មន្ត្រីសិទ្ធិមនុស្សទាមទារឱ្យរដ្ឋាភិបាលទទួលខុសត្រូវលើករណីមនុស្សដណ្ដើមអាំងប៉ាវនៅផ្ទះលោក សុខ គង់ ស្លាប់និងរបួស
2025.01.23

អ្នកការពារសិទ្ធិមនុស្ស និងអ្នកតាមដានស្ថានការណ៍នយោបាយ ទាមទារឱ្យរដ្ឋាភិបាលចេញមុខទទួលត្រូវលើករណីមនុស្សស្លាប់ និងរបួស ពេលដណ្ដើមអាំងប៉ាវ នៅផ្ទះលោកឧកញ៉ា សុខ គង់។
ពួកគេព្រួយបារម្ភថា ករណីនេះគ្មានអ្នកទទួលខុសត្រូវ ហើយទីបំផុតទៅ បានត្រឹមតែផ្ដល់លុយបន្តិចបន្តូចចូលបុណ្យគ្រួសារសព ហើយបិទបញ្ចប់សំណុំរឿង ដូចករណីរត់ជាន់គ្នានៅកោះពេជ្រកាលពីឆ្នាំ២០១០ ជាដើម។
ក្រុមអ្នកតាមដានស្ថានការណ៍នយោបាយ និងអ្នកការពារសិទ្ធិមនុស្សលើកឡើងថា សមត្ថកិច្ចប្រាប់អំពីមូលហេតុមនុស្សស្លាប់ ៤នាក់ និងរបួស ៥នាក់ ក្នុងពេលប្រជ្រៀតគ្នាដណ្ដើមអាំងប៉ាវពីឧកញ៉ា សុខ គង់ ថា មកពីបញ្ហាសុខភាពខ្សោយនោះ ជាការសន្និដ្ឋានលឿនពេក ហើយហាក់ដូចជាចង់គេចវេះពីការទទួលត្រូវ។
អ្នកអត្ថាធិប្បាយនយោបាយ លោក គឹម សុខ មានប្រសាសន៍ថា ជាទូទៅរដ្ឋាភិបាលត្រកូល ហ៊ុន តែងតែគេចវេះពីការទទួលត្រូវ។ លោកថា សមត្ថកិច្ចនៅក្នុងរបបដឹកនាំដោយត្រកូល ហ៊ុន តែងតែធ្វើសេចក្ដីសន្និដ្ឋានយ៉ាងឆាប់រហ័ស ក្នុងទិសដៅ ដើម្បីបិទបញ្ចប់សំណុំរឿង មិនថាអ្នកស្លាប់ដណ្ដើមអាំងប៉ាវនេះ ឬព្រឹត្តិការណ៍នៅកោះពេជ្រនោះទេ។
លោក គឹម សុខ៖ «កាលណាមានរឿងជាទម្លាប់របស់រដ្ឋាភិបាល តែងតែប្រើលេស ដើម្បីដោះបន្ទុក ដើម្បីគេចវេះពីការទទួលត្រូវរបស់ខ្លួនហើយ។ តែបញ្ហាសំខាន់ ទោះបីជាពលរដ្ឋ នៅក្នុងស្ថានភាពបែបណាក៏ដោយ គាត់ស្លាប់ដោយសារសុខភាពលាយឡំក៏ដោយ តែបរិយាកាសនៃការជាន់គ្នា គឺជារូបភាពអាក្រក់បំផុត។ អាក្រក់នៅត្រង់ថា បង្ហាញពីភាពក្រីក្រមែនទែនរបស់ប្រជាពលរដ្ឋខ្មែរ ដែលគាត់បាត់បង់សេចក្ដីថ្លៃថ្នូរ ទៅយកអាំងប៉ាវបន្តិចពីឧកញ៉ាត្រកូល ហ៊ុន ឧកញ៉ារកស៊ីមិនត្រឹមត្រូវនៅកម្ពុជា ហើយភាពក្រីក្រនេះបង្ហាញពីអសមត្ថភាព នៃការដឹកនាំរបស់ត្រកូល ហ៊ុន ច្បាស់ណាស់។ ម្លោះហើយ កុំយកលេសអីផ្សេងៗ ទៅបិទបាំងណា»។
