អាជ្ញាធរ​កម្ពុជា​កំពុង​ស៊ើប​អង្កេត​ករណី​ជនជាតិ​វៀតណាម​ជិត​៦០នាក់ នាំគ្នា​រត់​ចេញ​ពី​កាស៊ីណូ​មួយ​កន្លែង​ក្នុង​ក្រុង​បាវិត ខេត្តស្វាយរៀង

ដោយ សុជីវី
2022.09.19
Share on WhatsApp
Share on WhatsApp
អាជ្ញាធរ​កម្ពុជា​កំពុង​ស៊ើប​អង្កេត​ករណី​ជនជាតិ​វៀតណាម​ជិត​៦០នាក់ នាំគ្នា​រត់​ចេញ​ពី​កាស៊ីណូ​មួយ​កន្លែង​ក្នុង​ក្រុង​បាវិត ខេត្តស្វាយរៀង រូបភាពយកចេញពីវីដេអូដែលបង្ហាញពីជនជាតិវៀតណាមជាច្រើននាក់ រត់ចេញពីកាស៊ីណូមួយកន្លែងស្ថិតនៅក្រុងបាវិត ខេត្តស្វាយរៀង កាលពីថ្ងៃទី១៧ ខែកញ្ញា ឆ្នាំ២០២២។
រូប៖ VN Express

អាជ្ញាធរ​កម្ពុជា​កំពុង​ស៊ើបអង្កេត​ករណី​ជនជាតិ​វៀតណាម​ចំនួន​ជិត​៦០ នាក់ ដែល​បាន​នាំគ្នា​រត់​ចេញ​ពី​កាស៊ីណូ​មួយ​កន្លែង​ក្នុង​ក្រុង​បាវិត ខេត្តស្វាយរៀង កាលពីថ្ងៃទី១៧ ខែកញ្ញា។ 

សារព័ត៌មាន​វៀតណាម (VNExpress) ផ្សព្វផ្សាយ​កាលពី​ថ្ងៃទី១៨ ខែកញ្ញា ដោយបង្ហាញ​វីដេអូខ្លី​មួយ ដែល​ថត​បាន​ជនជាតិ​វៀតណាមជិត​៦០​នាក់ សម្រុក​រត់ចេញ​ពី​កាស៊ីណូ​មួយ​ស្ថិត​នៅចម្ងាយ​ប្រមាណ​មួយ​គីឡូម៉ែត្រ ពី​ច្រក​ព្រំដែន ម៉ុកបាយ (Moc Bai) ​ខេត្ត តាយនិញ (Tay ninh) នៃប្រទេស​វៀតណាម កាល​ពី​រសៀលថ្ងៃទី១៧ ខែកញ្ញា។

វីដេអូ ដែលថតដោយ​ពលរដ្ឋ​ក្នុង​មូលដ្ឋាន​បង្ហាញ​ទៀតថា​ ក្រុម​ជនជាតិ​វៀតណាម​បាន​នាំគ្នា​រត់​ចេញ​ពេល​កំពុង​ភ្លៀង​ខ្លាំង។ វីដេអូ ដែលមាន​រយៈពេល​ប្រហែល​១​នាទី​ ដដែល​នោះ បង្ហាញ​មនុស្ស​ស្លៀក​ឯកសណ្ឋាន​មួយ​ក្រុម ទំនង​ជាក្រុម​សន្តិសុខ​កាស៊ីណូ​បាន​រត់​ដេញ​តាម​ពួកគេ​ពី​ក្រោយ តាម​ចាប់​ពួកគេ​ទៅ​វិញ។ ក្រុម​សន្តិសុខ​ថែមទាំង​បាន​វាយ​ដំ​ជនជាតិ​វៀតណាម ដែល​ពួកគេ​ចាប់​បាន

អាជ្ញាធរ​នៅខេត្តតាយនិញ​វៀតណាម​ប្រាប់​សារព័ត៌មាន​វៀតណាមថា ជនជាតិ​វៀតណាម​មួយក្រុម​នោះមាន​ចំនួន​៥៦នាក់ពួកគេ​ធ្វើការ​នៅក្នុង​បនល្បែង​នៅក្រុង​បាវិតប្រភព​ដដែល​បញ្ជាក់ថា មូលហេតុ ​ដែល​ពួកគេ​នាំគ្នា​រត់​ចេញ​ដោយ​សារ​ភាគី​និយោជក​រំលោភ​កិច្ចសន្យា​ការងារ

ជនជាតិ​វៀតណាម​ដែល​បាន​រត់​ចេញ​មួយ​ចំនួន​បាន​ប្រាប់​សារព័ត៌មាន​វៀតណាម​ (VNExpress) ​ថា​ពួកគេ​​ត្រូវ​​បោក​​ប្រាស​​ឱ្យ​​ទៅ​​ធ្វើការ​​នៅ​កាស៊ីណូ​ក្នុង​ប្រទេសខ្មែរ​កាលពី​៣ខែ​មុនពួកគេ​ត្រូវ​បង្ខាំង​នៅក្នុង​បន្ទប់​រួម ដែលមាន​ច្រកចេញ​ចូល​តែ​មួយ និង​បង្ខំ​ឱ្យ​ធ្វើការ​១២​ម៉ោង​ក្នុង​មួយ​ថ្ងៃ ដោយ​មិន​ឱ្យ​ចេញ​ទៅ​ក្រៅ។ ពួកគេថា ថៅកែ និង​អ្នកគ្រប់គ្រង​កាស៊ីណូនេះ​បានបញ្ចៀស​មិន​ឱ្យ​នគរបាល​អាច​ចូល​ទៅ​ធ្វើ​អធិការ​កិច្ច​ក្នុង​កាស៊ីណូ​នេះ។ ជាមួយ​គ្នានេះពួកគេ​បានដំណឹងថា ថៅកែនឹង​លក់ពួកគេ​ឱ្យ​ទៅ​ថៅកែ​ផ្សេង​ទៀត ទើបពួកគេ​នាំគ្នារត់​ចេញ​ព្រមៗ​គ្នា ក្នុង​ពេល​តែ​មួយ​ចេញ​ពី​អគារ​ជាន់​ទី៨។

អាជ្ញាធរ​វៀតណាម​​ប្រាប់ VNExpress ទៀតថា អាជ្ញាធរ​កម្ពុជា​បាន​ជួល​សណ្ឋាគារ​ឱ្យ​អ្នកទាំង​៥៦នាក់​ស្នាក់​នៅ ដើម្បី​ស៊ើបអង្កេត។ ចំណែក​អាជ្ញាធរ​វៀតណាមក៏​បញ្ជូន​មន្រ្តីពាក់ព័ន្ធ​ចូលរួម​ស៊ើបអង្កេត​នៅក្នុង​ក្រុង​បាវិត​នេះ​ដែរ

បើទោះជាយ៉ាងណា វិទ្យុអាស៊ីសេរី​មិន​អាច​ទាក់ទង​អាជ្ញាធរ​ខ្មែរ ដើម្បី​សាកសួរ​ព័ត៌មាន​បន្ថែម​បាន​នៅ​ឡើយ​ទេ កាលពី​យប់ថ្ងៃទី១៨ ខែកញ្ញា។

នេះជាករណីទី២ ហើយដែលជនជាតិវៀតណាម​ជាច្រើននាក់​នាំគ្នាសម្រុក​ចេញពី​កាស៊ីណូនៅ​កម្ពុជា។ ​កាលពី​ថ្ងៃទី១៨ ខែសីហា មនុស្ស​ជាង៤០នាក់ ក្នុង​នោះ​ប្រុស៣៥នាក់ បានរត់គេច​ខ្លួន​ចេញ​កន្លែង​ឃុំឃាំង​នៅក្នុង​កាស៊ីណូ រិចវើលដ៍ (Rich World)  ឬ កាស៊ីណូ ហ្គោលដិន ហ្វ៊ីនិក (Golden Phoenix) ស្ថិត​ក្នុង​ឃុំសំពៅពូន ស្រុកកោះធំ ខេត្តកណ្តាល។ ពួកគេបានហែល​ឆ្លងទន្លេ ប៊ិញឌី ​ត្រឡប់ទៅ​ប្រទេស​វៀតណាមវិញ

ស្របគ្នានេះ​ដែរ អាជ្ញាធរ​កម្ពុជា និង​វៀតណាម កាលពីថ្ងៃទី២ ខែកញ្ញា បាន​សហការ​គ្នាជួយ​សង្គ្រោះ​ពលរដ្ឋ​វៀតណាម​ជាង​៦០០នាក់ ដែលចាញ់​បោក​គេ​មក​ធ្វើការ​នៅ​កម្ពុជា

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។