"រដ្ឋ​គួរ​ដំឡើង​ប្រាក់ខែ​ឲ្យ​កម្មករ​ជា​ជាង​បើក​ប្រាក់ខែ​២​ដង​ក្នុង​១​ខែ​ដែល​មិន​សូវ​ផ្ដល់​ប្រយោជន៍"

ថន ថារ៉ូ
2018-09-23
អ៊ីម៉ែល
មតិ
Share
បោះពុម្ព
ពិធី​សំណេះសំណាល​របស់​លោក​នាយករដ្ឋមន្ត្រី ហ៊ុន សែន និង​កម្មករ​រោងចក្រ​នៅ​ក្រុង​បាវិត ខេត្ត​ស្វាយរៀង នៅ​ថ្ងៃ​ទី១០ ខែ​ឧសភា ឆ្នាំ​២០១៨។
ពិធី​សំណេះសំណាល​របស់​លោក​នាយករដ្ឋមន្ត្រី ហ៊ុន សែន និង​កម្មករ​រោងចក្រ​នៅ​ក្រុង​បាវិត ខេត្ត​ស្វាយរៀង នៅ​ថ្ងៃ​ទី១០ ខែ​ឧសភា ឆ្នាំ​២០១៨។
Photo courtesy of Hun Sen Facebook page

សហជីព​ឯករាជ្យ​ការពារ​កម្មករ យល់ថា​របប​លោក ហ៊ុន សែន គួរតែ​ជួយ​ដំឡើង​ប្រាក់ខែ​ជូន​កម្មករ​ឲ្យ​បាន​ខ្ពស់ និង​គិតគូរ​ផ្ដល់​ផលប្រយោជន៍​ផ្សេងៗ​ជូន​កម្មករ គឺជា​រឿង​ល្អ​ប្រសើរ ជាជាង​ការ​បើកប្រាក់​ខែ ២​ដង ក្នុង​មួយ​ខែ ខណៈ​ប្រាក់ខែ​កម្មករ​នៅ​ទាប​ដដែល។ ការ​លើកឡើង​នេះ បន្ទាប់ពី​ក្រសួង​ការងារ ប្រកាស​ថា កម្មករ​និយោជិក​អាច​បើកប្រាក់​ឈ្នួល ២​ដង​ក្នុង​មួយ​ខែ ចាប់ពី​ខែ​មករា ឆ្នាំ​២០១៩ តទៅ។

ប្រធាន​សម្ព័ន្ធ​សហជីព​កម្ពុជា អ្នកស្រី យ៉ាង សុភ័ណ្ឌ មាន​ប្រសាសន៍ថា ការ​បើក​ប្រាក់ខែ ២​ដង ក្នុង​មួយ​ខែ​អាច​ធ្វើ​ឲ្យ​កម្មករ​មួយ​ចំនួន​សប្បាយចិត្ត ព្រោះ​អាច​ជួយ​សម្រួល​តម្រូវ​កា​រ​ខ្លះៗ ប៉ុន្តែ​កម្មករ​មួយ​ចំនួន​ទៀត ក៏​មិន​សប្បាយ​ចិត្ត​ដែរ ព្រោះ​ពួកគេ​ត្រូវ​ការ​បើក ១​ខែ​ម្ដង ដើម្បី​ងាយស្រួល​សន្សំ​លុយ និង​ចាត់ចែង​លុយ។ អ្នកស្រី​យល់​ថា ការ​ជួយ​សម្រួល​បើកប្រាក់​ខែ​នេះ មិន​បាន​ជួយ​ឬ​ផ្ដល់​ប្រយោជន៍​ដល់​កម្មករ​ច្រើន​នោះ​ទេ។ ផ្ទុយទៅវិញ​របប​លោក ហ៊ុន សែន គួរតែ​ជួយ​ដំឡើង​ប្រាក់ខែ​ឲ្យ​ខ្ពស់​ជាង​បច្ចុប្បន្ន​នេះ ដើម្បី​ឲ្យ​កម្មករ​រស់នៅ​សមរម្យ៖ «ច្បាប់​បើកប្រាក់​ឈ្នួល​២​ដង​ក្នុង​មួយ​ខែ​នេះ បាន​ចេញ​តាំងពី​ឆ្នាំ​១៩៩៧ មក​ម្ល៉េះ ហើយ​រដ្ឋាភិបាល​គួរតែ​បាន​គិតដល់​បងប្អូន​កម្មករ​នូវ​អ្វី​ផ្សេងទៀត ដែល​ជា​ការ​ផ្ដល់​ប្រយោជន៍​ដល់​បងប្អូន​កម្មករ ជាជាង​ច្បាប់​ដែល​មាន​ស្រាប់​ហើយ នៅ​ចាំតែ​អនុវត្ត​ទៀត។ មួយទៀត​ពាក់ព័ន្ធ​នឹង​រឿង​ប្រាក់​ឈ្នួល​បងប្អូន​កម្មករ គឺជា​កត្តា​មួយ​ដែល​រដ្ឋាភិបាល​ត្រូវ​យកចិត្តទុកដាក់ ព្រោះ​ប្រាក់​ឈ្នួល​កម្មករ​មកដល់ពេលនេះ យើង​ជជែក​គ្នា​ដល់​ដំណាក់កាល​ចុងក្រោយ​ហើយ ដូច្នេះ​គួរតែ​គិត​ថា គួរ​ដំឡើង​ប្រាក់​ឈ្នួល​ប៉ុន្មាន ឬ​ដំឡើង​តាម​ការ​ទាមទារ​របស់​សហជីព ព្រោះ​វា​គឺជា​ការ​យកចិត្តទុកដាក់​ដល់​បងប្អូន​ពិតប្រាកដ។ មួយទៀត ពេល​ដែល​សហជីព​ទាមទារ​ដំឡើង​ប្រាក់​ឈ្នួល គឺ​មាន​រោងចក្រ​ខ្លះ ធ្វើការ​កៀប​សង្កត់​ដល់​បងប្អូន​កម្មករ​ដែល​រដ្ឋាភិបាល​គួរតែ​ពិនិត្យ​ទៅលើ​បញ្ហា​ទាំងអស់​នេះ»

ក្រសួង​ការងារ កាលពី​ថ្ងៃ​ទី​២១ ខែ​កញ្ញា បាន​ចេញ​សេចក្តី​ប្រកាស ស្ដីពី​ការ​បើក​ប្រាក់​ឈ្នួល​ជូន​កម្មករ​និយោជិត ២​ដង ក្នុង​មួយ​ខែ ដោយ​ចាប់​អនុវត្ត​ពី​ខែ​មករា ឆ្នាំ​២០១៩ តទៅ។ សេចក្តី​ប្រកាស​នោះ ឲ្យ​ដឹង​ថា ម្ចាស់​សហគ្រាស គ្រឹះស្ថាន ទាំងឡាយ​ណា​ដែល​ស្ថិត​ក្រោម​បទប្បញ្ញត្តិ​នៃ​ច្បាប់​ស្ដីពី​ការងារ ត្រូវ​រៀបចំ​បើក​ប្រាក់ខែ​ចំនួន​២​ដង ក្នុង​មួយ​ខែ។ លើក​ទី​១​ត្រូវ​បើក​នៅ​សប្ដាហ៍​ទី​២ ចំនួន​៥០​ភាគរយ​នៃ​ប្រាក់​ឈ្នួល​សុទ្ធសាធ​ក្នុង​១​ខែ។ លើក​ទី​២ ត្រូវ​បើក​នៅ​សប្ដាហ៍​ទី​៤ គឺ​ស្មើនឹង​ចំនួន​ប្រាក់​ឈ្នួល​សុទ្ធសាធ​ដែល​នៅ​សល់ ប្រាក់​ឈ្នួល បន្ទាប់​បន្សំ និង​អត្ថប្រយោជន៍​ផ្សេងៗ​ទៀត ដែល​កម្មករ​និយោជិក ត្រូវ​ទទួល​បាន​នៅ​ក្នុង​ខែ​នីមួយៗ។

ប្រធាន​សម្ព័ន្ធ​សហជីព​កម្ពុជា ក៏​សម្ដែង​ការ​បារម្ភ​ថា ការអនុវត្ត​ការ​បើកប្រាក់​ឈ្នួល​ពីរ​ដង ក្នុង​មួយ​ខែ អាច​ធ្វើ​ឲ្យ​កម្មករ​ជួប​បញ្ហា​មួយ​ចំនួន ដូចជា ងាយ​ជំពាក់​លុយ​ធនាគារ និង​គ្មាន​លទ្ធភាព​បង្វិល​សង ការប្រាក់​វិញ ព្រោះ​ពួកគេ​មួយ​ចំនួន​និយម​ស៊ីចាយ​មិនសូវ​ចេះ​សន្សំ និង​ខ្ចី​លុយ​គេ​ដើម្បី​ទិញ​របស់ បង់​រំលោះ​ជាដើម។ អ្នកស្រី​មើល​ឃើញ​ថា កម្មករ​ភាគច្រើន​នៅ​ពុំ​ទាន់​ចេះ​គ្រប់គ្រង​លុយ និង​ចាយវាយ​លុយ​នោះ​ឡើយ៖ «ជាទូទៅ​បងប្អូន​កម្មករ​យើង​នៅ​ពេល​ដែល​បើកប្រាក់​ឈ្នួល​មួយ​ខែ​ម្តង គឺ​គាត់​តែងតែ​ខ្ចី​លុយ​អ្នកដទៃ ឬ​ចងការ​គេ​យក​មក​ចាយ​អ៊ីចឹង ប៉ុន្តែ បើក​ប្រាក់ខែ​ពីរ​ដង​គឺ​អាច​ជួយ​គាត់​ដែរ តែ​មិនមែន​កម្មករ​ទាំងអស់​សុទ្ធតែ​អ៊ីចឹង​ទេ ព្រោះ​កម្មករ​មួយ​ចំនួន​ចេះ​គ្រប់គ្រង​លុយ ហើយ​មួយ​ចំនួន​ទៀត​មិន​ចេះ​គ្រប់គ្រង​អ៊ីចឹង​ទៅ»

កាលពី​ថ្ងៃ​ទី​១៨ ខែ​កញ្ញា​កន្លងទៅ ក្រុម​ការងារ​បច្ចេកទេស​ត្រីភាគី មាន​តំណាង​ភាគី សហជីព តំណាង​ភាគី​និយោជក និង​ពី​ភាគី​រដ្ឋាភិបាល បាន​ជួប​ប្រជុំ​ចរចា​គ្នា​លើក​ទី​៣ ដើម្បី​ចរចា​គ្នា អំពី​ការដំឡើង​ប្រាក់​ឈ្នួល អប្បបរមា​ជូន​កម្មករ​និយោជិក​វិស័យ កាត់ដេរ​នៅ​ឆ្នាំ​២០១៩ ។ ការ​ចរចា​នោះ គឺ​ខាង​ភាគី​និយោជក​ព្រម​ដំឡើង​ចំនួន ១៧៦​ដុល្លារ​ក្នុង​មួយ​ខែ រដ្ឋាភិបាល ព្រម​ដំឡើង​ចំនួន ១៧៧​ដុល្លារ រីឯ​ខាង​សហជីព ទាមទារ​ចំនួន​១៨៩​ដុល្លារ​ក្នុង​ខែ​វិញ បន្ទាប់​ពី​ដំបូង​ឡើយ​ទាមទារ ជាង ២​រយ​ដុល្លារ​ត្រូវ​បរាជ័យ។

ក្រុម​សហជីព លើក​ឡើង​ថា ការដំឡើង​ប្រាក់​ឈ្នួល​ជាង ១៨៩​ដុល្លារ​អាច​ធ្វើ​ឲ្យ​កម្មករ​រស់នៅ​បាន សមរម្យ​ខ្លះ ខណៈ​បច្ចុប្បន្ន​នេះ ពួកគេ​ទទួល​បាន​ប្រាក់​ឈ្នួល​ចំនួន​១៧០​ដុល្លារ​ក្នុង​មួយ​ខែ ដែល មិនទាន់​អាច​ឲ្យ​ពួកគេ​រស់នៅ​សមរម្យ​នៅឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល