ពលរដ្ឋខ្មែរអូស្ត្រាលីមួយចំនួនមិនគាំទ្រការប្រគំតន្ត្រី ឬខនស៊ត (Concert) របស់លោក ព្រាប សុវត្ថិ នៅលើទឹកដីអូស្ត្រាលីឡើយ ដោយពួកគាត់យល់ថា ក្នុងរយៈកាលប៉ុន្មានឆ្នាំចុងក្រោយនេះ លោក មានជាប់ឈ្មោះអាស្រូវរឿងទទួលបានដីនៅបឹងតាមោក កំពុងមានការតវ៉ាពីពលរដ្ឋរងគ្រោះ និង ជម្លោះដីធ្លី នៅខេត្តរតនគិរី។
លោក ព្រាប សុវត្ថិ ដែលជាកំពូលតារាចំរៀងខ្មែរប្រចាំប្រទេសកម្ពុជា កំពុងរៀបចំសម្ដែងខុនសិត (Concert) ក្នុងប្រទេសអូស្ត្រាលី នៅចុងសប្តាហ៍នេះ និងសប្តាហ៍ក្រោយ ប៉ុន្តែខុសពីពេលមុនដែលលោកតែងទទួលបានការគាំទ្រពីពលរដ្ឋខ្មែរនៅទីនោះ លើកនេះ លោកត្រូវបានអ្នកដែលធ្លាប់គាំទ្ររិះគន់ និងប្រតិកម្មប្រឆាំងវត្តមានរបស់លោក និងក្រុមគ្រួសារ។
ពលរដ្ឋខ្មែរអូស្ត្រាលី ពីទីក្រុងស៊ីដនី (Sydney) លោក សុខ ខេមា មានប្រសាសន៍ថា លោក ព្រាប សុវត្ថិ ក្នុងនាមជាតារាចំរៀងតំណាងឲ្យប្រទេសជាតិទាំងមូល ត្រូវតែមានគុណធម៌ក្នុងខ្លួន ដើរលើផ្លូវកណ្តាល ដោយរក្សាភាពយុត្តិធម៌ មិនត្រូវគាំទ្រអ្នកដែលជាន់ឈ្លីសិទ្ធិមនុស្ស រំលោភដីធ្លីពលរដ្ឋ និងបំផ្លាញធនធានជាតិ ដែលជាសម្បត្តិរួមនោះទេ។ លោក សុខ ខេមា ថា រដ្ឋាភិបាលកម្ពុជាសព្វថ្ងៃនេះ បានប្រើអំពើទុច្ចរិតជាច្រើនក្នុងការអូសទាញអ្នកដែលមានប្រជាប្រិយភាព ដើម្បីទាក់ទាញយុវជន ឲ្យមកប្រឡូកប្រឡាក់ ដើម្បីបិទបាំងនូវអំពើទុច្ចរិតរបស់ខ្លួន។
លោក សុខ ខេមា៖ «នៅក្នុងរបបផ្ដាច់ការសព្វថ្ងៃគេយកៗអ្នកទាំងនោះដើម្បីយកមកជួយបិទបាំង ការពិតរបស់គេ អ៊ីចឹងមើលឃើញដីតាមោក សួរថា លោក ព្រាប សុវត្ថិ ចង់បានទេ ខ្ញុំមើលទៅថា គាត់ចង់បានទេ?ចង់មិនចង់យើងយល់ហើយ ដីបឹងតាមោកនេះតាមោកនេះ សួរថាគាត់ដាក់ដេញថ្លៃទេ គាត់ទៅទិញពីគេទេ ខ្ញុំមិនជឿថា គាត់ចង់បានទេ អ៊ីចឹងទេលោក ហ៊ុន សែន គាត់ចែកឲ្យ គាត់មិនតែចែកឲ្យ ព្រាប សុវត្ថិ ទេ គាត់ចែកឲ្យ សៅ សុខា»។
