សមត្ថកិច្ច​ខេត្ត​ព្រះសីហនុ​កំពុង​ប្រឹងបង្ក្រាប​ទីតាំង​ឆបោក​តាម​អនឡាញ តែ​ក្រុមហ៊ុន​កាន់​តែ​ជ្រើសរើស​បុគ្គលិក​ថ្មី

ដោយ យ៉ង ចាន់តារា
2024.03.27
សមត្ថកិច្ច​ខេត្ត​ព្រះសីហនុ​កំពុង​ប្រឹងបង្ក្រាប​ទីតាំង​ឆបោក​តាម​អនឡាញ តែ​ក្រុមហ៊ុន​កាន់​តែ​ជ្រើសរើស​បុគ្គលិក​ថ្មី សកម្មភាព​សមត្ថកិច្ច​ខេត្ត​ព្រះសីហនុ​បង្ក្រាបបទល្មេីសឆបោកតាមប្រព័ន្ធអនឡាញ (scammed online)​ នៅខេត្តព្រះសីហនុ នៅទីតាំង​ភូមិ​២​ សង្កាត់៤​ ក្រុងព្រះសីហនុ​ កាលពីថ្ងៃទី១០ ខែ​មីនា ២០២៤។
រូប៖ ហ្វេសប៊ុកស្នងការខេត្ត​ព្រះសីហនុ

បញ្ហា​ឆបោក​តាម​អន​ឡាញ (Scammed Online) កំពុង​បន្ត​កើត​មាននៅ​កម្ពុជា ជាពិសេស​ក្នុង​ខេត្ត​ព្រះសីហនុ ហើយ​រដ្ឋាភិបាល​នៅតែ​មិនអាច​ដោះស្រាយ​បញ្ហា​នេះ​ឱ្យ​មាន​ប្រសិទ្ធភាព​។ បុគ្គលិក​កំពុង​ធ្វើការ​ឱ្យ​ក្រុមហ៊ុន​អនឡាញ​ទម្លាយ​ថា សមត្ថកិច្ច​មិន​ហ៊ាន​បង្ក្រាប​មេខ្លោង​ធំៗ ​ទេ ដោយសារតែ​ខ្លាច​ប៉ះពាល់​ផលប្រយោជន៍ និង​បណ្ដែតបណ្ដោយ​ឱ្យ​ក្រុមហ៊ុន​មួយ​ចំនួន​ដំណើរការ​ដោយ​សេរី។

ពលរដ្ឋ​ខ្មែរ​មួយចំនួន​ ដែល​កំពុង​បម្រើ​ការងារ​ផ្នែក​អនឡាញ​ក្នុង​ខេត្ត​ព្រះសីហនុ​បាន​វិល​ត្រឡប់​ទៅ​ស្រុក​កំណើត​វិញ​ជា​បន្តបន្ទាប់ ក្រោយពី​ពួកគាត់​ដឹង​ថា សមត្ថកិច្ច​បាន​បើក​យុទ្ធនាការ​ចុះ​បង្ក្រាប​ទីតាំង​អគារ​ឆបោក​អនឡាញ (Online) សាជាថ្មី​ទៀត​ចាប់​តាំង​ពី​ពាក់​កណ្ដាល​ខែ​កុម្ភៈ​មក។

