អាជ្ញាធរជាតិប្រយុទ្ធ ប្រឆាំងគ្រឿងញៀន ឲ្យដឹងថា រយៈពេល១១ខែ ឆ្នាំនេះ សមត្ថកិច្ច បានឃាត់ខ្លួនមនុស្សពាក់ព័ន្ធគ្រឿងញៀនជាង ១ម៉ឺន ៤ពាន់នាក់ និងរឹបអូសគ្រឿងញៀនជាង ៥រយគីឡូក្រាម។ មន្ត្រីសិទ្ធិមនុស្សកត់សម្គាល់ថា បញ្ហាគ្រឿងញៀននៅតែបន្តរីករាលដាល ហើយជនសង្ស័យភាគច្រើនដែលត្រូវបានឃាត់ខ្លួន ជាបន្តបន្ទាប់គឺជាក្រុមជួញដូរ និងអ្នកប្រើប្រាស់តូចតាច ដូច្នេះអាជ្ញាធរគួរតែបង្កើនសមត្ថភាព និងវិធានការបង្ក្រាបទៅលើក្រុមអ្នកជួញដូរគ្រឿងញៀនធំៗ ទើបមានប្រសិទ្ធភាព។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោកវេជ្ជបណ្ឌិត មាស វិរិទ្ធិ ប្រាប់អាស៊ីសេរីថា បញ្ហាគ្រឿងញៀន នៅតែជាក្ដីព្រួយបារម្ភរបស់សមត្ថកិច្ចនៅឡើយ ទោះបីជាមានការបង្ក្រាប អស់ច្រើនករណីក្ដី។
លោក មាស វិរិទ្ធិ ឲ្យដឹងថា ចាប់ពីខែមករា ដល់ខែវិច្ឆិកា ឆ្នាំ២០១៨ កម្លាំងសមត្ថកិច្ចបង្ក្រាបបទល្មើសគ្រឿងញៀនជាង ៧ពាន់ករណី ដោយឃាត់ខ្លួនជនសង្ស័យជាង ១ម៉ឺន ៤ពាន់នាក់ និងរឹបអូស គ្រឿងញៀនជាង៥រយគីឡូក្រាម។ លោកបន្តថា អាជ្ញាធរកំពុងគ្រប់គ្រងសភាពការណ៍គ្រឿងញៀន ហើយនឹងបន្តត្រួតត្រាគ្រឿងញៀន ដើម្បីទប់ស្កាត់កុំឲ្យមានរលករីករាលដាលនៃការប្រើប្រាស់គ្រឿងញៀនបន្តទៀត។
លោកជំរុញឲ្យអាជ្ញាធរមូលដ្ឋាន ខិតខំទប់ស្កាត់បទល្មើសគ្រឿងញៀនឲ្យមានប្រសិទ្ធភាព ដោយមិនចាំបាច់រង់ចាំបញ្ជាពីខាងថ្នាក់លើនោះទេ៖ «ឥឡូវនេះ វានៅតែកើតមានតែវាមិនមានជាលក្ខណធំៗទេ គឺវាថមថយថែមទៀត ស្របពេលដែលយើងដាក់ចេញនូវយុទ្ធនាការដោយការប្រើប្រាស់កម្លាំងនិងធនធានសរុបរបស់សង្គម ចូលរួមទាំងអស់គ្នា។ អ៊ីចឹងយើងនៅតែកៀរគរប្រជាពលរដ្ឋ អាណាព្យាបាល អោយមានការចូលរួមជាមួយអាជ្ញាធរមានសមត្ថកិច្ច និងដៃគួរពាក់ព័ន្ធនានាដោយសារគ្រឿងញៀនបញ្ហារួម»។
មន្ត្រីសិទ្ធិមនុស្សអះអាងថា យុវជនជាច្រើននៅតែបន្តរងគ្រោះដោយសារបញ្ហាគ្រឿងញៀន ដែលទាមទារឱ្យអាជ្ញាធរត្រូវដាក់ចេញនូវវិធានការជាក់លាក់ និងមានប្រសិទ្ធភាពជាងពេលបច្ចុប្បន្ន ខណៈបទល្មើសនេះមិនមានការថមថយចុះនៅឡើយ។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា ការ ចរាចរណ៍ជួញដូរគ្រឿងញៀននេះ ហាក់ដូចជាសំបូរបែបនិងច្រើនមែនទែន ព្រោះបើទោះបីជា សមត្ថកិច្ចបង្ក្រាបយ៉ាងណា ក៏នៅតែបន្តកើតមានដដែល។ លោកកត់សម្គាល់ឃើញថា ការបង្ក្រាបកន្លងមក គឺធ្វើបានតែអ្នកប្រើប្រាស់ និងអ្នកជួញដូរគ្រឿងញៀនតូចតាចប៉ុណ្ណោះ។
លោក សឹង សែនករុណា អំពាវនាវអោយកម្លាំងសមត្ថកិច្ច បន្តពង្រឹងការអនុវត្តវិធានការច្បាប់ ពង្រឹងសមត្ថភាព និងជំនាញបច្ចេកទេសរបស់សមត្ថកិច្ច ព្រមទាំងលុបបំបាត់អំពើពុករលួយ ទើប អាចធ្វើឲ្យយុទ្ធនាការបង្ក្រាបគ្រឿងញៀននេះ សម្រេចបានដោយជោគជ័យខ្លាំង៖ «ទោះបីជាអ្នកនោះមានអំណាច និងមានប្រាក់សូកប៉ាន់ក៏ដោយ ក៏ត្រូវតែចាត់វិធានការអោយស្មើភាពគ្នាដែរ ដើម្បីអោយពួកគាត់រាងចាល ហើយនៅពេលពួកគេអនុវត្តទោសនៅក្នុងពន្ធនាគារ គឺត្រូវតាមដានថាតើពួកគេអនុវត្តទោសត្រឹមត្រូវដែរទេ ជៀសវាងពេលដល់ពន្ធនាគារហើយ មានការរត់ការហើយអោយជនល្មើសចេញ ក្រៅដដែលជាហេតុធ្វើអោយពួកគាត់មិនរាងចាល ហើយប្រព្រឹត្តបទល្មើសដដែល។ ទន្ទឹមគ្នាត្រូវពិនិត្យមើលតំបន់ភូមិសាស្ត្រដែលចរាចរណ៍ចូលគ្រឿងញៀនដូចជាតំបន់ជាប់ប្រទេសឡាវ ជាដើម ព្រោះកន្លងមកធ្លាប់ចាប់បានគ្រឿងញៀនច្រើនគីឡូក្រាមដែរ»។
ច្បាប់ស្ដីពីការត្រួតពិនិត្យគ្រឿងញៀនត្រង់មាត្រា៤៥ ចែងថា ជនណាដែលប្រើប្រាស់ដោយខុសច្បាប់នូវសារធាតុញៀនតាមគ្រប់រូបភាព ត្រូវផ្ដន្ទាទោសដាក់ពន្ធនាគារពី ១ខែទៅ ៦ខែ និងពិន័យជាប្រាក់ពី ១សែនរៀលដល់ ១លានរៀល។ ក្នុងករណីមិនរាងចាល ត្រូវផ្ដន្ទាទោសដាក់ពន្ធនាគារពី ៦ខែដល់ ១ឆ្នាំ និងពិន័យជាប្រាក់ពី ១លានរៀលទៅ ២លានរៀល។
ដោយឡែកការរក្សាទុក ដឹកជញ្ជូន ឬជួញដូរដោយខុសច្បាប់នូវសារធាតុញៀន ជនល្មើសនឹងត្រូវបានផ្ដន្ទាទោសដាក់ពន្ធនាគារពី ២ឆ្នាំទៅ ៥ឆ្នាំ និងអាចត្រូវពិន័យជាប្រាក់ពី ៤លានរៀលទៅ ១០លានរៀល។ បើសិនជាបទល្មើសមានលក្ខណៈធ្ងន់ធ្ងរ អ្នកប្រព្រឹត្តិ អាចនឹងត្រូវផ្ដន្ទាទោសដាក់ពន្ធនាគារពី ៥ឆ្នាំដល់ ២០ឆ្នាំ និងពិន័យជាប្រាក់ពី ១០លានរៀលដល់ ៤០លានរៀល អាស្រ័យទៅតាមស្ថានទម្ងន់ទោស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។