ព្រះសង្ឃ សមណនិស្សិត និងនិស្សិតនៃសាកលវិទ្យាល័យព្រះសីហនុរាជ សាខាខេត្តបាត់ដំបង ដែលមានព្រះសង្ឃប្រមាណ ៧០អង្គ និងនិស្សិតជាង ១០០នាក់ នៅព្រឹកថ្ងៃទី៤ តុលា បាននាំយកអំណោយចំណីអាហារមួយចំនួន ទៅចែកដល់អ្នកជំងឺដែលមានជីវភាពក្រីក្រសម្រាកព្យាបាលនៅមន្ទីរបង្អែកខេត្តបាត់ដំបង និងមន្ទីរពេទ្យពោពី ក្រុងបាត់ដំបង ខេត្តបាត់ដំបង។
ការយកអំណោយទៅចែកដល់អ្នកជំងឺនេះ ក្នុងគោលបំណងដើម្បីបង្កើនទំនាក់ទំនងរវាងប្រជាពលរដ្ឋ និងប្រជាពលរដ្ឋ ឲ្យមានសាមគ្គីភាព និងចេះជួយទុក្ខធុរៈគ្នាទៅវិញទៅមកនៅក្នុងសង្គមជាតិ។
ព្រះសង្ឃសមណនិស្សិត និងនិស្សិតប្រុសស្រី បានបែងចែកភារកិច្ចរៀងៗខ្លួន ដោយព្រះអង្គខ្លះដាំបាយនឹងខ្ទះត្នោត និងនិស្សិតខ្លះទៀត អង្គុយវេចខ្ចប់ចំណីអាហារដាក់ក្នុងស្បោងប្លាស្ទិកប្រមាណ ៨០០កញ្ចប់ ដើម្បីនាំយកទៅចែកឲ្យអ្នកជំងឺចំនួន ៨០០នាក់ នៅក្នុងមន្ទីរពេទ្យចំនួនពីរកន្លែង។
ព្រះតេជព្រះគុណ ហាក់ សៀងហៃ ជាជំនួយការនៃសាកលវិទ្យាល័យព្រះសីហនុរាជ សាខាខេត្តបាត់ដំបង មានព្រះថេរដីកាដោយវាចាស្រទន់មួយៗ នៅខាងមុខអគារសាកលវិទ្យាល័យ មុននឹងព្រះអង្គនិមន្តនាំអំណោយទៅចែកជូនអ្នកជំងឺតាមមន្ទីរពេទ្យថា ព្រះសង្ឃ សមណនិស្សិត និស្សិត រួមនឹងប្រជាពលរដ្ឋដែលមានចិត្តសទ្ធាជ្រះថ្លាមួយចំនួនក្នុងខេត្តបាត់ដំបង បានរួមសាមគ្គីគ្នាទាំងថវិកា និងកម្លាំងកាយចិត្ត ទិញសម្ភារៈ រួមមានទឹកក្រូចមួយកំប៉ុង ទឹកសុទ្ធ ១ដប មី ២កញ្ចប់ និងបាយមួយប្រអប់ ព្រមទាំងក្រូច ២ផ្លែ ដែលគិតជាថវិកាប្រមាណ ១ម៉ឺនរៀលក្នុងមួយស្បោង។
ព្រះតេជព្រះគុណមានព្រះថេរដីកាបន្តថា ចំពោះបាយកញ្ចប់ ព្រះសង្ឃ និងនិស្សិតទិញរបស់របរមកចម្អិនធ្វើដោយខ្លួនឯង រួចវេចខ្ចប់យកទៅចែកដល់អ្នកជំងឺនៅក្នុងមន្ទីរពេទ្យផ្ទាល់ដៃ ដោយបែងចែកជា ២ក្រុម គឺក្រុមទី១ ទៅចែកនៅមន្ទីរពេទ្យបង្អែកខេត្ត និងមួយក្រុមទៀត ទៅចែកឲ្យអ្នកជំងឺនៅមន្ទីរពេទ្យពោពី ខេត្តបាត់ដំបង។ ព្រះអង្គមានព្រះថេរដីកាបន្តទៀតថា ការនាំអំណោយទៅចែកជូនអ្នកជំងឺនេះ ក្នុងគោលបំណងដើម្បីលើកទឹកចិត្តដល់អ្នកជំងឺក្នុងមន្ទីរពេទ្យ ឲ្យបានធូរស្រាលផង និងបណ្ដុះប្រជាពលរដ្ឋឲ្យមានការសាមគ្គីគ្នានៅក្នុងសង្គមជាតិផង៖ «ខ្វះការសាមគ្គីភាពគ្នាក្នុងសង្គម នាំឲ្យមានការបែកបាក់គ្នា និងធ្វើឲ្យសង្គមមិនមានការរីកចម្រើនទៅមុខ ហើយការចូលរួមរបស់ព្រះសង្ឃ និងយុវជនពេលនេះ នឹងក្លាយទៅជាទំពាំងស្នងឫស្សីរបស់សង្គមជាតិនៅថ្ងៃអនាគត»។
ស្រដៀងគ្នានេះដែរ ព្រះសង្ឃដែលចូលរួមនាំអំណោយទៅចែកជូនអ្នកជំងឺ គង់នៅវត្តពោធិ៍វាល គឺព្រះតេជព្រះគុណ វី សុវិជ្ជា មានព្រះថេរដីកាថា ព្រះអង្គសប្បាយរីករាយក្នុងការនាំអំណោយទៅចែកដល់អ្នកជំងឺនេះ ពីព្រោះថា ពួកគាត់ភាគច្រើនជាប្រជាពលរដ្ឋក្រីក្រសម្រាកព្យាបាលនៅក្នុងមន្ទីរពេទ្យរដ្ឋ ហើយពុំមានឱកាសទៅធ្វើបុណ្យធ្វើទានក្នុងរដូវបុណ្យកាន់បិណ្ឌនេះទេ ដើម្បីឲ្យពួកគាត់មានភាពកក់ក្ដៅ និងឆាប់បានជាសះស្បើយពីជំងឺ៖ «នៅរដូវកាន់បិណ្ឌនេះ ប្រជាពលរដ្ឋខ្មែរយើងភាគច្រើន ពួកគាត់នាំគ្នាធ្វើបុណ្យទាននៅទីវត្ត ប៉ុន្តែអ្នកជំងឺវិញ គឺពួកគាត់នៅឯកោក្នុងមន្ទីរពេទ្យ មិនបានទៅណានោះទេ។ ដូច្នេះ យើងទៅជួយអ្នកជំងឺឲ្យពួកគាត់មានក្ដីសង្ឃឹមឡើងវិញ»។
រីឯក្រុមនិស្សិតនៃសាកលវិទ្យាល័យព្រះសីហនុរាជ សាខាខេត្តបាត់ដំបង ថ្លែងនៅខាងមុខអគារសាកលវិទ្យាល័យថា ពួកគេមានការសប្បាយរីករាយ ដែលបានចូលរួមកិច្ចការសង្គមនេះ ហើយបានជួយរៀបចំសម្ភារៈម្ហូបអាហារជាមួយព្រះសង្ឃ និងលោកគ្រូអ្នកគ្រូ តាំងពីម៉ោង ៤កន្លះព្រឹករហូតដល់ពេលចេញដំណើរទៅមន្ទីរពេទ្យ៖ «ពួកខ្ញុំបានជួយលាងចាន លាងអង្ករ ចៀនសាច់ និងស្ងោរពងទា ព្រមទាំងបានវេចខ្ចប់បាយម្ហូបដាក់ក្នុងស្បោងប្លាស្ទិកជាមួយគ្នា»។
