បេក្ខនារីមកពីទីបេ (Tibet) និងតៃវ៉ាន់(Taiwan) ត្រូវអ្នករៀបចំកម្មវិធីដកចេញពីការប្រឡងបវរកញ្ញា Miss Global ឆ្នាំ២០២៣ ដែលកម្ពុជា និងវៀតណាមធ្វើជាម្ចាស់ផ្ទះ ដោយសារគោលនយោបាយចិនតែ១។
កម្ពុជា និងវៀតណាមកំពុងរួមគ្នារៀបចំកម្មវិធីប្រឡងបវរកញ្ញា Miss Global ដែលបានចាប់ផ្តើមតាំងពីថ្ងៃទី២ មករា និងគ្រោងបិទបញ្ចប់នៅថ្ងៃទី១៨ មករាខាងមុខ ដែលជាថ្ងៃប្រកួតផ្ដាច់ព្រ័ត្រ។
ម្ចាស់ផលិតកម្មមហាហង្ស ដែលតំណាងឱ្យភាគីកម្ពុជានៃអ្នករៀបចំកម្មវិធីប្រឡងបវរកញ្ញា Miss Global លោក អ៊ិន សុភិន អះអាងប្រាប់វិទ្យុអាស៊ីសេរីនៅយប់ថ្ងៃទី១១ ខែមករា ថា ក្រោមគោលនយោបាយចិនតែមួយមន្ត្រីរដ្ឋាភិបាលបានណែនាំឱ្យដកបេក្ខនារី២រូប គឺបេក្ខនារីមកពីទីបេ និងតៃវ៉ាន់ មិនឱ្យចូលរួមប្រកួតក្នុងកម្មវិធីពិភពលោកមួយនេះ។
លោក សុភិន បន្តថា ប៉ុន្តែដោយមានការសម្របសម្រួលបវរកញ្ញាមកពីតៃវ៉ាន់ កញ្ញា លីនដា ហ័ង (Linda Huang) បានចូលរួមប្រកួតវិញ ក្រោយយល់ព្រមប្ដូរពីពាក្យថា មកពីតៃវ៉ាន់ ទៅជាឈ្មោះដែនដីមួយនៅក្នុងប្រទេសចិនវិញ។ តែទោះជាយ៉ាងណាបវរកញ្ញាទីបេ កញ្ញា ទិនស៊ីន ផាលដុន (Tenzin Paldon) មិនបានចូលរួមក្នុងការប្រកួតឡើយ។
លោក អ៊ិន សុភិន៖ «ហ្នឹងរឿងថ្ងៃទី២ ហើយយើងក៏បានសម្របសម្រួលតាមហ្នឹងទៅ។ តាមរាជរដ្ឋាភិបាល ប្រទេសទីបេមិនអនុញ្ញាតឱ្យចូលរួមទេ ដោយសារយើងជ្រើសរើសយកប្រទេសចិនគឺជាដៃគូនយោបាយ។ តែតៃវ៉ាន់អាចចូលរួមបានដោយប្រើឈាងថា មកពីតៃប៉ិ ប្រទេសចិន ហើយរឿងហ្នឹងក៏ចប់ទៅ»។
លោក អ៊ិន សុភិន បញ្ជាក់ដែរថា កម្មវិធីផ្សាយផ្ទាល់កម្មវិធីកាលពីយប់ថ្ងៃ៣ ខែមករា ជាយប់បង្ហាញរូបបេក្ខនារីចូលរួមការប្រកួត ដែលធ្វើនៅកម្ពុជា តាមរយៈបណ្ដាញសង្គមរបស់ទូរទស្សន៍បាយ័នក៏ត្រូវមន្ត្រីរដ្ឋាភិបាលណែនាំឱ្យលុបចេញភ្លាមៗដែរ ដោយសារតែបេក្ខនារីទាំងពីរបានណែនាំខ្លួនថាពួកគេមកពីទីបេ និងតៃវ៉ាន់។
លោក អ៊ិន សុភិន ថា គ្មានភាពប្រទាំងប្រទើសអ្វីទៀតទេ មកដល់ពេលនេះ ព្រោះអ្នករៀបចំកម្មវិធីយល់ស្របថា នេះជាគោលនយោបាយរបស់រដ្ឋាភិបាល។
លោក អ៊ិន សុភិន៖ «លុបចោលទាំងអស់សិន ហើយយើងនឹងកាត់គាត់២នាក់ចោល ដើម្បីយើងយកទៅផូស(Post)ឡើងវិញ។ យើងផ្សព្វផ្សាយឡើងវិញ»។
បេក្ខនារីបវរកញ្ញា Miss Global មកពីទីបេ កញ្ញា ទិនស៊ីន ផាលដុន ដែលជាបវរកញ្ញាទីបេ ប្រចាំឆ្នាំ២០១៧ បានចុះឈ្មោះចូលរួមការប្រឡងបវរកញ្ញា Miss Global ឆ្នាំ២០២៣ ដោយបានជាប់ក្នុងបញ្ជីបេក្ខនារី ២៥នាក់ ដែលអ្នកមានអ្នកគាំទ្របោះឆ្នោតគាំទ្រច្រើនក្នុងការប្រឡងនេះ បានប្រាប់វិទ្យុអាស៊ីសេរីថា អ្នករៀបចំកម្មវិធីមួយរូបបានប្រាប់កញ្ញាថា រដ្ឋាភិបាលចិនបានដាក់សម្ពាធទៅលើនាយករដ្ឋមន្ត្រីកម្ពុជា ហើយគឺនាយករដ្ឋមន្ត្រី លោក ហ៊ុន ម៉ាណែត ផ្ទាល់ ដែលជាអ្នកផ្ញើសារប្រាប់ទៅអ្នករៀបចំកម្មវិធីឱ្យបញ្ឈប់មិនឱ្យកញ្ញាបន្តចូលរួមប្រកួត។
វិទ្យុអាស៊ីសេរីនៅមិនទាន់អាចសុំការបញ្ជាក់ពីអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យនាយករដ្ឋមន្ត្រី លោក មាស សុភ័ណ អំពីការលើកឡើងនេះបាននៅឡើយទេ គិតត្រឹមម៉ោងផ្សាយនេះ។
បើទោះជាយ៉ាងណា លោក អ៊ិន សុភិន មិនបញ្ជាក់យ៉ាងណាអំពីរឿងនេះទេ ដោយលោកយល់ថា រដ្ឋាភិបាលមានកិច្ចសហប្រតិបត្តិការជាមួយរដ្ឋាភិបាលចិន នៅក្រោមគោលនយោបាយចិនតែមួយគឺត្រូវតែអនុវត្តតាមគោលនយោបាយដែលបានកំណត់។
បើតាមលោក អ៊ិន សុភិន ពេលនេះក្រុមបេក្ខនារីប្រឡងបវរកញ្ញា Miss Global កំពុងបន្តសកម្មភាពនានា ដែលអ្នករៀបចំកម្មវិធីឱ្យពួកគេធ្វើនៅក្នុងប្រទេសវៀតណាម ដើម្បីឈានទៅដល់វគ្គពាក់កណ្ដាលផ្ដាច់ព្រ័ត្រនៅថ្ងៃ ទី១៣មករា ដែលគ្រោងនឹងធ្វើនៅលើកោះត្រល់ ដែលវៀតណាម ដាក់ឈ្មោះថា កោះភូកុក (Phú Quốc) ។ បន្ទាប់ពីនោះក្រុមបេក្ខនារីនឹងត្រឡប់មកកម្ពុជាវិញ ដើម្បីប្រកួតផ្ដាច់ព្រ័ត្រនៅយប់ថ្ងៃទី១៨ មករា។
លោក អ៊ិន សុភិន រំពឹងថា កម្មវិធីនេះនឹងបានជាផ្នែកមួយជួយជំរុញវិស័យទេសចរណ៍នៅកម្ពុជា នៅក្រោយវិបត្តិកូវីដ-១៩ ពិសេសវិស័យទេសចរណ៍នៅខេត្តសៀមរាប ពីព្រោះនៅក្រោយការប្រកួតបវរកញ្ញា ដែលជាប់ក្នុងបញ្ជីលំដាប់ថ្នាក់ ៥នាក់ចុងក្រោយ នឹងចំណាយពេលវេលាជាច្រើនថ្ងៃធ្វើកម្មវិធីមនុស្សធម៌ និងផ្សព្វផ្សាយនៅខេត្តសៀមរាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។