របាយការណ៍របស់អាជ្ញាធរគ្រប់គ្រងគ្រោះមហន្តរាយ បញ្ជាក់ថា គ្រោះធម្មជាតិនេះមិនត្រឹមតែបំផ្លាញទ្រព្យសម្បត្តិជាតិប៉ុណ្ណោះទេ តែវាក៏បានការបង្កឲ្យមានផលប៉ះពាល់ដល់អាយុជីវិតមនុស្ស និងសត្វ ទាំងផ្ទាល់ និងប្រយោល។ ដោយឡែក មនុស្ស ៣៥នាក់ស្លាប់ និង ២៤នាក់ទៀតរងរបួសដោយសាររន្ទះបាញ់ គិតត្រឹមខែមេសា ដើមឆ្នាំ២០១៣ នេះ។
ជំទប់ទី១ ឃុំទ្រាល មកពីគណបក្ស សម រង្ស៊ី និយាយថា កុមារីម្នាក់ស្លាប់ភ្លាមៗក្នុងចំណោម ៨នាក់ដែលរងរបួសធ្ងន់ស្រាលក្នុងហេតុការណ៍រន្ទះបាញ់ កាលពីល្ងាចថ្ងៃទី៨ ឧសភា ក្រៅពីនេះ ផ្ទះ និងផលដំណាំផ្សេងទៀត ក៏ត្រូវរងការខូចខាតដែរ។
ជំទប់ទី១ ឃុំទ្រាល ស្រុកបារាយ ខេត្តកំពង់ធំ នៃគណបក្ស សម រង្ស៊ី អ្នកស្រី សេង ចាន់ថូ មានប្រសាសន៍នៅថ្ងៃទី៩ ឧសភា ថា យ៉ាងហោចណាស់មានមនុស្ស ៨នាក់ ក្នុងនោះមានក្មេងប្រុសស្រី និងមនុស្សវ័យជាង ៣០ឆ្នាំម្នាក់ ត្រូវរងគ្រោះដោយសាររន្ទះបាញ់នៅពេលមានភ្លៀងធ្លាក់ខ្លាំង។ អ្នកស្រីបន្តថា ក្នុងចំណោមមនុស្ស ៨នាក់នោះ មានកុមារអាយុ ១៦ឆ្នាំម្នាក់ ឈ្មោះ ទេព នឿន ត្រូវស្លាប់ភ្លាមៗក្រោយពីរន្ទះបាញ់រួច។
អ្នកស្រីឲ្យដឹងទៀតថា ដោយឡែកមនុស្ស ៧នាក់ផ្សេងទៀត ក្នុងចំណោមនោះត្រូវរងរបួសធ្ងន់ និងស្រាល។ ទោះជាបែបណា រហូតមកដល់ពេលនេះ អ្នកដែលរងរបួសដោយសាររន្ទះបាញ់ទាំងនោះ ត្រូវបានជួយសង្គ្រោះ និងកំពុងសម្រាកព្យាបាលនៅផ្ទះរៀងៗខ្លួន៖ «ទេព នឿន ប្រុស ១៦ឆ្នាំ ស្លាប់ ទេព នឿន រួចហើយ វ៉ាយ ពួក ស្រី ១២ឆ្នាំ របួសធ្ងន់។ ៣ ម៉េង ម៉ិក ប្រុស ១៤ឆ្នាំ យ៉ែម ភាន់ ប្រុស ១៥ឆ្នាំ ញូង ផុង ប្រុស ១៦ឆ្នាំ។ ម៉ែន ផាន ប្រុស ១០ឆ្នាំ បាវ ធួក ប្រុស ៣៧ឆ្នាំ មី បូរ៉ា ប្រុស ៤ឆ្នាំ»។
លោក បាវ ធួក អាយុ ៣៧ឆ្នាំ នៅភូមិគិរីអណ្ដែត ឃុំទ្រាល ស្រុកបារាយ ខេត្តកំពង់ធំ គឺជាអ្នករងគ្រោះដោយរន្ទះបាញ់កាលពីល្ងាចថ្ងៃទី៨ ឧសភា ក្នុងចំណោមមនុស្ស ៦នាក់ផ្សេងទៀត និយាយថា ដោយសារភ្លៀងធ្លាក់ខ្លាំង រូបគាត់ និងអ្នកឃ្វាលគោជាមួយគ្នា បានទៅជ្រកក្រោមដើមឫស្សីដោយមានទូរស័ព្ទមួយគ្រឿងដែលបានបិទហើយ តែនៅកាន់ក្នុងដៃ។ លោកបន្តថា ការបាញ់នេះមិនដឹងកើតឡើងដោយមូលហេតុអ្វីនោះទេ៖ «ខ្ញុំវាទៅជ្រកហ្នឹង កន្លែងដេញគោទៅ វាភ្លៀងរងាចូលជ្រក។ ចូលជ្រកទៅ ក៏មួយសន្ទុះហ្នឹង ក៏រន្ទះបាញ់តែបណ្ដោយ។ គ្រាន់តែបាញ់ភឹបហ្នឹង អត់ដឹងខ្លួនផង មានទូរស័ព្ទមួយដែរ ប៉ុន្តែខ្ញុំបិទគ្រឿងចូលហើយ»។
វិទ្យុអាស៊ីសេរី ពុំអាចទាក់ទងលោក កែវ វី នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយបានទេ នៅថ្ងៃទី៩ ឧសភា។
ក៏ប៉ុន្តែ កាលពីដើមខែឧសភា កន្លងទៅនេះ គណៈកម្មាធិការជាតិគ្រប់គ្រងគ្រោះមហន្តរាយ បានកោះហៅមន្ត្រីរបស់ខ្លួនមកជួបជុំគ្នា ដើម្បីពិភាក្សារៀបចំផែនទី ឬគ្រោងការដើម្បីឆ្លើយតបបន្ទាន់មួយ ក្នុងការគ្រប់គ្រងគ្រោះមហន្តរាយនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។