អាជ្ញាធរបើកយុទ្ធនាការព្រមគ្នាបង្ក្រាបគ្រឿងញៀននិងភាពមិនស្របច្បាប់របស់ជនបរទេស
2018.11.30
ជនជាតិចិន ២៣៥នាក់ ដែលនគរបាលខេត្តតាកែវ កម្លាំងនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការដ្ឋាននគរបាលជាតិ សហការជាមួយនគរបាលចិន ចាប់បាននៅខេត្តតាកែវ កាលពីថ្ងៃទី២៦ ខែវិច្ឆិកា ឆ្នាំ២០១៨។
រូបថត៖ ស្នងការដ្ឋាននគរបាលខេត្តតាកែវ
អាជ្ញាធររាជធានីខេត្ត និងក្រុងមួយចំនួន បានបើកយុទ្ធនាការព្រមគ្នាបង្ក្រាបគ្រឿងញៀន និងពិនិត្យមើលនូវភាពស្របច្បាប់របស់ជនបរទេសដែលកំពុងស្នាក់នៅក្នុងប្រទេសកម្ពុជា នាចុងខែវិច្ឆិកានេះ។
នៅក្នុងយុទ្ធនាការនោះ អាជ្ញាធរ រកឃើញអ្នកជាប់ពាក់ព័ន្ធបញ្ហាគ្រឿងញៀនជិត៥០នាក់ ក្នុងនោះមានជនបរទេស ជាពិសេសជនជាតិចិន និងជនបរទេសរស់នៅមិនស្របច្បាប់ មួយចំនួនទៀត នៅក្នុងខេត្ត រាជធានីភ្នំពេញ ក្រុងព្រះសីហនុ និងខេត្តព្រះវិហារ។
សមត្ថកិច្ច ខេត្តព្រះសីហនុឲ្យដឹងថា រយៈពីរថ្ងៃ គឺថ្ងៃទី២៨ និងទី២៩ វិច្ឆិកានេះ គេរកឃើញបទល្មើសគ្រឿងពាក់ព័ន្ធនឹងជនជាតិចិន ៦ករណី និងចាប់ខ្លួនពួកគេបាន ៩នាក់។
សារព័ត៌មានក្នុងស្រុកមួយចំនួនចុះផ្សាយថា ស្នងការនគរបាលខេត្ត ព្រះសីហនុ លោក ជួន ណារិន្ទ និងសមត្ថកិច្ចប្រឆាំងគ្រឿងញៀន បង្ក្រាបបទល្មើសគ្រឿងញៀនបានចំនួន ៦ករណី ឃាត់ខ្លួនជនសង្ស័យ ជាជនជាតិចិនចំនួន៩នាក់ ចាប់យកថ្នាំញៀនជាច្រើនមុខចំនួន ១២២កញ្ចប់ និងថ្នាំញៀនផ្សេងៗជាច្រើនទៀត។
ចំណែកការិយាល័យកណ្ដាលប្រឆាំងបទល្មើស នៃស្នងការដ្ឋាននគរបាលរាជធានីភ្នំពេញ បានបង្ក្រាបនិងបង្ហាញមុខជនសង្ស័យ ពាក់ព័ន្ធនឹងបទល្មើសគ្រឿងញៀនចំនួន៤១នាក់ ដែលកម្លាំងនគរបាលជំនាញ និងនគរបាលទាំង១២ខណ្ឌ បានចុះបង្ក្រាបរយៈពេល ២ថ្ងៃកន្លងមកនេះ។
ក្រោយការចាប់ខ្លួន ជនសង្ស័យទាំង៤១នាក់នោះ ត្រូវបានសមត្ថកិច្ចកសាងសំណុំរឿងបញ្ជូនទៅតុលាកាតចាត់ការបន្តតាមនីតិវិធី។
ពាក់ព័ន្ធបញ្ហាគ្រឿងញៀននេះដែរ អាជ្ញាធរខេត្តព្រះវិហារ ចាប់បានជនសង្ស័យ ជាជនជាតិឡាវពាក់ព័ន្ធគ្រឿងញៀន ២នាក់ដែរ។
ដោយឡែកបញ្ហាជនអន្តោប្រវេសន៍ខុសច្បាប់វិញ អាជ្ញាធរខណ្ឌឫស្សីកែវ រាជធានីភ្នំពេញ បានឃាត់ខ្លួន ជនជាតិវៀតណាមចំនួន ៥នាក់ ដែលប្រើប្រាស់ឯកសារមិនត្រឹមត្រូវបញ្ជូនទៅអគ្គនាយកដ្ឋានដើម្បីអនុវត្តនីតិវិធីបន្តនៃច្បាប់ នៅថ្ងៃព្រហស្បតិ៍ ទី២៩ ខែវិច្ឆិកានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត