កូដករ​ណាហ្គាវើលដ៍​ខកចិត្ត​​នឹង​ប្រព័ន្ធ​ឃោសនា​រដ្ឋ​ ដែល​ថា ការ​ទាមទារ​សិទ្ធិ​ការងារ​ពួកគេ​ជា​រឿង​នយោបាយ

ដោយ ម៉ៅ សុធានី
2022.04.29
Share on WhatsApp
Share on WhatsApp
កូដករ​ណាហ្គាវើលដ៍​ខកចិត្ត​​នឹង​ប្រព័ន្ធ​ឃោសនា​រដ្ឋ​ ដែល​ថា ការ​ទាមទារ​សិទ្ធិ​ការងារ​ពួកគេ​ជា​រឿង​នយោបាយ អាជ្ញាធរភ្នំពេញស្រាក់ដៃគ្នាកៀង​ក្រុម​កូដករ​ណាហ្គាវើលដ៍​​ឱ្យ​ឡើង​ឡាន​ដោយ​បង្ខំ នៅ​ថ្ងៃ​ទី២៩ ខែមេសា ឆ្នាំ២០២២ រួច​ហើយ​ដឹក​កូដករ​ទៅ​ទម្លាក់​នៅ​ជាយក្រុង​ដូច​សព្វដង។
រូបភាពពីពលរដ្ឋ

ក្រុម​កូដករ​ណាហ្គាវើលដ៍ និង​សហជីព​ ចាត់​ទុក​ប្រព័ន្ធ​ឃោសនា​របស់​រដ្ឋាភិបាល​លោក ហ៊ុន សែន ថា​ផ្សព្វផ្សាយ​ព័ត៌មាន​មិន​ឆ្លុះបញ្ចាំង​ពី​ការ​ពិត​ និង​ព្យាយាម​ដាក់​សម្ពាធ​ដល់​​ក្រុម​កូដករ។ ប្រតិកម្ម​របស់​កូដករ និង​សហជីព​នេះ ធ្វើ​ឡើង​ក្រោយ​ពី​សារព័ត៌មាន​ដែល​ស្និត​នឹង​រដ្ឋាភិបាល​ចុះ​ផ្សាយ​ដោយ​ចោទ​ប្រកាន់​ក្រុម​កូដករ​ថា កំពុង​ធ្វើ​សកម្មភាព​ដើម្បី​កេង​ចំណេញ​រឿង​នយោបាយ។

ក្រុម​កូដករ និង​សហជីព​ក្រុមហ៊ុន​កាស៊ីណូ​ណាហ្គាវើលដ៍​ហួស​ចិត្ត​នឹង​ប្រព័ន្ធ​ឃោសនា​រដ្ឋាភិបាល​លោក ហ៊ុន សែន​ និង​មន្ត្រី​អាជ្ញាធរ​ ដែល​បន្ត​លាប​ពណ៌​ចោទ​ប្រកាន់​លើ​សកម្មភាព​កូដករ​ដែល​គ្រាន់​ប្រើ​សិទ្ធិ​ស្រប​ច្បាប់​ដើម្បី​ទាមទារ​សិទ្ធ​សេរីភាព​ការងារ។

កូដករ​ និង​ជា​បុគ្គលិក​ក្រុមហ៊ុន​ណាហ្គាវើលដ៍​ម្នាក់​ កញ្ញា ឡាយ សុភ័ក្រ្តា ប្រាប់​វិទ្យុ​អាស៊ី​សេរី​នៅ​ថ្ងៃ​ទី២៩ ​មេសា​ថា កញ្ញា​​ខកចិត្ត​ចំពោះ​អាជ្ញាធរ​ និង​ក្រសួង​ពាក់ព័ន្ធ​ដែល​តែង​តែ​ព្យាយាម​បង្វែរ​សាច់​រឿង​មិន​ព្រម​ដើម្បី​ដោះស្រាយ​បញ្ចប់​វិវាទ​ការងារ​ដ៍​រ៉ាំរ៉ៃ​មួយ​នេះ។ កញ្ញា​​ចាត់​ទុក​ការ​ចោទ​ប្រកាន់​មក​លើ​កូដករ​ថា​ជា​ក្រុម​ធ្វើ​សកម្មភាព​នយោបាយ​នេះ ថា​ជា​រឿង​មិន​ពិត និង​ចោទ​ទាំង​ខ្វះ​មូលដ្ឋាន​ ដើម្បី​ដាក់​សម្ពាធ​ដល់​ក្រុម​កូដករ​បន្ថែម​ទៀត៖ «ខ្ញុំ​ក៏​ចង់​សួរ​បក​ទៅ​វិញ​ថា​ ការណ៍​ដែល​ចោទ​និង​លាប​ពណ៌​ពួក​ខ្ញុំ​ជា​ក្រុម​បដិវត្តន៍​ពណ៌ ​ជា​រឿង​នយោបាយ។ រឿង​នយោបាយ​ត្រង់​ណា​ដែរព្រោះ​រាល់​ថ្ងៃ​អ្វី​ដែល​ពួក​ខ្ញុំ​ធ្វើ​គឺ​ដើម្បី​ឆ្នាំង​បាយ ដើម្បី​ក្រពះ​។ ពួកខ្ញុំ​គ្រាន់​តែ​ទាមទារ​ឱ្យ​មាន​សហជីព​នៅ​កន្លែង​ការងារ​តែ​ប៉ុណ្ណឹង​ទេ។ អត់​មាន​រឿង​នយោបាយ​ អត់​មាន​បដិវត្តន៍​ពណ៌​អី​ទេ»

ប្រតិកម្ម​កូដករ​ណាហ្គាវើលដ៍​នេះ ធ្វើ​ឡើង​ក្រោយ​ពី​ប្រព័ន្ធ​ឃោសនា​រដ្ឋាភិបាល លោក ហ៊ុន សែន​ គឺ​ហ្វ្រេសញ៉ូ (Fresh New) បាន​ចុះផ្សាយ​នៅ​ថ្ងៃ​ទី២៩មេសា​ ដោយ​ចោទ​ប្រកាន់​សកម្ម​ភាព​របស់​ក្រុម​សហជីព និង​កូដករ​ថា​ជា​ឆាក​ល្ខោន​បន្លំ​ភ្នែក​ និង​ជា​សកម្មភាព​នយោបាយ​ ក្រោយ​ពី​សហជីព​បាន​អំពាវនាវ​រក​ជំនួយ​ពី​សប្បុរសធម៌​ជួយ​ដល់​ក្រុម​កូដករ​ដែល​កំពុង​ប្រឈម​បញ្ហា​ជីវភាព។

ជុំវិញ​រឿង​នេះ ប្រធាន​សហជីព​ក្រុមហ៊ុន​ណាហ្គាវើលដ៍​ កញ្ញា ឈឹម ស៊ីថរ​ រិះគន់​ថា​ បញ្ហា​លាប​ពណ៌​នេះ​កំពុង​ក្លាយ​ជា​ជំងឺ​មហារីក​សម្រាប់​អ្នក​មាន​អំណាច ឬ​មន្ត្រី​អាជ្ញាធរ​ដែល​បាន​ចោទ​ប្រកាន់​លើ​ពលរដ្ឋ​ទាំង​ខ្វះ​មូលដ្ឋាន។ កញ្ញា​បន្ត​ថា ការណ៍​ដែល​បន្ត​ចោទ​ប្រកាន់​ក្រុម​កូដករ​នេះ ក៏​កាន់​តែ​ឆ្លុះ​បញ្ចាំង​យ៉ាង​ច្បាស់​ថា ប្រជា​ពលរដ្ឋ​ពិត​ជា​មិន​មាន​សិទ្ធិ​ពេញ​លេញ​ក្នុង​ការ​សម្ដែង​មតិ​ដូច​ដែល​មាន​ធានា​ក្នុង​ច្បាប់​នោះ​ទេ៖ «គឺជា​ជំងឺ​មហារីក​ព្យាបាល​លែង​ជា ពាក់ព័ន្ធ​នឹង​ការ​ចោទ​ប្រកាន់។ តើ​សារព័ត៌មាន​ហ្រ្វេសញ៉ូ​ហ្នឹង​នៅ​ពី​ក្រោយ​គណបក្ស​នយោបាយ​ណា​ដែរបាន​ជា​ខំ ប្រឹង​លាប​ពណ៌​កូដករ​ខ្លាំង​ម៉្លេះ ឬ​ដើម្បី​កេង​ចំណេញ​ឱ្យ​គណបក្ស​ណាជា​ពិសេស​ក្រុមហ៊ុន​ណាហ្គាវើលដ៍​កម្មករ​ខ្មែរ​ ហើយ​វា​ក៏​បាន​បញ្ជាក់​ថា នៅ​ប្រទេស​កម្ពុជា​មិន​មាន​សេរីភាព​សហជីព និង​គ្មាន​សេរីភាព​ក្នុង​ការ​ជួប​ជុំ​តវ៉ា​របស់​កម្មករ​ដែរ»

