ប្រតិបត្តិ​ការ​នៃ​ក្រុមហ៊ុន CIC និង​ការ​ធ្លាក់​ចូល​ក្នុង​វិបត្តិ

ដោយ ខាន់ លក្ខិណា
2024.03.26
ប្រតិបត្តិ​ការ​នៃ​ក្រុមហ៊ុន CIC និង​ការ​ធ្លាក់​ចូល​ក្នុង​វិបត្តិ សមាជិក​ក្រុមហ៊ុន ស៊ីអាយស៊ី ភីអិលស៊ី (Cambodian Investors Corporation Plc.) ថត​ក្នុង​សម័យ​សន្និបាត​ប្រចាំ​ឆ្នាំ​លើក​ទី៥ កាល​ពី​ថ្ងៃ​ទី២៦ ខែមករា ឆ្នាំ២០១៩។
រូប៖ ហ្វេសប៊ុក Cambodian.invertors.corporation

ទោះបី​ជា​មាន​ការ​អំពាវនាវ​ពី​ជន​រងគ្រោះ ដែល​ដាក់​ទុន​វិនិយោគ​ក្នុង​ក្រុមហ៊ុន ​ស៊ីអាយស៊ី (CIC) ឱ្យ​ដោះស្រាយ​វិបត្តិ​នៃ​ការ​បាត់​ទុន​វិនិយោគ រាប់​សិប​លាន​ដុល្លារ ដែល​លេច​ធ្លាយ​ព័ត៌មាន តាំង​ពី​អំឡុង​ពាក់​កណ្ដាល​ឆ្នាំ២០២៣ ក៏ដោយ​ក៏​មិន​សូវ​មាន​ស្ថាប័ន​រដ្ឋ​ណា អើ​ពើ​ឡើយ។

រហូត​ទាល់​តែ​មាន​ប្រតិកម្ម ពី​អតីត​សមាជិក​ក្រុម​ប្រឹក្សាភិបាល​ក្រុមហ៊ុន​នេះ គឺ​អ្នកឧកញ៉ា គួច ម៉េងលី កាល​ពី​ថ្ងៃទី២៣ ខែមីនា ដែល​ទាមទារ​ឱ្យ​មាន​ការ​ស៊ើបអង្កេត នាំ​ជន​ល្មើស​ដែល​កិបកេង​លុយ​វិនិយោគ​ទៅ​ផ្ដន្ទាទោស ទើប​ឃើញ​ មាន​អន្តរាគមន៍​ខ្លះៗ ពី​ស្ថាប័ន​ពាក់ព័ន្ធ។

តើ​ក្រុមហ៊ុន CIC មាន​ប្រវត្តិ​យ៉ាង​ដូច​ម្ដេច មាន​បេសកកម្ម​វិនិយោគ​លើ​វិស័យ​អ្វី​ខ្លះ និង ធ្លាក់​ចូល​ក្នុង​វិបត្តិ​ដោយ​របៀប​ណា?

អ្នកឧកញ៉ា គួច ម៉េងលី បាន​លើក​ឡើង​ថា បើ​មិន​រក​យុត្តិធម៌ ហើយ​ឱ្យ​រឿង​អាស្រូវ​បែប​នេះ នៅ​តែ​បន្ត​កើត​ឡើង​ទៀត នោះ​ប្រជាជន​នឹង​បាត់​ជំនឿ​លើ​រដ្ឋាភិបាល​និង​ប្រព័ន្ធ​យុត្តិធម៌ រដ្ឋាភិបាល​នឹង​បាត់​ជំនឿ​ពី​សហគមន៍​អន្តរជាតិ ហើយ​នឹង​ឈាន​ទៅ​ដល់​ការ​បំផ្លិចបំផ្លាញ​សេដ្ឋកិច្ច​កម្ពុជា។

បន្ទាប់​ពី​ការ​បង្ហាញ​យោបល់ របស់​អ្នកឧកញ៉ា គួច ម៉េងលី ទើប​ឃើញ​មាន​ការ​យក​ចិត្ត​ទុក​ដាក់​ពី​ស្ថាប័នរដ្ឋ និង​មន្ត្រី​ជាន់ខ្ពស់​ជា​ច្រើន​ស្ថាប័ន​ទៀត ដូចជា និយ័តករ​មូលបត្រ​កម្ពុជា ព្រម​ទាំង​មន្ត្រី​ជាន់ខ្ពស់​ក្រសួង​ពាណិជ្ជកម្ម ក្រសួង​យុត្តិធម៌ និង ក្រសួង​មហាផ្ទៃ​ជា​ដើម ចេញ​មុខ​បំភ្លឺ និង​ណែនាំ​អំពី​វិធី​រក​ខុស​ត្រូវ​ដោយ​ឱ្យ​ប្ដឹង​ទៅ​តុលាការ ឬ​អាជ្ញាធរ​ពាក់ព័ន្ធ រួម​ទាំង​ការ​ប្ដេជ្ញា​យក​ចិត្ត​ទុក​ដាក់​ស្វែង រក​ដំណោះស្រាយ ដើម្បី​ការពារ​អ្នក​វិនិយោគ​ស្រប​ច្បាប់។

ក្រុមហ៊ុន ស៊ីអាយស៊ី ភីអិលស៊ី (Cambodian Investors Corporation Plc.) ត្រូវ​បាន​បង្កើត​ឡើង ក្នុង​ខែមេសា ឆ្នាំ២០១៣។ ក្រុមហ៊ុន CIC នេះ មាន​ក្រុមហ៊ុន​បុត្រ​សម្ព័ន្ធ​មួយ គឺ​ក្រុមហ៊ុន Cambodian Investors Capital Partners Plc (CIC Capital Partners Plc.) ដែល​ពេល​ចាប់​ផ្ដើម​ដំណើរ​ការ គឺ​ស្ថិត​នៅ​ក្រោម​ការ​ដឹក​នាំ​របស់​លោក គុយ វ៉ាត ជា​ប្រធាន​ក្រុម​ប្រឹក្សាភិបាល ក្នុង​រចនាសម្ព័ន្ធ​អ្នក​គ្រប់គ្រង​ជាន់​ខ្ពស់ ចំនួន ១៣នាក់។

ក្បាល​ម៉ាស៊ីន​ជាន់​ខ្ពស់​ទាំង ១៣នាក់ ក្រៅ​ពី​លោក គុយ វ៉ាត ដែល​ក៏​ជា​ម្ចាស់​អាហារដ្ឋាន Park Café ជា​ប្រធាន ក៏​មាន​លោក ហ៊ុន មុន្នីវណ្ណ លោក លី លាង លោក សុខ ពិសិដ្ឋ លោក ឃីម សុខហេង និង អ្នក​ឧកញ៉ា គួច ម៉េងលី ស្ថិត​នៅ​ក្នុង​រចនាសម្ព័ន្ធ​គ្រប់គ្រង​ផង​ដែរ ។

H032424-RFAThumbnail-CIC_2.jpg
រូប​ទី៣ ពី​ខាង​ស្ដាំ៖ លោក ឃឹម សុខហេង គ្រូជោគជ័យ និង​ជា​ថ្នាក់​ដឹកនាំ​ក្រុមហ៊ុន ស៊ីអាយស៊ី (CIC) ថត​ក្នុង​ឆ្នាំ២០២២។ រូប៖ ហ្វេសប៊ុក CIC

ចំពោះ​អ្នកឧកញ៉ា គួច ម៉េងលី លោក​បាន​អះអាង​កាល​ពីថ្ងៃទី២៥ មីនា ថា​លោក ​បាន​លាលែង​ពី​តួនាទី​ជា​សមាជិក​ក្រុម​ប្រឹក្សាភិបាល​ក្រុមហ៊ុន ស៊ីអាយស៊ី កាល​ពី​ថ្ងៃ​ទី២ ខែវិច្ឆិកា ឆ្នាំ២០១៨ រីឯ​សមាសភាព​ផ្សេង​ទៀត ដែល​ក្រោយ​មក​ ឃើញ​មាន​ការ​រុះរើ​ចេញ​ដែរ​នោះ វិទ្យុ​អាស៊ី​សេរី​មិន​ទាន់​អាច​ទាក់ទង​សុំ​ការ​បំភ្លឺ​បាន​ទេ។

ក្រុមហ៊ុន​បុត្រ​សម្ព័ន្ធ CIC Capital Partners មាន​គោលការណ៍​ប្រមូល​ផ្ដុំ​ក្រុម​អ្នក​វិនិយោគ និង ពលរដ្ឋ​ក្នុង​ស្រុក ឱ្យ​ចូលរួម​ទុន​វិនិយោគ។

ឯកសារ​លក្ខន្តិកៈ​របស់​ក្រុមហ៊ុន កាល​ពី​ឆ្នាំ២០១៥ បាន​ឱ្យ​ដឹង​ថា ក្រុមហ៊ុន​មាន​វត្ថុ​បំណង​ធ្វើ​អាជីវកម្ម ទាំង​នៅ​ប្រទេស​កម្ពុជា និង​នៅ​ប្រទេស​ដទៃ​ទៀត លើ​មុខ​ ជំនួញ​មួយ​ចំនួន ដូចជា សេវា​ហិរញ្ញវត្ថុ សេវា​អចលនវត្ថុ ពាណិជ្ជកម្ម-ទិញ-លក់-នីហរ័ណអាហរ័ណ ផលិត​ផល​កសិកម្ម ការ​ចិញ្ចឹម​សត្វ ឧស្សាហកម្ម​រោង​ចក្រ សិប្បកម្ម រោង​ម៉ាស៊ីន​កិន​ស្រូវ គ្រឿង​បរិក្ខារ​គ្រប់​ប្រភេទ ការ​ជួល​ឃ្លាំង​ ដាក់​ផលិត​ផល ការ​ជួល​សម្ភារៈ ការ​ជួល​ដីធ្លី-ផ្ទះ​សម្បែង ការ​បញ្ចាំ ការ​ប្ដូរ​ប្រាក់ ការ​កែច្នៃ ទិញ លក់​គ្រឿង​អលង្ការ សេវា​រក​ការងារ​ជូន​អតិថិជន​ធ្វើការ​ក្នុង​និង​ក្រៅ​ប្រទេស សេវា​ព័ត៌មាន​វិទ្យា សេវា​ផ្សាយ​ពាណិជ្ជកម្ម សេវា​បោះ​ពុម្ព សេវា​ផលិត​ខ្សែ​ភាព​យន្ត សេវា​ដឹក​ជញ្ជូន វិស័យ​សាង​សង់​និង​ស្ថាបត្យកម្ម សេវា​កម្ម​សុខាភិបាល​ និង​សេវា​កម្ម​ទេសចរណ៍​ជា​ដើម។

ប៉ុន្តែ​ក្រុមហ៊ុន ស៊ីអាយស៊ី មិន​បាន​ផ្សព្វផ្សាយ​ឱ្យ​លម្អិត ថា មក​ដល់​ពេល​នេះ បាន​វិនិយោគ​លើ​វិស័យ​អ្វី​ខ្លះ​នោះ​ទេ។ យ៉ាងណា អ្នកឧកញ៉ា គួច ម៉េងលី ធ្លាប់​បាន​ប្រាប់​វិទ្យុ​អាស៊ី​សេរី​ថា ការ​វិនិយោគ​របស់​ក្រុមហ៊ុន​មាន​ពីរ​ក្រុម គឺ​ក្រុម​អ្នក​វិនិយោគ​និង​ក្រុម​អ្នក​ឱ្យ​លុយ​ខ្ចី។

ក្នុង​ខែមីនា ឆ្នាំ២០១៩ ក្រុមហ៊ុន​នេះ បាន​កែ​សម្រួល​រចនាសម្ព័ន្ធ​ខ្លះ ដោយ​ឱ្យ​មាន​អ្នក​ទទួល​ខុស​ត្រូវ​កំពូល​ចំនួន ៣រូប គឺ​លោក គុយ វ៉ាត ជា​ប្រធាន​ក្រុម​ប្រឹក្សាភិបាល​ដដែល ហើយ​លោក លី លាង និង​លោក ហុង លាងអ៊ី ជា​អភិបាល។ ប៉ុន្តែ​ពុំ​មាន​ការ​ពន្យល់​ច្បាស់ អំពី​ការ​កែ​សម្រួល​នេះ​ទេ។

លុះ​ដល់​ខែមិថុនា ឆ្នាំ២០១៩ ដដែល ក្រុមហ៊ុន​នេះ ទទួល​បាន​អាជ្ញាប័ណ្ណ​ពី​គណៈកម្មការ​មូលបត្រ​កម្ពុជា (SECC) ហើយ​ក្លាយ​ជា «ក្រុមហ៊ុន​គ្រប់គ្រង​មូលនិធិ» ដំបូង​នៅ​កម្ពុជា។

ក្រុមហ៊ុន​នេះ ធ្លាក់​ក្នុង​វិបត្តិ​លែង​អាច​ផ្ដល់​ការ​ប្រាក់​ប្រចាំ​ខែ ឱ្យ​សមាជិក​ដែល​ផ្ដល់​ប្រាក់​កម្ចី ដើម្បី​បាន​ការ​ប្រាក់​ចាប់​តាំង​ពី​ខែឧសភា ឆ្នាំ២០២៣ មក។ ក្នុង​ខែមិថុនា ឆ្នាំ២០២៣ ក៏​មាន​ការ​ផ្លាស់ប្ដូរ​រចនាសម្ព័ន្ធ​ដឹក​នាំ​របស់​ក្រុមហ៊ុន។

លោក សុខ ពិសិដ្ឋ ក្លាយ​ជា​ប្រធាន​ក្រុម​ប្រឹក្សាភិបាល រីឯ​លោក គុយ វ៉ាត ទៅ​ជា​អភិបាល រួម​ជាមួយ​អ្នក​មាន​តួនាទី​អភិបាល​មួយ​ចំនួន​ទៀត ដូចជា លោក ហុង លាងអ៊ី លោក សោម សម្បត្តិ និង​លោក ឃីម សុខហេង ជាដើម ដែល​ភាគ​ច្រើន​គេ​ស្គាល់​ថា ជា​ក្រុម​គ្រូ​ជោគជ័យ។

គ្រា​នោះ លោក គុយ វ៉ាត ចុះ​ចេញ​ពី​ប្រធាន​ក្រុម​​ប្រឹក្សាភិបាល ក្រោយ​ពី​មាន​ការ​សង្ស័យ ពី​ក្រុម​អ្នក​ចូល​ទុន​វិនិយោគ​មួយ​ចំនួន ថា លោក​បាន​ធ្វើ​ឱ្យ​បាត់​លុយ​វិនិយោគ​រាប់​សិប​លាន​ដុល្លារ។

មក​ដល់​ពេល​នេះ មិន​ទាន់​ឃើញ​លោក គុយ វ៉ាត ចេញ​មុខ​បក​ស្រាយ​នៅ​ឡើយ​ទេ ហើយ​វិទ្យុ​អាស៊ី​សេរី ក៏​មិន​ទាន់​អាច​ទាក់ទង​សុំ​បំភ្លឺ​ពី​លោក​បាន​ដែរ នៅ​ថ្ងៃ​ទី២៦ ខែមីនា។

