ជនពិការដែលជាអតីតយុទ្ធជនស្នើរដ្ឋាភិបាលបើកប្រាក់ជំនួយសង្គមដល់ពួកគាត់ឱ្យបានទៀងទាត់
2024.12.03
ពិធីចែកអង្ករដល់អតីតយុទ្ធជនគ្រួសារយោធិន និងប្រជាពលរដ្ឋក្នុងខេត្តពោធិ៍សាត់ កាលពីថ្ងៃទី៤ ខែកក្កដា ឆ្នាំ២០២៤។
រូប៖ ហ្វេសប៊ុកលោក ហ៊ុន ម៉ាណែត
អតីតទាហានមានពិការភាពស្នើរដ្ឋាភិបាលបើកប្រាក់ជំនួយសង្គមសម្រាប់ខែវិច្ឆិកាកន្លងទៅឱ្យបានឆាប់ ខណៈពួកគាត់រំពឹងតែទៅលើប្រាក់ជំនួយសង្គមនេះ ដើម្បីដោះស្រាយជីវភាព និងមើលជំងឺ។ មន្ត្រីសង្គមស៊ីវិលថា រដ្ឋាភិបាលគួរពិនិត្យមូលហេតុដែលនាំឱ្យមានភាពយឺតយ៉ាវ និងដោះស្រាយបញ្ហានេះឱ្យបានឆាប់រហ័ស។
ការលើកឡើងរបស់ជនពិការដែលជាអតីតយុទ្ធជន ក្រោយសេចក្ដីជូនដំណឹងរបស់មូលនិធិជាតិជំនួយសង្គមប្រកាសថា ការបើកប្រាក់ជាលើកទី២ ប្រចាំខែវិច្ឆិកា ដល់អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុកនឹងត្រូវពន្យារ ទៅសប្តាហ៍ទី១ ខែធ្នូវិញ។
អតីតទាហានមានពិការភាព លោក ចិត្រ សម្ព័ន្ធ លើកឡើងថា អស់រយៈពេលជិតមួយខែហើយដែលរដ្ឋាភិបាលបានពន្យារពេលបើកប្រាក់ជំនួយសង្គមដល់រូបលោក និងអតីតទាហានមានពិការភាពផ្សេងទៀត។ លោកថា ការយឺតយ៉ាវបើកប្រាក់ឧបត្ថម្ភធ្វើឱ្យប៉ះពាល់យ៉ាងខ្លាំងដល់រូបលោកដែលមានជំងឺប្រចាំកាយមិនមានប្រាក់ទិញអាហារ និងមិនអាចធ្វើការប្រកបចិញ្ចឹមជីវិតបាន។
លោក ចិត្រ សម្ព័ន្ធ ថា សម្រាប់ប្រាក់ជំនួយសង្គមរបស់លោកដែលជាអតីតទាហានធ្លាប់បម្រើប្រទេសជាតិ កាលពី២០ ទៅ៣០ឆ្នាំ មុនទទួលបានប្រាក់តិចជាងទាហានដែលទើបចូលនិវត្តន៍ប៉ុន្មានឆ្នាំកន្លងទៅថ្មីនេះ។ លោកស្នើដល់រដ្ឋាភិបាលឱ្យគិតគូរប្រាក់ជំនួយសង្គមឱ្យបានសមរម្យ ស្មើភាពគ្នា និងបើកប្រាក់ឱ្យបានទៀងទាត់តាមកាលកំណត់។
លោក ចិត្រ សម្ព័ន្ធ៖ «ខ្ញុំវ៉ៃ[ផ្ញើសារ]ទៅក្រសួង វ៉ៃ[ផ្ញើសារ] ហ៊ុន ម៉ាណែត គេ ចូលមើលតែគេមិនតបយើង អ៊ីចឹងនិយាយមកអ្នកពិការជាតិ បាក់បែកដេកមូសខាំ ដាច់ជើង ដាច់ដៃ ទាំងពីរទាំងបីមានធ្វើអីកើត ពឹងតែប្រាក់ខែមួយមុខ រដ្ឋមិនគួរណាយឺតយ៉ាវដល់ពួកគាត់ទេ ចាស់ៗ ហើយទីពីរក៏មិនដឹងថាមានអាជ្ញាធរដែនដីណាដែលជួយបាន»។
អតីតទាហានមានពិការភាពម្នាក់ទៀតថ្លែងដោយសុំមិនបញ្ចេញឈ្មោះលើកឡើងថា រដ្ឋាភិបាលមិនទាន់បានគិតគូរដល់អតីតទាហានដែលមានពិការភាពជំនាន់មុនឱ្យបានដិតដល់នោះទេ លោកថា សម្រាប់ប្រាក់ដែលលោកទទួលប្រមាណ ១លានរៀល ឬស្មើប្រមាណ២៥០ ដុល្លារក្នុងមួយខែនេះគឺមានចំនួនតិចតួច សម្រាប់ផ្គត់ផ្គង់ការចំណាយផ្សេងៗ រួមទាំងការសិក្សារបស់កូនៗផង។ លោកថា អតីតទាហានមានពិការភាពបានលះបង់ជាច្រើនដើម្បីការពារទឹកដី និងប្រជាជន ដូច្នេះរដ្ឋាភិបាលគួរយកចិត្តទុកដាក់ជាងនេះ។
អតីតទាហានមានពិការភាព៖ «វាមានគម្លាតខុសគ្នាអ្នកចេញក្រោយវាចេញហួសអ្នកមុន ដោយសារអីដោយសាររាជរដ្ឋាភិបាលគាត់ដំឡើងប្រាក់បៀវត្សរ៍មូលដ្ឋាន ដំឡើងប្រាក់ហូប ដំឡើងប្រាក់អ៊ីចឹងទៅវាធ្វើឱ្យចេញក្រោយបានច្រើន អ្នកចេញមុនបាន ហើយអ្នកចេញមុនបានតិច ហើយអ្នកចេញមុនភាគច្រើនគាត់ជួបការលំបាកច្រើនគាត់ជាអ្នកត្រួសត្រាយផ្លូវប្រទេសជាតិទាំងពីបាតដៃទទេមក ហើយដល់ពេលអ្នកក្រោយមានសូវពិបាកអី»។
ទាក់ទងនឹងបញ្ហានេះ មន្ត្រីដែលធ្វើការនៅមូលនិធិជាតិជំនួយសង្គមថ្លែងដោយសុំមិនបញ្ចេញឈ្មោះថា ពេលវេលានៃការបើកប្រាក់នេះនៅមិនទាន់កំណត់ជាក់លាក់នៅឡើយនោះទេ តែទោះជាយ៉ាងណាអ្នកស្រីថាមូលនិធិជាតិជំនួយសង្គមដែលស្ថិតក្រោមក្រសួងសង្គមកិច្ច អតីតយុទ្ធជន និងយុវនីតិសម្បទានឹងពន្លឿនឱ្យបានឆាប់តាមដែលអាចធ្វើទៅបាន។
មន្ត្រីដែលធ្វើការនៅមូលនិធិជាតិជំនួយសង្គម៖ «ទាក់ទងនឹងការបរិច្ឆេទច្បាស់លាស់ហ្នឹង ខាងយើងនឹងបញ្ជាក់នៅក្នុងសេចក្ដីជូនដំណឹងនៅក្នុងសប្ដាហ៍ទីមួយហ្នឹងដែរថា នឹងជម្រាបជូននៅពេល ក្រោយ ដោយសារជំនាញគាត់កំពុងដុតដៃដុតជើងដែរ តែវាអត់ទាន់ចេញ»។
ក្នុងឱកាសទិវាជនមានពិការភាពកម្ពុជាលើកទី២៦នេះដែរ នាយករដ្ឋមន្ត្រី លោក ហ៊ុន ម៉ាណែត បានចេញសារលិខិតកាលពីថ្ងៃទី២៨ ខែវិច្ឆិកា ប្រកាសដាក់ឱ្យអនុវត្តជាផ្លូវការនូវ «ផែនការយុទ្ធសាស្ត្រជាតិស្ដីពីពិការភាព ឆ្នាំ២០២៤-២០២៨» ដោយអំពាវនាវដល់គ្រប់តួអង្គពាក់ព័ន្ធទាំងអស់ ត្រូវអនុវត្តបានជោគជ័យដើម្បីកំណើន ការងារ សមធម៌ ប្រសិទ្ធភាព និងចិរភាព។ លោក ហ៊ុន ម៉ាណែត ថាដើម្បីធានាឱ្យបានកំណើនសេដ្ឋកិច្ច បង្កើតការងារឱ្យបានកាន់តែច្រើន សម្រេចឱ្យបាននូវគោលដៅកាត់បន្ថយភាពក្រីក្រ មន្ត្រីគ្រប់រូបត្រូវបន្តពង្រឹងសមត្ថភាពអភិបាលកិច្ច និងលើកកម្ពស់គុណភាពស្ថាប័ន ធានាឱ្យបាននូវចិរភាពនៃការអភិវឌ្ឍសង្គមសេដ្ឋកិច្ច។
ជុំវិញករណីនេះដែរ ប្រធានអង្គការសម្ព័ន្ធភាពការពារសិទ្ធិមនុស្សហៅកាត់ថា ច្រាក់ (CHRAC) លោក រស់ សុដ្ឋា មានប្រសាសន៍ថា ជនពិការដែលជាអតីតយុទ្ធជនគឺជាក្រុមដែលងាយរងគ្រោះ ដោយសារពួកគាត់មិនមានអ្វីរំពឹងក្រៅពីប្រាក់ឧបត្ថម្ភដែលរដ្ឋាភិបាលផ្ដល់ឱ្យ។ លោកថា រដ្ឋាភិបាលគួរតែពិនិត្យលើដំណើរការបើកប្រាក់ខែឡើងវិញដើម្បីធានាថាប្រាក់ជំនួយសង្គមនេះបានដល់ដៃពួកគាត់ជាទៀងទាត់។
លោក រស់ សុដ្ឋា៖ «ស្ថាប័នមានសមត្ថកិច្ចគួរតែមានការពន្យល់ជម្រាបគាត់ឱ្យបានច្បាស់លាស់អំពីការទទួលបានប្រាក់ខែ ហើយអាចពិនិត្យទាក់ទងនឹងកត្តាផ្ទៃក្នុង តើមូលហេតុអីដែលនាំឱ្យមានការយឺតយ៉ាវ ហើយដោយសារកត្តាហិរញ្ញវត្ថុរបស់រដ្ឋាភិបាលខ្វះថវិកា ឬក៏មកពីស្អី បើសិនជាមានភាពមិនប្រក្រតីលោកក៏ជួយអន្តរាគមន៍ផងណា»។
បច្ចុប្បន្នជនមានពិការភាពដែលក្នុងនោះមានទាំងជនពិការដែលជាអតីតយុទ្ធជនមានសរុបចំនួនជាង៣ សែន (៣៥១.២៧៦) នាក់ ក្នុងនោះស្ត្រីចំនួនជាង ១សែន (១៦៦.០៣៤)នាក់ ដែលរដ្ឋាភិបាលបានកំណត់អត្តសញ្ញាណកម្មតាមរយៈជនបង្គោល ឃុំ/សង្កាត់ទូទាំងប្រទេស ហើយបានផ្ដល់ប័ណ្ណសម្គាល់ជនមានពិការភាពបានចំនួនជាង ២សែន (២៥០.៧៣០) ប័ណ្ណ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
អត្ថបទពេញនិយម
សង្គម
- មនុស្ស ៤នាក់ស្លាប់ និង ៥នាក់ទៀតរបួសធ្ងន់ ពេលប្រជ្រៀតគ្នាយកអាំងប៉ាវនៅភូមិគ្រឹះលោក សុខ គង់
- ជនសង្ស័យ៥នាក់ត្រូវបានឃាត់ខ្លួនករណីក្លែងបន្លំឯកសណ្ឋានសមត្ថកិច្ចដើរជំរិតទារប្រាក់
- អ្នកឃ្លាំមើលរិះគន់ថា អាជ្ញាធរមិនបានបង្ក្រាបមេខ្លោងបនល្បែងធំៗ ទើបទីតាំងបនល្បែងតាមអនឡាញរីករាលដាលខ្លាំង
- កម្មកររោងចក្រ គ្លូរី នីតវែរ នៅខេត្តកណ្ដាល តវ៉ាបិទផ្លូវជាតិ៤ ទាមទារឲ្យថៅកែបើកប្រាក់បំណាច់ឆ្នាំ
- អាជ្ញាធរមីនកម្ពុជាបើកការស៊ើបអង្កេតលើករណីផ្ទុះមីនតោន នៅខេត្តឧត្តរមានជ័យដែលសម្លាប់អ្នកជំនាញដោះមីន២នាក់