បុគ្គលិក​កំពុង​បម្រើ​ការងារ​អនឡាញ (Online) នៅ​ក្រុមហ៊ុន​ចិន ​តំបន់​អគារ​ឆាយណាថោន (China Town) ក្នុង​ខេត្ត​ព្រះសីហនុ​ថ្លែង​សុំ​មិន​បញ្ចេញ​ឈ្មោះ ព្រោះ​ព្រួយបារម្ភ​ពី​សុវត្ថិភាព​បាន​រៀបរាប់​ប្រាប់​វិទ្យុ​អាស៊ីសេរី​ថា ការងារ​តាម​អន​ឡាញ​មាន​ច្រើន​ទម្រង់​ដូចជា បុគ្គលិក​ល្បួង​ភ្ញៀវ​ចាក់​ល្បែង​តាម​វេបសាយ (Website) ដែល​ប្រភេទ​ការងារ​នេះ​ថៅកែ​ជនជាតិ​ចិន​តែងតែ​បង់លុយ​ដល់​សមត្ថកិច្ច​មូលដ្ឋាន ដើម្បី​កុំឱ្យ​បង្ក្រាប​ទីតាំង​ពួកគេ​។ ដោយឡែក ​ប្រភេទ​ការងារ​អនឡាញ​មួយ​ប្រភេទ​ទៀត គឺ​ការ​ល្បួង​ភ្ញៀវ​ឱ្យ​ដាក់​លុយ​វិនិយោគ និង​ទិញ​ទំនិញ​ខ្យល់​ជាដើម។

បុគ្គលិក​រូប​នេះបញ្ជាក់​ថា អគារ​ក្នុង​តំបន់​អគារ​ឆាយណាថោន ភាគច្រើន​នៅ​ខាងមុខ​នៃ​អគារ​មាន​សភាព​ចាស់​ទ្រុឌទ្រោម ប៉ុន្តែ​ខាងក្នុង​បំពាក់​ដោយ​គ្រឿង​ទំនើបៗ និង​ផ្ទុក​សម្ភារៈ​កុំព្យូទ័រ​ជាច្រើន​គ្រឿង ហើយ​ក្នុង​មួយ​អគារ​មាន​បុគ្គលិក​ខ្មែរ និង​ជនបរទេស​រាប់​រយ​នាក់​។ បុគ្គលិក​រូប​នេះ ទម្លាយ​ឱ្យ​ដឹង​ទៀត​ថា ក្រៅពី​បុគ្គលិក​ជនជាតិ​ចិន និង​បរទេស​មួយចំនួន​ ដែល​មាន​ជម្លោះ​ទាស់ទែង​ជាមួយ​ថៅកែ ហើយ​ត្រូវ​បាន​គេ​យក​បង្ខាំង​ធ្វើ​ទារុណកម្ម ខាងក្នុង​អគារ​ដែល​បម្រើ​ការងារ​ផ្នែក​អនឡាញ​នោះ មាន​ថៅកែ និង​មេការ​ជាច្រើន​ទៀត​ ដែល​ភាគច្រើន​ជា​ជន​ជាតិចិន​ប្រើគ្រឿងញៀន​ដោយ​សេរី។

បុគ្គលិក​ថ្លែង​លាក់​ឈ្មោះ៖ «ពួក​ចិន​វា​ជក់​ខេ វា​លេង​ខេ (Ketamine) វា​យក​ចាន​ខេ​លេង​ក្នុង​ការិយាល័យ (Office) ធ្វើការ​ហ្នឹង វា​ដើរកាត់​ឱ្យ​យើង​ឃើញ​ហ្មង​។ ចិន​ប៉ុន្មាន​នាក់​គ្នា​វា​ហ្នឹង​។ ពេលធ្វើការ​ដំបូង​គេ​ឱ្យ​នៅ​ក្នុង​ការិយាល័យ (Office) រយៈពេល ១​ខែ ពេល​ចប់ ១​ខែ យើង​អាច​បើក​បន្ទប់​ដេក​ក្រៅ​អី​ក៏​បាន​ដែរ វា​ខ្លាច​យើង​ធ្វើការ​បានតែ​ដំបូង វា​ឃាំង​យើង​ តែ​បាយ​ទឹក​ក្នុង​ហ្នឹង​មួយ​ចប់​។ អនឡាញ​ឥឡូវ​ភាគច្រើន​គេ​អត់​សូវ​យក​ជនបរទេស​ទេ ភាគច្រើន​គេ​យក​ខ្មែរ ចិន​គ្នា​វា​។ ជនបរទេស​ភាគច្រើន​វា​ឈ្លោះ​គ្នា​ជាមួយ​ពួក​ចិន វា​ខឹង​មាន​ឃាំង​មិនមែន​ឃាំង​ទាំងអស់​វា​ខឹង​អ្នកណា វា​ឃាំង​អ្នក​ហ្នឹង វា​ខឹង​ចិន វា​ខឹង​យួន​ វា​ដាក់​យួន​មួយ​ដុំ​យួន​គ្នា​វា​ផ្សេង ហើយ​ខ្មែរ​ធ្វើការ​ធម្មតា វា​ធ្វើ​អ៊ីចឹង»

សមត្ថកិច្ច​ចម្រុះ​ខេត្ត​ព្រះសីហនុ​កាលពី​ថ្ងៃទី​៩ និង​ថ្ងៃទី​១០ ខែមីនា បាន​ចុះ​បង្ក្រាប​ទីតាំង​ឆបោក​តាម​អនឡាញ​ចំនួន ២​ទីតាំង​ផ្សេងគ្នា និង​បាន​ឃាត់ខ្លួន​ជនជាតិ​ចិន (China) ជនជាតិ​ចិនតៃវ៉ាន់ (Taiwan) វៀតណាម (Vietnam) ថៃ (Thailand) មីយ៉ាន់ម៉ា (Myanmar) និង​ជនជាតិ​ខ្មែរ​ជាង ៤០០​នាក់។

ក៏ប៉ុន្តែ ក្រុម​ជនល្មើស​ហាក់​មិន​ខ្លាចញញើត​ច្បាប់ ហើយ​ក្រុម​ថៅកែ​តែងតែ​បញ្ជា​ឱ្យ​បុគ្គលិក​ខ្មែរ​ប្រកាស​ស្វែងរក​បុគ្គលិក​ជា​បន្តបន្ទាប់ ដើម្បី​បម្រើការ​ឆបោក​តាម​អនឡាញ​នេះ។

បុគ្គលិក​ថ្លែង​លាក់​ឈ្មោះ៖ «បាទ​! សួស្ដី​បងប្អូន ថ្ងៃ​ហ្នឹង​មាន​ដំណឹង​ល្អ​គឺ​រើស​ច្រើន​ទីតាំង​មែនទែន អ៊ីចឹង​បងប្អូន​អាច​ជ្រើសរើស​ទីតាំង​បាន កន្លែង​ណា​ដែល​បងប្អូន​ចង់​មក​សម្ភាស។ សម្រាប់​ឥឡូវ​ហ្នឹង ដូច​ខ្ញុំ​បាន​ផុស​អ៊ីចឹង​គឺ​មាន ៣​ទីតាំង​អគារ​២ អគារ​៦ និង​អគារ​រ៉ូយ៉ាល់​យ៉ាងឡិក (Royal Yang Lek) សម្រាប់ ៣​ទីតាំង​ហ្នឹង​មិនបាច់​សួរ​ប្រាក់ខែ​ទេ ដូចគ្នា​ទាំងអស់​ប្រាក់ខែ ហើយ​ម៉ោង​ចេញចូល​សឹង​តែ​ដូចគ្នា»

ទាក់ទង​បញ្ហា​ឆបោក​តាម​អន​ឡាញ​នេះ កាលពី​ថ្ងៃទី​១០ ខែ​មីនា រដ្ឋលេខាធិការ​ក្រសួង​មហាផ្ទៃ និង​ជា​ប្រធាន​គណៈកម្មការ​ចំពោះ​កិច្ច​ ដើម្បី​ស្រាវជ្រាវ និង​ស៊ើបអង្កេត​គ្រប់​ល្បែងស៊ីសង​ខុសច្បាប់ លោក សុខ ផល ព្រមាន​ដល់​អ្នក​រកស៊ី​អាជីវកម្ម​ល្បែង​ឆបោក​តាម​អន​ឡាញ និង​បុគ្គលិក​ខ្មែរ​កំពុង​បម្រើការ ឱ្យ​បញ្ឈប់​ជាបន្ទាន់​ក្នុង​ការ​បន្ត​បើក​អាជីវកម្ម និង​ធ្វើ​ការងារ​លើ​វិស័យ​ល្បែង​ឆបោក​តាម​អនឡាញ។

