អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ឲ្យដឹងនៅថ្ងៃទី២ ខែឧសភា ថា កម្មករក្រុមហ៊ុនសីលា បន្តសាងសង់រូបសំណាកព្រះបរមរូបសម្ដេចឪ ទាំងយប់ទាំងថ្ងៃ និងគ្មានថ្ងៃឈប់សម្រាក ដើម្បីពន្លឿនឲ្យព្រះបរមរូបនោះអាចសម្ពោធតាមការដាក់កំហិតរបស់រដ្ឋាភិបាល។
លោកបន្តថា បច្ចុប្បន្ន ជាងកំពុងចាក់ទម្ររូបសំណាក និងកំពុងសូនរូបព្រះបរមរូបសម្ដេចឪ ប៉ុន្តែលោកមិនទាន់អាចកំណត់ថា តើការសាងសង់នោះបានប៉ុន្មានភាគរយនៅឡើយ ព្រោះមិនទាន់បានជួបម្ចាស់ក្រុមហ៊ុនម៉ៅការនៅឡើយ៖ «រូបសំណាកព្រះបរមរូបព្រះបរមរតនកោដ្ឋ ហ្នឹង គឺត្រូវតែធ្វើពិធីសម្ពោធតែម្តងនៅថ្ងៃទី៩ វិច្ឆិកា ២០១៣។ កំពុងធ្វើសូនរូប កំពុងតែសូនផង ទី១។ ទី២ គឺទីតាំងដែលយើងឃើញទាំងអស់គ្នានៅសួនច្បារវិមានឯករាជ្យហ្នឹង គឺកំពុងរៀបចំផ្ដើមបុកគ្រឹះហើយ ពីព្រោះអីរដ្ឋាភិបាលបានដាក់កំហិតថា ធ្វើឲ្យបានទាន់ថ្ងៃទី៩ ខែវិច្ឆិកា»។
តាមគម្រោង ទម្រង់ព្រះបរមរូបរបស់សម្ដេចតា គឺជារូបឈរ។ សំណង់ស្តូបមានកម្ពស់ ២៧,២០ម៉ែត្រ ស្ថិតនៅចម្ងាយ ២០០ម៉ែត្រ ខាងកើតវិមានឯករាជ្យ។ សំណាកព្រះបរមរូបសម្ដេចឪ ដែលមានកម្ពស់ទាំងទម្រចំនួន ៧ម៉ែត្រ ២តឹកនោះ នឹងត្រូវសង់អំពីស្ពាន់លេខ១។ រាជរដ្ឋាភិបាលជាអ្នកធានាចេញប្រាក់ទាំងស្រុង សម្រាប់ការសាងសង់ព្រះបរមរូបនេះ ដោយគ្រោងចំណាយទឹកប្រាក់អស់ជិត ១លាន ៥សែនដុល្លារ។ សំណង់នេះធ្វើឡើងដើម្បីរំលឹកព្រះគុណូបការៈរបស់ព្រះអង្គចំពោះជាតិមាតុភូមិ ម្យ៉ាងទៀត សំណង់ក៏សង់ដើម្បីឲ្យកូនចៅជំនាន់ក្រោយៗស្គាល់ព្រះអង្គដែរ។
ដំបូងឡើយ រាជរដ្ឋាភិបាលមានបំណងចង់អោយក្រុមហ៊ុនទទួលបន្ទុកការសាងសង់សម្រេចបានស្តូបព្រះបរមរូបសម្ដេចតា ចប់នៅមុនថ្ងៃទី៣១ ខែតុលា ឆ្នាំ២០១៣ ដើម្បីរៀបចំការសម្ពោធស្តូបព្រះបរមរូបនេះនៅចំថ្ងៃប្រសូតរបស់សម្ដេចឪ នរោត្តម សីហនុ តែម្តង គឺថ្ងៃទី៣១ តុលា។ ប៉ុន្តែទំនងមិនទាន់ ទើបពន្យារពេលដាក់សម្ពោធនៅថ្ងៃទី៩ វិច្ឆិកា វិញ ជាថ្ងៃប្រវត្តិសាស្ត្រមួយដែលសម្ដេចឪបានទាមទារឯករាជ្យភាពពេញបរិបូរណ៍ជូនដល់ប្រជាជាតិកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។