ឃុំកំពង់ស្រឡៅមួយ និងកំពង់ស្រឡៅ២ ស្រុកឆែប នៃខេត្តព្រះវិហារ គឺជាតំបន់នៅជាប់គ្នានឹងព្រំដែនឡាវ ដោយគ្រាន់តែមានដងទន្លេខណ្ឌចែកទឹកដីគ្នាប៉ុណ្ណោះ។
មន្ត្រីនៃអាជ្ញាធរជាតិ ប្រយុទ្ធប្រឆាំងគ្រឿងញៀនក្រសួងមហាផ្ទៃ បានថ្លែងថា ឃុំកំពង់ស្រឡៅនិងតំបន់ខ្លះ នៅក្នុងខេត្តស្ទឹងត្រែង គឺជាច្រកដែលឧក្រិដ្ឋជនតែងលួចនាំចូលគ្រឿងញៀនខុសច្បាប់ ពីតំបន់ត្រីកោណមាស ចូលមកក្នុងប្រទេសកម្ពុជា។
ប្រជាពលរដ្ឋមួយចំនួន នៅឃុំកំពង់ស្រឡៅមួយ និងកំពង់ស្រឡៅ២ ស្រុកឆែប នៃខេត្តព្រះវិហារ កំពុងព្រួយបារម្ភ ចំពោះអសន្តិសុខនៅក្នុងសហគមន៍ដោយសារតែបច្ចុប្បន្ននេះ មានយុវជនច្រើនឡើងៗ បានប្រើប្រាស់គ្រឿងញៀន ដែលធ្វើប៉ះពាល់ដល់សតិបញ្ញាស្មារតី និងមានអំពើហិង្សាដល់សង្គមផង។
អ្នកភូមិខ្លះនិយាយថា បច្ចុប្បន្ន នៅក្នុងឃុំដែលពួកគាត់កំពុងរស់នៅ គឺមានយុវជនប្រើប្រាស់គ្រឿងញៀនកាន់តែច្រើនឡើងៗ ហើយក៏មានប្តីប្រពន្ធជាច្រើនឈ្លោះប្រកែកគ្នាញឹកញាប់ ដោយសារតែថ្នាំញៀនដែរ។
បុរសម្នាក់ រស់នៅភូមិកំពងជ្រៃ នៃឃុំកំពង់ស្រឡៅ២ ដែលសុំមិនបញ្ចេញឈ្មោះ មានប្រសាសន៍ថា រូបគាត់ក៏ដូចប្រជាពលរដ្ឋជាច្រើនទៀត ព្រួយបារម្ភជាខ្លាំងទៅលើសន្តិសុខសហគមន៍ ដោយសារតែយុវជនប្រើប្រាស់គ្រឿងញៀនមានកាន់តែច្រើនឡើងៗ ហើយនៅតាមគ្រួសារខ្លះ ប្ដីនិងប្រពន្ធតែងឈ្លោះប្រកែកគ្នាដោយសារតែញៀនថ្នាំ។
ពលរដ្ឋថ្លែងលាក់ឈ្មោះ៖ «ព្រួយគ្រប់គ្នាហ្នឹង ព្រួយខាងដីធ្លីក៏ព្រួយ បើសិនជាបំបិទការប្រើថ្នាំញៀនបានគេអរណាស់ ពីព្រោះបច្ចុប្បន្នអ្នកខ្លះ ប្ដីលែងស្ដាប់ប្រពន្ធ ប្រពន្ធលែងស្ដាប់ប្ដីអស់ហើយ ។ មួយថ្ងៃៗឮតែឈ្លោះប្ដី ប្រពន្ធ ជក់នោះជក់។ អ្នកខ្លះវង្វេងស្មារតីលីលាអស់ហើយ។ បន្ថែមលើបញ្ហាហ្នឹងមានអ្នកដើរលួច របស់របរ ទុកអ្វីក៏មិនសល់ដែរ ។ ពីដើមនៅតំបន់នេះគ្មានអ្នកចេះលួចទេ ប៉ុន្តែឥឡូវកុំប្រហែស។ ប៉ុន្មានថ្ងៃមុននោះ ឡាវគេចាប់ខ្មែរយើងចំនួន ៣នាក់ ពាក់ព័ន្ធនឹងការជួញដូរគ្រឿងញៀន។ ចាប់អ្នកភូមិរបស់ខ្ញុំតែម្ដង»។