ពលរដ្ឋខ្មែរមួយរូបទៀតពីទីក្រុងស៊ីដនី (Sydney) ដដែល លោក កូន សម្បត្តិ យល់ឃើញថា លោក ព្រាប សុវត្ថិ មិនមែនមើលមិនឃើញនូវអ្វីដែលកំពុងកើតឡើងក្នុងប្រទេសជាតិរបស់ខ្លួននោះទេ តែលោកបិទភ្នែកធ្វើជាមិនឃើញ ដោយសារតែលាភសក្ការៈ ដែលបានផ្តល់ដោយគណបក្សប្រជាជន ដូចជាមុខតំណាងក្នុងជួរទាហាន និងមានបុណ្យស័ក្តិទៀតផង។ លោក កូន សម្បត្តិ ថា ប្រទេសកម្ពុជាមិនមែនមានសង្គ្រាម ដែលតម្រូវឲ្យពលរដ្ឋ ឬតារាចម្រៀងចូលធ្វើទាហានដើម្បីការពារជាតិទេ។ លើសពីនេះ លោកថា ខណៈណាកម្ពុជាគ្មានសង្គ្រាមឈ្លានពាន ហើយប្រទេសកម្ពុជាបានប្រកាន់យកលទ្ធិប្រជាធិបតេយ្យ តារាចម្រៀងទាំងអស់ត្រូវតែរក្សាភាពអព្យាក្រឹត្យ មិនប្រកាន់បក្ខពួកឬបក្សសម្ព័ន្ធនោះឡើយ។
លោក កូន សម្បត្តិ៖ «ចំពោះខ្ញុំផ្ទាល់ ខ្ញុំមិនគាំទ្រក្រុមសិល្បៈរបស់គ្រួសារ ព្រាប សុវត្ថិ ទេ ដែលគាត់នឹងសម្ដែងនៅរដ្ឋវ៉ិកតូរីយ៉ា(Victoria)ហើយនៅរដ្ឋញូសៅវែល(New South Wales)អត់ទាន់ដឹងថ្ងៃខែទេ វ៉ិកតូរីយ៉ាគាត់នឹងសម្ដែង ថ្ងៃទី ២១ ខែតុលា ២០២៣ នេះ អ្វីដែលខ្ញុំមិនគាំទ្រ ព្រោះគាត់ជា ក្រុមគ្រួសារគាត់ជាមន្ត្រី ជាឧកញ៉ា ដែលគាំទ្រគណបក្សប្រជាជនខ្មែរ ដែលក្រុមឧក្រិដ្ឋជន ដែលគាត់មានការចូលរួមក្នុងការកាប់បំផ្លាញព្រៃឈើ ច្បាមយកដីប្រទេសជាតិ និងច្បាមយកធនធានធម្មជាតិនៅប្រទេសខ្មែរយើង ហើយខ្ញុំមិនគាំទ្រទេដោយសារគាត់នៅក្នុងហ្នឹងជាមួយគេ»។
ស្រដៀងគ្នានេះដែរ ពលរដ្ឋខ្មែរពីទីក្រុងម៉ែលប៊ន (Melbourne) កញ្ញា សាន សេរីដា យល់ឃើញថា បើតាមការតាមដានសកម្មភាពរបស់កញ្ញា ទៅលើកំពូលតារាចំរៀង លោក ព្រាប សុវត្ថិ គឺមិនដែលឃើញតារាចម្រៀងរូបនេះបានធ្វើកិច្ចការសង្គមអ្វីទល់តែសោះ ក្នុងគ្រាប្រទេសជាតិកំពុងលិចលង់ ពោរពេញដោយអំពើពុករលួយ ធនធានធម្មជាតិកាន់បាត់បង់ ដោយសារអ្នកកាន់អំណាចនាំគ្នាច្បាមយកជាកម្មសិទ្ធិផ្ទាល់ខ្លួន ហើយពលរដ្ឋរាប់លាននាក់កាន់តែរងទុក្ខលំបាក។
កញ្ញា សាន សេរីដា៖ «ពួកខ្ញុំគឺគាំទ្រពួកគាត់ពីមុនចា ដល់ពេលអ៊ីចឹង ដល់ពេលឥឡូវ គាត់ទៅជាបែកឆ្វេង ដោយសារគាត់ទ្រ ស៊ីភីភី(CPP)ផង គាត់ធ្វើឲ្យប្រជាជនមានការឈឺចាប់ដោយសារយកដីយកទឹកអ៊ីចឹងណាបង កាប់ព្រៃឈើ ចូលរួមបំផ្លាញព្រៃឈើ ចូលរួមបំផ្លាញទឹកចិត្តប្រជាពលរដ្ឋខ្មែរយើងហ្នឹង ដោយសារលប់បឹងតាមោក បងដឹងស្រាប់ហើយ បឹងហ្នឹងធំៗមែនទែនតែម្តង សម្រាប់ទប់ទឹកដែលហូរចូលមកអ៊ីចឹង កុំឲ្យលិចទីក្រុងភ្នំពេញអ៊ីចឹង»។
