មន្ត្រីជាន់ខ្ពស់នៃក្រសួងមហាផ្ទៃ ថា លោកកំពុងបារម្ភចំពោះវត្តមានដ៏ច្រើនលើសលប់នៃជនជាតិចិន ខេត្តព្រះសីហនុ។ ចំណែកពលរដ្ឋ និងអ្នកស្រាវជ្រាវស្នើសុំឲ្យមានការត្រួតពិនិត្យទៅលើជនជាតិចិន ទាំងនោះឲ្យបានត្រឹមត្រូវតាមផ្លូវច្បាប់ ខណៈជនជាតិចិន ទាំងនោះកំពុងបង្កបញ្ហាជាញឹកញាប់នៅខេត្តព្រះសីហនុ។
រដ្ឋលេខាធិការនៃក្រសួងមហាផ្ទៃ ទទួលបន្ទុកផ្នែកជនអន្តោប្រវេសន៍ លោក អ៊ុក គឹមលេខ និយាយថា បច្ចុប្បន្ននេះកម្ពុជា មិនបារម្ភនឹងជនជាតិវៀតណាមទេ ប៉ុន្តែបារម្ភពីជនជាតិចិន ទៅវិញ ព្រោះឥឡូវនេះ ចិនច្រើនណាស់ចូលមករកស៊ីនៅកម្ពុជា ពិសេសនៅខេត្តព្រះសីហនុ។
ការថ្លែងបែបនេះរបស់មន្ត្រីជាន់ខ្ពស់ក្រសួងមហាផ្ទៃ ត្រូវបានសារព័ត៌មានក្នុងស្រុកយកមកចុះផ្សាយកាលពីថ្ងៃទី៥ ខែមករា ខណៈលោកចូលរួមក្នុងពិធីសម្ពោធបើកបឋមសិលាសាងសង់អគារសាលាឃុំជ្រៃ ស្រុកថ្មគោល ខេត្តបាត់ដំបង។ មន្ត្រីជាន់ខ្ពស់ក្រសួងមហាផ្ទៃ រូបនេះត្អូញត្អែរទៀតថា ពេលនេះនៅខេត្តព្រះសីហនុ រកផ្លូវដើរមិនបានទេ សុទ្ធតែចិន។
ទាក់ទងចំនួនដ៏ច្រើននៃជនជាតិចិន ក្នុងខេត្តព្រះសីហនុនេះ ម្ចាស់ផ្ទះសំណាក់នៅខេត្តព្រះសីហនុ ម្នាក់ លោក សុជៈ ឌិន ប្រាប់អាស៊ីសេរី ថា វត្តមានជនជាតិធ្វើឲ្យប៉ះពាល់ដល់ការរកស៊ីរបស់លោក។ លោករៀបរាប់ថា ជនជាតិចិន ដែលមករកស៊ីនៅខេត្តព្រះសីហនុ ពួកគេមកជាក្រុម ដោយទាំងអ្នកបើកសណ្ឋាគារ ភោជនីយដ្ឋាន កាស៊ីណូ ហាងទំនិញ និងសេវាកម្មផ្សេងៗទៀត។ លោកឲ្យដឹងទៀតថា ខណៈមានជនជាតិចិន ច្រើនបែបនេះធ្វើឲ្យភ្ញៀវអឺរ៉ុប ដែលទៅរកស៊ីនៅខេត្តព្រះសីហនុ ធ្លាក់ចុះ៖ «»។
ជាមួយនឹងការត្អូញត្អែរនេះ លោក សុជៈ ឌិន ក៏បានអំពាវនាវទៅអាជ្ញាធរខេត្តធ្វើយ៉ាងណាឲ្យជនជាតិចិន ដែលចូលទៅរកស៊ីនៅខេត្តព្រះសីហនុ ត្រូវគោរពច្បាប់ចរាចរណ៍ និងច្បាប់របស់ប្រទេសកម្ពុជា ឲ្យបានខ្ជាប់ខ្ជួន។
ទន្ទឹមគ្នានេះដែរ អ្នកសិក្សាការអភិវឌ្ឍសង្គម លោកបណ្ឌិត មាស នី មានប្រសាសន៍ថា កំណើនជនជាតិចិន នៅខេត្តព្រះសីហនុ គឺជាបញ្ហាដែលរាជរដ្ឋាភិបាលត្រូវយកចិត្តទុកដាក់ឲ្យបានម៉ត់ចត់។ លោកព្រមានថា ការអនុវត្តច្បាប់អន្តោប្រវេសន៍ធូររលុងនឹងបង្កមហន្តរាយដល់ពលរដ្ឋនៅក្នុងខេត្តនេះ រួមទាំងទំនាក់ទំនងការទូតរវាងប្រទេសទាំងពីរនៅថ្ងៃណាមួយជាក់ជាមិនខាន៖ «»។
លោកបណ្ឌិតលើកឧទាហរណ៍ជាក់ស្ដែងដែលធ្លាប់កើតនៅប្រទេសវៀតណាម កាលពីប៉ុន្មានឆ្នាំថា ធ្លាប់មានករណីហិង្សារវាងពលរដ្ឋវៀតណាម និងជនជាតិចិន ដែលទៅរកស៊ីនៅប្រទេសវៀតណាម។ លោកព្រួយបារម្ភថា ករណីនេះអាចនឹងកើតមាននៅទឹកដីខេត្តព្រះសីហនុ ដែរ បើរដ្ឋាភិបាលព្រងើយកន្តើយនឹងវត្តមានជនជាតិនៅពេលនេះ។
ខណៈរដ្ឋាភិបាលលោក ហ៊ុន សែន មានទំនាក់ទំនងល្អជាមួយប្រទេសចិន ជនជាតិចិន រាប់ម៉ឺននាក់នាំគ្នាទៅរកស៊ីសេរីនៅខេត្តព្រះសីហនុ ដែលជាទឹកដីសេដ្ឋកិច្ច និងជាកំពង់ផែដ៏សំខាន់ប្រចាំប្រទេស។ ជាញឹកញាប់ជនជាតិចិន នៅខេត្តព្រះសីហនុ តែងតែបង្កភាពអនាធិបតេយ្យ ដូចជាចាប់ជំរិតតាមប្រព័ន្ធអ៊ិនធឺណិត បង្កគ្រោះថ្នាក់ចរាចរណ៍ និងហិង្សាជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។