អាជ្ញាធរថៃមិនទាន់បញ្ជូនមន្ត្រីយោធាកម្ពុជាដែលបើកឡានចូលប្រទេសថៃខុសច្បាប់កាលពីព្រលប់ថ្ងៃទី៥ ខែវិច្ឆិកា ត្រង់ចំណុចព្រំដែនអន្តរជាតិស្រុកសំពៅលូន ខេត្តបាត់ដំបង មកកម្ពុជាវិញនោះទេ។ តុលាការថៃនឹងកាត់ទោសនាយទាហានខ្មែរស័ក្ដិ៥នោះតាមបទចោទ៤ករណី ដែលប៉ូលិសព្រំដែនថៃបានចោទប្រកាន់ ហើយត្រូវអនុវត្តទោសនៅប្រទេសថៃគ្រប់ពេលកំណត់ទើបបញ្ជូនទៅខ្មែរវិញ។
ប៉ូលិសថៃមិនទាន់អនុញ្ញាតឲ្យលោកវរសេនីយ៍ឯក សុខ បានផល ត្រឡប់ទៅកម្ពុជាវិញទេទោះជាមានការសុំអន្តរាគមន៍ពីភាគីកម្ពុជាឲ្យនាយទាហានរូបនេះមកទទួលពិន័យនៅកម្ពុជាវិញក៏ដោយ។ ប្រទេសថៃនៅតែទាមទារដាក់ទោសជនល្មើសដើម្បីអនុវត្តច្បាប់និងការពារអធិបតេយ្យរបស់ខ្លួនដោយមិនព្រមដោះលែងអ្នកដែលបានបំពានមកលើទឹកដីខ្លួនលុះត្រាតែជនល្មើសនោះអនុវត្តទោសគ្រប់ចំនួនទើបដោះលែង។
សារព័ត៌មានថៃ ថៃរ៉ាត់ (Thai Rath) ឲ្យដឹងថា លោកវរសេនីយ៍ឯក សុខ បានផល ជានាយទាហានស័ក្ដិ៥នៃអគ្គលេខាធិការដ្ឋានក្រសួងការពារជាតិកម្ពុជាមានបញ្ហាក្នុងគ្រួសារដោយប្រពន្ធសុំលែងលះហើយខូចចិត្តទើបផឹកស្រាស្រវឹងបើកឡានចូលមកប្រទេសថៃកាលពីព្រលប់ថ្ងៃទី៥ ខែវិច្ឆិកា តាមច្រកព្រំដែនអន្តរជាតិភូមិខាវឌិន (Khao Din) ស្រុកខ្លងហាត (Klong Hat) ជាប់ព្រំដែនស្រុកសំពៅលូនខេត្តបាត់ដំបង។ នាយទាហានរូបនេះមិនបានឆ្លងកាត់ការត្រួតពិនិត្យពីប៉ូលិសព្រំដែនថៃទេហើយបើកឡានសម្រុកចូលមកដីថៃក្នុងល្បឿនលឿនតែកងរាជអាវុធហត្ថថៃប្រចាំព្រំដែនថៃបានដេញតាមឃាត់រថយន្តនេះអស់រយៈពេល១៧ម៉ោងទើបបាញ់ទម្លុះកង់ក្រោយហើយក៏ឃាត់ឡាននោះបាន។ទាហានខ្មែររូបនេះសម្ងំក្នុងឡានអស់រយៈពេល២៤ម៉ោងទើបចេញពីឡានហើយកាន់កាំភ្លើងដើររេរាដោយបើកកៃកាំភ្លើងរួចជាស្រេចនៅម្ដុំផ្លូវបែកជាបួនក្នុងស្រុកវាត់ថៈណាណៈខន (Watthana Nakhon) ខេត្តស្រះកែវ (Sarak Keo)។ ក្នុងការបង្ក្រាបនោះពុំមាននរណាម្នាក់រងរបួសឡើយ។
អ្នកសារព័ត៌មានថៃម្នាក់នៅខេត្តស្រះកែវនិយាយសូមមិនបញ្ចេញឈ្មោះនិងសំឡេងប្រាប់វិទ្យុអាស៊ីសេរី នៅព្រឹកថ្ងៃទី១៤ ខែវិច្ឆិកា ថា នាយទាហានខ្មែរស័ក្ដិ៥នោះកំពុងជាប់ពន្ធនាគារនៅស្នងការដ្ឋាននគរបាលស្រុកវាត់ថៈណាណៈខន (Watthana Nakhon) ខេត្តស្រះកែវ (Sarak Keo) ហើយរង់ចាំតុលាការកាត់ទោស តែមិនទាន់ដឹងថា កាត់ទោសនៅថ្ងៃណានោះទេ។ អ្នកសារព័ត៌មានថៃរូបនេះបន្តថាមានខាងសាច់ញាតិជនល្មើសនិងយោធាកម្ពុជាបានមកស្នើសុំឲ្យជនជាប់ចោទទៅទទួលទោសនៅកម្ពុជាដែរតែអាជ្ញាធរថៃមិនអនុញ្ញាត។
អគ្គមេបញ្ជាការរងកងយោធពលខេមរភូមិន្ទលោក សៅ សុខា ប្រាប់វិទ្យុអាស៊ីសេរី នៅថ្ងៃទី១៣ ខែវិច្ឆិកា ថា លោកនៅមិនទាន់ដឹងច្បាស់រឿងដែលតុលាការថៃកាត់ទោសនាយទាហានខ្មែរដែលបើកឡានចូលស្រុកគេខុសច្បាប់នោះទេ។ លោកបន្តថា ច្បាប់កងទ័ពរបស់កម្ពុជានឹងដាក់ទោសទៅលើមន្ត្រីយោធាណាដែលប្រព្រឹត្តល្មើសវិន័យទាហានតាមកម្រិតទោសដែលយោធារូបនោះធ្វើខុស៖