ការលើកឡើងរបស់លោក គឹម សុខ នេះ ធ្វើឡើងបន្ទាប់ពីមានមនុស្សចំនួន ៤នាក់ បានស្លាប់ ពីរនាក់ជាស្ត្រី ដែលមានអាយុចន្លោះពីជាង ៣០ឆ្នាំទៅជាង ៧០ឆ្នាំ និង ៥នាក់ទៀតរងរបួស កំពុងសង្គ្រោះបន្ទាន់នៅមន្ទីរពេទ្យ នៅ ក្រោយពីបានប្រជ្រៀតដណ្ដើមអាំងប៉ាវ ដែលមានទឹកប្រាក់ប្រមាណ ៤ម៉ឺនរៀល ឬ ១០ដុល្លារ និងអង្ករ ២គីឡូហ្រ្គាម។ ហេតុការណ៍នេះបានកើតឡើងនៅខាងមុខភូមិគ្រឹះអ្នកឧកញ៉ា សុខ គង់ ស្ថិតនៅតាមបណ្ដោយផ្លូវ នរោត្ដម រាជធានីភ្នំពេញ កាលពីព្រឹកថ្ងៃទី២៣ ខែមករា។

នៅមុខផ្ទះលោក សុខ គង់ ចែកអំណោយនេះ សាលារាជធានីភ្នំពេញ ឬអាជ្ញាធរមូលដ្ឋាន ពុំបានរៀបចំសណ្ដាប់ធ្នាប់ឱ្យពលរដ្ឋឈរតម្រៀបជួរ ដើម្បីដើរផ្លាស់ប្ដូរគ្នា ទៅយកអាំងប៉ាវនៅក្នុងបរិវេណភូមិគ្រឹះលោក សុខ គង់ ឡើយ។
ព័ត៌មានចុងក្រោយ ដែលវិទ្យុអាស៊ីសេរីទទួលបាន មកទល់យប់ថ្ងៃទី២៣ មករានេះ សាកសពចំនួន ៣នាក់ ត្រូវបានគេបញ្ជូនទៅធ្វើបុណ្យនៅខែត្រតាកែវ និងម្នាក់នៅច្បារអំពៅ។ រីឯអ្នករងរបួស ៥នាក់ទៀត កំពុងសម្រាកព្យាបាលនៅមន្ទីរពេទ្យនៅឡើយ។
សាច់ញាតិជនរងគ្រោះ ដែលស្លាប់បានស្រែកទ្រហោយំស្ដាយស្រណោះ ចំពោះការបាត់បង់ជន្ទល់គ្រួសារ និងសមាជិករបស់ខ្លួន ដោយការដណ្ដើមគ្នារឿងលុយ ៤ម៉ឺនរៀលនេះ។ ពួកគាត់បញ្ជាក់ថា មូលហេតុចម្បង ដែលធ្វើឱ្យពួកគាត់នាំគ្នាទៅទទួលអំណោយពីអ្នកមានលុយមានអំណាចនេះ គឺដោយសារតែមានជីវភាពក្រីក្រ។
លោក សុខ គង់ បានប្រកាសផ្ដល់ក្ដារមឈូសដល់អ្នកស្លាប់ម្នាក់មួយ និងទឹកប្រាក់ដល់ក្រុមគ្រួសារជនរងគ្រោះម្នាក់ប្រមាណ ៦ពាន់ដុល្លារ ចំណែកអ្នករងរបួសទទួលបានទឹកប្រាក់ ៤លានរៀល ឬ ១ពាន់ដុល្លារ។
គិតមកទល់យប់ថ្ងៃទី២៣ មករានេះ រដ្ឋាភិបាលមិនទាន់ចេញសារណាមួយ បញ្ជាក់អំពីការទទួលខុសត្រូវ លើករណីនេះថា យ៉ាងណានៅឡើយទេ។
រីឯអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា បញ្ជាក់ប្រាប់វិទ្យុអាស៊ីសេរី កាលពីថ្ងៃទី២៣ ខែមករា ថា ជនរងគ្រោះចំនួន ៤នាក់បានស្លាប់នោះ ដោយសារតែពួកគាត់មានសុខភាពខ្សោយ និង រងការប្រជ្រៀតពីមនុស្សកុះករនៅខាងមុខផ្ទះលោក សុខ គង់។ លោកអះអាងថា សមត្ថកិច្ចមិនមានចំណាត់ការស្វែងរកអ្នកទទួលខុសត្រូវចំពោះការបាត់បង់ជីវិតមនុស្សចំនួន ៤នាក់នេះទេ។
លោក សំ វិច្ឆិកា៖ «តាមពិតទៅពាក់ព័ន្ធនឹងបញ្ហានេះគាត់ [លោក សុខ គង់] ជាអ្នកមានទឹកចិត្តសប្បុរសមានចិត្តជួយប្រជាពលរដ្ឋ និងអំណោយដែលជាទឹកចិត្តរបស់គាត់។ អ៊ីចឹងកិច្ចការងារនេះ គឺជាការងារដែលកើតឡើង គឺរឿងរ៉ាវបញ្ហាសុខភាព អត់មានពាក់ព័ន្ធនឹងរឿងអីផ្សេងៗ ទេ។ ការងារហ្នឹង យើងនឹងរៀបចំនូវអ្វី ដែលចូលរួមរំលែកជាមួយក្រុមគ្រួសារសពពាក់ព័ន្ធអ្វី ដែលកើតឡើងពាក់ព័ន្ធបញ្ហាសុខភាព ហើយអ្នកចែកអំណោយមានទឹកចិត្តសប្បុរស»។
នេះមិនមែនជាលើកទី១ ទេ ដែលរដ្ឋាភិបាលមិនទទួលត្រូវលើករណីជាន់គ្នាស្លាប់នេះ ព្រឹត្តិការណ៍កាលពី ១៥ឆ្នាំមុន គឺព្រឹត្តិការណ៍ផ្អើលរត់ជាន់គ្នានៅកោះ ពេជ្រ នារាត្រីនៃពិធីបុណ្យអ៊ំទូកកាលពីឆ្នាំ២០១០ ដែលធ្វើឱ្យមនុស្ស៣៥១នាក់ស្លាប់ និងមនុស្ស ៣៩៥នាក់ទៀតរងរបួសនោះ ក៏រដ្ឋាភិបាលត្រកូល ហ៊ុន មិនទទួលខុសត្រូវលើករណីនេះដែរ។ កាលណោះ អតីតនាយករដ្ឋមន្រ្តី ហ៊ុន សែន បានត្រឹមសម្រក់ទឹកភ្នែកនៅមុខក្រុមគ្រួសារជនរងគ្រោះមួយចំនួន និងផ្ដល់ថវិកាជូនរងគ្រោះច្រើនបំផុតម្នាក់ ១ម៉ឺន ២ពាន់ដុល្លារ។
អតីតលោកនាយករដ្ឋមន្ត្រី ហ៊ុន សែន បានចាត់ទុកករណីនេះ ជាមេរៀនពិសោធន៍ប្រវត្តិសាស្ត្រ សម្រាប់ទុកជាមេរៀន ដោះស្រាយរាល់ព្រឹត្តិការណ៍ផ្សេងទៀត។ នៅពេលនោះ លោក ហ៊ុន សែន ថែមទាំងបញ្ជាក់ថា គ្មាននរណាទទួលទោស នៅក្នុងហេតុការណ៍ស្លាប់មនុស្សនៅស្ពានកោះពេជ្រឡើយ ដោយលោកចាត់ទុកថា ជាការការទទួលខុសត្រូវរួមទៅវិញ។ រីឯប្រធានគណៈកម្មការដោះស្រាយករណីឧបទ្ទវហេតុលើស្ពានកោះពេជ្រ លោក សុខ អានបានចេញមុខប្រកាសអំពីលទ្ធផលស៊ើបអង្កេតយ៉ាងខ្លីថា មកពីផ្អើលស្លន់ស្លោ រត់ជាន់គ្នា។ បញ្ហានេះនេះក៏បិទបញ្ចប់តាំងពីពេលនោះមក។
អត្ថបទទាក់ទងរឿងជាន់គ្នាស្លាប់៖
មន្ត្រីសង្គមស៊ីវិលជំរុញរដ្ឋាភិបាលឱ្យស៊ើបអង្កេតព្រឹត្តិការណ៍ជាន់គ្នាស្លាប់នៅស្ពានកោះពេជ្រ
អ្នកច្បាប់ និងសង្គមស៊ីវិលស្នើរដ្ឋាភិបាលឱ្យបន្តសំណុំរឿងរត់ជាន់គ្នានៅស្ពានកោះពេជ្រ
គ្រួសារជនរងគ្រោះមួយចំនួន ប្រតិកម្មទៅនឹងការវាយកម្ទេចស្ពានកោះពេជ្រ
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត សោកស្ដាយចំពោះការស្លាប់ពលរដ្ឋក្រីក្រចំនួន ៤នាក់ក្នុងព្រឹត្តិការណ៍ប្រជ្រៀតគ្នា នៅមុខផ្ទះលោក សុខ គង់ នេះ។ លោកស្នើឱ្យរដ្ឋាភិបាលស្វែងរកអ្នកទទួលខុសត្រូវករណីនេះ។
