អង្គការតម្លាភាពអន្តរជាតិ (Transparency International) បានដាក់ចំណាត់ថ្នាក់ផ្នែកអំពើពុករលួយសម្រាប់ឆ្នាំ២០២១ ឲ្យរដ្ឋាភិបាលកម្ពុជាល្អជាងឆ្នាំ២០២០ បន្តិច គឺកើនឡើង ២ពិន្ទុ។ ប៉ុន្តែតួលេខនេះនៅតែបង្ហាញថា កម្ពុជាជាប់លេខរៀងខាងប្រព្រឹត្តអំពើពុករលួយអាក្រក់ជាងគេ នៅក្នុងតំបន់អាស៊ានដដែល។ សង្គមស៊ីវិលជំរុញឲ្យរដ្ឋាភិបាលប្រឹងប្រែងពន្លឿនធ្វើកំណែទម្រង់ឲ្យមានប្រសិទ្ធភាព ពង្រឹងនីតិរដ្ឋ គោរពលទ្ធិប្រជាធិបតេយ្យ និងបង្កើតបរិយាកាសនយោបាយឲ្យមានភាពសេរីឡើងវិញ។
ក្នុងឆ្នាំ២០២១ កម្ពុជានៅតែបន្តលេខរៀងបាតតារាងក្នុងតំបន់អាស៊ីអាគ្នេយ៍ ខាងប្រព្រឹត្តអំពើពុករលួយខ្លាំងជាងគេ។ អង្គការតម្លាភាពអន្តរជាតិ (Transparency International) ចេញផ្សាយរបាយការណ៍ថ្ងៃទី២៥ ខែមករាបង្ហាញថា ក្នុងចំណោម ១៨០ប្រទេសនៅទូទាំងពិភពលោក កម្ពុជាស្ថិតនៅលេខរៀងទី១៥៧ ដោយទទួលបានពិន្ទុល្អជាងឆ្នាំមុន ២ពិន្ទុ។
នាយកប្រតិបត្តិនៃអង្គការតម្លាភាពកម្ពុជាលោក ប៉ិច ពិសី ឲ្យដឹងថា ការកើនបាន ២ពិន្ទុនេះ ដោយសារក្រុមវិនិយោគ និងអ្នកធុរកិច្ចមួយចំនួនវាយតម្លៃថា ស្ថានភាពអំពើពុករលួយមានភាពប្រសើរជាងឆ្នាំ២០២០ បន្តិច។ ប៉ុន្តែទោះជាយ៉ាងនេះក្ដី លោក ប៉ិច ពិសី សង្កេតឃើញថា វិស័យសេដ្ឋកិច្ចនៅជោគជាំដោយអំពើពុករលួយ និងការស៊ីសំណូកសូកប៉ានក្នុងប្រតិបត្តិការអាជីវកម្មដដែល។
Opens in new windowចំណែកវិស័យស្ថាប័នសាធារណៈផ្សេងទៀត រួមទាំងប្រព័ន្ធតុលាការផងនោះ នៅតែកើតមានអំពើពុករលួយធ្ងន់ធ្ងរដដែល។ តំណាងសង្គមស៊ីវិលរូបនេះព្រួយបារម្ភថា ប្រសិនបើកម្ពុជា បន្តជាប់ឈ្មោះមិនល្អខាងអំពើពុករលួយបន្តទៀត នឹងក្លាយជាឧបសគ្គធំ ដែលនិងធ្វើឲ្យមានការប៉ះពាល់ដល់ពលរដ្ឋ។ លោកជំរុញឲ្យរដ្ឋាភិបាលបង្កើនការខិតខំទ្វេដងទៀត ដើម្បីទប់ស្កាត់អំពើពុករលួយឲ្យមានប្រសិទ្ធភាព៖ « ទាមទារឲ្យមានការបន្ត បន្តឲ្យបានកាន់តែច្រើនថែមទៀត ចំពោះការកាត់បន្ថយអំពើពុករលួយនៅក្នុងវិស័យធុរកិច្ច ការកាត់បន្ថយការិយាធិបតេយ្យ អំពើពុករលួយ ហើយជាពិសេសនោះ គឺការជំរុញការអនុលោមតាមគោលការណ៍ច្បាប់ដែលមានជាធរមាន»។
សន្ទស្សន៍នៃការស្រាវជ្រាវបែបវិទ្យាសាស្ត្រពីអំពើពុករលួយ (CPI) ឆ្នាំ២០២១ របស់អង្គការតម្លាភាពអន្តរជាតិ ផ្សាយចេញពីទីក្រុងប៊ែរឡាំង (Berlin) ប្រទេសអាល្លឺម៉ង់ បង្ហាញថា ស្ថានភាពអំពើពុករលួយនៅកម្ពុជាកើនបាន ២ពិន្ទុ បើធៀបនឹងឆ្នាំ២០២០ គឺពី ២១ពិន្ទុ មក ២៣ពិន្ទុ សម្រាប់ឆ្នាំ២០២១។ ឯចំណាត់ថ្នាក់វិញ គឺកម្ពុជាថយពីលេខរៀងទី១៦០ មកនៅលេខរៀងទី១៥៧ ក្នុងចំណោមប្រទេស និងដែនដីសរុបចំនួន១៨០។
