អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ដកហូត​សារធាតុ​ញៀន​ជាង១៤​តោន​ក្នុង​ឆ្នាំ​២០២២

ដោយ យ៉ង ចាន់តារា
2023.01.07
អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ដកហូត​សារធាតុ​ញៀន​ជាង១៤​តោន​ក្នុង​ឆ្នាំ​២០២២ គ្រឿងញៀន​ដែល​សមត្ថកិច្ច​ចាប់​រឹបអូស​បាន​ពី​ជនល្មើស កាលពីថ្ងៃទី១៣ ខែ​វិច្ឆិកា ឆ្នាំ​២០២២។
រូប៖ គេហទំព័រអគ្គស្នងការនគរបាលជាតិ

អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​បាន​ដក​ហូត​គ្រឿងញៀន​ជាង​១៤តោន និង​ឃាត់​ខ្លួន​អ្នក​ពាក់​ព័ន្ធ​គ្រឿង​ញៀន​ជាង ១ម៉ឺន ៤ពាន់​នាក់ (១៤.៧៨៤) ក្នុង​នោះ​មាន​ជនបរទេស​ជាង២រយ (២៥៩)នាក់ មាន ៩សញ្ជាតិ កាល​ពី​ក្នុង​ឆ្នាំ២០២២។ របាយការណ៍​របស់​មន្ត្រី​អាជ្ញាធរ​ជំនាញ​បង្ហាញ​ទៀត​ថា ក្នុង​ចំណោម​ការ​បង្ក្រាប​ជាង ៦ពាន់​ករណី(.២៩០) រក​ឃើញ​មាន​ការ​ជួញ​ដូរ​ជាង ៣ពាន់​ករណី(.០៩៧) ផលិត​រក្សា​ទុក​ជាង ១ពាន់​ករណី (.១០៤) និងអ្នក​ប្រើប្រាស់​គ្រឿង​ញៀន​ជាង ២ពាន់​ករណី(.០៤៥)

របាយការណ៍​ដដែល បញ្ជាក់​ថា កម្លាំង​សមត្ថកិច្ច​ក៏​បាន​រឹប​អូស​យក​សម្ភារៈ​មួយ​ចំនួន ដូច​ជា មាន​រថយន្ត​ជាង ១រយ ( ១៤៤)គ្រឿង ម៉ូតូ​ជាង ១ពាន់(.៤៣៦) គ្រឿង អាវុធ​ខ្លី ២៩​ដើម និង​អាវុធ​វែង ៦៤ដើម (កែច្នៃ ៣៩​ដើម) ព្រម​ទាំង​គ្រាប់​បែក ៥គ្រាប់។ ចំនួន​នេះ បើ​ប្រៀប​ធៀប​នឹង​ឆ្នាំ​២០២១ គឺ​មាន​ការ​កើន​ឡើង​ខ្លាំង​ដោយ​សារ​ឆ្នាំ​២០២១ អាជ្ញាធរ​បង្ក្រាប​បាន​តែ​ចំនួន​ជាង ៤តោន និង​ឃាត់​ខ្លួន​មនុស្ស​ជាង ១ម៉ឺននាក់។

ស្ថានភាព​នៃ​ការ​ជួញ​ដូរ​គ្រឿងញៀន​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ កាន់​តែ​ធ្ងន់ធ្ងរ ដោយ​ជន​ល្មើស ហ៊ាន​បើក​រោងចក្រ​ផលិត​ និង​ចែកចាយ​គ្រឿងញៀន​នៅ​ក្នុង​ប្រទេស​កម្ពុជា​តែ​ម្ដង ហើយ​ជន​ល្មើស​សុទ្ធ​តែ​មាន​កាំ​ភ្លើង​ក្នុង​ដៃ​ទៀត​ផង។ ជាក់ស្តែង កាល​ពី​សប្ដាហ៍​មុន​នេះ ជន​ល្មើស​បាន​បាញ់​សមត្ថ​កិច្ច​ស្លាប់​ម្នាក់ ក្នុង​ពេល​ចុះ​បង្ក្រាប​គ្រឿង​ញៀន នៅ​ខណ្ឌ​ដង្កោ រាជធានី​ភ្នំពេញ។

នាយក​ប្រតិបត្តិ​អង្គការ​សម្ព័ន្ធ​ភាព​ការពារ​សិទ្ធិ​មនុស្ស ហៅ​កាត់​ថា (CHRAC) លោក រស់ សុដ្ឋា បាន​ប្រាប់​វិទ្យុអាស៊ីសេរី នៅ​ថ្ងៃទី៦ ខែ​មករា ថា "លោក​អបអរសាទរ​ជាមួយ​រាជរដ្ឋាភិបាល​ដែល​បាន​ខិតខំ​បំពេញ​ចំណាត់​ការ​លើ​បញ្ហា​នេះ ក៏​ប៉ុន្តែ​លោក​ព្រួយ​បារម្ភ​ពី​ចំនួន​ផលិត និង​ចរាចរ​នៅ​លើ​ទីផ្សារ​ព្រោះ​នេះ​ជា​បរិមាណ​ច្រើន​ហើយ​អាច​ប៉ះ​ពាល់ដល់​ប្រជាពលរដ្ឋ និង​សង្គម​ធ្ងន់ធ្ងរ។

លោក រស់ សុដ្ឋា«បើ​យើង​មិន​ពង្រឹង​វិន័យ​ច្បាប់ និង​សីលធម៌​ទេ មិន​បោស​សំអាត​អំពើ​ពុករលួយ​មិន​បាន​ទេ បញ្ហា​ហ្នឹង​ចេះ​តែ​បង្ក​ឱ្យ​សង្គម​ខ្មែរ​ជួប​វិបត្តិ»

របាយការណ៍​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន ចេញ​ផ្សាយ​កាល​ពីឆ្នាំ​២០២១ ថា ឃាត់​ខ្លួន​អ្នក​ពាក់​ព័ន្ធ​គ្រឿង​ញៀន​បាន​ជាង ១ម៉ឺន ៣ពាន់​នាក់(១៣.៧៦៥) បង្ក្រាប​បាន​ជាង ៦ពាន់​ករណី (៦.២៤២) និង​ដក​ហូត​គ្រឿង​ញៀន​បាន​ជាង ៤តោន។ ទោះ​បី​យ៉ាង​ណា សមត្ថកិច្ច​បង្ហាញ​ថា ទី​តាំង​ផលិត​គ្រឿង​ញៀន​ភាគ​ច្រើន ដែល​សមត្ថកិច្ច​ចុះ​ទៅ​បង្ក្រាប​នោះ​គឺ​មានជន​ជាតិ​ចិន និង​វៀតណាម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
សង្គម
អ្នក​ឃ្លាំ​មើល​សង្គម​ថា រដ្ឋាភិបាល​លាក់បាំង​គម្រោង​អ្នក​វិនិយោគិន​ក្នុង​ស្រុក​ករណី​ព្រែកជីក​ហ្វូណន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។