ឆ្លើយតបនឹងសំណួររបស់អាស៊ីសេរី ថាតើអំពីទំព័រហ្វេសប៊ុក (Facebook) របស់លោក ហ៊ុន សែន ពិតជាត្រូវបានជនអនាមិក ឬក្រុមចោរព័ត៌មានវិទ្យា (Hackers) លួចយកទៅកាន់កាប់ជាបណ្ដោះអាសន្ន កាលពីថ្ងៃទី២៥ កុម្ភៈ មែនឬយ៉ាងណានោះ ក្រុមហ៊ុនហ្វេសប៊ុក ឆ្លើយបញ្ជាក់មកអាស៊ីសេរីនៅថ្ងៃ២៨ កុម្ភៈ នេះថា ទំព័រហ្វេសប៊ុករបស់លោក ហ៊ុន សែន ពិតជាមានគេចូលលួចកាន់កាប់មែន។ មន្ត្រីព័ត៌មានរបស់ក្រុមហ៊ុនហ្វេសប៊ុក បានបញ្ជាក់ថា ក្រុមហ៊ុន Facebook ក៏បានធ្វើការជាមួយក្រុមការងារគ្រប់គ្រងទំព័រហ្វេសប៊ុកផ្លូវការរបស់លោក ហ៊ុន សែន ដើម្បីជួយពួកគេឱ្យមានលទ្ធភាពអាចមកគ្រប់គ្រងទំព័រហ្វេសប៊ុករបស់លោក ហ៊ុន សែន ឡើងវិញបានដោយជោគជ័យ។ ការបញ្ជាក់ពីក្រុមហ៊ុនហ្វេសប៊ុក នេះ គឺជាការបញ្ចប់ក្ដីមន្ទិលមួយចំនួនពីសំណាក់ក្រុមអ្នកប្រើប្រាស់បណ្ដាញសង្គមដែលសង្ស័យថា ករណីលោក ហ៊ុន សែន ប្រកាសថា ទំព័រហ្វេសប៊ុកផ្លូវការរបស់លោក ត្រូវជនអនាមិកលួចដណ្ដើមយកទៅគ្រប់គ្រងនេះ គឺជាការប្រឌិតរបស់លោក ហ៊ុន សែន។
កាលពីថ្ងៃទី២៥ កុម្ភៈ ទំព័រហ្វេសប៊ុករបស់លោក ហ៊ុន សែន បានចុះផ្សាយសារព្រមានគួរឱ្យភ្ញាក់ផ្អើលមួយ ក្នុងអត្ថន័យដែលលោក ហ៊ុន សែន ជាអ្នកសរសេរខ្លួនឯងថា ក្រុមហ៊ុនហ្វេសប៊ុក បានលុប និងព្យាយាមបិទគណនីរបស់ខ្ញុំ។ តែខ្ញុំ ហ៊ុន សែន សូមប្រាប់ទៅវិញថា បើអ្នកឯងហ៊ានបិទហ្វេសប៊ុករបស់ខ្ញុំ ខ្ញុំនឹងបិទលែងឱ្យប្រើហ្វេសប៊ុកនៅស្រុកខ្មែរ។ សារព្រមានបិទហ្វេសប៊ុកនៅកម្ពុជាទាំងមូលនេះ រងការរិះគន់យ៉ាងខ្លាំងពីសំណាក់ក្រុមអ្នកប្រើប្រាស់បណ្ដាញសង្គម តែក្រោយមកត្រូវលោក ហ៊ុន សែន បដិសេធចោលទាំងស្រុង ដោយអះអាងថា ហ្វេសប៊ុករបស់លោកត្រូវបានជនអនាមិកលួចយកទៅគ្រប់គ្រង។
កន្លងមកលោក ហ៊ុន សែន ធ្លាប់បានព្រមានជាសាធារណៈថា អាជ្ញាធររបស់លោក មានសមត្ថភាពអាចវែកមុខចាប់សកម្មជនបក្សប្រឆាំងដែលហ៊ានបញ្ចេញមតិ ក្នុងន័យប្រមាថរបបរបស់លោក ក្នុងរយៈពេលមិនដល់ ៧នាទីផង។ ក៏ប៉ុន្តែ ក្រោយពីហ្វេសប៊ុក របស់លោក មានការលួចយកទៅគ្រប់គ្រងអស់ពីរលើករួចមកហើយនេះ របបលោក ហ៊ុន សែន មិនដែលវែកមុខចាប់ជនប្រព្រឹត្តិបាននៅឡើយទេ គិតមកទល់ពេលនេះ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។