ពលរដ្ឋ​រិះគន់​រដ្ឋាភិបាល​លោក ហ៊ុន សែន ដែល​យក​លុយ​ជាតិ​ទៅ​ផលិតភាព​យន្ត​ស្ដីពី​ការ​តស៊ូ​របស់​លោក ហ៊ុន សែន

ដោយ សុជីវី
2021-01-10
Share
ពលរដ្ឋ​រិះគន់​រដ្ឋាភិបាល​លោក ហ៊ុន សែន ដែល​យក​លុយ​ជាតិ​ទៅ​ផលិតភាព​យន្ត​ស្ដីពី​ការ​តស៊ូ​របស់​លោក ហ៊ុន សែន រូប​គំនូរ ដែល​គេ​គូរបង្ហាញ​អំពី​ដំណើរ​ចេញ​ពី​កម្ពុជា​នៅ​ក្នុង​របប​ខ្មែរក្រហម ទៅ​តស៊ូ​នៅ​ប្រទេស​វៀតណាម។
រូបពីហ្វេសប៊ុក​លោក ហ៊ុន សែន

ពលរដ្ឋ​រិះគន់​រដ្ឋាភិបាល​លោក ហ៊ុន សែន ដែល​យក​លុយ​ជាតិ​ទៅ​ផលិតភាព​យន្ត​ស្ដីពី​ការ​តស៊ូ​របស់​លោក។ ការ​លើក​ឡើង​បែប​នេះ ក្រោយ​លោក​នាយក​រដ្ឋមន្ត្រី ហ៊ុន សែន បញ្ជា​ឲ្យ​ក្រុម​ការងារ​អន្តរ​ក្រសួង​រួម​គ្នា​បង្កើត​ភាពយន្ត​ឯកសារ​ស្ដីពី​ជីវិត​របស់​លោក ដាក់​ចំណងជើង​ថា កូនប្រុស​ក្រោម​ពន្លឺ​ព្រះចន្ទ​ពេញ​បូណ៌មី។

លរដ្ឋ និង​អ្នក​វិភាគ​រិះគន់​ថា លោក ហ៊ុន សែន កំពុង​ប្រើប្រាស់​លុយ​ជាតិ ដើម្បី​បំភ្លៃ​ប្រវត្តិសាស្ត្រ និង​បម្រើ​ប្រយោជន៍​នយោបាយ​របស់​លោក។ ពួក​គាត់​យល់​ថា បើ​មេ​ដឹក​នាំ​មាន​ស្នាដៃ​ចំពោះ​ជាតិ​មិន​ចាំបាច់​អួតអាង​ពី​ខ្លួន​នោះ​ទេ។

ពលរដ្ឋ​ម្នាក់​រស់នៅ​ភ្នំពេញ លោក បុត្រ សុផល យល់​ថា ភាពយន្ត​នេះ​ធ្វើ​ឡើង​ដើម្បី​លើក​តម្កើង​ស្នាដៃ​លោក ហ៊ុន សែន។ ដូច្នេះ គួរ​ប្រើ​លុយ​ផ្ទាល់​ខ្លួន​ជា​ជាង​ការ​ប្រើប្រាស់​មន្ត្រី​រដ្ឋាភិបាល និង​លុយ​ជាតិ។ ពលរដ្ឋ​រូប​នេះ​លើក​ឡើង​ទៀត​ថា ចំពោះ​ការ​រំដោះ​ជាតិ​កាល​ឆ្នាំ១៩៧៩ ក៏​មិន​ទាន់​មាន​ការ​ឯកភាព​គ្នា​ថា លោក ហ៊ុន សែន គឺ​ជា​មេដឹកនាំ​ពេល​នោះ​ទេ។ ដូច​នេះ មិន​ទាន់​ដល់​ពេល​លោក ហ៊ុន សែន អះអាង​ថា ជ័យជម្នះ ៧ មករា ជា​របស់​លោក​តែ​ម្នាក់​ដាច់​មុខ​នោះ​ទេ៖ «តាម​គំនិត​ខ្ញុំ​គាត់​(លោក ហ៊ុន សែន) គួរ​ចំណាយ​លុយ​ឯកជន​ផ្ទាល់​ខ្លួន ព្រោះ​នេះ​ស្នាដៃ​របស់​គាត់​ផ្ទាល់​ខ្លួន»

ពលរដ្ឋ​ម្នាក់ទៀត​រស់នៅ​ខេត្ត​តាកែវ​លោក ស៊ីណា ថូ សង្កេត​ឃើញ​ថា លោក ហ៊ុន សែន តែង​ប្រើ​គ្រប់​មធ្យោបាយ​បង្ហាញ​ពី​ស្នាដៃ​របស់​ខ្លួន ដូច​ជា ការ​ផលិត​ចម្រៀង សៀវភៅ និង​វីដេអូ​ឯកសារ​ជា​ដើម។ ពលរដ្ឋ​រូប​នេះ​យល់​ថា បើ​លោក ហ៊ុន សែន ពិតជា​មេ​ដឹក​នាំ​មាន​ស្នាដៃ​មែន​នោះ​មិន​ចាំបាច់​ប្រឹងប្រែង​ផលិត​ខ្លួន​ឯង​នោះ​គឺ ពលរដ្ឋ ឬ​អ្នក​គោរព​ស្រលាញ់​លោក​គេ​នឹង​ផលិត​ដោយ​ខ្លួន​ឯង​មិន​ចាំបាច់​លោក ហ៊ុន សែន បង្គាប់បញ្ជា​នោះ​ទេ៖ «និយាយ​យ៉ាង​ខ្លី​ទៅ​ថា មនុស្ស​យើង​ធ្វើ​រឿង​ល្អ​ស្នេហា​ជាតិ គេ​អ្នកនិពន្ធ​គេ​ធ្វើ​ឱ្យ​យើង​ហ្មង»

រីឯ​សកម្មជន​គណបក្ស​សង្គ្រោះ​ជាតិ លោក ឈុន វាន យល់​ថា អ្វី​ដែល​លោក ហ៊ុន សែន កំពុង​ធ្វើ​ជា​ការ​បន្លំ​ប្រវត្តិសាស្ត្រ។ លោក​ថា តាម​សិក្សា​របស់​លោក​គឺ លោក ប៉ែន សុវណ្ណ ជា​មេ​ដឹក​នាំ​រំដោះ​ថ្ងៃ​៧ មករា ប៉ុន្តែ​ពេល​នេះ គ្រប់​យ៉ាង​គឺ លោក ហ៊ុន សែន ក្រសោប​យក​ទាំង​អស់៖ «ថ្ងៃ ៧ មករា ហ្នឹង បើ​ដឹង​ឱ្យ​ពិត​ប្រាកដ​គឺ ដោយសារ​លោក ប៉ែន សុវណ្ណ ទេ។ ប៉ុន្តែ​លោក ហ៊ុន សែន គាត់​ស៊ី​កេរ ៧ មករា»

ពលរដ្ឋ​រិះគន់​បែប​នេះ ក្រោយ​ពេល​រដ្ឋាភិបាល ហ៊ុន សែន ប្រកាស​បង្កើត​គណៈកម្មការ​ផលិតភាព​យន្ត​ភាគ​រឿង​កូន​ប្រុស​ក្រោម​ពន្លឺ​ព្រះចន្ទ​ពេញ​បូណ៌មី ដោយ​មាន​មន្ត្រី​រដ្ឋាភិបាល​តាម​ក្រសួង​នានា និង​ទីប្រឹក្សា​របស់​លោក​រួម​គ្នា​ផលិត។ សេចក្ដី​សម្រេច​របស់​រដ្ឋាភិបាល​ចុះ​ថ្ងៃ​ទី៥ ខែ​មករា ឱ្យ​ដឹង​ថា រដ្ឋលេខាធិការ​ក្រសួង​ព័ត៌មាន លោក ម៉ៅ អាយុទ្ធ ជា​ប្រធាន​គណៈកម្មការ​ផលិតភាព​យន្ត​ភាគ​រឿង និង​មាន​មន្ត្រី​ស្ថាប័ន​ផ្សេង​ទៀត ជា​អនុប្រធាន និង​ជា​ទីប្រឹក្សា។ រឿង​នេះ និពន្ធ និង​ដឹក​នាំ​ដោយ​លោក ហ៊ុយ វាសនា។ ចំណែក​ល្ខោន​វិទ្យុ​រឿង​កូន​ប្រុស​ក្រោម​ពន្លឺ​ព្រះចន្ទ​ពេញ​បូណ៌មី​វិញ រឿង​នេះ​ត្រូវ​បាន​វិទ្យុ​បាយ័ន​ជា​របស់​កូន​ស្រី​លោក ហ៊ុន សែន អ្នកស្រី ហ៊ុន ម៉ាណា ចាក់​ផ្សាយ ជា​ច្រើន​ឆ្នាំ​មក​ហើយ។

ជុំវិញ​រឿង​នេះ អាស៊ី​សេរី​មិនទាន់​សុំ​ការ​បំភ្លឺ​បន្ថែម​ពី​រដ្ឋលេខាធិការ​ក្រសួង​ព័ត៌មាន លោក ម៉ៅ អាយុទ្ធ ជា​ប្រធាន​គណៈកម្មការ​ផលិត​ភាពយន្ត​ភាគ​រឿង​បាន​នៅ​ឡើយ​ទេ ថ្ងៃ​ទី១០ ខែ​មករា។ អាស៊ី​សេរី​ក៏​មិន​អាច​សុំ​ការ​អត្ថាធិប្បាយ​ពី​អ្នក​នាំ​ពាក្យ​ក្រសួង​ព័ត៌មាន​លោក មាស សុភ័ណ្ឌ បាន​ដែរ។ចំណែក​សមាជិក​ក្រុម​ផលិត​រឿង​នេះ​ដែល​ជា​ប្រធាន​នាយកដ្ឋាន​នយោបាយ និង​ទំនាក់ទំនង​ការ​បរទេស​នៃ​ក្រសួង​ការពារ​ជាតិ​លោក ណឹម សុវត្ថិ ពេល​ទូរស័ព្ទ​ហៅ​ចូល​លោក​ថា សេវា​ទូរស័ព្ទ​ខ្សោយ​មិន​អាច​ផ្ដល់​សម្ភាស​បាន។

អ្នក​នាំ​ពាក្យ​គណបក្ស​ប្រជាជន​កម្ពុជា​លោក ឈឹម ផលវរុណ និយាយ​ថា ការ​មាន​មតិ​រិះគន់​រឿង​នេះ​ជា​ការ​បញ្ចេញ​មតិ​ក្នុង​សង្គម​ប្រជាធិបតេយ្យ។ លោក​ថា មេ​ដឹក​នាំ​ប្រទេស​ដែល​ផលិត​សៀវភៅ ឬ​ភាពយន្ត​ឯកសារ​ប្រវត្តិសាស្ត្រ​ជា​តម្លៃ​ប្រវត្តិសាស្ត្រ​មិន​មែន​ជា​តម្លៃ​បុគ្គល​ទេ៖ «ត្រូវ​ទទួល​ស្គាល់​ជា​ផលិតផល​ប្រវត្តិសាស្ត្រ​ទេ មិន​មែន​សំដៅ​ទៅ​បុគ្គល​ទេ គ្រាន់តែ​បុគ្គល​អ្នក​ធ្វើ​ក្នុង​សកម្មភាព​ប្រវត្តិសាស្ត្រ»

ទោះ​យ៉ាង​ណា អ្នក​វិភាគ​នយោបាយ​លោក គឹម សុខ យល់​ថា ចេតនា​ដែល​លោក ហ៊ុន សែន ផលិត​ភាពយន្ត​នៃ​ការ​តស៊ូ​នេះ គឺ​ដើម្បី​ឱ្យ​ពលរដ្ឋ ជា​ពិសេស ពលរដ្ឋ​តាម​ស្រុក​ស្រែ​ចម្ការ​ឱ្យ​ផ្ដោត​អារម្មណ៍​លើក​តម្កើង​ពី​តម្លៃ​គ្រួសារ​របស់​លោក ហ៊ុន សែន។ លោក​ថា រូបភាព​នេះ​ជា​ការ​ប្រើ​អក្សរ​សិល្ប៍​នយោបាយ​ក្នុង​កា​រៀបចំ​ផែនការ​ផ្ទេរ​អំណាច​របស់​លោក ហ៊ុន សែន ទៅ​ឱ្យ​លោក ហ៊ុន ម៉ាណែត៖ «ដើម្បី​ឱ្យ​ផែនការ​គាត់​នេះ អាច​បំភាន់​មហាជន​បាន លោក ហ៊ុន សែន នឹក​ឃើញ​ផលិត​អក្សរសិល្ប៍​ជា​ភាពយន្ត​បញ្ចាំង​លើក​តម្កើង​ខ្លួន​គាត់ និង​គ្រួសារ​គាត់»

កាល​ពី​ឆ្នាំ២០១៧ លោក ហ៊ុន សែន ធ្លាប់​លើក​ឡើង​ថា លោក​មិន​ឲ្យ​អ្នក​ផ្សេង​ឈ្នះ​ដើម្បី​សរសេរ​ប្រវត្តិសាស្ត្រ​ឡើយ។ លោក​ថា គ្មាន​ឱកាស​សម្រាប់​ឲ្យ​អ្នក​ដទៃ ដែល​ជា​អ្នក​ចាញ់​សរសេរ​ប្រវត្តិសាស្ត្រ​ទេ គឺ​មាន​តែ​អ្នក​ឈ្នះ ដែល​ជា​អ្នក​សរសេរ​ប្រវត្តិសាស្ត្រ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល