កម្មករ​ប្រមូល​សំរាម​ស៊ីនទ្រី​នៅ​តែ​ធ្វើ​កូដកម្ម​ទាមទារ​ដំណោះស្រាយ​ការងារ​មួយ​ចំនួន

ដោយ ឡេង ម៉ាលី
2020-10-13
អ៊ីម៉ែល
មតិ
Share
បោះពុម្ព
បុគ្គលិក​ក្រុមហ៊ុន​ប្រមូល​សំរាម ស៊ីនទ្រី ខេមបូឌា (CINTRI Cambodia) ប្រមាណ ១ពាន់​នាក់ បន្ត​ការ​តវ៉ា​នៅ​ថ្ងៃ​ទី៥ ខែតុលា ទាមទារ​ឲ្យ​ថៅកែ​ក្រុម​ហ៊ុន​​ទូទាត់​ប្រាក់​បញ្ចប់​កិច្ច​សន្យា​ការងារ​មុន​កាល​កំណត់។
បុគ្គលិក​ក្រុមហ៊ុន​ប្រមូល​សំរាម ស៊ីនទ្រី ខេមបូឌា (CINTRI Cambodia) ប្រមាណ ១ពាន់​នាក់ បន្ត​ការ​តវ៉ា​នៅ​ថ្ងៃ​ទី៥ ខែតុលា ទាមទារ​ឲ្យ​ថៅកែ​ក្រុម​ហ៊ុន​​ទូទាត់​ប្រាក់​បញ្ចប់​កិច្ច​សន្យា​ការងារ​មុន​កាល​កំណត់។
រូប៖ កម្មករ

ក្រុម​កម្មករ​ប្រមូល​និង​ដឹក​សំរាម​នៃ​ក្រុមហ៊ុន​ស៊ីនទ្រី​ជាង​ ១ពាន់​នាក់​ នៅ​តែ​បន្ត​ធ្វើ​កូដកម្ម​ទាមទារ​ឲ្យ​ភាគី​ថៅកែ និង​អាជ្ញាធរ​គិតគូរ​លក្ខ​ខណ្ឌ​ការងារ​ ២​ចំណុច​ជា​មុន​សិន ទើប​ពួកគាត់​វិល​ចូល​ធ្វើ​ការ​វិញ។ ចំណែក​ខាង​ក្រុមហ៊ុន និង​សាលា​រាជធានី​ភ្នំពេញ​ថា ​ការ​ទាមទារ​របស់​កម្មករ​ មិន​ស្រប​តាម​ច្បាប់​ស្ដីពី​ការងារ ខណៈ​ក្រុមហ៊ុន​មិន​ទាន់​បិទ​ទ្វារ ឬ​បញ្ឈប់​ពួកគេ​ពី​ការងារ​នៅ​ឡើយ។

តំណាង​កម្មករ​ស៊ីនទ្រី លោក រ៉ង សារ៉ាយ ប្រាប់​អាស៊ី​សេរី​ នៅ​ថ្ងៃ​ទី​១២ តុលា ថា​ ការ​ព្រម​មិន​វិល​ចូល​ធ្វើការ​ប្រមូល​និង​ដឹក​សំរាម​ពី​ក្រុម​កម្មករ​ជាង​១​ពាន់​នាក់​នេះ ដោយ​សារ​តែ​ពួកគាត់​មិន​ជឿ​ទុក​ចិត្ត​ចំពោះ​ដំណោះស្រាយ​របស់​​ក្រុមហ៊ុន​ និង​រដ្ឋបាល​សាលា​រាជធានី​ភ្នំពេញ ដែល​បាន​ផ្ដល់​ឲ្យ​កន្លង​មក។

