កម្មករ​រោងចក្រ​ ហុង សេន ជិត​មួយ​ពាន់​នាក់​​ នៅ​ក្រុង​ដូនកែវ ព្រមាន​តវ៉ា​បិទ​ផ្លូវ​​ម្ដង​ទៀត បើ​នៅ​តែ​មិន​​​ដោះស្រាយ ករណី​​ថៅកែ​រត់​ចោល

ដោយ សុជីវី
2020.09.28
Hong Sen Textile កម្មករ​រោងចក្រ ហុង សេន ថិចស្ថាយ (Hong Sen Textile (Cambodia) Co., Ltd.) នាំ​គ្នា​តវ៉ា​នៅ​មុខ​រោងចក្រ ទាមទារ​ប្រាក់​ឈ្នួល និង​ប្រាក់​អត្ថប្រយោជន៍ កាល​ពី​​ថ្ងៃ​ទី១២ ខែកញ្ញា ឆ្នាំ២០២០។
រូប៖ CENTRAL

កម្មករ​រោងចក្រ ​ហុង សេន ថិចស្ថាយ (Hong Sen Textile (Cambodia) Co.ltd) ជិត​មួយ​ពាន់ (១.០០០)​នាក់ នៅ​​ក្នុង​ក្រុង​ដូនកែវ ខេត្ត​តាកែវ​ ព្រមាន​ថា នឹង​នាំ​គ្នា​តវ៉ា បិទ​ផ្លូវ​មុខ​រោងចក្រ​ម្ដង​ទៀត​ ដើម្បី​ទាមទារ​ឲ្យ​មាន​ដំណោះស្រាយ។ ក្រុម​កម្មករ​ ឲ្យ​ដឹង​ថា ពួក​គេ លំបាក​ជីវភាព​ខ្លាំង ក្រោយ​ពេល​ថៅកែ​ រត់ចោល​កម្មករ ដោយ​មិន​បើក​ប្រាក់​​ឈ្នួល និង​ប្រាក់​អត្ថប្រយោជន៍​ឲ្យ​ជិត​មួយ​ខែ​​មក​ហើយ​នៅ​មិន​ទាន់​មាន​ដោះ​ស្រាយ​ទៀត។

កម្មការិនី​ផ្នែក​ដេរ លោកស្រី ម៉ៅ សារ៉ន ឲ្យ​ដឹង​ថា កម្មករ​ បាន​នាំ​គ្នា​បិទ​ផ្លូវ នៅ​មុខ​រោងចក្រ​ស្ថិត​នៅ​ភូមិ​តាឌូ សង្កាត់​រកា​ក្រៅ​ ក្រុង​ដូនកែវ​ កាល​ពី​ថ្ងៃ​ទី២៥ កញ្ញា តែ​អាជ្ញាធរ បាន​ដាក់​ពង្រាយ​កង​កម្លាំង​ប្រដាប់​អាវុធ ដំបង​ឆក់ និង​ខែល យ៉ាង​ច្រើន រួច​ប្រាប់​ឲ្យ​ក្រុម​កម្មករ​រំសាយ​ការ​តវ៉ា​បិទ​ផ្លូវ ដើម្បី​ចរចា​រក​ដំណោះស្រាយ។

លោកស្រី ប្រាប់​ថា ក្រុម​កម្មករ បាន​ទទួល​យក ការ​ចរចា​តែ​អាជ្ញាធរ​ខេត្ត និង​មន្ត្រី​ក្រសួង​ការងារ បាន​ត្រឹម​​សន្យា និង​ប្រាប់​ឲ្យ​កម្មករ​រង់ចាំ។ កម្មការិនី​រូប​នេះ បន្ត​ថា ចំពោះ​ដំណោះស្រាយ​​ជាក់​ស្ដែង​វិញ គឺ​មិន​មាន​ទេ។ លោកស្រី ម៉ៅ សារ៉ន ប្រាប់​ថា ក្រុម​កម្មករ អាច​នឹង​តវ៉ា​ទ្រង់ទ្រាយ​ធំ​ម្ដង​ទៀត បើ​នៅ​តែ​​បន្ត​គ្មាន​ដំណោះស្រាយ​ ព្រោះ​ម្នាក់ៗ កំពុង​ប្រឈម​ជីវភាព​ខ្វះខាត​ខ្លាំង។

វិវាទ​ការងារ រវាង​កម្មករ និង​ថៅកែ​​ជនជាតិ​ចិន នៃ​រោងចក្រ​ ហុង សេន​ បាន​​ចាប់​​ផ្ដើម​កើត​ឡើង កាល​ពី​ថ្ងៃ​ទី៩ កញ្ញា ដោយសារ​ ក្រុម​កម្មករ​ទទួល​​ដំណឹង​ថា ថៅកែ​​​រត់ ហើយ​​ទុក​រោងចក្រ​ចោល ដោយ​​មិន​ទាន់​បាន​ទូទាត់​លុយ​ឲ្យ​កម្មករ។ ​

កម្មករ​ ឲ្យ​ដឹង​ថា មន្ត្រី​ក្រសួង​ការងារ បាន​ចុះ​ទៅ​អន្តរាគមន៍​ច្រើន​ដង​ហើយ និង​ផ្ដល់​ជម្រើស​២ ឲ្យ​កម្មករ គឺ​ ការ​​ប្ដឹង​តាម​ផ្លូវ​តុលាការ ដោយ​​កម្មករ​ដាក់​ពាក្យ​ប្ដឹង​ទៅ​តុលាការ ឬ​ជម្រើស​យន្ត​ការ​ដោះ​ស្រាយ​​ក្រៅ​ប្រព័ន្ធ​តុលាការ គឺ​ដាក់​ពាក្យ​ស្នើសុំ​លក់​ឡាយឡុង សម្ភារៈ​ក្នុង​រោង​ចក្រ។

ក្រុម​កម្មករ​ព្រួយ​បារម្ភ​ថា ជម្រើស​ទាំង​ពីរ មិន​អាច​ផ្ដល់​លុយ​ឲ្យ​កម្មករ​បាន​គ្រប់​ចំនួន ព្រោះ​កម្មករ អះ​អាង​ថា ក្នុង​ម្នាក់ ត្រូវ​ទទួល​បាន​ប្រាក់​ឈ្នួល និង​ប្រាក់​អត្ថប្រយោជន៍​ ប្រហែល​ជាង​ប្រាំពីរ (៧០០) ដុល្លារ​ឡើង តាម​អតីតភាព​ការងារ​រៀងៗ ខ្លួន។ កម្មករ ចង់​ឲ្យ​ខាង​ក្រសួង​ការងារ ទទួល​ខុស​ត្រូវ ថា ពួក​គេ ពិត​ជា​ទទួល​បាន​សំណង​គ្រប់​ចំនួន តាម​ច្បាប់​ការងារ។

អាស៊ី​សេរីមិន​អាច​សុំ​ការ​បញ្ជាក់​ពី​អគ្គ​លេខាធិការ នៃ​អគ្គ​លេខាធិការដ្ឋាន​គណៈកម្មការ​សម្រាប់​ដោះ​ស្រាយ​បញ្ហា​កូដកម្ម បាតុកម្ម​នៅ​តាម​គ្រប់​មុខ​សញ្ញា (..) លោក ទេស រុក្ខា​ផល បាន​ទេ នៅ​ថ្ងៃ​ទី២៨ កញ្ញា ដោយសារ​ទូរស័ព្ទ​រោទ៍​គ្មាន​អ្នក​ទទួល។

រោងចក្រ ហុង សេន​ បើក​ដំណើរ​ការ​រយៈ​ពេល ៨ឆ្នាំ​ហើយ មាន​កម្មករ​សរុប​ប្រហែល​ប្រាំបួន​រយ (៩០០) នាក់ ជា​រោងចក្រ​កាត់ដេរ​ខោ​អាវ​ក្នុង​ និង​ខោ​អាវ​កូន​ក្មេង៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។