លោក សុខ ផល៖ «គោលការណ៍​របស់​រាជ​រដ្ឋាភិបាល​ខិតខំ​បំបិទ​បំបាត់​ល្បែង​ខុសច្បាប់​នេះ ជាពិសេស​ លើក​ទឹកដី​ខេត្ត​ព្រះសីហនុ ដើម្បី​យក​ឱកាស​ឱ្យ​អាជ្ញាធរ​ខេត្ត មន្ទីរ​ជុំវិញ​ខេត្ត​ជំនាញ​ទាំងអស់ ដើម្បី​ធ្វើការ​អភិវឌ្ឍ​ខេត្ត​ព្រះសីហនុ ជា​ខេត្ត​មួយ​ឈានមុខ​វិស័យ​ទេសចរណ៍ ហើយក៏​ជា​ខេត្ត​មួយ​ ដែល​អាច​ឈានមុខ​អភិវឌ្ឍ​សម្រាប់​ប្រទេសជាតិ​។ ទន្ទឹមនឹង​នេះ ក៏​អំពាវនាវ​តាមរយៈ​អ្នកសារព័ត៌មាន​របស់​យើង តាមរយៈ​ទូរទស្សន៍​ទាំងអស់ (Gaming online) នេះ​សុំ​ឱ្យ​បិទ​ដោយ​ខ្លួន​ឯង ដើម្បី​រក​ឱកាស​ប្រកប​របរ​អី​ ដែល​សមស្រប​តាម​គោលនយោបាយ​របស់​រាជ​រដ្ឋាភិបាល»

ទោះជា​យ៉ាងណា អ្នកបម្រើ​ការ​តាម​អន​ឡាញ​ឱ្យ​ដឹង​ថា បច្ចុប្បន្ន​នៅតែ​មាន​ពលរដ្ឋ​ខ្មែរ និង​ជនបរទេស​រាប់​រយ​នាក់​កំពុង​បម្រើការ​តាម​អនឡាញ​ក្នុង​ខេត្ត​ព្រះសីហនុ​។ បុគ្គលិក​កំពុង​បម្រើ​ការងារ​ផ្នែក​អនឡាញ​ឱ្យ​ដឹង​ថា មូលហេតុ​ដែល​ពលរដ្ឋ​ខ្មែរ​មួយចំនួន​សម្រេចចិត្ត​ត្រឡប់​ទៅ​ស្រុកកំណើត​វិញ ព​ព្រោះ​ពួកគាត់​មិន​ចង់​ចំណាយ​លុយ​កាក់ ឬ​អ្នក​ខ្លះទៀត​គ្មាន​លុយ​បង់​ឱ្យ​ប៉ូលិស ពីព្រោះ​នៅ​ពេល​សមត្ថកិច្ច​បង្ក្រាប​បាន​ក្រុម​ថៅកែ​ជនជាតិ​ចិន និង​បុគ្គលិក​ខ្មែរ​តែងតែ​សូក​លុយ​ទៅ​កាន់​ប៉ូលិស​ខេត្ត​ព្រះសីហនុ ដើម្បី​ជា​ថ្នូរ​នឹង​ការ​ដោះលែង​ឱ្យ​មាន​សេរីភាព​វិញ។

បុគ្គលិក​ថ្លែង​លាក់​ឈ្មោះ៖ «ឧទាហរណ៍​បើ​ចាប់ៗ​ ថៅកែ​ចិន ហើយ​ពួក​យើង​បង់​លុយ​​គេ​​ម្នាក់ ៥​០០​​ដុល្លារ ៧​០០​​ដុល្លារ អស់ហើយ​។ បើ​ថា ចាប់​ដាក់គុក​អត់​ទេ ភាគច្រើន​ឱ្យ​បង់លុយ​បុគ្គលិក​ម្នាក់​ធំ​បំផុត ១​ពាន់​​ដុល្លារ (១.០០០​ដុល្លារ​) យើង​បង់​ខ្លួនឯង ហើយ​ថៅកែ​ផាក​ផ្សេងទៀត​អ្នកគ្រប់គ្រង​ក្រុមហ៊ុន​ម្នាក់​ខ្ទង់​ប៉ុន្មាន​ម៉ឺនៗ​ អ៊ីចឹង​ទៅ ហើយ​បុគ្គលិក ៥​០០​ដុល្លារ ៧​០០​ដុល្លារ អស់ហើយ​។ បើ​បុគ្គលិក​អត់​មាន​លុយ​បង់ តាម​កន្លែង​ថៅកែ​អាណិត​យើង​អ៊ីចឹង ថៅកែ​ចេញ​ឱ្យ ហើយ​ធ្វើការ​បន្ត​ទៀត ហើយ​ឱ្យ​កាត់​ប្រាក់ខែ​យើង​តិចៗ វា​បើក​ឱ្យ​តែ​វា​កាត់ ១​០០ដុល្លារ ២​០០​​ដុល្លារ»

ទាក់ទង​នឹង​រឿង​នេះ ស្នងការ​នគរបាល​ខេត្ត​ព្រះសីហនុ លោក ស រដ្ឋា បាន​បដិសេធ​អត្ថាធិប្បាយ​ជុំវិញ​រឿង​នេះ ដោយ​លោក​ប្រាប់​ថា កំពុង​ជាប់​ប្រជុំ​។ ចំណែក​អភិបាល​ខេត្ត​ព្រះសីហនុ លោក គួច ចំរើន និង​អ្នកនាំពាក្យ​សាលាខេត្ត​នេះ​គឺ​លោក ឃាង ភារម្យ វិញ វិទ្យុ​អាស៊ីសេរី​ក៏​មិន​អាច​ទាក់ទង ដើម្បី​សុំ​ការ​បកស្រាយ​បាន​នៅឡើយ​ទេ កាល​ថ្ងៃទី​២៦ ខែ​មីនា។

របាយការណ៍​ស៊ើបអង្កេត​របស់​អង្គការ​សហប្រជាជាតិ (UN) ចេញផ្សាយ​កាល​ពី​ឆ្នាំ​២០២៣ បង្ហាញ​ថា មនុស្ស​ប្រមាណ ១​សែន​​នាក់ កំពុង​រងគ្រោះ​ពី​ការ​បង្ខំ​ឱ្យ​បម្រើ​ការងារ​ឆបោក​តាម​អនឡាញ​នៅ​កម្ពុជា។

ទាក់ទង​ទៅ​នឹង​រឿង​នេះ ប្រធាន​ផ្នែក​ប្រយុទ្ធ​ប្រឆាំង​ការ​ជួញដូរ​មនុស្ស និង​ទេសន្តរប្រវេសន៍ នៃ​អង្គការ​សង់ត្រាល់ (CENTRAL) លោក ឌី ថេហូយ៉ា មាន​ប្រសាសន៍ ប្រជាពលរដ្ឋ​ខ្មែរ​មួយ​ចំនួន​គ្មាន​ជម្រើស និង​ដោយសារ​កត្តា​ជីវភាព​ក្រីក្រ ទើប​បម្រើ​ការងារ​ផ្នែក​អនឡាញ​ខុសច្បាប់ បើ​ទោះ​បី​ជា​ពួកគាត់​ដឹង​ថា ប្រឈម​ការ​ចុះ​បង្ក្រាប​យ៉ាងណាក្ដី​។ លោក​សង្កេត​ឃើញ​ថា ក្រុម​សមត្ថកិច្ច​ខេត្ត​ព្រះសីហនុ​ហាក់​គ្មាន​ឆន្ទៈ​ដោះស្រាយ​បញ្ហា​ល្បែង​អនឡាញ​នេះ​ឱ្យ​មាន​ប្រសិទ្ធភាព​នោះ​ទេ គឺ​ដោយសារតែ​សមត្ថកិច្ច​មិន​បាន​ស៊ើបអង្កេត​ពេញ​លេញ​លើ​មេខ្លោង​ធំៗ​ ដែល​ពាក់ព័ន្ធ​ពីក្រោយ​នៃ​ល្បែង​តាម​អនឡាញ​នេះ។

លោក ឌី ថេហូយ៉ា៖ «ការស៊ើបអង្កេត​ឱ្យ​មាន​ការ​ចូល​រួមមាន​តម្លាភាព ប្រសិន​ការចូលរួម​គ្មាន​តម្លាភាព ការ​ចាត់​វិធានការ​ចាត់​បែប​ម៉េច​? មូលហេតុ​ដែល​ខ្ញុំ​គិតថា ការ​ចាត់វិធានការ ឬ​ការអនុវត្ត​ឱ្យ​មាន​តម្លាភាព​ហ្នឹង​ត្រូវ​បង្ហាញថា ធ្វើ​ពិតប្រាកដ​អត់​? ធ្វើ​នៅ​ណាខ្លះ​? ទីមួយ​ត្រូវ​ដឹង​ថា ក្រុម​បណ្ដាញ​នៃ​អំពើ​ជួញដូរ​មនុស្ស ឬ​ឆបោក​តាម​អនឡាញ​ជា​អ្នកណា​សិន​។ នៅក្នុង​ប្រទេស​មួយ​វា​មិន​ដែល​ថា មិន​អាច​ដឹង​ស្វែងរក ឬ​បញ្ជាក់​អត្តសញ្ញាណ​ថា ក្រុម​ណា​បានទេ អ៊ីចឹង​គ្រប់គ្រង​ប្រទេស​ម៉េច​បាន ប្រទេស​ម៉េច​មាន​សុវត្ថិភាព​។ អាហ្នឹង​ត្រូវតែ​ច្បាស់​ក្នុង​ការ​បញ្ជាក់​អត្តសញ្ញាណ​ថា តើ​បណ្ដាញ​ក្រុម​ហ្នឹង​ជា​អ្នកណា ហើយ​អ្នកណា​នៅ​ពី​ក្រោយខ្នង​?»

កន្លងទៅ​រដ្ឋាភិបាល​នៃ​បណ្ដា​ប្រទេស​មួយចំនួន​ដូចជា ប្រទេស​ថៃ (Thailand) ហ្វីលីពីន (Philippines) ម៉ាឡេស៊ី (Malaysia) និង​ប្រទេស​ឥណ្ឌា (India) ជាដើម តែងតែ​ព្រមាន​ដល់​ពលរដ្ឋ​ពួកគេ​ឱ្យ​ប្រុងប្រយ័ត្ន​អំពី​ការ​ចាញ់​ល្បួង តាមរយៈ​ការឃោសនា​រើស​បុគ្គលិក​បម្រើការងា​​តាម​អនឡាញ​នៅ​កម្ពុជា ​ដែល​កុហក​ថា ទទួល​បាន​ប្រាក់ខែ​ខ្ពស់។ ប៉ុន្តែ​ពេល​ចូល​បម្រើ​ការងារ​ជាក់ស្ដែង ​ខុសពី​ការពិត ហើយ​ត្រូវ​បាន​ថៅកែ​រឹតត្បិត​សិទ្ធិ​សេរីភាព និង​អាច​ឈាន​ការ​បង្ខាំង​ធ្វើ​ទារុណកម្ម​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។