អង្គការមូលនិធិបណ្ដាញលើកកម្ពស់គុណភាពជីវិតពលករហៅកាត់ថា អ៊ិល.ភី.អ៊ិន (LPN) នៅប្រទេសថៃបានជួយសម្រួលដល់ពលករខ្មែរជាច្រើននាក់នៅតំបន់ទីក្រុងបាងកកបានចាក់វ៉ាក់សាំងការពារជំងឺកូវីដ១៩។ អង្គការនេះបន្តអំពាវនាវដល់ពលករខ្មែរទាំងឡាយដែលមិនទាន់ចាក់វ៉ាក់សាំងអាចទាក់ទងទៅមន្ត្រីរបស់ខ្លួននៅប្រទេសថៃ ដើម្បីសុំចុះឈ្មោះចាក់វ៉ាក់សាំង។
មន្ត្រីអង្គការសង្គមស៊ីវិលធ្វើការងារផ្នែកពលករបរទេសនៅប្រទេសថៃ ថ្លែងថា ចាប់តាំងពីខែសីហារហូតមក អង្គការនេះបានជួយដល់ពលករខ្មែរចាក់វ៉ាក់សាំងការពារជំងឺកូវីដ១៩ បានជាង ១ពាន់នាក់ហើយ។ អង្គការនេះអាចជួយការចាក់វ៉ាក់សាំង ចំពោះពលករខ្មែរដែលរស់នៅទីក្រុងបាងកក និងខេត្តជុំវិញប៉ុណ្ណោះ។ ប្រសិនបើពលករណាមិនទាន់ចាក់វ៉ាក់សាំង ពួកគេអាចទាក់ទងទៅតំណាងអង្គការអ៊ិល.ភី.អ៊ិន (LPN) តាមលេខទូរស័ព្ទ ០៦១ ២៤៤ ១៥៥០ និង ០៩៤ ៣៣៦ ២៦១៥ ដើម្បីឱ្យជួយចុះឈ្មោះចាក់វ៉ាក់សាំងការពារជំងឺកូវីដ១៩ ដោយឥតគិតប្រាក់។
មន្ត្រីអង្គការមូលនិធិបណ្ដាញលើកកម្ពស់គុណភាពជីវិតពលករ លោក ទិត្យ ផល្លា ប្រាប់វិទ្យុអាស៊ីសេរីនៅថ្ងៃទី២៧ កញ្ញាថា គោលបំណងនៃការជួយពលករនេះ ដើម្បីជួយឱ្យពលករខ្មែរបានចាក់វ៉ាក់សាំងការពារកូវីដ១៩ ឱ្យបានគ្រប់គ្នា ដើម្បីពួកគេបានធ្វើការងារនៅប្រទេសថៃប្រកបដោយសុវត្ថិភាព។ មន្ត្រីសង្គមស៊ីវិលរូបបញ្ជាក់ថា ឯកសារដែលពលករភ្ជាប់មកជាមួយ ដើម្បីសុំចុះឈ្មោះចាក់វ៉ាក់សាំង រួមមាន លិខិតឆ្លងដែន ឬកាតពណ៌ស៊ីជម្ពូ និងប័ណ្ណសំគាល់ខ្លួនផ្សេងៗ ដែលចេញដោយថៅកែថៃ៖ «ខាងអង្គការសំឡឹងឃើញថា ជាសិទ្ធិរបស់ពលករមួយ ដែលគាត់ត្រូវតែមាន ត្រូវតែបានចាក់វ៉ាក់សាំង។ អ៊ីចឹងហើយក្នុងនាមខ្ញុំជាតំណាងឱ្យខាងមូលនិធិ ក៏ខ្ញុំខំខ្នះខ្នែង ដើម្បីពន្យល់ឱ្យពួកគាត់ថតមុខឯកសារអីមក ដាក់លេខទូរស័ព្ទ ដើម្បីដក់ចូលទៅឱ្យបានចាក់វ៉ាក់សាំងទាំងអស់គ្នា ព្រោះយើងឃើញថាកូវីដ១៩ នៅក្នុងប្រទេសថៃ វាកំពុងតែផ្ទុះខ្លាំងអីចឹងហើយ គេសង្កត់ធ្ងន់ឱ្យយើងហ្នឹងមានការចាក់វ៉ាក់សាំង » ។
កន្លងមកមានពលករខ្មែរជាច្រើននាក់ចង់ចាក់វ៉ាក់សាំងការពារជំងឺកូវីដ១៩ នៅប្រទេសថៃ ប៉ុន្តែពួកគេពុំដឹងទៅទាក់ទងនៅស្ថាប័នណាដើម្បីបានចាក់វ៉ាក់សាំងនោះទេ។