បុរសម្នាក់ទៀត នៅឃុំកំពង់ស្រឡៅ២ដែរ ឱ្យដឹងប្រហាក់ប្រហែលគ្នាថា បញ្ហាយុវជនប្រើប្រាស់គ្រឿងញៀន កំពុងកើតមាន ហើយជារៀងរាល់យប់ គឺក្រុមយុវជនប្រើគ្រឿងញៀនទាំងនោះតែងនាំគ្នាបើកម៉ូតូ លឿនខ្លាំងធ្វើឱ្យមានការបារម្ភចំពោះគ្រោះថ្នាក់ចរាចរណ៍ទៀតផង។
អ្នកឃុំកំពង់ស្រឡៅ២៖ «មានការព្រួយបារម្ភ ព្រួយខ្លាំងបំផុតគឺប្រជាពលរដ្ឋដែលជាកសិករធ្វើស្រែចំការនោះឯង។ ប៉ុន្តែឱ្យខ្ញុំធ្វើយ៉ាងដូចម្ដេច ពីព្រោះជារឿងដែលពិបាក បើដឹងរឿងក៏ពិបាក។ និយាយជារួមទៅ ខ្ញុំមិនចង់ដឹងរឿងច្រើនទេ ពីព្រោះខ្ញុំជាប្រជាពលរដ្ឋ កាលណាខ្ញុំដឹងរឿងទៅ អាជ្ញាធរគេថា ខ្ញុំនេះបក្សពួកខាងនេះ ខាងនោះ»។
នៅឃុំកំពង់ស្រឡៅមួយ និងកំពង់ស្រឡៅ២ បច្ចុប្បន្ន ក្រៅតែពីមានបញ្ហាយុវជនប្រើប្រាស់គ្រឿងញៀនកើនឡើង ក៏មានបញ្ហារត់ពន្ធទំនិញគេចពន្ធជាច្រើនប្រភេទ និងសកម្មភាពនាំជនជាតិចិនឆ្លងដែនខុសច្បាប់ពីប្រទេសឡាវ ចូលមកកម្ពុជាដែរ។
វិទ្យុអាស៊ីសេរី មិនអាចសុំការអធិប្បាយជុំវិញបញ្ហានេះ ពីអ្នកនាំពាក្យសាលាខេត្ត លោក ណុប វុធ្ធី និងស្នងការនគរបាលខេត្តព្រះវិហារ លោក សួស សុខដារ៉ា បាននៅឡើយនៅថ្ងៃទី២០ ខែមីនា។
ក៏ប៉ុន្តែអគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធ ប្រឆាំងគ្រឿងញៀនក្រសួងមហាផ្ទៃ លោក មាស វីរិទ្ធិ ធ្លាប់ប្រាប់វិទ្យុអាស៊ីសេរី កាលពីដើមខែមីនា ថា ឃុំកំពង់ស្រឡៅមួយនិងកំពង់ស្រឡៅ២ គឺជាច្រកមួយក្នុងចំណោមច្រកខ្លះទៀត នៅខេត្តស្ទឹងត្រែង ដែលឧក្រិដ្ឋជន តែងលួចនាំគ្រឿងញៀនឆ្លងកាត់ពីប្រទេសឡាវ ចូលមកកម្ពុជា។
លោក មាស វីរិទ្ធិ៖«ចេញពីតំបន់ត្រីកោណមាស ចូលប្រទេសឡាវ ចេញពីឡាវចូលមកប្រទេសកម្ពុជាតាមច្រកភាគឦសាន វាមានច្រកត្រពាំងគ្រៀល ខេត្តស្ទឹងត្រែង និងច្រកមួយទៀតកំពង់ស្រឡៅ។ នឹងគឺជាការលួចនាំចូលទេ ពីព្រោះយើងអត់មានច្រកនៅទីនោះឡើយ គ្រាន់តែជាផ្លូវ ដែលឧក្រិដ្ឋជនតែងលួចនាំចូលឆ្លងកាត់ពីឡាវមកកំពង់ស្រឡៅ ចូលមកក្នុងខេត្តព្រះវិហារ នេះបើតាមការកត់សំគាល់»។