ទាក់ទងនឹងបញ្ហានេះដែរ ព្រះអនុគណក្រុងបាត់ដំបង ព្រះតេជព្រះគុណ យឿម រដ្ឋសភា ដែលបានចូលរួមនាំអំណោយទៅចែកដល់អ្នកជំងឺនៅក្នុងមន្ទីរពេទ្យដែរ មានព្រះថេរដីកាថា ព្រះអង្គសាទរចំពោះកាយវិការរបស់ព្រះសង្ឃ សមណនិស្សិត និងនិស្សិតនៃសាកលវិទ្យាល័យព្រះសីហនុរាជ ថាជាសកម្មភាពមនុស្សធម៌ដ៏កម្រមួយនៅក្នុងសង្គម ដើម្បីជួយរំលែកទុក្ខដល់អ្នកដទៃ ដោយមិនគិតពីការនឿយហត់របស់ខ្លួន៖ «អាត្មាសាទរចំពោះបុណ្យកុសលដែលព្រះសង្ឃ និងនិស្សិតបានធ្វើនេះ គឺជាវប្បធម៌ចែករំលែក ក្នុងនាមព្រះសង្ឃ និងពុទ្ធបរិស័ទ តាមលទ្ធភាពដែលអាចធ្វើទៅបាន»។
កន្លងទៅ មតិមហាជនមួយចំនួនតែងលើកឡើងពីរឿងមិនល្អរបស់ព្រះសង្ឃ ដោយអ្នកខ្លះយល់ឃើញថា ព្រះសង្ឃបួសឆាន់នៅតែក្នុងវត្ត មិនបានជួយការងារអ្វីជាដុំកំភួន ធ្វើឲ្យសង្គមរីកចម្រើននោះទេ។
ទោះជាយ៉ាងនេះក្ដី ប្រធានអង្គការព្រះពុទ្ធសាសនាដើម្បីអភិវឌ្ឍន៍ លោកបណ្ឌិត ហេង មុនីចិន្ដា មានប្រសាសន៍ថា កន្លងមក ព្រះសង្ឃតែងមានទំនាក់ទំនងគ្នាល្អជាមួយប្រជាពលរដ្ឋនៅក្នុងសង្គម។ បើទោះជាប្រជាពលរដ្ឋមានទុក្ខលំបាកយ៉ាងណាក្ដី គឺព្រះសង្ឃតែងតែយកចិត្តទុកដាក់ដល់ពួកគាត់ជាប្រចាំ។ លោកបញ្ជាក់ថា ព្រះសង្ឃ និងនិស្សិត នាំអំណោយទៅចែកដល់អ្នកជំងឺនេះ គឺសកម្មភាពមួយល្អនៅក្នុងសង្គម ហើយពុំមានខុសឆ្គងអ្វីនោះទេ៖ «ព្រះសង្ឃអាចចុះទៅសួរសុខទុក្ខ និងនាំយកអំណោយទៅចែកជូនពុទ្ធបរិស័ទមានជំងឺក្នុងមន្ទីរពេទ្យបាន និងមិនខុសពីព្រះវិន័យក្នុងព្រះពុទ្ធសាសនាទេ»។
ព្រះសង្ឃ សមណនិស្សិត និងនិស្សិតនៃសាកលវិទ្យាល័យព្រះសីហនុរាជ សាខាខេត្តបាត់ដំបង នាំអំណោយទៅចែកអ្នកជំងឺនៅតាមមន្ទីរពេទ្យមួយចំនួនក្នុងខេត្តបាត់ដំបង ធ្វើរៀងរាល់មួយឆ្នាំម្ដង។
ជំនួយការនៃសាកលវិទ្យាល័យព្រះសីហនុរាជ ឲ្យដឹងថា ក្រោយពីថ្ងៃបុណ្យភ្ជុំបិណ្ឌប្រពៃណីខ្មែររួច សាកលវិទ្យាល័យនឹងមានគម្រោងនាំយកអំណោយនំចំណី ទៅចែកជូនអ្នកទោសនៅពន្ធនាគារខេត្តបាត់ដំបង ទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។