លោក ហ៊ុន សែន បញ្ជាអោយរដ្ឋមន្ត្រីក្រសួងអប់រំពិភាក្សាជាមួយអាជ្ញាធររាជធានី ខេត្តដើម្បីសិក្សាពីការបើកសាលាឡើងវិញនៅតំបន់គ្មានការឆ្លងជំងឺ កូវីដ១៩។ សារសំឡេងលោក ហ៊ុន សែន ដែលត្រូវបានផ្សព្វផ្សាយនៅថ្ងៃទី៣១ ខែសីហា លោកក៏ទទួលស្គាល់ថាសិស្សក្រីក្រនៅតាមទីជនបទគ្មានលទ្ធភាពរៀនអនឡាន (Online) តាមប្រព័ន្ធអ៊ីនធើណែតនោះទេ ហើយបើនៅតែបន្តបិទសាលាទៀតនឹងធ្វើឲ្យក្មេងភ្លេចអក្សរ។
លោកនាយករដ្ឋមន្ត្រី ហ៊ុន សែន ថ្លែងថា បើកុមារមិនរៀនតទៅទៀតអាចនឹងធ្វើឲ្យកុមារបោះបង់ចោលការសិក្សា។ លោកថា ការអនុញ្ញាតឲ្យបើកសាលាឡើងវិញជាគំនិតឆ្លាតវ័យ និងបត់បែនតាមសភាពការណ៍ ខណៈការរីករាលដាលនៃជំងឺកូវីដ-១៩ នៅភ្នំពេញ និងតំបន់មួយចំនួនបានថយចុះ។ លោកថា ជំងឺកូវីដ-១៩ ឆ្លងដាច់ដោយដុំ ហើយប្រមូលផ្ដុំតែនៅទីប្រជុំជន៖ «យើងមានលទ្ធភាពបើកនូវសាលារៀននោះដោយមិនរង់ចាំថា ទូទាំងប្រទេសត្រូវតែបើក ឬក៏ខេត្តមួយត្រូវតែបើក ឬស្រុកមួយត្រូវបើក។ យើងគួរជ្រើសរើសនៅតាមភូមិ តាមឃុំដែលពុំមានការកើតនូវជំងឺឆ្លងនេះ ហើយកុមាររបស់យើងបានចូលសិក្សា»។
មុនពេលលោក ហ៊ុន សែន ប្រកាសបែបនេះមន្រ្តីសង្គមស៊ីវិលដែលធ្វើការងារទាក់ទងនឹងការសិក្សាតែងលើកឡើងពីបញ្ហារបស់កុមារក្រីក្រនិងកុមារនៅទីជនបទដែលគ្មានលទ្ធភាពទិញទូរស័ព្ទទំនើបឬមានសេវាអ៊ីនធើណែតដើម្បីអាចសិក្សាតាមអនឡាញ (Online) បាន។
ទោះជាយ៉ាងណា លោកនាយករដ្ឋមន្ត្រី មិនទាន់បញ្ជាក់ពីពេលវេលាជាក់លាក់នៃការបើកសាលាឡើងវិញនៅពេលនោះទេ ប៉ុន្តែលោកប្រាប់ទៅរដ្ឋមន្ត្រីក្រសួងអប់រំឲ្យធ្វើការសិក្សាជាមួយអាជ្ញាធរខេត្ត រាជធានី ដើម្បីសិក្សាទីតាំងសាលារៀនដែលគ្រោងបើកឡើងវិញ រួចចាំស្នើមកលោក ទើបលោកអនុញ្ញាតឲ្យបើកសាលារៀនជាផ្លូវការ។
ទាក់ទងរឿងនេះ វិទ្យុអាស៊ីសេរីមិនអាចសុំបំភ្លឺបន្ថែមពីអ្នកនាំពាក្យក្រសួងអប់រំ យុវជន និងកីឡាលោក រស់ សុវាចា បានទេនៅថ្ងៃទី៣១ ខែសីហា។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ស្វាគមន៍ការប្រកាសរបស់លោក ហ៊ុន សែន ពេលនេះ។ លោកបន្តថា ការអនុញ្ញាតឲ្យបើកសាលាក្នុងតំបន់គ្មានការឆ្លងជំងឺកូវីដ និងឲ្យរៀនតាមអនឡាញ (Online) ចំពោះតំបន់ដែលបង្កការគំរាមកំហែងដោយជំងឺកូវីដ-១៩ ជាជម្រើសល្អក្នុងវិបត្តិជំងឺកូវីដបែបនេះ។ ទោះយ៉ាងណា អ្នកធ្វើការងារវិស័យអប់រំរូបនេះយល់ថា មុនពេលមានការបើកសាលារៀនឡើងវិញអាជ្ញាធរពាក់ព័ន្ធគួរមានការផ្សព្វផ្សាយឲ្យឪពុកម្ដាយ ឬអាណាព្យាបាលសិស្សឲ្យដឹងមុនដើម្បីត្រៀមខ្លួនបង្ការពីជំងឺកូវីដផង៖ «ការបើកឡើងវិញក្នុងស្ថានភាពបែបនេះក៏ជារឿងមួយល្អហើយគ្រប់គ្នាបានរៀនសូត្របានច្រើនពីវិធានការបង្ការក៏ដូចជាការរកមធ្យោបាយដើម្បីបង្ការខ្លួន»។
ស្រដៀងគ្នានេះដែរ នាយកប្រតិបត្តិមជ្ឈមណ្ឌលប្រជាពលរដ្ឋដើម្បីការអភិវឌ្ឍន៍និងសន្តិភាពលោក យង់ គិមអេង គាំទ្រគម្រោងបើកសាលារៀនឡើងវិញពេលនេះ។ លោកស្នើទៅក្រសួងអប់រំនិងអ្នកពាក់ព័ន្ធ គួរណែនាំកុំឲ្យសិស្សលេងជុំគ្នាជាក្រុម ឬច្រើននាក់ រក្សាគម្លាតសុវត្ថិភាពពេលម៉ោងចេញលេង ចំណែកគ្រូបង្រៀនមិនបានបង្រៀនគួរផ្ដល់ដំណឹងឲ្យសិស្សដឹងមុនជៀសវាងក្មេងលេងជុំគ្នាច្រើនក្នុងពេលដែលរង់ចាំគ្រូ។ អ្នកឃ្លាំមើលសង្គមរូបនេះបន្តទៀតថា នៅតាមសាលានីមួយៗ គួររៀបចំឲ្យមានអនាម័យ និងមានទឹកលាងដៃជាដើម៖ «ឲ្យណែនាំពីការគម្លាតកុំឲ្យគាត់ទៅប្រឡូកប្រឡាក់ជាមួយគ្នានេះជារឿងសំខាន់ហើយការពាក់ម៉ាស់ លាងដៃហើយតាមសាលាមួយៗកុំឲ្យមានការលំបាក តទឹកទៅដល់ទីធ្លា ដល់សួនច្បាររបស់សាលាសម្រាប់ដាក់លាងដៃទៅបាទ»។
រដ្ឋាភិបាលលោក ហ៊ុន សែន បានបិទសាលារៀនគ្រប់កម្រិតកាលពីខែកុម្ភៈកន្លងទៅក្រោយមានករណីជំងឺកូវីដ-១៩ ឆ្លងចូលសហគមន៍លើកទី៣។ របាយការណ៍រដ្ឋាភិបាលឲ្យដឹងថា ពេលនេះកុមារឬយុវវ័យដែលអាយុពី១២ ទៅ ១៧ឆ្នាំចំនួន ១លាន ៥សែននាក់ ត្រូវបានចាក់រ៉ាក់សាំងបង្ការជំងឺកូវីដ-១៩ រួចរាល់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។