វិទ្យុ​អាស៊ី​សេរី​មិន​អាច​ទាក់ទង​ប្រធាន​អង្គភាព​អ្នកនាំ​ពាក្យ​រដ្ឋាភិបាល​ លោក ផៃ ស៊ីផាន និង​អ្នក​នាំ​ពាក្យ​គណៈកម្មាធិការ​សិទ្ធិ​មនុស្ស​របស់​រដ្ឋាភិបាល លោក កត្ដា អ៊ន ដើម្បី​សុំ​បំភ្លឺ​ពី​បញ្ហា​នេះ​បាន​ទេ​នៅ​ថ្ងៃ​ទី២៩ មេសា។

នេះ​មិនមែន​ជា​លើក​ទី​មួយ​ទេ ដែល​ក្រុម​កូដករ​រង​ការ​ចោទ​ប្រកាន់​ពី​សំណាក់​ប្រព័ន្ធ​ឃោសនា​រដ្ឋាភិបាល​បែប​នេះ។ កន្លង​មក​ រដ្ឋបាល​ក្រុង​ភ្នំពេញ​បាន​ចេញ​ក្ដី​ប្រកាស​ព័ត៌មាន​ជា​ហូរហែ ដោយ​ចោទ​ក្រុម​កូដករ​ថា​ជា​ក្រុម​បំពុល​សង្គម​ ពេល​ដែល​ពួកគេ​ចេញ​ទាមទារ​ដំណោះស្រាយ​ពី​ថៅកែ​នៅ​ក្បែរ​អគារ​ក្រុមហ៊ុន។ លើស​ពី​នេះ មន្ត្រី​នៅ​ក្រសួង​ស្ថាប័ន​ពាក់ព័ន្ធ​មួយ​ចំនួន ក៏​ធ្លាប់​បាន​ចោទ​ក្រុម​កូដករ​ថា ជា​ក្រុម​មេរោគ​ចង្រៃ និង​ជា​ក្រុម​បដិវត្តន៍​ពណ៌​ចង់​ផ្ដួល​រលំ​រដ្ឋាភិបាល​ នៅ​ពេល​ដែល​ក្រុម​កូដករ​ប្រមូល​ផ្ដុំ​គ្នា​ដោយ​សន្តិវិធី​ទាមទារ​ឱ្យ​ថៅកែ​គោរព​សិទ្ធិ​សហជីព​នៅ​កន្លែង​ការងារ។

ក្រៅ​ពី​ការ​ចោទ​ប្រកាន់​ក្រុម​កូដករ​ភ្ជាប់​នឹង​រឿង​នយោបាយ​នេះ អាជ្ញាធរ​ក្រុង​ភ្នំពេញ​ក៏​បាន​បង្កើន​ការ​ប្រើ​អំពើ​ហិង្សា​លើ​កូដករ​ស្ទើរ​រៀង​រាល់​ថ្ងៃ។ អាជ្ញាធរ​ក្រុង​ភ្នំពេញ​បន្ត​ស្រែក​សម្លុត និង​រុញច្រាន​កូដករ​ជិត ១០០រយ​នាក់​ឱ្យ​រថយន្ត​ទាំង​កណ្ដាល​ភ្លៀង​នៅ​ថ្ងៃ​ទី២៩ មេសា។