លោក​ បន្ត​ថា ខាង​កម្មករ​នៅ​តែ​ស្នើ​ភាគី​ក្រុមហ៊ុន​បញ្ចប់​កិច្ច​សន្យា​ការងារ​ ហើយ​ផ្ដល់​កញ្ចប់​ថវិកា​ ប្រាក់​បំណាច់​ឆ្នាំ​ និង​ប្រាក់​អតីតភាព​ការងារ​ជាមុន​សិន ទើប​ពួកគាត់​វិល​ចូល​ធ្វើការ​ជា​ធម្មតា​វិញ។ ជាង​ជួល​ជុល​ឡាន​ដឹក​សំរាម​រូប​នេះ បញ្ជាក់​ថា ប្រសិន​បើ​កម្មករ​មិន​ទទួល​បាន​ដំណោះស្រាយ​ពីរ​ចំណុច​ខាង​លើ​នេះ​ទេ ពួកគាត់​នឹង​មិន​ចេញ​ទៅ​ប្រមូល​សំរាម​នោះ​ទេ៖ «សេចក្ដី​ព្រួយ​បារម្ភ​របស់​ពួក​គាត់​ហ្នឹង គឺ​ស្ថិត​លើ​ចំណុច​ហ្នឹង។ គាត់​ទាមទារ​ទទូច​សូម​ឲ្យ​ភាគី​ពាក់ព័ន្ធ មិន​ថា​ក្រុមហ៊ុន និង​សាលា​ក្រុង​ទេ គាត់​អត់​ដឹង​ទេ។ គាត់​ដឹង​តែ​ទាមទារ​២​ចំណុច​ហ្នឹង​ សុំ​ឲ្យ​មាន​ការ​គិត​ជា​កញ្ចប់​ហើយ​បញ្ចប់​កិច្ច​សន្យា​ជាមួយ​ពួកគាត់ រួច​ហើយ​គាត់​នឹង​ចាប់​ផ្ដើម​សារ​ជាថ្មី តែ​ប៉ុណ្ណឹង​ទេ»

អនុ​ប្រធាន​ក្រុមហ៊ុន​ស៊ីនទ្រី ឧកញ៉ា សុខ ហួត មានប្រសាសន៍​ថា​ ការ​ទាមទារ​របស់​កម្មករ​នៅ​ពេល​នេះ គឺ​ផ្ទុយ​ពី​ច្បាប់​ស្ដី​ការងារ​ និង​ប្រាសចាក​ពី​លទ្ធ​ផល​កំណត់​ហេតុ ដែល​ភាគី​ពាក់ព័ន្ធ​ទាំង​អស់​ចូល​រួម​ដំណោះស្រាយ​ កាល​ពី​ថ្ងៃ​ទី៧ ខែ​តុលា។

លោក បន្ត​ថា​ ខាង​ភាគី​មិន​អាច​ផ្ដល់​ជូន​តាម​អ្វី​ដែល​ក្រុម​កម្មករ​ស្នើ​សុំ​បាន​ទេ ព្រោះ​ថា​ក្រុមហ៊ុន​នៅ​តែ​ដំណើរ​ជា​ធម្មតា ហើយ​ក៏​មិន​បាន​បញ្ឈប់​កម្មករ​ណា​ម្នាក់​ចេញ​ពី​ការងារ​ដែរ ។ លោក​អំពាវនាវ​ដល់​កម្មករ​ដែល​កំពុង​ធ្វើ​កូដកម្ម​វិល​ចូល​ធ្វើការ​វិញ ដើម្បី​ប្រយោជន៍​ការងារ​ទៅ​ថ្ងៃ​មុខ​ និង​ជួយ​សំអាត​ទីក្រុង​ភ្នំពេញ​ឲ្យ​មាន​សោភ័ណភាព​ស្អាត​ឡើង​វិញ៖ «ការ​ទាមទារ​របស់​គាត់​ គឺ​មិន​អាច​ធ្វើ​អ្វី​បាន ផ្អែក​តាម​ច្បាប់​ស្ដី​ពី​ការងារ។ ក្រុមហ៊ុន​មិន​ទាន់​បញ្ឈប់​គាត់​ផង គាត់​ទាមទារ​សុំ​ឲ្យ​ក្រុមហ៊ុន​បញ្ឈប់ ហើយ​បង់​លុយ​ជូន​គាត់។ ខ្ញុំ​ជឿ​ថា​ប្រទេស​ណា ក្រុមហ៊ុន​ណា​ក៏​មិន​អាច​ធ្វើ​ទៅ​កើត​ដែរ។ អ៊ីចឹង! មិន​ទាន់​បញ្ឈប់​ផង​ គាត់​ទាមទារ​ប្រាក់​បំណាច់​ ប្រាក់​បញ្ឈប់​ គឺ​អត់​ត្រឹមត្រូវ»

ទាក់​ទង​នឹង​ការ​ធ្វើ​កូដកម្ម​អស់​រយៈ​១០​ថ្ងៃ​មក​នេះ រដ្ឋបាល​សាលា​រាជធានី​ភ្នំពេញ ចេញ​លិខិត​មួយ​នៅ​ថ្ងៃ​ទី១២​ តុលា​ថា កម្មករ​ផ្នែក​បើកបរ និង​ផ្នែក​ប្រមូល​សំរាម នៅ​តែ​បន្ត​ធ្វើការ​ទាមទារ​ខុស​ច្បាប់ បើ​ទោះបី​ជា​សាលា​រាជធានី​ភ្នំពេញ បាន​ផ្ដល់​ដំណោះស្រាយ​វិវាទ​ការងារ​មួយ​នេះ ដោយ​ធានា​និរន្តរភាព​និង​អត្ថប្រយោជន៍​ការងារ​ជូន​កម្មករ​ក៏ដោយ។

សាលា​រាជធានី​ភ្នំពេញ​បញ្ជាក់​ថា ប្រសិន​បើ​កម្មករ​នៅ​តែ​បន្ត​ទាមទារ​អត្ថប្រយោជន៍​នា​នា​ខុស​ពី​ច្បាប់​ការងារ​នោះ សាលា​ក្រុង​មិន​អាច​ធ្វើ​អន្តរាគមន៍​ដោះ​ស្រាយ​បញ្ហា​ជូន​កម្មករ​បាន​ឡើយ។ សាលា​រាជ​ធានី​ភ្នំពេញ​នៅ​តែ​អំពាវនាវ​ដល់​កម្មករ​ឲ្យ​បញ្ឈប់​ការ​ធ្វើ​កូដកម្ម​ត​ទៅ​ទៀត និង​វិល​ចូល​ធ្វើការ​តាម​វេន​របស់​ខ្លួន​វិញ ដើម្បី​កុំ​ឲ្យ​បាត់​អត្ថប្រយោជន៍​ការងារ​របស់​ពួកគេ​ដែល​មាន​ចែង​ក្នុង​ច្បាប់។

កាល​ពី​ថ្ងៃ​ទី​៧​ ខែ​តុលា អភិបាល​រាជធានី​ភ្នំពេញ លោក ឃួង ស្រេង បាន​សន្យា​នឹង​កម្មករ​ ដោយ​មាន​លាយលក្ខណ៍​អក្សរ​ថា ភាគី​ក្រុមហ៊ុន​ទទួល​ដោះ​ស្រាយ​តាម​ច្បាប់​ស្ដីពី​ការងារ ហើយ​រដ្ឋបាល​រាជធានី​ភ្នំពេញ ជា​អ្នក​ធានា​ខុស​ត្រូវ។ សាលា​រាជធានី​ភ្នំពេញ ធានា​រក្សា​ការងារ​ជូន​កម្មករ​មិន​ឲ្យ​បាត់បង់​ឡើយ ទោះបីជា​ក្រុមហ៊ុន​ស៊ីនទ្រី ដេញ​ថ្លៃ​បាន ឬ​មិន​បាន​ក៏ដោយ។

បើ​ទោះ​បី​ជា​មាន​ដំណោះស្រាយ​យ៉ាង​នេះ​ក្ដី ក្រុម​កម្មករ​ស៊ីនទ្រី​នៅ​តែ​មិន​ព្រម​ចូល​ធ្វើ​ការ ដោយ​ប្រកាន់​ជំហរ​ចង់បាន​ដំណោះស្រាយ ៥ចំណុច រួម​មាន​ ប្រាក់​បំណាច់​អតីតភាព ប្រាក់​សំណង​ជំងឺ​ចិត្ត ប្រាក់​ជួស​ការ​ជូន​ដំណឹង ប្រាក់​ខែ​ចុង​ក្រោយ និង​ប្រាក់​ឈប់​សម្រាក​ប្រចាំ​ឆ្នាំ​នៅ​សល់។

ប្រាក់​ឈ្នួល​កម្មករ​បោស​សំរាម​តាម​ផ្លូវ​ក្នុង​ម្នាក់​ គឺ​ចន្លោះ​ពី ៦០ម៉ឺន​ដល់ ៧០ម៉ឺន​រៀល។ កម្មករ​កើប​សំរាម​ទទួល​បាន​ប្រាក់​ឈ្នួល​ ចាប់​ពី ៧០ម៉ឺន​ដល់ ៨០ម៉ឺន​រៀល ហើយ​អ្នក​បើក​ឡាន​ដឹក​សំរាម​ គឺ​ទទួល​បាន​ពី​២៥០​ដុល្លារ​ដល់ ៣០០​ដុល្លារ។

ប្រធាន​សហព័ន្ធ​សហជីព​កម្មករ និយោជិក​​វិស័យ​ទេសចរណ៍​កម្ពុជា លោក ទូច កុសល ឲ្យ​ដឹង​ថា ក្រោយ​ពី​មាន​ដំណោះស្រាយ​កាល​ពី​ថ្ងៃ​ទី៧ តុលា លោក​បាន​ពន្យល់​ផ្លូវ​ច្បាប់​ដល់​កម្មករ​ដែល​ធ្វើការ​តវ៉ា​ទាំង​អស់​ថា ថា​ការ​ទាមទារ​ប្រាក់​ឈ្នួល​និង​លក្ខខណ្ឌ​ការងារ​ផ្សេង​ទៀត​ នៅ​ពេល​នេះ គឺ​ធ្វើ​មិន​ត្រឹមត្រូវ​តាម​ច្បាប់​នោះ​ទេ ដោយ​សារ​តែ​ក្រុមហ៊ុន​មិន​ទាន់​បិទទ្វារ ឬ​បញ្ឈប់​កម្មករ​ចេញ​ពី​ការងារ​នៅ​ឡើយ។

លោក​ បន្ត​ថា​ មាន​កម្មករ​មួយ​ចំនួន​មិន​ពេញចិត្ត​នឹង​ការ​និយាយ​របស់​លោក​ឡើយ ដោយ​សារ​ពួកគាត់​គិត​ថា​ លោក​មិន​អាច​ជួយ​ស្វែង​រក​ដំណោះស្រាយ​ដូច​បំណង​របស់​ពួកគាត់​បាន។ លោក​ស្នើ​ឲ្យ​ខាង​កម្មករ​ចូល​ធ្វើការ​វិញ ដើម្បី​រក្សា​ស្ថេរ​ភាព​ការងារ​​ត​ទៅ​ទៀត និង​ជួយ​ប្រមូល​សំរាម​សំអាត​ទីក្រុង​ឲ្យបាន​ស្អាត​ឡើង​វិញ៖ «ឆ្លៀត​ក្នុង​ឱកាស​នេះ​ដែរ ខ្ញុំ​ចង់​ផ្ញើ​សារ​ទៅ​ដល់​បង​ប្អូន​កម្មករ​ទាំង​អស់​ដែល​ធ្វើ​ការ​នៅ​ក្នុង​ក្រុមហ៊ុន​ស៊ីន​ទ្រី​ ខេម​បូឌា​ ហ្នឹង។ សូម​ឲ្យ​បង​ប្អូន​ចូល​ធ្វើការ​ងារ​វិញ​ទៅ អត្ថប្រយោជន៍​របស់​បង​ប្អូន​នឹង​មិន​បាត់​បង់​ទេ។ ពេល​ដែល​ក្រុមហ៊ុន​ស៊ីនទ្រី ដេញ​មិន​បាន​ ឬ​បាន​ចំណែក​ណាមួយ​នោះ ក្រុមហ៊ុន​ស៊ីនទ្រី កាត់​បន្ថយ​បុគ្គលិក​ ក្រុមហ៊ុន​នឹង​ទូទាត់​ស្រប​ទៅ​តាម​ច្បាប់ ហើយ​មាន​អភិបាល​រាជ​ធានី​ភ្នំពេញ លោក​បាន​ដឹង​ឮ​ផង។ មួយ​ទៀត សូម​បង​ប្អូន​កុំ​មាន​ព្រួយ​បារម្ភ​ទៅ​លើ​ស្ថេរ​ភាព​ការងារ ពី​ព្រោះ​ឯក​ឧត្ដម​ក៏​បាន​សន្យា​ក្នុង​កំណត់​ដែរ​ថា បើ​ក្រុមហ៊ុន​កាត់​បន្ថយ​បុគ្គលិក ឯកឧត្ដម​នឹង​រៀប​ចំ​ឲ្យ​ក្រុមហ៊ុន ២ ផ្សេង​ទៀត​ ដែល​ដេញ​បាន​នេះ ទទួល​យក​បង​ប្អូន​ចូល​ធ្វើ​ការងារ​វិញ»

ក្នុង​ដំណាក់កាល​នេះ ប្រធាន​សហព័ន្ធ​សហជីព​កម្មករ និយោជិក​​វិស័យ​ទេសចរណ៍​កម្ពុជា លោក ទូច កុសល យល់​ថា ក្រុម​កម្មករ​គួរ​ពិភាក្សា​គ្នា ហើយ​ងាក​មក​ចូល​ធ្វើការ​ជា​ធម្មតា​វិញ ដើម្បី​រក្សា​ស្ថេរ​ភាព​ការងារ​របស់​ពួកគេ​ និង​បន្ត​តាម​ដាន​ព័ត៌មាន​​ដេញថ្លៃ​នៅ​ពេល​ខាង​មុខ ដែល​មាន​ក្រុមហ៊ុន​ចំនួន ៣ ប្រជែង​គ្នា ក្នុង​សេវា​ប្រមូល​សំរាម​នៅ​រាជ​ធានី​ភ្នំពេញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល