អ្នកវិភាគថា លោក សម រង្ស៊ី ជាន់ទឹកដីម៉ាឡេស៊ី ប្រៀបដូចជាការទះកំផ្លៀងលោក ហ៊ុន សែន
2023.05.31
លោក សម រង្ស៊ី និងមាជិកសភាម៉ាឡេស៊ី ក្នុងជំនួបពេលលោកធ្វើទស្សនកិច្ចនៅរដ្ឋសភាម៉ាឡេស៊ី នៅព្រឹកថ្ងៃពី៣០ ខែឧសភា ឆ្នាំ២០២៣។
រូបពីពលរដ្ឋ
ក្រុមអ្នកវិភាគលើកឡើងថា ដំណើរទស្សនកិច្ចរបស់លោក សម រង្ស៊ី ប្រធានស្ដីទីគណបក្សសង្គ្រោះជាតិ នៅម៉ាឡេស៊ី នៅពេលនេះ គឺបង្ហាញកាន់តែច្បាស់ថា រដ្ឋាភិបាលម៉ាឡេស៊ី មិនចាប់យកមេដឹកនាំផ្ដាច់ការជាមិត្តនោះទេ។ ពួកគេលើកឡើងថា ទំនាក់ទំនងរវាង លោក អាន់វ៉ា អ៊ីប្រាហ៊ីម (Anwar Ibrahim) នាយករដ្ឋមន្ត្រី ម៉ាឡេស៊ី (Malaysia) និងលោកនាយករដ្ឋមន្ត្រី ហ៊ុន សែន គ្រាន់តែជាទំនាក់ទំនងការទូតរវាងប្រទេស និងប្រទេស។ ប៉ុន្តែពុំមានន័យថា មេដឹកនាំម៉ាឡេស៊ីចាប់ដៃលោក ហ៊ុន សែន ហើយបោះបង់មេបក្សប្រឆាំង លោក សម រង្ស៊ី នោះឡើយ។
ក្រុមអ្នកតាមដានកិច្ចការអន្តរជាតិលើកឡើងថា លោក សម រង្ស៊ី បានទៅជាន់ទឹកដីម៉ាឡេស៊ីជាថ្មីទៀត ក្រោយពីរបបលោក ហ៊ុន សែន រារាំងមិនឲ្យលោកវិលទៅកម្ពុជា កាលពីថ្ងៃទី៩ ខែវិច្ឆិកា ឆ្នាំ២០១៩ នោះ ប្រៀបដូចជា ការទះកំផ្លៀងលោកនាយករដ្ឋមន្ត្រី ហ៊ុន សែន ដូច្នោះដែរ។
អ្នកវិភាគនយោបាយ លោក បណ្ឌិត សេង សារី មានប្រសាសន៍ថា រដ្ឋាភិបាលថ្មីម៉ាឡេស៊ី ដែលកើតចេញពីគណបក្សប្រឆាំង ឈ្នះការបោះឆ្នោតកាលពីឆ្នាំ២០២២ នោះ ហើយទទួលស្វាគមន៍លោក សម រង្ស៊ី នៅប្រទេសម៉ាឡេស៊ីនេះ បង្ហាញថា រដ្ឋបាលរបស់លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី មិនបោះបង់មេដឹកនាំគណបក្សប្រឆាំងកម្ពុជា លោក សម រង្ស៊ី ដែលបានតស៊ូ ដើម្បីប្រជាធិបតេយ្យដូចគ្នានោះឡើយ។
ការលើកឡើងរបស់អ្នកវិភាគនេះ នៅក្រោយពេលលោកនាយករដ្ឋមន្ត្រី ហ៊ុន សែន ធ្លាប់បានអួតអាង ក្រោយពីលោកបានជួបលោក អាន់វ៉ា អ៊ីប្រាហ៊ីម កាលពីខែមីនា ឆ្នាំ២០២៣ ថា នាយករដ្ឋមន្ត្រី ម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) មិនឲ្យក្រុមមេដឹកនាំគណបក្សប្រឆាំងនៅកម្ពុជា ជាន់ទឹកដី ឬប្រើប្រាស់ទឹកដីម៉ាឡេស៊ី ដើម្បីធ្វើនយោបាយប្រឆាំងនឹងរួបលោកឡើយ។ លោក ហ៊ុន សែន អះអាងថា កាលពីមុន លោក អាន់វ៉ា ធ្លាប់ធ្វើជាមេដឹកនាំគណបក្សប្រឆាំង ហើយអាចមានទំនាក់ទំនងជាមួយមេដឹកនាំគណបក្សប្រឆាំងនៅកម្ពុជា តែឥឡូវនេះខុសពីមុន។
លោក ហ៊ុន សែន អះអាងបែបនេះ ទំនងជាលោកភ្លេចគិតថា លោក អាន់វ៉ា អ៊ីប្រាហ៊ីម ជាមេដឹកនាំគណបក្សប្រឆាំងម៉ាឡេស៊ី ដែលតស៊ូនយោបាយយ៉ាងស្វិតស្វាញជាង ៣ទសវត្សមកហើយ ទម្រាំលោក ទទួលបានជោគជ័យក្លាយជានាយករដ្ឋមន្ត្រីម៉ាឡេស៊ីនោះ។ លោក អាន់វ៉ា ក៏ជាមេដឹកនាំនយោបាយប្រឆាំង ធ្លាប់រងគ្រោះនយោបាយ ជាប់ពន្ធនាគារម្ដងជាពីរដង ក៏ប៉ុន្តែ លោកក៏មិនចុះញ៉មនឹងអតីតនាយករដ្ឋមន្ត្រីម៉ាឡេស៊ី ដែលធ្វើទុក្ខបុកម្នេញលោកដែរ។ លោកជាមេដឹកនាំគណបក្សប្រឆាំងនយោបាយរងគ្រោះដោយសារតែរឿងនយោបាយ មិនខុសពីអ្វីដែលលោក ហ៊ុន សែន កំពុងតែប្រើប្រាស់ប្រព័ន្ធតុលាការធ្វើទុក្ខបុកម្នេញលោក សម រង្ស៊ី នាពេលនេះឡើយ។ លោក អាន់វ៉ា ត្រូវបានក្រុមអ្នកតាមដានកិច្ចការនយោបាយអន្តរជាតិមើលឃើញថា ជាមេដឹកនាំចលនាគណបក្សប្រឆាំងដ៏ធំជាងគេនៅម៉ាឡេស៊ី ដូចដែលលោក សម រង្ស៊ី កំពុងតែដឹកនាំចលនាប្រឆាំង នឹងរបបជិះជាន់ គាបសង្កត់របស់លោក ហ៊ុន សែន នាពេលនេះដូច្នោះដែរ។
លោក សម រង្ស៊ី និងមន្រ្តីជាន់ខ្ពស់គណបក្សសង្រ្គោះជាតិ លោក ម៉ែន សុថាវរិន្ទ រួមទាំងភរិយាលោកផង បានទៅដល់ប្រទេសម៉ាឡេស៊ី កាលពីថ្ងៃទី៣០ ឧសភា។ នៅក្នុងវីឌីអូឃ្លីប ដែលបង្ហោះនៅលើបណ្ដាញសង្គមហ្វេសប៊ុក មានមន្រ្តីរដ្ឋាភិបាលម៉ាឡេស៊ី និងគណៈប្រតិភូជនជាតិចាមនៅប្រទេសម៉ាឡេស៊ីទៅទទួលស្វាគមន៍លោកនៅព្រះលានយន្តហោះ នៅទីក្រុងកូឡាឡាំពួរ (Kuala Lumpur) ថែមទៀតផង។
នេះជាដំណើរទស្សនកិច្ចលើកទីពីររបស់លោក សម រង្ស៊ី ក្រោយពីលោកបានព្យាយាមវិលទៅកម្ពុជាវិញ មិនបានសម្រេច កាលពីថ្ងៃទី៩ ខែវិច្ឆិកា ឆ្នាំ២០១៩ ដោយសារតែរបបលោក ហ៊ុន សែន បានរារាំង។ ការវិលទៅជាន់ទឹកដីម៉ាឡេស៊ីជាថ្មីទៀតនេះ ក៏មានមន្ត្រីទូតខ្មែរប្រចាំនៅប្រទេសម៉ាឡេស៊ី ទៅរារាំង និងសុំឲ្យមន្ត្រីការបរទេសម៉ាឡេស៊ី មិន លោក សម រង្ស៊ី នៅម៉ាឡេស៊ីទៀតផង។ ក៏ប៉ុន្តែ ការរារាំងរបស់មន្ត្រីទូតខ្មែរនេះ មិនជោគជ័យឡើយ។ ផ្ទុយទៅវិញ លោក សម រង្ស៊ី បានជួបមន្ត្រីរដ្ឋាភិបាលម៉ាឡេស៊ីមួយចំនួន ដើម្បីជជែកអំពីបញ្ហាលំហសេរីភាព និងប្រជាធិបតេយ្យនៅកម្ពុជា ដែលរបបលោក ហ៊ុន សែន កំពុងតែបំផ្លាញចោល។ នេះ បើយោងតាមការអះអាងរបស់មន្ត្រី ស្និទ្ធនឹងលោក សម រង្ស៊ី ដែលបានឲ្យវិទ្យុអាស៊ីសេរីដឹង កាលពីយប់ថ្ងៃទី៣០ ខែឧសភានេះ។
ទាក់ទងនឹងបញ្ហានេះ អ្នកវិភាគនយោបាយ លោក គឹម សុខ លើកឡើងថា លោក ហ៊ុន សែន មិនយល់ កំពុងតែយល់ច្រឡំខ្លួនឯងថា ខ្លាំង ហើយអាចគាបសង្កត់រដ្ឋាភិបាលម៉ាឡេស៊ីឲ្យធ្វើតាមលោក។ តែការស្រមើស្រមៃរបស់លោក ហ៊ុន សែន ខុសពីការពិតហើយ។ លោក គឹម សុខ បញ្ជាក់ថា ម៉ាឡេស៊ីជារដ្ឋឯករាជ្យមិនមែនធ្វើតាមការបង្គាប់បញ្ជារបស់លោក ហ៊ុន សែន។
លោក ហ៊ុន សែន ធ្លាប់ទទួលបានជោគជ័យកាលពីឆ្នាំ២០១៩ ដោយលោកស្នើឲ្យរដ្ឋាភិបាលយោធាថៃ គឺលោក ប្រាយុទ្ធ ចាន់អូចា មិនឲ្យលោក សម រង្ស៊ី ប្រើប្រាស់ទឹកដីថៃ ដើម្បីដឹកនាំអ្នកគាំទ្រលោកវិលទៅកម្ពុជាវិញ កាលពីឆ្នាំ២០១៩។ ក៏ប៉ុន្តែសម្រាប់បរិបទនយោបាយនៅថៃនាពេលនេះវិញ ខុសពីមុន ពោលគឺ រដ្ឋាភិបាលរបស់លោក ប្រាយុទ្ធ បានចាញ់ការបោះឆ្នោត កាលពីពេលថ្មីៗ នេះ។ ក្រុមអ្នកវិភាគមើលឃើញថា គណបក្សប្រឆាំងនៅថៃឈ្នះការបោះឆ្នោតនេះ ក៏ជារបត់មួយថ្មីទៀត សម្រាប់លោក សម រង្ស៊ី ក្នុងការវិលទៅកម្ពុជាវិញ។
លោក សម រង្ស៊ី ប្រធានស្ដីទីគណបក្សសង្គ្រោះជាតិ បានឲ្យវិទ្យុអាស៊ីសេរីដឹងកាលពីពេលថ្មីៗ នេះថា លោក នឹងវិលទៅកម្ពុជាវិញក្នុងពេលឆាប់ៗ នេះ។ លោកអះអាងថា លោកអាចវិលទៅកម្ពុជាវិញបានឆាប់ ឬយ៉ាងណានោះ ក៏អាស្រ័យលើរដ្ឋាភិបាលថ្មីរបស់ថៃ ដែលនឹងបង្កើតឡើង នៅពេលខាងមុខនេះដែរ។
ទាក់ទងនឹងបញ្ហានេះអ្នកតាមដានស្ថានការណ៍ភូមិសាស្ត្រតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី មានប្រសាសន៍ថា លោក សម រង្ស៊ី មិនទាន់ប្រាកដថា អាចប្រើប្រាស់ទឹកដីថៃ ដើម្បីប្រមូលផ្ដុំអ្នកគាំទ្រ វិលចូលស្រុកវិញបាន ១០០% នោះឡើយ។ លោកបន្ថែមថា រដ្ឋាភិបាលថៃថ្មី ដែលនឹងបង្កើតឡើងនៅពេលខាងមុខនេះ ជារដ្ឋាភិបាលកើតចេញពីគណបក្សឆ្ពោះទៅមុខ ដែលនឹងបង្កើតរដ្ឋាភិបាលចម្រុះជាមួយគណបក្សភឿថៃ របស់កូនស្រីលោក តាក់ស៊ីន ស៊ីណាវ៉ា់ត់ អតីតនាយករដ្ឋមន្ត្រីថៃកំពុងនិរទេសខ្លួន និងគណបក្សនយោបាយថៃតូចៗ មួយចំនួនទៀត។
ដោយឡែក បណ្ឌិត សេង សារី វិញ មើលឃើញថា ប្រសិនរដ្ឋាភិបាលថ្មីរបស់ថៃ បើកច្រកឲ្យលោក សម រង្ស៊ី ជាន់ទឹកដីថៃបាននោះ អំណាចរបស់លោក ហ៊ុន សែន អាចនឹងរង្គោះរង្គើ។
លោក សម រង្ស៊ី និងគណៈប្រតិភូ បានទៅធ្វើទស្សនកិច្ចនៅឥណ្ឌូនេស៊ី កាលពីដើមខែឧសភា។ លោកបានជួបមេដឹកនាំគណបក្សប្រឆាំង និងសមាជិកសភាមួយចំនួន។ បន្ទាប់មកលោកបន្តដំណើរទៅធ្វើទស្សនកិច្ចនៅប្រទេសអូស្ត្រាលី បានជួបអ្នកគាំទ្រ តំណាងរាស្ត្រ មន្ត្រីរដ្ឋាភិបាលអូស្ត្រាលីមួយចំនួន ហើយកាលពីថ្ងៃទី២៩ ឧសភា លោកបានបន្តដំណើរទៅតំបន់អាស៊ានជាថ្មីម្ដងទៀត គឺប្រទេសម៉ាឡេស៊ី ដែលជាដំណើរទស្សនកិច្ចចុងក្រោយ។ តាមគម្រោងលោក សម រង្ស៊ី នឹងវិលទៅប្រទេសបារាំងវិញ នៅថ្ងៃទី១ ខែមិថុនា៕
កំណត់ចំណាំចំពោះអ្នកបញ្ចេញមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិ ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
