ក្រសួងមហាផ្ទៃរៀបចំបង្កើតបញ្ជីខ្មៅកត់ត្រាអ្នកបើកបរក្នុងស្ថានភាពស្រវឹង ហើយបង្កគ្រោះថ្នាក់ចរាចរណ៍បណ្ដាលឲ្យអ្នកដទៃរងរបួស ឬបាត់បង់អាយុជីវិត។ អ្នកជំនាញផ្នែកសុវត្ថិភាពចរាចរណ៍ថា ការបង្កើតបញ្ជីខ្មៅនេះ ជាចំណុចចាប់ផ្ដើម នៃការជជែកពីសុវត្ថិភាពចរាចរណ៍។
ក្រសួងមហាផ្ទៃកំពុងរៀបចំបង្កើតបញ្ជីខ្មៅកត់ត្រាអ្នកបើកបរក្នុងស្ថានភាពស្រវឹង ហើយបង្កគ្រោះថ្នាក់ចរាចរណ៍ ក្រោយពីចំនួនគ្រោះថ្នាក់ បានឆក់យកជីវិតមនុស្ស និងបន្សល់ទុកជនរងគ្រោះរាប់ពាន់នាក់ក្នុងមួយឆ្នាំៗ។
រដ្ឋមន្ត្រីក្រសួងមហាផ្ទៃ លោក ស សុខា កាលពីថ្ងៃទី២៣ ខែមករា បានបង្ហោះសារនៅលើទំព័រហ្វេសប៊ុក (Facebook) ផ្លូវការថា ក្នុងរយៈពេលមួយឆ្នាំ២០២៣ គ្រោះថ្នាក់ចរាចរណ៍ បណ្ដាលឲ្យជនរងគ្រោះជិត ២ពាន់នាក់ បានស្លាប់នៅលើដងផ្លូវ ហើយមូលហេតុ នៃសោកនាដកម្មនេះ គឺបណ្ដាលមកពីការបើកបរក្រោមឥទ្ធិពល នៃគ្រឿងស្រវឹង។ លោក ស សុខា បន្ត ថា ការបញ្ជាយានយន្តក្នុងស្ថានភាពស្រវឹង ជាការប្រមាថអាយុជីវិតខ្លួនឯង ហើយអាចក្លាយជាឃាតកគ្រប់វិនាទី។ លោកឲ្យដឹងថា ក្រសួងមហាផ្ទៃកំពុងបង្កើតបញ្ជីខ្មៅ (Blacklist) ដើម្បីកត់ត្រា និងគ្រប់គ្រងទិន្នន័យអ្នកបើកបរនៅក្នុងស្ថានភាពស្រវឹង ហើយបង្កគ្រោះថ្នាក់ចរាចរណ៍ បណ្ដាលឲ្យអ្នកដទៃ រងរបួស ឬបាត់បង់អាយុជីវិត។
ទាក់ទងនឹងរឿងនេះដែរ ថ្លែងក្នុងពិធីបិទសន្និបាតបូកសរុបការងារ ឆ្នាំ២០២៣ និងលើកទិសដៅការងារបន្ត ឆ្នាំ២០២៤ របស់ក្រសួងព័ត៌មាន កាលពីថ្ងៃទី២៣ មករា លោកនាយករដ្ឋមន្ត្រី ហ៊ុន ម៉ាណែត ទទួលស្គាល់ថា ការស្លាប់របស់ពលរដ្ឋកម្ពុជាបណ្ដាលមកពីគ្រោះថ្នាក់ចរាចរណ៍ មានចំនួនច្រើនជាងគ្រោះថ្នាក់ផ្សេងទៀតដូចជា គ្រោះថ្នាក់បណ្ដាលមកពីយុទ្ធភណ្ឌមិនទាន់ផ្ទុះ។ លោក ហ៊ុន ម៉ាណែត ក៏ដាក់បញ្ជាឲ្យអាជ្ញាធរ ពង្រឹងការអនុវត្តច្បាប់ចរាចរណ៍ និងបញ្ឈប់ការផ្សព្វផ្សាយជំរុញលើកទឹកចិត្តឲ្យពលរដ្ឋប្រើប្រាស់គ្រឿងស្រឹងហួសហេតុ តាមកញ្ចក់ទូរទស្សន៍។
លោក ហ៊ុន ម៉ាណែត៖ «ថ្ងៃមុនបានប្រជុំហើយជាមួយស្ថានីយទូរទស្សន៍ គឺឥឡូវហាមការផ្សាយបិទប៉ាណូ ប៉ុន្តែដាក់ពាក្យអប់រំជាមួយ ផឹក បើថា ស្រវឹងកុំបើកបរ អ៊ីចឹងទៅ។ ប៉ុន្តែរឿងឡើងវាយបុកហៅមនុស្សទៅគាស់ផឹកគាស់អី អត់ទេ សូមឲ្យគ្រប់ស្ថានីយទូរទស្សន៍ទាំងអស់ឈប់ឲ្យធ្វើបន្តទៀត»។
អ្នកជំនាញផ្នែកកម្មវិធីសុវត្ថិភាពចរាចរណ៍ លោក គង់ រតនៈ ប្រាប់វិទ្យុអាស៊ីសេរីនៅថ្ងៃទី២៤ ខែមករា ថា លោកសង្កេតឃើញថា ពលរដ្ឋកម្ពុជានៅមិនទាន់យល់ដឹងពីច្បាប់ចរាចរណ៍នៅឡើយទេ ជាហេតុនាំឲ្យការបើកបរក្នុងស្ថានភាពស្រវឹង និងល្មើសច្បាប់ចរាចរណ៍នៅតែមានជាបន្តទៀត។ លោកបន្តថា ចំពោះការបង្កើតបញ្ជីខ្មៅ កត់ត្រាអ្នកបើកបរក្រោមឥទ្ធិពលគ្រឿងស្រវឹង ហើយបង្កគ្រោះថ្នាក់ចរាចរណ៍វិញ អាចជាផ្នែកមួយ ធ្វើឲ្យពលរដ្ឋងាកមកគោរពច្បាប់ចរាចរណ៍ ហើយបើកបរគ្មានសារធាតុស្រវឹង។ ប៉ុន្តែលោកថា ដើម្បីបង្ការគ្រោះថ្នាក់ចរាចរណ៍ក្នុងរយៈពេលវែង រដ្ឋាភិបាល និងអាជ្ញាធរគួរតែបង្កើនការផ្សព្វផ្សាយ និងរឹតបន្តឹងច្បាប់ចរាចរណ៍ ព្រមទាំងពិនិត្យប្រព័ន្ធសុវត្ថិភាពតាមដងផ្លូវ។
លោក គង់ រតនៈ៖ «ក៏ប៉ុន្តែអ្វី ដែលសំខាន់ជាងហ្នឹងទៅទៀតនោះគឺ សម្រាប់ខ្ញុំ គឺមានការអនុវត្តយន្តការ ដើម្បីការពារសុវត្ថិភាពជាច្រើនទៅទៀតទេ ដែលសំខាន់ជាងហ្នឹង ហើយធ្វើយ៉ាងណាកាត់បន្ថយកុំឲ្យមានការទទួលទានគ្រឿងស្រវឹង ឬក៏បង្កើតឲ្យមានច្បាប់គ្រប់គ្រងគ្រឿងស្រវឹង ឬក៏អីហ្នឹងវាជារឿង ដែលប្រសើរជាជាងហ្នឹង មានន័យថា វាមានឥទ្ធិពលនៅក្នុងរយៈពេលវែង ជាជាងការធ្វើសកម្មភាពឃើញតែពេលមួយភ្លែត ហើយក៏បាត់ទៅវិញអីចឹងទៅ»។
ក្នុងហេតុការណ៍គ្រោះថ្នាក់ចរាចរណ៍កន្លងមក គេសង្កេតឃើញថា ជនបង្កដែលជា អ្នកមានលុយមានអំណាចមួយចំនួន ដែលមានទំនាក់ទំនងជាមួយគណបក្សកាន់អំណាចតែងរួចពីសំណាញ់ច្បាប់ ជាក់ស្ដែងដូចករណីគ្រោះថ្នាក់ចរាចរណ៍ ដែលបង្កដោយអនុប្រធានរដ្ឋសភា មកពីគណបក្សប្រជាជនកម្ពុជា លោក ជាម យៀប ដែលឡានរបស់លោក បានបុកមនុស្ស ហើយរត់គេច ដែលបណ្ដាលឱ្យស្ត្រីជាប្រពន្ធមានផ្ទៃពោះស្លាប់ និងប្ដីរងរបួសធ្ងន់ក្នុងស្រុកកៀនស្វាយកាលពីឆ្នាំ២០១៣ ។ ករណីមួយទៀត អភិបាលខេត្តមណ្ឌលគិរី លោក ថង សាវុន ក៏បានបើកឡានទំនើបបុកពលរដ្ឋពីរនាក់ស្លាប់ភ្លាមៗ កាលពីខែកញ្ញា ឆ្នាំ២០២១ ហើយមកទល់ពេលនេះ អាជ្ញាធរក៏មិនទាន់ស្រាវជ្រាវ និងផ្ដល់យុត្តិធម៌ដល់ជនរងគ្រោះនៅឡើយទេ ។ ករណីមួយផ្សេងទៀត ជនបង្កឈ្មោះ ព្រហ្ម វិចិត្រសុសក្តា ដែលជាកូនប្រុសរបស់មេធាវី ព្រហ្ម វិចិត្រសុភា បើកឡានទំនើប(Jeep) ប្រណាំងជាមួយឡានទំនើបមួយផ្សេងទៀត បានបុកលោក សៀង គីមហុង ដែលជាកីឡាករវាយសីឆ្នើមរបស់កម្ពុជា បណ្ដាលឲ្យស្លាប់ កាលពីថ្ងៃទី១៤ ខែធ្នូ ឆ្នាំ២០២៣។ ក្រោយពីកើតហេតុ ជនបង្កបានរត់គេចខ្លួន ហើយអាជ្ញាធរបានត្រឹមតែអំពាវនាវឲ្យជនបង្កចូលខ្លួនសារភាពកំហុស ដោយគ្មានចំណាត់ការណាមួយឡើយ រហូតទាល់តែនាយករដ្ឋមន្ត្រី ហ៊ុន ម៉ាណែត ដាក់បញ្ជាឲ្យអាជ្ញាធរចាប់អ្នកបើកបររថយន្តរូបនោះ ទើបជនបង្កចូលខ្លួនសារភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។