កូដករ​ និង​ជា​បុគ្គលិក​ក្រុម​ណាហ្គាវើលដ៍​ លោកស្រី​ សាំង សុផល​ បញ្ជាក់​ថា​ អាជ្ញាធរ​បាន​ដឹក​កូដករ​ទៅ​ទម្លាក់​នៅ​ជាយក្រុង​ដូច​សព្វដង។ លោកស្រី​ រិះគន់​អាជ្ញាធរ​ថា​ អសមត្ថភាព​ក្នុង​ដោះស្រាយ​បញ្ចប់​វិវាទ​នេះ​ ដែល​បណ្ដោយ​ក្រុមហ៊ុន​បន្ត​រំលោភ​សិទ្ធិ​កម្មករ​ខ្មែរ៖ «ថៅកែ​ណាហ្គាវើលដ៍​ធ្វើ​បាប​កម្មករ​ខ្មែរ​រាល់​ថ្ងៃ​ អត់​មាន​ដំណោះស្រាយ​អី​ទេ។ ថៅកែ​បរទេស​ មក​រក​ស៊ី​ស្រុក​ខ្មែរ​ តែ​រំលោភ​ច្បាប់​ការងារ​ស្រុក​ខ្មែរ។ ព្រៃ​ផ្សៃ​ណាស់អាជ្ញាធរ​តស៊ូ​ណាស់​ គ្មាន​ជំរុញ​ឱ្យ​ថៅកែ​ចេញ​មុខ​ដោះស្រាយ​អី​ទេ។ អាជ្ញាធរ​ស៊ី​ប្រាក់​ខែ​ពី​រាស្ត្រ តែ​ការពារ​ក្រុមហ៊ុន​បរទេស»

ជុំវិញ​រឿង​នេះ នាយក​ទទួលបន្ទុក​កិច្ចការ​ទូទៅ​នៃ​អង្គការ​លីកាដូ (LICADO) លោក អំ សំអាត រិះគន់​ថា​ ការណ៍​ដែល​មាន​ករណី​លាប​ពណ៌​លើ​ក្រុមកូដករ​ជា​ច្រើន​លើក​មក​ច្រើន​សារ​មក​នេះ​ ដោយសារ​អាជ្ញាធរ​ព្យាយាម​គេចវេះ​ក្នុង​ការ​រក​យុត្តិធម៌​ជូន​កូដករ​តែ​ប៉ុណ្ណោះ។ លោក​បន្ត បើ​ស្ថានភាព​វិវាទ​ការងារ​មួយ​នេះ​បន្ត​អូស​បន្លាយ​ រដ្ឋាភិបាល​នឹង​រង​ការ​រិះគន់​បន្ថែម​ទៀត​ពី​សំណាក់​សហគមន៍​ជាតិ និង​អន្តរជាតិ៖ «សំខាន់​បំផុត​យើង​ត្រូវ​ស្វែង​រក​ដំណោះស្រាយ​ប្រកប​ដោយ​សុចរិត​ភាព តម្លាភាព​ យុត្តិធម៌។ អាជ្ញាធរ​ត្រូវ​ឈរ​លើ​គោលការណ៍​គោរព​សិទ្ធិ​មនុស្ស​ គោរព​ទាំង​ច្បាប់​ជាតិ​ និង​ច្បាប់​អន្តរជាតិ​ ដែល​កម្ពុជា​ទទួល​ស្គាល់។ ក្រៅ​ពី​នេះ​ អាជ្ញាធរ​ត្រូវ​ស្វែង​រក​ការ​ផ្សះផ្សា​មួយ​ដែល​អាច​បញ្ចប់​វិវាទ​ការងារ​នៅ​ក្រុមហ៊ុន​ណាហ្គាវើលដ៍​ជា​មួយ​អតីត​បុគ្គលិក​ និង​សហជីព​ក្រុមហ៊ុន​កាស៊ីណូ​ណាហ្គាវើលដ៍»

ទោះ​ជា​យ៉ាង​ណា​ក្ដី ក្រុម​កូដករ​ប្រកាន់​ជំហរ​ថា ពួកគាត់​នឹង​បន្ត​ចេញ​ធ្វើ​កូដកម្ម​រហូត​មាន​ដំណោះស្រាយ​ពី​ថៅកែ​បនល្បែង​ណាហ្គាវើលដ៍។ ពួកគេ​អំពាវនាវ​ ដល់​អាជ្ញាធរ​ និង​ស្ថាប័ន​ពាក់ព័ន្ធ ឱ្យ​បញ្ឈប់​លាប​ពណ៌​សកម្មភាព​ទាមទារ​សិទ្ធិ​ការងារ​នេះ​ ជា​រឿង​នយោបាយ​ និង​ត្រូវ​ជំរុញ​ឱ្យ​ភាគី​ក្រុមហ៊ុន​ចេញ​មុខ​ដោះស្រាយ​វិវាទ​ការងារ​មួយ​នេះ​ប្រកប​ដោយ​តម្លាភាព​ និង​យុត្តិធម៌៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។