អ្នកដើរលេងបុណ្យអុំទូករិះគន់ការដំឡើងថ្លៃផ្ញើឡានម៉ូតូនៅតែមានតម្លៃថ្លៃដូចរាល់ៗឆ្នាំ
2018.11.23
ទិដ្ឋភាពនៅកន្លែងផ្ញើកង់ ម៉ូតូ មួយកន្លែងនារាជធានីភ្នំពេញ។ រូបឯកសារ
Photo: RFA
ពលរដ្ឋដើរកម្សាន្ត ក្នុងពិធីបុណ្យអុំទូក រអ៊ូរទាំដូចរាល់ឆ្នាំថា ថ្លៃផ្ញើម៉ូតូឡាន នៅមានតម្លៃខ្ពស់ ប៉ុន្តែមិនឃើញអាជ្ញាធរចាត់វិធានការ ដោះស្រាយសោះ។ ពួកគេស្នើបញ្ឈប់ទម្លាប់កេងប្រវ័ញ្ចពលរដ្ឋក្នុងឱកាសពិធីបុណ្យទានជាតិ។
ពលរដ្ឋមកពីខេត្តតាកែវម្នាក់ លោក ស៊ុន រក្សា ឲ្យដឹងថា តម្លៃផ្ញើឡានម៉ូតូក្នុង ថ្ងៃបុណ្យអុំទូកកើនឡើង ពីចន្លោះ៣ពាន់ ទៅ៦ពាន់រៀល និងមានកន្លែងខ្លះ តម្លៃ១ម៉ឺនរៀល។ ជាធម្មតាតម្លៃចាប់ពី៥០០រៀល ដល់១ពាន់រៀលតែប៉ុណ្ណោះ។ លោក ស៊ុន រក្សា បន្ដថា អាជ្ញាធរបានបិទផ្លូវបរិវេណកន្លែងពិធីបុណ្យអុំទូកនៅភ្នំពេញដូច្នេះពលរដ្ឋត្រូវបង្ខំចិត្តផ្ញើម៉ូតូ ក្នុងតម្លៃខ្ពស់៖ «បើសម្រាប់អ្នកក្រ បើ១ម៉ឺន ឬ៥ពាន់ ពិបាករកមែនទែនខុសពីអ្នកមាន... អាជ្ញាធររាជធានីភ្នំពេញ គាត់គួរតែពិចារណា ដោយសារនេះ គឺជាបុណ្យជាតិទាំងមូល»។
ពលរដ្ឋសំណូមពរអាជ្ញាធររាជធានីភ្នំពេញ ជួយពិនិត្យមើលទីតាំងផ្ញើម៉ូតូទាំងអស់នោះផង កុំឲ្យមានការយកថ្លៃខ្លាំងពេក។ អាស៊ីសេរីមិនអាចសុំការបំភ្លឺពីអ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានទេ នៅថ្ងៃទី២៣ វិច្ឆិកា ដោយសារមិនលើកទូរស័ព្ទ។
សៀវភៅបន្ទុកកំណត់ដោយក្រសួងសេដ្ឋកិច្ច និងហិរញ្ញវត្ថុ កត់ត្រាថា តម្លៃផ្ញើម៉ូតូ ១គ្រឿង តម្លៃ៥០០រៀល និងរថយន្ត១គ្រឿង តម្លៃ១០០០រៀល។ ដោយឡែកតម្លៃផ្ញើតាមផ្សារវិញ អាជ្ញាធររាជធានីភ្នំពេញ ធ្លាប់ប្ដេជ្ញាចាត់វិធានការ លើកន្លែងផ្ញើឡានម៉ូតូណា ដែលយកតម្លៃ លើស តម្លៃបន្ទុក ដែលបានដេញថ្លៃជាមួយអាជ្ញាធរ។
ម្ចាស់កន្លែងផ្ញើម៉ូតូឡាន អះអាងថា ការដំឡើងថ្លៃផ្ញើម៉ូតូឡាន ក្នុងឱកាសព្រះរាជពិធីបុណ្យអុំទូក ដោយសារតែ ពួកគេត្រូវការគ្នាច្រើនជាងថ្ងៃធម្មតា ជួលទីតាំងថ្លៃជាងថ្ងៃធម្មតា និងមានការយកភាស៊ីច្រើនជាងថ្ងៃធម្មតា។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ ថាការបង្កើនតម្លៃផ្ញើម៉ូតូនិងឡានជាទម្លាប់អាក្រក់។
លោក វន់ ពៅ រកឃើញថា មូលហេតុដែលធ្វើឲ្យមានការដំឡើងថ្លៃសព្វមុខទំនិញ និងសេវា នៅក្នុងព្រះរាជពិធីបុណ្យអុំទូក ដោយសារតែមានឈ្មួញឱកាសនិយមខ្លះ ឆ្លៀតកេងប្រវ័ញ្ច និងដោយសារអាជ្ញាធរឱកាសនិយមខ្លះ បានកេងប្រវ័ញ្ច ដំឡើងថ្លៃភាស៊ីពីអ្នកលក់៖ «អាជ្ញាធរមិនឃើញមានយន្តការស្អីទៅត្រួតពិនិត្យច្បាស់លាស់។ មិនទាន់ឃើញទៅត្រួតពិនិត្យ មានវិធានការកន្លែងផ្ញើម៉ូតូហ្នឹងទេ។ តាំងដល់ពេលសង្គមស៊ីវិល និងប្រជាពលរដ្ឋ និយាយការពិត ក្រោយអុំទូកហើយ អាជ្ញាធរស្រែកវិធានការៗ។ ការស្រែកវិធានការហ្នឹង ជាភាសាឡើងជ្រេញតែហ្មង... សូម្បីអ្នកលក់ពងទាកូន ក៏រអ៊ូថា លក់មិនដាច់ ហើយគេ (ទារភាស៊ី) យកលុយហ្នឹង យកច្រើនទៀត»។
លោក វន់ ពៅ យល់ថា អាជ្ញាធរគួរចាត់វិធានការលើឈ្មួញ និងមន្ត្រីឆ្លៀតឱកាសដើម្បីទប់ស្កាត់ការ ដំឡើងថ្លៃហួសហេតុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ
