សហព័ន្ធគមនាគមន៍ព័ត៌មានបច្ចេកវិទ្យា (ICT) បានសម្ពោធដាក់ឲ្យប្រើប្រាស់នៅ ភ្នំពេញ នៅថ្ងៃទី២៤ កក្កដា ដើម្បីជំរុញវិស័យឧស្សាហកម្មខាងបច្ចេកវិទ្យាកម្ពុជា បានជឿនលឿន។
រដ្ឋលេខាធិការក្រសួងប្រៃសណីយ៍ និងទូរគមនាគមន៍ លោក កាន ច័ន្ទមេតា ត្រូវបានសារព័ត៌មានសិនហួរ (Xinhua) ស្រង់សម្ដី ផ្សាយថ្ងៃទី២៤ កក្កដា ថា សហព័ន្ធនេះជាដៃគូមួយយ៉ាងសំខាន់របស់ក្រសួងប្រៃសណីយ៍ និងទូរគមនាគមន៍ ដើម្បីអភិវឌ្ឍន៍វិស័យឧស្សាហកម្ម នៃគមនាគមន៍បច្ចេកវិទ្យាព័ត៌មាន។
សារព័ត៌មានដដែលឲ្យដឹងថា ប្រធានសហព័ន្ធ គមនាគមន៍ព័ត៌មានបច្ចេកវិទ្យា គឺជាកូនប្រសា លោកនាយករដ្ឋមន្ត្រី ហ៊ុន សែន និងត្រូវជាកូនបង្កើតលោក សុខ អាន ឧបនាយករដ្ឋមន្ត្រី និងជារដ្ឋមន្ត្រីនៃទីស្ដីការគណៈរដ្ឋមន្ត្រី។
កម្ពុជាដែលមានពលរដ្ឋជាង ១៤លាននាក់ មានអ្នកទិញទូរស័ព្ទដៃប្រើប្រាស់ដល់ទៅ ២០ លាន ២ សែនគ្រឿងកាលពីឆ្នាំទៅមិញ គឺចំនួនអ្នកទិញទូរស័ព្ទប្រើប្រាស់កើនឡើង ៦ ភាគរយរៀងរាល់ឆ្នាំ ក្នុងនោះមានក្រុមហ៊ុនចែកចាយសេវាអ៊ិនធើណែតប្រហែល២៧ និងមានអ្នកប្រើប្រាស់អ៊ិនធើណែតប្រហែល ២ លាន៧ សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។