"ជនជាតិ​ចិន​សំបូរ​រឿងអាស្រូវ​ច្រើនជាង​គេ ក្នុង​ចំណោម​ជនបរទេស​ដែល​ចូល​មក​កម្ពុជា"

ដោយ សន ចាន់រដ្ឋា
2019-01-17
អ៊ីម៉ែល
មតិ
Share
បោះពុម្ព
ជនជាតិ​ចិន ដែល​ត្រូវ​ប៉ូលិស​នៃ​អគ្គស្នងការដ្ឋាន​នគរបាល​ជាតិ សហការ​ជាមួយ​ប៉ូលិស​ចិន ឡោមព័ទ្ធ​ចាប់​នៅ​ក្នុង​អគារ​កាស៊ីណូ​ហ្គោលឌិន ក្រោន (Golden Grown) នៅ​រសៀល​ថ្ងៃ​ទី​២ ខែ​មីនា ឆ្នាំ​២០១៦។
ជនជាតិ​ចិន ដែល​ត្រូវ​ប៉ូលិស​នៃ​អគ្គស្នងការដ្ឋាន​នគរបាល​ជាតិ សហការ​ជាមួយ​ប៉ូលិស​ចិន ឡោមព័ទ្ធ​ចាប់​នៅ​ក្នុង​អគារ​កាស៊ីណូ​ហ្គោលឌិន ក្រោន (Golden Grown) នៅ​រសៀល​ថ្ងៃ​ទី​២ ខែ​មីនា ឆ្នាំ​២០១៦។
RFA/Hum Chamroeun

មន្ត្រី​សង្គម​ស៊ីវិល​នៅ​ខេត្ត​បន្ទាយមានជ័យ សង្កេត​ឃើញ​ថា ជនជាតិ​ចិន ដែល​ចូល​មក​កម្សាន្ត និង​រកស៊ី​នៅ​កម្ពុជា សំបូរ​ទៅ​ដោយ​រឿងអាស្រូវ ច្រើនជាង​បណ្ដា​ជន​ជាតិ​ផ្សេងៗ​ទៀត ដែល​ចូល​មក​រស់នៅ និង​រកស៊ី​នៅ​កម្ពុជា​ដូចគ្នា​នេះ។ ការ​លើកឡើង​នេះ​បន្ទាប់​ពី អាជ្ញាធរ​ចម្រុះ​ក្នុង​ខេត្ត​បន្ទាយមានជ័យ ធ្វើការ​ឃាត់ខ្លួន​ជនជាតិ​ចិន​ជា​ថ្មី​ទៀត ដែល​បើក​ការ​រកស៊ី​ល្បែង​ខុសច្បាប់​តាម​ប្រព័ន្ធ​អ៊ីនធឺណិត។

មន្ត្រី​សម្របសម្រួល​នៃ​សមាគម​អាដហុក (Adhoc) ប្រចាំ​ខេត្ត​បន្ទាយមានជ័យ លោក ស៊ុំ ច័ន្ទគា បាន​ថ្លែងប្រាប់​អាស៊ីសេរី​នៅ​ថ្ងៃទី១៦ ខែ​មករា ថា លោក​តែង​សង្កេត​ឃើញ​ថា ជនជាតិ​ចិន​តែង​ធ្វើ​សកម្មភាព​មួយ​ចំនួន ដែល​បង្ក​អោយ​ពលរដ្ឋ​ខ្មែរ នៅ​តំបន់​នោះ​មាន​ការ​មិន​ពេញចិត្ត ដូចជា​ការ​ប្រើ​អំពើ​ហិង្សា ការ​ចាប់​ជំរិត ការប្រើប្រាស់​ស្លាក​សញ្ញា​អាជីវកម្ម​ដែល​មិន​មាន​អក្សរ​ខ្មែរ និង​ប្រព្រឹត្តិ​បទល្មើស​តាម​ប្រព័ន្ធ​អ៊ីនធឺណិត​ជាដើម។

កាលពី​ថ្ងៃទី១៦ ខែ​មករា អាជ្ញាធរ​ចម្រុះ​របប​ក្រុងភ្នំពេញ​បាន​ឃាត់ខ្លួន​ជនជាតិ​ចិន​ចំនួន ១៥​នាក់ ដែល​បាន​ជួល​វីឡា​មួយ​កន្លែង នៅ​ក្នុង​ខេត្ត​បន្ទាយមានជ័យ បើក​បន​ល្បែង​តាម​ប្រព័ន្ធ​អ៊ីនធឺណិត​។ បន្ទាប់ពី​សមត្ថកិច្ច​បា​ន​ឆែកឆេរ ទើប​រក​ឃើញ​ថា ជនជាតិ​ចិន​ទាំង ១៥ នាក់​នេះ ឆ្លងដែន​មក​ធ្វើការ​រកស៊ី​នៅ​ប្រទេស​កម្ពុជា ដោយ​មិន​មាន​ប័ណ្ណ​ការងារ​នោះ​ទេ។

សមត្ថកិច្ច​ក៏បាន​បញ្ជូន​ជនជាតិ​ចិន​ទាំង ១៥ នាក់​នេះ ទៅ​ស្នងការដ្ឋាន​នគរបាល​ខេត្ត​បន្ទាយមានជ័យ ដើម្បី​ធ្វើការ​សាកសួរ និង​បន្ត​នីតិវិធី ទៅ​តាម​ផ្លូវច្បាប់។

លោក ស៊ុំ ច័ន្ទគា លើកឡើង​ថា នេះ​មិនមែន​ជា​លើកទីមួយ​ទេ ដែល​កើតមាន​ករណី​បែប​នេះ នៅ​ក្រុង​ប៉ោយប៉ែត ខេត្ត​បន្ទាយមានជ័យ​នោះ។ លោក​ថា​កន្លងមក អាជ្ញាធរ​តែង​បង្ក្រាប​បទល្មើស​តាម​ប្រព័ន្ធ​អ៊ីនធឺណិត​ដែល​បង្ក​ដោយ​ជនជាតិ​ចិន​ជា​ហូរហែ ប៉ុន្តែ​ករណី​នេះ​នៅតែ​បន្ត​កើតមាន​ម្ដង​ហើយ​ម្តង​ទៀត។

លោក​យល់ថា ជនជាតិ​ចិន​អាច​បន្ត​ប្រើប្រាស់​ទឹកដី​កម្ពុជា ដើម្បី​ប្រព្រឹត្តិ​បទល្មើស​ទៅ​បាន​នេះ ដោយសារតែ​ការអនុវត្ត​ច្បាប់​នៅ​មាន​ភាព​ធូររលុង និង​អាច​មក​ពី​មាន​មន្ត្រី​មានអំណាច​មួយ​ចំនួន​នៅ​ពីក្រោយ​ការ​រកស៊ី​នេះ​ផង​ដែរ៖ «ប្រទេស​កម្ពុជា​យើង​ខ្សោយ​ជាងគេ ប្រសិន​បើជា​គេ (​ជនជាតិ​ចិន​) អាច​ធ្វើ​បាន រកស៊ី​អនឡាញ​អ៊ីចឹង​បាន​នៅ​ប្រទេស​ចិន គេ​អាច​ធ្វើ​កើត​ហើយ ប៉ុន្តែ​ប្រទេស​គេ គេ​រឹត​បន្តឹង។ ហើយ​មាន​មន្ត្រី​គ្រាក់ៗ​នៅ​ពីក្រោយ​ជួយ​បើក ជួយ​សម្រួល​ដល់​ការ​បង្កើត​អនឡាញ​ហ្នឹង ប៉ុន្តែ​ខ្លួន​អត់​ដឹង​ថា ការ​បង្កើត​អនឡាញ​ហ្នឹង​ប៉ះពាល់​អ្វីខ្លះ ផ្នែក​ខាង​សេដ្ឋកិច្ច សន្តិសុខ សណ្ដាប់ធ្នាប់ និង​បូរណភាព​ទឹកដី​របស់​កម្ពុជា​យើង​អត់​ដឹង​ទេ ដឹង​តែ​ថា គេ​ឱ្យ​លុយ​មក គេ​ទាក់ទង​ខ្លួន​មក ខ្លួន​ជួយ​សម្រួល​រត់ការ​ធ្វើ​ម៉េច​ឱ្យ​បាន​បើក​អ៊ីចឹង​ទៅ ពេលខ្លះ​ធ្វើជា​ខ្នង ធ្វើជា​ខែល​ជួយ​ដល់​ជន​ជាតិ​ចិន​ទាំងអស់​នោះ​ទៀត​ផង»

លោក ស៊ុំ ច័ន្ទគា ក៏​សង្កេត​ឃើញ​ថា បន្ទាប់ពី​ជនជាតិ​ចិន​បាន​បង្ក​អសន្តិសុខ​ជា​ហូរហែ​មក ពលរដ្ឋ​នៅ​ក្នុង​ក្រុង​ប៉ោយប៉ែត ខេត្ត​បន្ទាយមានជ័យ ហាក់​មានការ​ខ្លាច​រអា នៅ​ក្នុង​ការ​ធ្វើដំណើរ​ពេលយប់ ដោយសារ​បារម្ភ​អំពី​បញ្ហា​សន្តិសុខ​ផ្ទាល់ខ្លួន៖ «អត់​ចង់​ហ៊ាន​ដើរ អត់​ចង់​ហ៊ាន​ចេញ​ដើរ​ទៅ​ណា មក​ណា អត់​ដូច​កាល​លើក​មុន​ទេ ព្រោះ​ព្រួយ ព្រោះ​ភ័យខ្លាច​ជនជាតិ​ចិន​ហ្នឹង ព្រោះ​ពួកគាត់​មក​ជា​ក្រុម មើល​ទៅ​ហាក់​ដូច​មានអំណាច​ខ្លាំង​ណាស់ គាត់​មក​នៅ​ហើយ គាត់​យក​ក្បាច់​គុណ យក​កម្លាំង​របស់​គាត់​ហ្នឹង គឺ​យក​មក​បង្ហាញ​ស្នាដៃ​នៅ​ស្រុក​ខ្មែរ​ហ្មង»

របាយការណ៍​របស់​ក្រសួងមហាផ្ទៃ​ឱ្យ​ដឹង​ថា ជនជាតិ​ចិន ដែល​បាន​ចូល​មក​ស្នាក់នៅ​ក្នុង​ប្រទេស​កម្ពុជា មាន​ដល់​ទៅ​ជាង​ម្ភៃ​មួយ​ម៉ឺន​នាក់ ហើយ​ក្នុង​នេះ​មានតែ​ជាង​ពីរ​ម៉ឺន​នាក់​ប៉ុណ្ណោះ ដែល​មាន​ប័ណ្ណ​ការងារ​ត្រឹមត្រូវ។ ចំណែក​របាយការណ៍​ប៉ូលិស​ក្រុង​ប៉ោយប៉ែត​ឲ្យ​ដឹង​ថា បច្ចុប្បន្ន​ចំនួន​ជនជាតិ​ចិន​រស់នៅ​ក្រុង​ប៉ោយប៉ែត​មាន​ប្រមាណ ២​ពាន់​នាក់ ក្នុង​នោះ​មាន​អ្នកធ្វើការ​នៅ​តាម​ក្រុមហ៊ុន និង​អ្នក​ធ្វើ​អាជីវកម្ម។ ប៉ុន្តែ​ប្រជាពលរដ្ឋ​នៅ​អះអាង​ថា ចំនួន​ជនជាតិ​ចិន​រស់នៅ​ក្រុង​មួយ​នេះ អាច​មាន​ចំនួន​ច្រើនជាង​នេះ។

នា​ពេល​ប៉ុន្មាន​ឆ្នាំ​មកនេះ គេ​តែង​សង្កេត​ឃើញ​ថា មាន​ភាព​អសន្តិសុខ​ដែល​បង្ក​ដោយ​ជនជាតិ​ចិន​ជា​ហូរហែ មិនមែន​កើតមានឡើង​តែ​នៅ​ក្នុង​ខេត្ត​បន្ទាយមានជ័យ​នោះ​ទេ ប៉ុន្តែ​គេ​សង្កេត​ឃើញ​ថា តែង​កើតមាន​ច្រើន​ជាពិសេស​នៅ​តំបន់​ទេសចរណ៍​ផ្សេងទៀត​ដូចជា​នៅ​ខេត្ត​ព្រះសីហនុ និង​ខេត្​សៀមរាប​ផង​ដែរ។

មន្ត្រី​ជាន់ខ្ពស់​ក្រសួងមហាផ្ទៃ​លោក សុខ ផល បាន​អះអាង​នៅ​ក្នុង​ពិធី​សំណេះសំណាល​ជាមួយ​នគរបាល​ជាន់ខ្ពស់​នៅ​ក្រសួងមហាផ្ទៃ កាល​ពី​ដើម​ឆ្នាំ២០១៨ ថា​នឹង​បង្ក្រាប​រាល់​ជនជាតិ​ចិន​ទាំងឡាយ​ណា ដែល​ប្រព្រឹត្តិ​ខុសច្បាប់​ជា​ដាច់ខាត។

ទោះ​យ៉ាងណា មន្ត្រី​សង្គម​ស៊ីវិល​ចង់​ឃើញ​ប្រមុខ​រដ្ឋាភិបាល យក​បញ្ហា​ជនជាតិ​ចិន​នេះ​ទៅ​ធ្វើ​ការ​ថ្លឹងថ្លែង ដើម្បី​ធ្វើ​យ៉ាង​រក្សា​សង្គម​កម្ពុជា​មាន​សន្តិសុខ សណ្ដាប់ធ្នាប់ និង​របៀបរៀបរយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល