អ្នកវិភាគនយោបាយ និងសង្គម ដែលហ៊ាននិយាយរិះគន់លោកនាយករដ្ឋមន្រ្តី ហ៊ុន សែន ដោយឥតសំចៃមាត់អះអាងថា លោក ហ៊ុន សែន កំពុងបោកប្រាស់ប្រជាពលរដ្ឋ ឲ្យជឿថា លោកមានចិត្តគិតគូររឿងជួយអតីតយុទ្ធជន តាមរយៈការប្រកាសយកប្រាក់ដែលបានពីការលក់សៀវភៅ និងប្រាក់រង្វាន់ពីអង្គការសាសនាកូរ៉េទៅបន្តសាងសង់លំនៅដ្ឋានជូនអតីតយុទ្ធជន។
លោក គឹម សុខ ចាត់ទុកសារបែបនោះថាជាការយល់សប្តិទាំងកណ្តាលថ្ងៃត្រង់និងជាសារប្រជាភិថុតិតែប៉ុណ្ណោះព្រោះលោក ហ៊ុន សែន កាន់តំណែងជានាយករដ្ឋមន្រ្តីជិត៤០ ឆ្នាំ (៣៧ឆ្នាំ) មកហើយហេតុអ្វីទើបតែនឹកឃើញសរសេរសៀវភៅលក់ និងយកប្រាក់បានពីរង្វាន់បន្តិចបន្តួចទៅជួយអតីតយុទ្ធជនដែលខ្វះការយកចិត្តទុកដាក់ពីរដ្ឋាភិបាលនេះយូរយារណាស់មកហើយ៖ «យុទ្ធជនពិការ ក្រីក្រលំបាកដែលរដ្ឋាភិបាលលោក ហ៊ុន សែន មិនទទួលខុសត្រូវហ្នឹងមានច្រើនណាស់ ហើយអាជ្ញាធរលោក ហ៊ុន សែន ហ្នឹងធ្វើអាជីវកម្មលើយុទ្ធជនទាំងអស់នោះទៅទៀត ដូចជាគាត់បើកប្រាក់អាហារសង្គមកិច្ចរបស់ពួកគាត់ជាដើមហ្នឹង គេកិបកេងពីរបបហ្នឹង ដោយ អំពើពុករលួយ ស្រស់ៗ នៅនឹងភ្នែក ។ រឿងនេះយុទ្ធជនដឹងច្បាស់ណាស់ »។
ប្រតិកម្មរបស់លោក គឹម សុខ ធ្វើឡើងតបទៅនឹងសាររបស់លោក ហ៊ុន សែន ដែលថ្លែងក្នុងកិច្ចប្រជុំគណៈរដ្ឋមន្រ្តីកាលពីថ្ងៃទី៤ ខែកុម្ភៈ ដែលលោក ហ៊ុន សែន ថាលុយបានពីការលក់សៀវភៅរឿង«គូរព្រេងមិនព្រាត់» ប្រមាណ៧ពាន់ដុល្លារ និង ១លានដុល្លារទៀតពីរង្វាន់អង្គការសាសនាកូរ៉េឈ្មោះ ស៊ុនហាក់ នឹងត្រូវយកទៅបន្តសាងសង់លំនៅដ្ឋានជូនអតីតយុទ្ធជន។
លោក គឹម សុខ ថាសាររបស់លោក ហ៊ុន សែន គឺផ្ទុយទៅនឹងការពិតជាក់ស្តែងដែលលោកថារដ្ឋាភិបាលចំណាយលុយឥតប្រយោជន៍រាប់លានដុល្លារដើម្បីសាងសង់ស្តូបអនុស្សាវរីយ៍ទាហានវៀតណាមដែលពលរដ្ឋខ្មែរជាច្រើនមិនពេញចិត្ត។ លោកថាបើរដ្ឋាភិបាលយកលុយនោះមកជួយយុទ្ធជន គឺបានផលច្រើនជាងយកទៅចំណាយសង់ស្តូបវៀតណាមទាំងនោះ។ម្យ៉ាងទៀតលោកថារដ្ឋាភិបាលលោក ហ៊ុន សែន ផ្តល់ដីសម្បទានរាប់សិបម៉ឺនហិកតានៅទូទាំងប្រទេសទៅឲ្យក្រុមហ៊ុនវៀតណាមធ្វើអាជីវកម្មដែលដីនោះ គួរផ្តល់ទៅគ្រួសារយុទ្ធជន ដើម្បីអាស្រ័យផល ធ្វើស្រែចម្ការដោះស្រាយជីវភាពរបស់ពួកគាត់។ មិនតែប៉ុណ្ណោះលោកថាចម្ការកៅស៊ូធំៗជាច្រើននៅកម្ពុជាជារបស់វៀតណាម ដោយមានថៅកែ អ្នកបច្ចេកទេស និងសូម្បីតែកម្មករក៏ជាជនជាតិវៀតណាមទៅទៀត។ លោកចោទជាសំណួរទៀតថា ហេតុអ្វីមិនផ្តល់ឱកាសឲ្យយុទ្ធជនក្រីក្រក្នុងការបានទទួលផលពីអាជីវកម្មទាំងនេះផង?
ជុំវិញ ពានរង្វាន់សន្តិភាពនោះ គឺលោក ហ៊ុន សែន ទទួលបានពី អង្គការសាសនាកូរ៉េមួយដែលបង្កើតឡើងដោយប្តីប្រពន្ធកូរ៉េពីរនាក់។ អង្គការសាសនានេះ ជាអង្គការរកប្រាក់ចំណេញពីអ្នកចូលជាសមាជិក។ ប្រធានអង្គការនេះ ធ្លាប់ជាប់គុកជិត១ឆ្នាំនៅអាមេរិក ដោយសារលួចបន្លំពន្ធ និងរួមគំនិតប្រព្រឹត្តបឧក្រិដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។