អង្គការ-សមាគម សហជីព គ្រោង​ជួបគ្នា​រំលឹក​វិញ្ញាណក្ខន្ធ និង​បង្សុកូល​ជូន​បណ្ឌិត កែម ឡី នៅ​ស្ដុប​បូកគោ ​ថ្ងៃ​ទី១០ កក្កដា

ដោយ ថា ថៃ
2022.07.08
Share on WhatsApp
Share on WhatsApp
អង្គការ-សមាគម សហជីព គ្រោង​ជួបគ្នា​រំលឹក​វិញ្ញាណក្ខន្ធ និង​បង្សុកូល​ជូន​បណ្ឌិត កែម ឡី នៅ​ស្ដុប​បូកគោ ​ថ្ងៃ​ទី១០ កក្កដា
Photo: RFA

ក្រុម​មន្ត្រី​អង្គការ-សមាគម សហជីព គ្រោង​ជួបជុំ​គ្នា ដើម្បី​រំលឹក​វិញ្ញាណក្ខន្ធ និង​បង្សុកូល​តាម​បែប​ព្រះពុទ្ធសាសនា ជូន​បណ្ឌិត កែម ឡី នៅ​ស្ដុប​បូកគោ ដែល​ជា​កន្លែង​ឃាតកម្ម នៅ​ថ្ងៃ​ទី១០ ខែកក្កដា។ កម្មវិធី​ជួបជុំ​នៅ​ស្តុប​បូកគោ​នោះ ធ្វើឡើងនៅម៉ោង៨ព្រឹក។ បន្ទាប់​មក​ពួក​គាត់ នឹង​ទៅ​ជួបជុំ​គ្នា​នៅ​ការិយាល័យ​ផ្ទះ​សាមគ្គី នៅម៉ោង១០ ព្រឹកដោយនិមិត្តព្រះសង្ឃ២អង្គ បង្សុកូល​ឧទ្ទិស​កុសល​ជូន​បណ្ឌិត កែម ឡី។ ពិធី​នោះ ក៏​មាន​តំណាង​អង្គការ​សង្គម​ស៊ីវិល ថ្លែង​សារ​ទៅ​កាន់​ក្រុម​អ្នកសារព័ត៌មាន អំពី​ការ​បន្ត​ទាមទារ​យុត្តិធម៌​ពេញលេញ​សម្រាប់​ក្រុម​គ្រួសារ និង​ជន​រង​គ្រោះ។

ជាន់​ខ្ពស់​ផ្នែក​ប្រព័ន្ធ​ផ្សព្វផ្សាយ​នៃ​សមាគម​បណ្ដាញ​យុវជន​កម្ពុជា (CYN) លោក ម៉ា ចិត្រា ឲ្យ​ដឹង​ថា ពិធី​ជួបជុំ​បែប​ពុទ្ធសាសនា​នេះ មិន​បាន​ដាក់​លិខិត​សុំ​ការ​អនុញ្ញាត​ពី​អាជ្ញាធរ​នោះ​ទេ ព្រោះ​នេះ​ជា​ការ​អនុវត្ត​សិទ្ធិ​សេរីភាព​ស្រប​តាម​ច្បាប់ ហើយ​ពិធី​នេះ ក៏​មិន​កំណត់​អ្នក​ចូលរួម​ដែរ។លោក សង្ឃឹមថា អាជ្ញាធរ នឹង​មិន​រារាំង​ពិធី​ជួបជុំ​តាម​បែប​ពុទ្ធសាសនា​របស់​ក្រុម​អង្គការ-សមាគម​នោះ​ទេ៖ «ខ្ញុំ​គិត​ថា បើសិន​ជា​រដ្ឋាភិបាល​ឆ្លាត គាត់​ប្រាកដ​ជា​មិន​រារាំង​ទេ ព្រោះ​ការ​ធ្វើ​ពិធី​រម្លឹក​ខួប​នេះ យ៉ាង​ច្រើន​ចំណាយ​ពេល ១ម៉ោង​ទៅ ២ម៉ោង ហើយ​ចប់​កម្មវិធី យើង​ទៅ​ផ្ទះ​រៀង​ខ្លួន ហើយ​បើសិន​ជា​មាន​ការ​រារាំង​វា​ជា​រូបភាព​មួយ អាក្រក់​មើល​សម្រាប់​សាធារណជន។ខ្ញុំ​គិត​ថា ជា​រឿង​ល្អ ប្រសិន​បើ​រដ្ឋាភិបាល ព្យាយាម រក យុត្តិធម៌​ជូន​បណ្ឌិត កែម ឡី វា​ជា​ជាង​ការ​រារាំង ព្រោះ​អី​ទោះ​បី​ជា​គាត់​រារាំង ក៏​គេ​នៅ​តែ​ធ្វើ​ដែរ។ នេះ​បើ​តាម​យើង​មើល»

ទាក់ទង​រឿង​នេះ​វិទ្យុ​អាស៊ី​សេរី មិន​អាច​សុំ​ការ​ឆ្លើយតប​ពី​អ្នក​នាំ​ពាក្យ​សាលា​រាជធានី​ភ្នំពេញ លោក ម៉េត មាសភក្តី បាន​ទេ ដោយសារ​ទូរស័ព្ទ​ចូល​ពុំ​មាន​អ្នក​ទទួល។ទោះជា យ៉ាងណា កន្លង​មក អាជ្ញាធរ​រដ្ឋាភិបាល​លោក ហ៊ុន សែន តែងតែ​រារាំង និង​ចាប់​ខ្លួន អ្នក​ប្រារព្ធ​ខួប និង​ថែម​ទាំង​ហាម​មិន​ឲ្យ​ពលរដ្ឋ​ពាក់​អាវ​មាន​រូប និង​ទស្សនៈ​បណ្ឌិត កែម ឡី ទៀត​ផង។

កាល​ពី​ថ្ងៃ​ទី១០ ខែកក្កដា ឆ្នាំ២០១៦ បណ្ឌិត កែម ឡី ដែល​ជា​អ្នក​អត្ថាធិប្បាយ​បញ្ហា​សង្គម និង​នយោបាយ​ដ៏​លេច​ធ្លោ ត្រូវ​បាន​ឃាតក​បាញ់​សម្លាប់​ក្នុង​ថ្លុក​ឈាម​នៅ​ហាង​កាហ្វេ​មួយ​កន្លែង​នៅ​ក្នុង​ស្ថានីយ​ប្រេង​ឥន្ធនៈ នៅ​កណ្ដាល​រាជធានី​ភ្នំពេញ។ ការ​បាញ់​ប្រហារ​នេះ កើត​ឡើង​ក្រោយ​ពី​អ្នក​វិភាគ​រូប​នេះ​បាន​ផ្តល់​ការ​អធិប្បាយ​ដល់​បណ្ដាញ​ព័ត៌មាន​អំពី​ការ​កាន់កាប់​ទ្រព្យ​សម្បត្តិ​ដ៏​ច្រើន​សន្ធឹកសន្ធាប់​របស់​ក្រុម​គ្រួសារ​លោក​នាយក​រដ្ឋមន្ត្រី ហ៊ុន សែន ដែល​លាត​ត្រដាង​នៅ​ក្នុង​របាយការណ៍​អង្គការ​ឃ្លាំមើល​ពិភពលោក គ្លូបលវីតណេស (Global Witness)

រហូត​មក​ដល់​ពេល​នេះ រដ្ឋាភិបាល លោក ហ៊ុន សែន នៅ​តែ​ខកខាន​ក្នុង​ការ​ស្វែងរក​យុត្តិធម៌​ជូន បណ្ឌិត កែម ឡី និង​ក្រុម​គ្រួសារ​របស់​គាត់។ ក្នុង​ឱកាស​ប្រារព្ធ​ខួប ៦ឆ្នាំ​នេះ ក្រុម​អង្គការ​សង្គម​ស៊ីវិល និង​អ្នក​គោរព​ស្រឡាញ់​បណ្ឌិត កែម ឡី នៅ​តែ​បន្ត​ទាមទារ​ឲ្យ​អាជ្ញាធរ​វែក​មុខ​ចាប់​ជន​ដៃដល់​ពិត​ប្រាកដ និង​អ្នក​ពាក់ព័ន្ធ ជា​ពិសេស អ្នក​បញ្ជា​ពី​ក្រោយ​ខ្នង យក​មក​កាត់​ទោស​តាម​ច្បាប់ ដើម្បី​ផ្តល់​យុត្តិធម៌​សម្រាប់​ជន​រង​គ្រោះ៕



កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។