លោក អំ សំអាត៖ «ប្រសិនជានិយាយពីរឿងទទួលខុសត្រូវ គឺជាទំហំមួយធំធេង ព្រោះគឺជាប្រជាពលរដ្ឋ ដែលពលរដ្ឋលោកស្ម័គ្រចិត្តទៅទទួលអាំងប៉ាវ ឬអំណោយអំពីអ្នក ដែលមានទ្រព្យធនហ្នឹង។ ប៉ុន្តែគ្រាន់តែថា អ្វីដែលសំខាន់ហ្នឹង វប្បធម៌នេះមិនគួរកើតឡើងរបៀបហ្នឹងបន្តទៀត បើអាចបន្តកើតឡើងទៀតអាចជួបបញ្ហាគ្រោះថ្នាក់ ឬហានិភ័យបន្តទៀត។ ជាគោលការណ៍នីត្យានុកូល នៅមានព្រឹត្តិការណ៍កើតឡើង ទោះបីព្រឹត្តិការណ៍ហ្នឹងយ៉ាងណាក៏ដោយ នៅពេលធ្វើឱ្យមានការបាត់បង់ជីវិតមនុស្ស គឺត្រូវតែមានការស៊ើបអង្កេត ការស្រាវជ្រាវរកមូលហេតុមួយឱ្យបានច្បាស់លាស់។ ប្រសិនបើរឿងទាំងអស់ហ្នឹងមិនមែនជាបទល្មើស ក៏គួរតែមានការស្វែងរកវិធីមធ្យោបាយ ដើម្បីបង្ការ និងទប់ស្កាត់ ដើម្បីកុំឱ្យកើតមានបញ្ហាទាំងអស់ហ្នឹងកើតឡើងបន្តទៀត»។
ឧកញ៉ា សុខ គង់ អាយុ ៦៩ឆ្នាំ មានដើមកំណើតជាជនជាតិវៀតណាម។ លោកមានរហ័សនាមថា «Mr. Sokimex» និងជាទីប្រឹក្សាលោក ហ៊ុន សែន។ លោកជាម្ចាស់ក្រុមហ៊ុនលក់ប្រេងសាំង សូគីម៉ិច ដែលល្បីឈ្មោះអាក្រក់ខាងរត់ពន្ធសាំង ប្រេងកាត កៅស៊ូ សម្ភារៈយោធា ស្បៀង និងថ្នាំសង្កូវសម្រាប់យោធា។ ក្រៅពីនេះ លោកក៏មានរឿងអាស្រូវកិបកេងចំណូលជាតិ បានមកពីការលក់សំបុត្រឱ្យភ្ញៀវទេសចរបរទេសចូលទស្សនាតំបន់អង្គរដែរ។
លោកក៏ជាម្ចាស់សណ្ឋាគារយីហោ សុខា អូតែល និងទទួលបានសិទ្ធិវិនិយោគខ្វះតម្លាភាពនៅតាមតំបន់ជាច្រើន ជាពិសេស នៅតំបន់រមណីយដ្ឋានភ្នំបូកគោ ដែលរងការចោទថា បានឃុំឃាំងមនុស្សខុសច្បាប់។
ជារឿងរាល់ឆ្នាំ ឱ្យតែជិតដល់ពិធីបុណ្យចូលឆ្នាំប្រពៃណីចិន និងវៀតណាម លោក សុខ គង់ តែងតែផ្ដល់អាំងប៉ាវ ឬលុយ ដល់កងកម្លាំងសមត្ថកិច្ច កងសន្តិសុខ ប្រជាការពារ និងប្រជាពលរដ្ឋរាប់ពាន់នាក់នៅខាងមុខផ្ទះរបស់លោក។
ក្រុមអ្នកតាមដានស្ថានការណ៍នយោបាយ លើកឡើងថា ពលរដ្ឋ មន្រ្តីរាជការទៅដណ្ដើមគ្នាយកអាំងប៉ាវពីឧកញ៉ា សុខ គង់ នេះ ហាក់លែងខ្វល់អំពីការខ្មាស់អៀន និងមិនខ្វល់អំពីធនធាន ដែលឧកញ៉ាជិតស្និទជាមួយត្រកូលហ៊ុន រូបនេះ រកស៊ីកឹបកេង ឬបំផ្លាញជាតិបែបណាឡើយ ដោយសារតែពួកគាត់រស់នៅក្នុងស្ថានភាពក្រលំបាក គឺធ្វើយ៉ាងណាឱ្យតែមានលុយ ដើម្បីយកមកដោះស្រាយរឿងក្រពះមួយគ្រាសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។