ដោយឡែក ពលរដ្ឋខ្មែរមួយរូបទៀត មកពីទីក្រុងម៉ែលប៊ន (Melbourne) ដដែល លោក ហ៊ុច សេរីវុឌ្ឍិ មើលឃើញថា លោក ព្រាប សុវត្ថិ គួរតែដកខ្លួននៅឲ្យឆ្ងាយពីគណបក្សកាន់អំណាច បើមិនចង់បាត់បង់អ្នកគាំទ្រ ហើយត្រូវបែរមកជួយអ្នកដែលកំពុងរងទុក្ខវេទនាដោយការដឹកនាំរបស់រដ្ឋាភិបាលសព្វថ្ងៃ។
លោក ហ៊ុច សេរីវុឌ្ឍិ៖ «ប្រជាជនខ្វះកាអារច្រើន ហើយចំណាកស្រុកក៏ច្រើនមែនទែន ចំណុចហ្នឹងហើយ ហើយគាត់ជាតារាចម្រៀងកំពូល ហេតុអ្វីបានគាត់ទៅឈរ ទៅប្រឡូកប្រឡាក់ជាមួយខាងនយោបាយ ខាងស៊ីភីភី(CPP)នោះ អ៊ីចឹងជាហេតុផលមួយជ្រុង ដែលពួកខ្ញុំ មិនពេញចិត្ត ហើយក៏មិនចូលរួមគាំទ្រតទៀត អ៊ីចឹងបង»។
ជុំវិញការសម្ដែងខនស៊ត (Concert) របស់លោក ព្រាប សុវត្ថិ និងតារាចម្រៀងក្រុមគ្រួសារលោកក្នុងប្រទេសអូស្ត្រាលីនេះ វិទ្យុអាស៊ីសេរីបានសុំការអត្ថាធិប្បាយពីអ្នករៀបចំកម្មវិធី ក្នុងទីក្រុងម៉ែលប៊ន(Melbourne) លោក សុ កាន់ នៅថ្ងៃទី១៧ តុលា ប៉ុន្តែលោកបានបដិសេធ សុំមិនឆ្លើយតបអ្វីទេ។
ទោះជាយ៉ាងណា ក្នុងសារវីឌីអូមួយ ដែលផ្សព្វផ្សាយពីការសម្ដែងខនស៊ត របស់លោក ព្រាប សុវត្ថិ ក្នុងទំព័រ Facebook សមាគមខ្មែរនៃទីក្រុងម៉ែលប៊ន ដែលមាន លោក ជា យូហ៊ន ជាប្រធាន មានប្រសាសន៍ថា សិល្បៈតន្ត្រី តារាចម្រៀងខ្មែរក្តី គឺជាផ្នែកមួយតំណាងឲ្យអត្តសញ្ញាណរបស់ជាតិ។ លោក ជា យូហ៊ន ថា លោកព្រាប សុវត្ថិ រស់នៅក្រោមការដឹកនាំដោយគណបក្សប្រជាជន ដូច្នោះចង់មិនចង់លោកត្រូវតែចូលរួមជាមួយគណបក្សមួយនេះ។
កាលពីថ្ងៃទី១៣ ខែមេសា ឆ្នាំ២០២២ អតីតនាយករដ្ឋមន្ត្រី លោក ហ៊ុន សែន បានចេញអនុក្រឹត្យ កាត់ដីបឹងតាមោកចំនួន ៣ហិកតារ ក្នុងខណ្ឌព្រែកព្នៅ រាជធានីភ្នំពេញឲ្យលោក ព្រាប សុវត្ថិ។ ពលរដ្ឋធ្លាប់រិះគន់ថា លោក ព្រាប សុវត្ថិ ដែលធ្លាប់តែមានអ្នកគាំទ្រច្រើន និងជាបុគ្គលស្អាតស្អំ មិនគួរចង់បានដីបឹងធម្មជាតិនេះទេ។
ពលរដ្ឋខ្មែរអូស្ត្រាលីលើកឡើងថា ដរាបណាលោក ព្រាប សុវត្ថិ មិនដកខ្លួននៅឲ្យឆ្ងាយពីក្រុមអ្នកនយោបាយទុច្ចរិតនៅកម្ពុជា ពួកគេនឹងបន្តប្រឆាំង ការសម្ដែងខនស៊ត (Concert) របស់លោក ព្រាប សុវត្ថិ នៅក្នុងប្រទេសអូស្ត្រាលីលើកក្រោយៗទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។