ជប៉ុន ចង់បង្កើនកិច្ចសហប្រតិបត្តិការកាន់តែខ្លាំងបន្ថែមទៀតជាមួយកម្ពុជាលើវិស័យសន្តិសុខ ឌីជីថល និងវិធានការផ្នែកសន្តិសុខព័ត៌មានវិទ្យា។ ជប៉ុនក៏ចង់ឱ្យមានការផ្លាស់ប្ដូររវាងប្រជាជន និងប្រជាជន វប្បធម៌ និងបញ្ញា រវាងប្រទេសទាំងពីរឱ្យកាន់តែរឹងម៉ាំថែមទៀត តាមរយៈកម្មវិធីភាពជាដៃគូ និងការផ្លាស់ប្ដូរការអប់រំសម្រាប់មនុស្សជំនាន់ថ្មី។
ការបង្ហាញពីចេតនាបង្កើនកិច្ចសហប្រតិបត្តិការនេះ ធ្វើឡើងនៅក្នុងជំនួបទ្វេភាគីមួយរវាងរដ្ឋមន្ត្រីការបរទេសជប៉ុន អ្នកស្រី កាមីកាវ៉ា យូកូ (Kamikawa Yoko) និងរដ្ឋមន្ត្រីការបរទេសកម្ពុជា លោក សុខ ចិន្តាសោភា នៅឯក្រសួងការបរទេសជប៉ុន កាលពីថ្ងៃទី១៧ ខែធ្នូ។ ប្រទេសជប៉ុនកំពុងរៀបចំកិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុន ដើម្បីអបអរសាទរឆ្នាំទី៥០ នៃមិត្តភាព និងកិច្ចសហប្រតិបត្តិការអាស៊ាន-ជប៉ុន នៅទីក្រុងតូក្យូ ពីថ្ងៃទី១៦ ដល់ថ្ងៃទី១៨ ខែធ្នូ។
ក្រសួងការបរទេសជប៉ុន ឱ្យដឹងតាមរយៈសេចក្តីប្រកាសព័ត៌មាន កាលពីថ្ងៃទី១៧ ខែធ្នូ ថា ភាគីទាំងពីរបានគូសបញ្ជាក់ពីការធ្វើការរួមគ្នាដើម្បីពង្រឹង «ភាពជាដៃគូយុទ្ធសាស្ត្រគ្រប់ជ្រុងជ្រោយ» រវាងប្រទេសទាំងពីរ និងសណ្ដាប់ធ្នាប់អន្តរជាតិសេរី និងបើកចំហផ្អែកលើការគោរពច្បាប់ជាធំ។
ទាក់ទងនឹងកិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុនវិញ ក្រុមមេដឹកនាំនៃប្រទេសក្នុងតំបន់អាស៊ាន និងមេដឹកនាំជប៉ុន កាលពីថ្ងៃទី១៧ ខែធ្នូ បានអនុម័តនូវចក្ខុវិស័យរួមគ្នាមួយផ្តោតលើកិច្ចសហប្រតិបត្តិការលើវិស័យសន្តិសុខ និងសេដ្ឋកិច្ច ដោយយកការគោរពច្បាប់ជាធំ។ កិច្ចប្រជុំកំពូលនេះ ធ្វើឡើងស្របពេលដែលប្រទេសមួយចំនួននៅក្នុងតំបន់កំពុងតែប្រឈមនឹងបញ្ហាតានតឹងនៅលើលម្ហសមុទ្រជាមួយប្រទេសចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។