កាលពីថ្ងៃទី២១ ខែមករា កងរាជអាវុធហត្ថខេត្តព្រះវិហារ បានប្រទះឃើញគ្រឿងញៀន ទម្ងន់ជាង ១តោន (១០២០) គីឡូក្រាម ដែលឧក្រិដ្ឋជនប្លុងទុកចោលនៅលើរថយន្ត ទល់មុខវិទ្យាល័យស្រុកជ័យសែន។
កាលពីថ្ងៃទី២០ ខែមករា ដែរ កម្លាំងកងរាជអាវុធហត្ថខេត្តព្រះវិហារ ក៏បានបង្ក្រាបគ្រឿងញៀន ប្រភេទម៉ាទឹកកកជាង ១តោនផងដែរ ក្នុងពេលដែលក្រុមឧក្រិដ្ឋជន ដឹកជញ្ជូនតាមរថយន្តMazda ១គ្រឿង នាំចេញពីប្រទេសឡាវ ឆ្លងកាត់ខេត្តព្រះវិហារ។
នាយកអង្គការពន្លកខ្មែរ ដែលកំពុងធ្វើការជាមួយសហគមន៍ខេត្តព្រះវិហារ លោក ប៉ិក សោភ័ណ សំដែងការព្រួយបារម្ភ ចំពោះបញ្ហាយុវជនប្រើប្រាស់គ្រឿងញៀន និងជាច្រើន ដែលកំពុងកើតឡើងនៅទឹកដី ឃុំកំពង់ស្រឡៅមួយ និងកំពង់ស្រឡៅ២នេះ។
លោក ប៉ឹក សោភ័ណ អំពាវនាវ ឱ្យសមត្ថកិច្ចរដ្ឋាភិបាលចាត់វិធានការតឹងរ៉ឹង ដើម្បីផ្ដល់សន្តិសុខ ប្រសើរជូនដល់ប្រជាពលរដ្ឋទីនោះឡើងវិញ។
លោក ប៉ឹក សោភ័ណ៖ «យើងចង់ឱ្យអាជ្ញាធរ ជាពិសេសរដ្ឋាភិបាលធ្វើការរឹតបន្តឹងក្នុងការបើកច្រក ហើយទំនិញណាដែលផ្ទុយនិងច្បាប់ ទំនិញណាដែលប្រាសចាកនិងច្បាប់ សុំឱ្យមានការត្រួតពិនិត្យឱ្យបានតឹងតែង ដើម្បីកុំឱ្យវាជះឥទ្ធិពលមកលើប្រជាពលរដ្ឋខ្មែរ ហើយនិងពាក់ព័ន្ធជាមួយសេដ្ឋកិច្ច របស់ប្រជាពលរដ្ឋខ្មែរផង»។
អាជ្ញាធរជាតិប្រយុទ្ធប្រឆាំងគ្រឿងញៀនឱ្យដឹងថាក្នុងរយៈពេល៦៣ថ្ងៃ ដើមឆ្នាំ២០២៤ សមត្ថកិច្ចបង្ក្រាបបានការជួញដូរគ្រឿងញៀនទូទាំងប្រទេសជិត៧រយ(៦៥៩)ករណី ព្រមទាំងឃាត់ខ្លួនមនុស្សជិត៤ពាន់(៣៨៩៩) នាក់។
ក្នុងរយៈពេល ១ខែដើមឆ្នាំ២០២៤នេះ ករណីបង្ក្រាបការជួញដូរគ្រឿងញៀនខុសច្បាប់មានការកើនឡើង បើប្រៀបធៀបទៅនិងរយៈពេលដូចគ្នា កាលពីឆ្នាំ២០២៣កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។