ពលករខ្មែរម្នាក់ធ្វើការរោងចក្រគ្រឿងអគ្គិសនីនៅខេត្តសាមុតប្រាកាណ (Samuth Prakan) លោក ជួន ឌឿន ថ្លែងថា ពលករខ្មែរធ្វើការជាមួយលោកប្រមាណ២០ មិនទាន់ចាក់វ៉ាក់ការពារជំងឺកូវីដនៅឡើយទេ។ ពលករវ័យ ៣៧ឆ្នាំរូបនេះ បញ្ជាក់ថា ពួកគេបានស្វែងរកចាក់វ៉ាក់សាំងជាច្រើនថ្ងៃមកហើយ ប៉ុន្តែរកមិនបានចាក់នោះទេ៖ «កន្លែងខ្ញុំអត់មានអ្នកណាគេប្រាប់ឱ្យទៅចាក់វ៉ាក់សាំងនៅកន្លែងណាផង។គេថា ទាល់តែយើងមានឯកសារគ្រប់គ្រាន់បានយើងមានទៅចុះឈ្មោះបាន មិនមានអ្នកណាគេប្រាប់ទៅចាក់នៅកន្លែងណាកន្លែងណីអត់មានទេ។ ខ្ញុំចង់ចាក់ប៉ុន្តែមិនដឹងទៅរកនៅកន្លែងណាទៅចុះកន្លែងណាចាក់វ៉ាក់សាំង » ។
ជុំវិញរឿងនេះវិទ្យុអាស៊ីសេរីមិនអាចទាក់ទងមន្ត្រីស្ថានទូតខ្មែរប្រចាំនៅប្រទេសថៃ ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី២៧ កញ្ញា។
ពលករខ្មែរធ្វើការសំណង់នៅទីក្រុងបាងកក លោក ឆន សុខឿន ប្រាប់ថា នៅកន្លែងធ្វើការរបស់លោកមានពលករខ្មែរប្រមាណ ៥០នាក់មិនទាន់ចាក់វ៉ាក់សាំងនៅឡើយទេ។ លោកបន្តថា ពួកលោកចង់ចាក់វ៉ាក់សាំងការពារជំងឺកូវីដ១៩ ព្រោះលោកព្រួយបារម្ភពីសុវត្ថិភាព ដោយសារនៅកន្លែងពួកលោកធ្វើការជាតំបន់ដែលមានការរាតត្បាតជំងឺកូវីដខ្លាំង៖ «បើជាមានអ៊ីចឹងមែន គឺល្អមែនទែន ដោយសារពលករខ្មែរជាច្រើននាក់ដែលគាត់មិនសូវមានសមត្ថភាព ហើយអត់បានចាក់ ដោយសារគាត់ខ្លាចចាក់ទៅគេយកប្រាក់ ព្រោះយើងអត់មានខ្សែរយៈក្នុងការចុះឈ្មោះ ឬក៏យើងអត់ដឹង។ ខ្ញុំសង្ឃឹមថាអង្គការនេះគាត់ជួយដល់ពលករខ្មែរជាច្រើនដែលមិនទាន់បានចាក់ ឱ្យគាត់បានចាក់គ្រប់គ្នា ដើម្បីឱ្យមានសុវត្ថិភាព ខ្ញុំក៏ត្រេកអរណាស់ ដែលទទួលបានព័ត៌មានថា មានអង្គការជួយដល់ពលករខ្មែរ » ។
របាយការណ៍អង្គការសង់ត្រាល់ឱ្យដឹងថា បច្ចុប្បន្នមានពលករខ្មែរធ្វើការងារស្របច្បាប់និងមិនស្របច្បាប់ជិត ២លាននាក់ (២.០០០.០០០) ធ្វើការនៅប្រទេសថៃ ។
ក្នុងចំណោមនោះគិតត្រឹមថ្ងៃទី៦ ខែកញ្ញាក្រសួងសុខាភិបាលថៃបានរកឃើញពលករខ្មែរជាង ២ម៉ឺន៣ពាន់នាក់ (២៣.២១១) ឆ្លងជំងឺកូវីដ។
មន្ត្រីអង្គការអ៊ិលភីអ៊ិន លោក ទិត្យ ផល្លា ជឿថា រហូតមកដល់ពេលនេះ មានពលករខ្មែររាប់សែននាក់មិនទាន់បានចាក់វ៉ាក់សាំងការពារជំងឺកូវីដ ដូច្នេះអង្គការរបស់លោកនៅតែបន្តជួយសម្រួលដល់ពលករ ដើម្បីចុះឈ្មោះចាក់វ៉ាក់សាំងរហូតដល់ចប់គម្រោងចាក់វ៉ាក់សាំងការពារជំងឺកូវីដ១៩របស់រដ្ឋាភិបាលថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។