«អាហ្នឹងគឺខ្ញុំអត់ឆ្លើយបានណាព្រោះវាមិនមែនជាតួនាទីភារកិច្ចរបស់ខ្ញុំដល់អ៊ីចឹងទៅខ្ញុំអត់ឆ្លើយបានទេហើយការងារនេះគឺក្រសួងការពារជាតិឬអគ្គបញ្ជាការឬក៏មេបញ្ជាការប្រភេទទ័ពហ្នឹងបាទបានលោកឆ្លើយបាន។ប៉ុន្តែអ្វីដែលខ្ញុំអាចដឹងបានគឺកងទ័ពគឺទាំងអស់ត្រូវតែគោរពទៅតាមច្បាប់លក្ខន្តិកៈដែលជាច្បាប់គ្រប់គ្រងលើកងទ័ពដូច្នេះកងទ័ពណាដែលប្រព្រឹត្តបទល្មើសត្រង់កន្លែងក្នុងក្របខ័ណ្ឌវិន័យយោធាគឺត្រូវបានអនុវត្តទៅតាមច្បាប់លក្ខន្តិកៈហ្នុងបាទ»។
ជុំវិញរឿងនេះមន្ត្រីសម្របសម្រួលអង្គការលីកាដូប្រចាំខេត្តបាត់ដំបងលោក អ៊ិន គង់ជិត លើកឡើងថាប្រទេសថៃអនុវត្តច្បាប់តាមប្រទេសរបស់គេដោយឲ្យបុគ្គលដែលប្រព្រឹត្តល្មើសក្នុងស្រុកថៃទទួលទោសគ្រប់ចំនួនសិនទើបគេបណ្ដេញចេញពីប្រទេស។ លោកបន្តថាបើយោងតាមនីតិវិធីកម្ពុជាអាចសុំអាជ្ញាធរថៃទទួលយកជនល្មើសមកផ្ដន្ទាទោសនៅកម្ពុជាបានតែត្រង់ថៃអនុញ្ញាតឬមិនអនុញ្ញាតនោះជារឿងមួយផ្សេង។លោកយល់ថា មន្ត្រីយោធាខ្មែរ ដែលប្រើឫកពាមិនសមរម្យក្នុងប្រទេសគេអាចធ្វើឲ្យអាម៉ាស់ដល់មន្ត្រីរាជការដែលគោរពច្បាប់ត្រឹមត្រូវ៖
«ទីបញ្ជាការដ្ឋានកងរាជអាវុធហត្ថលើផ្ទៃប្រទេសមិនសូវអនុវត្តតឹងរ៉ឹងដោយមានការយោគយល់អ៊ីចឹងទៅណា។ប៉ុន្តែនៅស្រុកគេគឺគេមិនយោគយល់ទេមន្ត្រីមានបុណ្យស័ក្ដិឋានន្តរស័ក្ដិកម្រិតណាក៏ដោយមានតួនាទីខ្ពង់ខ្ពស់យ៉ាងណាក៏ដោយកាលណាបើអនុវត្តខុសច្បាប់គឺនៅស្រុកគេគេអនុវត្តហើយ។ដោយឡែកនៅស្រុកខ្មែរយើងតែងតែមានការយោគយល់អនុគ្រោះឬក៏បិទភ្នែកបិទអីអ៊ីចឹងធ្វើឲ្យមន្ត្រីខិលខូចខ្លះគាត់អាងយ៉ាងអ៊ីចឹងនៅពេលគាត់ទៅស្រុកគេគាត់ប៉ើងទ្រូងដាក់សមត្ថកិច្ចស្រុកគេគាត់ត្រូវទទួលវិធានការច្បាប់បែបហ្នឹង»។
នេះជាលើកដំបូងហើយដែលមានមន្ត្រីយោធាខ្មែរបើកឡានចូលប្រទេសថៃខុសច្បាប់ដោយមិនឆ្លងកាត់ការត្រួតពិនិត្យរបស់មន្ត្រីយាមព្រំដែនថៃហើយថែមទាំងកាន់អាវុធនៅក្នុងទីសាធារណៈដោយគ្មានការអនុញ្ញាតនៅក្នុងប្រទេសថៃទៀតផង។
អាជ្ញាធរប្រទេសថៃបានចោទប្រកាន់លើលោកវរសេនីយ៍ឯក សុខ បានផល ក្នុងបទចោទ៤ករណីគឺទី១ចូលទឹកដីថៃដោយខុសច្បាប់មិនព្រមឲ្យប៉ូលិសព្រំដែនឆែកឆេរ ទី២ នាំយានយន្តចូលប្រទេសថៃដោយគ្មានការអនុញ្ញាតពីមន្ត្រីគយ ទី៣ កាន់អាវុធខុសច្បាប់ក្នុងទីប្រជុំជននិងទី៤ប្រឆាំងនឹងកិច្ចប្រតិបត្តិការរបស់ប៉ូលិសថៃ។ តុលាការថៃនឹងកាត់ទៅមន្ត្រីយោធាខ្មែររូបនោះ នៅថ្ងៃក្រោយតាមបទចោទទាំង៤ តែនៅមិនទាន់កំណត់ថ្ងៃឲ្យច្បាស់លាស់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។