មន្ត្រីសង្ឃបញ្ជាក់ថា វត្តអារាមទូទាំងប្រទេស អាចរៀបចំកន្លែងទទួលចង្ហាន់ និងទេយ្យវត្ថុពីពុទ្ធបរិស័ទ អំឡុងពិធីបុណ្យកាន់បិណ្ឌ និងភ្ជុំបិណ្ឌ ដោយអនុវត្តតាមវិធានការសុខាភិបាល។ ថេរដីកានេះ ធ្វើឡើងបន្ទាប់ពីរដ្ឋាភិបាលបានប្រកាសផ្អាករៀបចំពិធីបុណ្យកាន់បិណ្ឌនិងភ្ជុំបិណ្ឌ ដោយសារការផ្ទុះរាតត្បាតជំងឺកូវីដ-១៩ នៅតាមវត្តអារាមដែលធ្វើឱ្យចំនួនអ្នកឆ្លងនិងស្លាប់ដោយជំងឺនេះកើនឡើង។
មន្ត្រីសង្ឃបញ្ជាក់ថា ពុទ្ធបរិស័ទចំនួនម្នាក់ ឬពីរនាក់អាចយកចង្ហាន់ ឬទេយ្យវត្ថុទៅប្រគេនព្រះសង្ឃនិងបង្សុកូលឧទ្ទិសកុសលអំឡុងបុណ្យកាន់បិណ្ឌ និងភ្ជុំធម្មតា ប៉ុន្តែមិនអនុញ្ញាតឱ្យប្រារព្ធពិធីសាសនា ដែលមានការជុំមនុស្សច្រើនឡើយ។
ប្រធានលេខាធិការដ្ឋានគណៈសង្ឃនាយកព្រះតេជព្រះគុណ ឃឹម សន មានថេរដីកាថា ទោះបីរដ្ឋាភិបាលបានប្រកាសផ្អាករៀបចំពិធីបុណ្យកាន់បិណ្ឌ និងកាន់បិណ្ឌក៏ដោយ ប៉ុន្តែវត្តអារាមទូទាំងប្រទេសអាចរៀបចំកន្លែងទទួលចង្ហាន់ និងទេយ្យវត្ថុពីពុទ្ធបរិស័ទត្រឹមក្លោងទ្វារវត្ត ដើម្បីទប់ស្កាត់ការរីករាលដាលជំងឺកូវីដ-១៩ នៅក្នុងវត្តអារាម។ ព្រះអង្គសង្កាត់ធ្ងន់ថាវត្តនីមួយៗត្រូវប្រកាន់ខ្ជាប់វិធានការសុខាបាល ដោយរក្សាគម្លាតសុវត្ថិភាព ពាក់ម៉ាស់ ប្រើឧបករណ៍វាស់កម្ដៅ បាញ់អាល់កុលសម្លាប់មេរោគជាដើម៖ «សូមឱ្យញាតិញោមពុទ្ធបរិស័ទគ្រប់មជ្ឈដ្ឋានទាំងអស់ហ្នឹងយល់ជ្រាបតាមហ្នឹងទៅពរ ព្រោះយើងទាំងអស់គ្នាហ្នឹងសុទ្ធតែស្រឡាញ់ជីវិតស្រឡាញ់សុខភាពទាំងអស់គ្នា។ អ៊ីចឹងយើងជ្រះថ្លាយើងអាចយកទៅបាន គ្រាន់ថា ម្នាក់ពីរនាក់ព្រះសង្ឃចាំទទួលនៅវត្ត យើងត្រឡប់មកវិញមក ពរតាមដែលព្រះសង្ឃដាក់តុតាមវត្តអ៊ីចឹង មិនអាចផ្ដុំគ្នាយូរលក្ខណៈប្រារព្ធអីពិធីកាន់បិណ្ឌភ្នំបិណ្ឌហ្នឹងពរ»។
កាលពីពេលថ្មីៗ នេះ លោកនាយករដ្ឋមន្ត្រី ហ៊ុន សែន បានប្រកាសផ្អាករៀបចំពិធីបុណ្យកាន់បិណ្ឌនិងភ្ជុំបិណ្ឌចាប់ពីបិណ្ឌទី៤ ដល់ថ្ងៃពិធីបុណ្យភ្ជុំបិណ្ឌវិញ ដោយសារការជួបជុំ និងប្រមូលផ្ដុំនៅតាមវត្តអារាមមិនបានអនុវត្តត្រឹមត្រូវតាមវិធានការសុខាភិបាលក្នុងការបង្ការ និងទប់ស្កាត់ជំងឺកូវីដ-១៩ ដែលធ្វើចំនួនអ្នកឆ្លងថ្មី និងអ្នកស្លាប់ដោយជំងឺកូវីដ-១៩ កើនឡើងជាបន្តបន្ទាប់។ ប៉ុន្តែលោក ហ៊ុន សែន បានអនុញ្ញាតពុទ្ធបរិស័ទអាចយកចង្ហាន់ និងទេយ្យវត្ថុប្រគេនព្រះសង្ឃ ដោយមានការសម្របសម្រួលពីអាជ្ញាធរ។
ជុំវិញរឿងនេះ ព្រះសង្ឃគង់នៅវត្តស្ទឹងមានជ័យ ព្រះតេជព្រះគុណ អ៊ិ ពុទ្ធី មានថេរដីកាថា នៅវត្តព្រះអង្គបានបិទទ្វារនិងផ្អាកពិធីសាសនាទាំងស្រុង ដើម្បីទប់ស្កាត់ការរីករាលដាលជំងឺកូវីដ-១៩។ ព្រះអង្គបន្តថាមន្ត្រីសង្ឃបានចាត់ឱ្យរៀបចំតុទទួលចង្ហាន់ និងទេយ្យវត្ថុដោយមានព្រះសង្ឃ ៤ ទៅ ៥អង្គនៅតាមក្លោងទ្វារចូលវត្ត ដើម្បីបង្សុកូល ចាប់ពីម៉ោង ៦ដល់ម៉ោង ១០កន្លះព្រឹក បន្ទាប់មកចង្ហាន់ទាំងនោះរៀបចំប្រគេនព្រះសង្ឃនៅតាមកុដិនីមួយៗ ដោយអនុវត្តតាមវិធានការសុខាភិបាល។ ព្រះអង្គថាស្ថានភាពនេះព្រះសង្ឃខ្សត់ខ្សោយចង្ហាន់ដោយសារពុទ្ធបរិស័ទប្រមាណ២០ទៅ៣០នាក់ក្នុងមួយថ្ងៃមកធ្វើបុណ្យ ខណៈព្រះសង្ឃគង់ចាំព្រះវស្សានៅក្នុងវត្ត មានចំនួន ២៧៧អង្គ ដោយមិនគិតទាំងអ្នករស់នៅអាស្រ័យនឹងវត្តផង៖ «មិនអនុញ្ញាតឱ្យញាតិញោមចូលទៅបង្សុកូលនៅវត្តអ៊ីចឹង បានត្រឹមតែដាក់តុឱ្យព្រះសង្ឃចាំទទួលពុទ្ធបរិស័ទមកធ្វើបុណ្យនៅតាមក្លោងទ្វារទាំងបីនៅក្នុងវត្ត ដល់ពេលមានការផ្អាកអ៊ីចឹងវាមិនគ្រប់គ្រាន់ប៉ុន្មានទេ ថ្ងៃខ្លះវាស្ទើរថ្ងៃខ្លះល្មមថ្ងៃខ្លះក៏វាខ្វះអ៊ីចឹង»។
ចំណែកវត្តអារាមដែលអាជ្ញាធរកំពុងដាក់ឲ្យស្ថិតនៅក្នុងតំបន់ក្រហម ឬបិទខ្ទប់វិញ ព្រះចៅអធិការវត្តប្រាសាទគោកចក ក្រុងសៀមរាប ព្រះតេជព្រះគុណ ហែម គឹមសាន មានថេរដីកាថាច្រើនថ្ងៃមកហើយ ដែលអាជ្ញាធរបានដាក់ចេញវិធានការហាមប្រាមមិនឱ្យពុទ្ធបរិស័ទចេញពីផ្ទះ ដើម្បីទប់ស្កាត់ការរាតត្បាតជំងឺកូវីដ-១៩។ ព្រះអង្គបន្តថាពិធីបុណ្យកាន់បិណ្ឌ និងភ្ជុំបិណ្ឌឆ្នាំនេះ ពុទ្ធបរិស័ទមិនសូវមកធ្វើបុណ្យទានទេ ព្រោះពលរដ្ឋនៅក្នុងតំបន់បិទខ្ទប់ ខ្វះខាតជីវភាព និងបារម្ភឆ្លងជំងឺកូវីដ-១៩។ ព្រះអង្គឱ្យដឹងថា ថ្វីត្បិតពេលនេះរដូវកាលបុណ្យទានក៏ដោយ តែព្រះអង្គនៅតែចំណាយប្រាក់ដែលបានពីពុទ្ធបរិស័ទមួយចំនួន ដើម្បីឱ្យចុងភៅវត្តធ្វើចង្ហាន់ប្រគេនព្រះសង្ឃជាង ៣០អង្គ និងចែកជូនដូនជី សិស្សនិស្សិតដែលកំពុងស្នាក់នៅក្នុងវត្តផងដែរ៖ «សម្រាប់កន្លែងទទួលចង្ហាន់ញាតិញោមគាត់មកម្នាក់ពីរនាក់ គឺមាននៅក្នុងវត្តពរមួយកន្លែង មានលោកតាមួយអង្គនៅចាំទទួលញាតិញោម បើញាតិញោមច្រើនមិនអនុញ្ញាតទេ ញាតិញោមយកមួយស្រាក់ពីរស្រាក់ ពរ គ្នាគាត់ម្នាក់ពីរនាក់តំណាងគ្រួសារអនុញ្ញាតបានពរ»។
វិទ្យុអាស៊ីសេរីមិនអាចទាក់ទាក់ អ្នកនាំពាក្យក្រសួងធម្មការ និងសាសនា លោក សេង សុមុនី ដើម្បីបញ្ជាក់ជុំវិញការផ្ទុះរាតត្បាតជំងឺកូវីដ-១៩នៅតាមវត្តអារាមបានទេ នៅថ្ងៃ២៧ កញ្ញា។
ទោះជាយ៉ាងណាលោក សេង សុមុនី បានប្រាប់សារព័ត៌មានក្នុងស្រុកនៅថ្ងៃទី២៦ កញ្ញាថាក្រសួងសុខាភិបាលបានយកសំណាកលើព្រះសង្ឃ គណៈកម្មការ អាចារ្យ និងសិស្សនិស្សិត ចំនួន ៩៧៥អង្គ និងនាក់ ដែលស្នាក់នៅវត្តចំនួន ១៥០ ក្នុងចំណោម ១៥៤ នៅក្នុងរាជធានីភ្នំពេញ ដោយលទ្ធផលរកឃើញថា អ្នកឆ្លងជំងឺកូវីដ-១៩ ចំនួន ១៤១អង្គ និងនាក់ អំឡុងពិធីបុណ្យកាន់បិណ្ឌ និងភ្ជុំបិណ្ឌ ៤ថ្ងៃកន្លងមក។
ពិធីកាន់បិណ្ឌមានរយៈពេល ១៥ថ្ងៃ គឺចាប់ពីថ្ងៃ ១រោចដល់ថ្ងៃ ១៥រោច ខែភទ្របទ គឺជាថ្ងៃបុណ្យភ្ជុំបិណ្ឌធំ ទៅតាមទំនៀមទម្លាប់ខ្មែរ និងកាលកំណត់ជាទៀងទាត់ពីបុរាណមក ដើម្បីឧទ្ទិសកុសលដល់ដួងវិញ្ញាណក្ខន្ធនៃអ្នកមានគុណទាំងឡាយដែលបានលាចាកលោកនេះទៅកាន់លោកខាងមុខ។ បុណ្យកាន់បិណ្ឌឆ្នាំនេះ ចាប់ផ្ដើមពីថ្ងៃទី២២ កញ្ញា ដល់ថ្ងៃទី៦ តុលា ដែលជាថ្ងៃបុណ្យភ្ជុំ។
កាលពីថ្ងៃទី២៥ កញ្ញា លោក ហ៊ុន សែន ថាការរាតត្បាតជំងឺកូវីដ១៩ នៅតាមវត្តអារាម គឺជាបញ្ហាធ្ងន់ធ្ងរ ដែលគ្រោះថ្នាក់ដល់ជាតិ និងសាសនា ទើបលោកប្រកាសផ្អាករៀបចំពិធីកាន់បិណ្ឌ និងភ្ជុំបិណ្ឌវិញ ដើម្បីការពារអាយុជីវិត និងសុខភាពពលរដ្ឋ ពីព្រោះការជួបជុំ និងប្រមូលផ្ដុំនៅតាមវត្តអារាមមិនបានអនុវត្តត្រឹមត្រូវតាមវិធានការសុខាភិបាល។ លោក ហ៊ុន សែន ទទួលស្គាល់ថា លោកធ្វេសប្រហែស អនុញ្ញាតឱ្យរៀបចំពិធីបុណ្យកាន់បិណ្ឌ និងភ្ជុំបិណ្ឌអំឡុងការរាតត្បាតជំងឺកូវីដ-១៩ ដែលបណ្ដាលឱ្យចំនួនអ្នកឆ្លង និងស្លាប់ដោយជំងឺនេះកើនឡើងជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។