Opens in new windowអង្គការអន្តរជាតិមួយនេះ បញ្ជាក់ថា ពិន្ទុដែលកម្ពុជាទទួលបាននៅឆ្នាំនេះ មិនមែនជាសញ្ញាវិជ្ជមានទេ ព្រោះពិន្ទុនេះនៅតែមានកម្រិតទាបដែលបង្ហាញថា កម្ពុជាបោះជំហានយឺតស្ថិតនៅពីក្រោយបណ្តាប្រទេសក្នុងតំបន់ និងពិភពលោក។ ពិន្ទុ និងលេខរៀងនេះ ក៏បានបង្ហាញថា កម្ពុជា គឺជាប្រទេសដែលមានអំពើពុករលួយខ្លាំងជាងគេដែរ គឺពុករលួយជាងរបបសឹកនៅមីយ៉ាន់ម៉ា (Myanmar) ឬ ភូមា (Bumar) និងឡាវ (Laos) ទៅទៀត។ ស្ថិតក្នុងកម្រិតតំបន់អាស៊ី-ប៉ាស៊ីហ្វិកវិញ កម្ពុជាក៏ជាប់ឈ្មោះក្នុងលេខរៀង ៣ប្រទេស ដែលមានពិន្ទុទាបជាងគេ ដោយនៅលើតែប្រទេសអាហ្វហ្កានីស្ថាន (Afghanista) និងកូរ៉េខាងជើងប៉ុណ្ណោះ។
ពាក់ព័ន្ធនឹងរបាយការណ៍នេះ វិទ្យុអាស៊ីសេរី មិនអាចសុំការបញ្ជាក់ពីប្រធានអង្គភាពប្រឆាំងអំពើពុករលួយលោក ឱម យិនទៀង និងអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃទី២៥ ខែមករា។ ប៉ុន្តែកន្លងមក ក្រុមមន្ត្រីរដ្ឋាភិបាលតែងតែច្រានចោលរបាយការណ៍ពីបញ្ហាពុករលួយនេះ និងបានចោទប្រកាន់បកទៅវិញថា អង្គការតម្លាភាពអន្តរជាតិ ចេញផ្សាយរបាយការណ៍មិនពិត ឬក៏ជារបាយការណ៍មាននិន្នាការប្រឆាំងជាដើម។
នាយិកានៃអង្គការគណៈកម្មាធិការប្រឆាំងអំពើពុករលួយអ្នកស្រី ម៉ម ស៊ីថា ឲ្យដឹងថា កម្ពុជានៅតែមានអំពើពុករលួយច្រើនជាងគេ ដោយសារការស៊ីសំណូកកើតមានលក្ខណៈជាប្រព័ន្ធ ខណៈការអនុវត្តច្បាប់នៅទន់ខ្សោយ ឬមានការរើសអើង។ អ្នកស្រីបន្តថា ការច្រានចោលរបាយការណ៍ស៊ើបអង្កេតបែបវិទ្យាសាស្ត្ររបស់អង្គការអន្តជាតិនេះ នឹងធ្វើឲ្យកម្ពុជាខាតប្រយោជន៍ទៅវិញទេ។ អ្នកស្រីលើកទឹកចិត្តឲ្យរដ្ឋាភិបាលយករបាយការណ៍មកសិក្សា និងពន្លឿនការធ្វើកំណែទម្រង់ឲ្យមានប្រសិទ្ធភាព ទើបជារឿងប្រសើរ៖« អំពើពុករលួយ គឺថា វារាលដាល។ យើងមើលការបើកចូលឲ្យជ្រៅក្នុងប្រព័ន្ធរដ្ឋបាលឲ្យជ្រៅបានដឹង ហើយការកើនពិន្ទុហ្នឹងមិនមែនជាការប្រសើរទេ។ យើងមិនមានមោទនអ្វីជាងឆ្នាំមុនៗ ទេ»។
អង្គការតម្លាភាពអន្តរជាតិ បញ្ជាក់ថា ការស្ថិតនៅលេខរៀងអាក្រក់នេះ ក៏ដោយសារកម្ពុជាមិនទាន់មានភាពប្រសើរពីកិច្ចខិតខំប្រឹងប្រែងក្នុងការលើកកម្ពស់លទ្ធិប្រជាធិបតេយ្យ នីតិរដ្ឋ និងគុណភាពគោលនយោបាយ ដែលធានាឲ្យមានការអភិវឌ្ឍន៍។ អង្គការមួយនេះបន្តថា ការគ្រប់គ្រងបែបរឹតត្បិត ដែលបានបំបិទសិទ្ធិសេរីភាពភាពពលរដ្ឋ និងការធ្លាក់ចុះនៃលទ្ធិប្រជាធិបតេយ្យ គឺជាកត្តាសំខាន់ដែលធ្វើឲ្យមានការកើនឡើងនៃកម្រិតអំពើពុករលួយកាន់តែខ្ពស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។