ក្រៅ​ពី​ការ​រុះរើ​សមាសភាព​ក្រុម​ប្រឹក្សាភិបាល ក្រុមហ៊ុន​បុត្រ​សម្ព័ន្ធ CIC Capital Partners ក៏​បាន​បង្កើត​ទម្រង់​ដឹក​នាំ​ពិសេស​មួយ ដើម្បី​ដោះស្រាយ​វិបត្តិ​ផ្ទៃ​ក្នុង​ ដែល​មាន​ការ​ចោទ​ប្រកាន់​ថា មាន​ការ​បាត់​លុយ​វិនិយោគ​រាប់​សិប​លាន​ដុល្លារ និង​ ទូទាត់​សង​ប្រាក់​ដល់​សមាជិក​រងគ្រោះ។ ក្រុមហ៊ុន​នេះ បាន​ជ្រើសរើស​លោក ឡែម ចាន់សំរេច ជា​នាយក​ប្រតិបត្តិ និង​លោក សុខ ពិសិដ្ឋ ជា​ប្រធាន​គណៈកម្មាធិការ​ស្ដារ​ក្រុមហ៊ុន​និង​មូលនិធិ​ក្នុង​ក្រុមហ៊ុន​នេះ។

យ៉ាងណា វិបត្តិ​នេះ គឺ​ជា​បញ្ហា​ដ៏​ពិបាក​យល់ ថា​តើ​វិបត្តិ​បាត់​លុយ​វិនិយោគ​ក្នុង​ក្រុមហ៊ុន ជា​អំពើ​របស់​លោក គុយ វ៉ាត តែ​ម្នាក់ ឬ​មាន​ការ​ឃុបឃិត​ពី​លោក ឡែម ចាន់សំរេច និង​លោក សុខ ពិសិដ្ឋ ដែល​ជា​អ្នក​ដឹក​នាំ​ថ្មី ព្រម​ទាំង​អ្នក​ផ្សេង​ទៀត​ដែរ ឬ​យ៉ាង​ណា​ទេ នៅ​ពេល​ក្រុម​ក្បាល​ម៉ាស៊ីន​ថ្មី​នេះ មិន​បាន​សើរើ​កំហុស​របស់​ប្រធាន​ក្រុម​ប្រឹក្សាភិបាល​ចាស់ គឺ​លោក គុយ វ៉ាត។

ប៉ុន្តែ​មាន​ព័ត៌មាន​ក្រៅ​ផ្លូវ​ការ​ថា លោក ឡែម ចាន់សំរេច និង លោក សុខ ពិសិដ្ឋ ក៏​ជា​ជន​រងគ្រោះ​ខាត​បង់​ទ្រព្យ​ដែរ។

អ្នកឧកញ៉ា គួច ម៉េងលី ប្រាប់​វិទ្យុ​អាស៊ី​សេរី កាល​ពី​ថ្ងៃ​ទី២៣ ខែមីនា ថា អាច​ប៉ះពាល់​ដល់​ក្រុម​អ្នក​វិនិយោគ​ជិត​ ៥០០នាក់ ដែល​មាន​ចំនួន​ទឹក​ប្រាក់​ប្រមាណ ១៥០លាន​ដុល្លារ។

អ្នកឧកញ៉ា គួច ម៉េងលី៖ «តាម​ខ្ញុំ​ដឹង​មាន​ពីរ​ក្រុម! ក្រុម​មួយ​អ្នក​វិនិយោគ! ក្រុម​មួយ​ទៀត ក្រុម​ឱ្យ​កម្ចី​លុយ។ អ៊ីចឹង​ទាំង​ពីរ​ក្រុម​ហ្នឹង ជិត ៥០០នាក់​ដែរ តាម​ខ្ញុំ​ដឹង។ ក្រុម​កម្ចី​លុយ​ខ្ញុំ​មិន​ដឹង​ពិត​ប្រាកដ​ប៉ុន្មាន​ទេ ប៉ុន្តែ​ក្រុម​វិនិយោគ​ប្រហែល​ជិត ៥០០នាក់ ព្រោះ​ប្រជុំ​ម្ដងៗ ប្រកាស​ចំនួន គឺ​យើង​ដឹង​ប្រហែល​ជិត ៥០០នាក់។ ក្រុម​មួយ​ហ្នឹង ប្រហែល​ជា​ជិត ៧០លាន​ដុល្លារ ហើយ​ក្រុម​កម្ចី​លុយ គឺ​យើង​លឺ​ថា ប្រហែល​ជា ៩០លាន​ដុល្លារ​ទៀត ខ្ញុំ​អត់​ច្បាស់។ អា​ហ្នឹង ទាល់​តែ​ផ្ទៀង​​ទិន្នន័យ​របស់​គាត់ អ៊ីចឹង​បើ​យើង​គិត​ជា​លុយ គឺ​ច្រើន! ច្រើន​មែន​ទែន»

ក្រោយ​ពី​មាន​ការ​តវ៉ា​របស់​ជន​រងគ្រោះ នៅ​ថ្ងៃ​ទី២៥ ខែមីនា ក្រុមហ៊ុន ស៊ីអាយស៊ី បាន​ចេញ​សេចក្ដី​បំភ្លឺ​ថា ក្រុមហ៊ុន ស៊ីអាយស៊ី ផាតន័រ មិនមែន​ជា​សំណុំ​រឿង​បោកប្រាស់ ដូច​ការ​ចោទ​ប្រកាន់​តាម​រយៈ​បណ្ដាញ​ទំនាក់ទំនង​សង្គម​មួយ​ចំនួន​ឡើយ ប៉ុន្តែ​ជា​វិបត្តិ​សន្ទនីយភាព​សាច់​ប្រាក់ ដែល​រង​ឥទ្ធិពល​ពី​វិបត្តិ​សេដ្ឋកិច្ច​សកល និង​ភាព​ខ្វះ​ចន្លោះ​ក្នុង​ការ​ត្រៀម​ខ្លួន​របស់​ក្រុមហ៊ុន។

ក្រុមហ៊ុន ស៊ីអាយស៊ី ថា ក្រុមហ៊ុន ស៊ីអាយស៊ី ផាតន័រ នៅ​តែ​រក្សា​គោល​ជំហរ​យ៉ាង​ម៉ឺង​ម៉ាត់ ក្នុង​ការ​ដោះស្រាយ​បញ្ហា​ចំពោះ​មុខ ដោយ​ធានា​ឱ្យ​បាន​ជា​អតិបរមា​ នូវ​ផល​ប្រយោជន៍​របស់​វិនិយោគិន​គ្រប់​រូប ដោយ​អនុ​លោម​ទៅ​តាម​គោល​ការណ៍ និង​បទប្បញ្ញត្តិ ដែល​កំណត់​ដោយ​និយ័តករ​មូលបត្រ​កម្ពុជា (..)

និយ័តករ​មូលបត្រ​កម្ពុជា​វិញ នៅ​ល្ងាច​ថ្ងៃ​ទី២៥ មីនា បាន​ចេញ​ប្រកាស​ព័ត៌មាន​ថា ទ្រព្យ​សកម្ម​របស់​ក្រុមហ៊ុន ត្រូវ​បាន​ប្រមូល​មក​វិញ​ប្រមាណ ៩០% នៃ​ចំនួន​ទឹក​ប្រាក់​សរុប។ និយ័តករ​មូលបត្រ​កម្ពុជា កំពុង​ជំរុញ​ការ​រៀបចំ​វេច​ខ្ចប់​ទ្រព្យ​ទាំង​នេះ ឱ្យ​បាន​ត្រឹមត្រូវ​តាម​ផ្លូវ​ច្បាប់ និង​បន្ត​ពិនិត្យ គ្រប់គ្រង​ការងារ​របស់​គណៈកម្មការ​ស្ដារ​ក្រុមហ៊ុន និង​មូលនិធិ​របស់​ក្រុមហ៊ុន​ជា​បន្ត​ទៀត ដើម្បី​ការពារ​ផល​ប្រយោជន៍​របស់​វិនិយោគិន​ស្រប​ច្បាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។