តុលាការក្រុងភ្នំពេញបានបើកសវនាការលើជនជាតិចិន៣នាក់ពាក់ព័ន្ធការផលិតគ្រឿងញៀន
2022.06.01
ជនសង្ស័យជនជាតិចិន និងវត្ថុតាងផលិតគ្រឿងញៀនដែលសមត្ថកិច្ចចាប់បាន កាលពីខែឧសភា ឆ្នាំ២០២២។
រូប៖ គេហទំព័រនគរបាលជាតិ
សាលាដំបូងរាជធានីភ្នំពេញបានបើកសវនាការលើជនជាតិចិនចំនួន ៣នាក់ ពាក់ព័ន្ធនឹងករណីរក្សាទុកសារធាតុញៀនជាង ៥៦គីឡូក្រាម និងការបើកសិប្បកម្មផលិតជាគ្រឿងញៀននៅកម្ពុជា។
អ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល ឱ្យដឹងថា តំណាងអយ្យការអមសាលាដំបូងរាជធានីភ្នំពេញ សម្រេចចោទប្រកាន់ ជនជាតិចិនជាតិទាំង៣ នាក់ ក្នុងនោះមានឈ្មោះ ជូ ស៊ីងជូ (CHO SHIH JIE) លី ហ្ស៊ី (Li Zhi) និង ផេង ហ្សេងហេង (PENG ZHENGCHENG) ពីបទចោទជួញដូរដោយខុសច្បាប់នូវសារធាតុញៀន។ លោកថា ចៅក្រមស៊ើបសួរ បានបង្គាប់ឱ្យមន្ត្រីនគរបាលយុត្តិធម៌នាំជនសង្ស័យទាំង៣ ទៅឃុំខ្លួនដាក់ពន្ធនាគារព្រៃសជាបណ្ដោះអាសន្នកាលពីថ្ងៃទី២៥ ឧសភា ក្រោយចប់សវនាការ។ ទោះយ៉ាងណា លោកមិនបានបញ្ជាក់ពីការបន្តសវនាការលើជនជាតិចិនទាំងនោះ នៅថ្ងៃណានៅឡើយទេ។
កាលពីថ្ងៃទី២៥ ឧសភា អាជ្ញាធរប្រឆាំងបទល្មើសគ្រឿងញៀន បង្ក្រាបបានក្រុមឧក្រិដ្ឋជនគ្រឿងញៀនទាំង៣នាក់នេះ ដោយស្ថិតនៅទីតាំងចំនួន៣ផ្សេងគ្នា ក្នុងនោះពីរទីតាំងស្ថិតក្នុងខេត្តព្រះសីហនុ និងមួយទីតាំងទៀតស្ថិតនៅរាជធានីភ្នំពេញ ដែលក្រុមឧក្រិដ្ឋជនទាំងនោះបានបន្តសម្ងំបង្កើតកន្លែងកែច្នៃគ្រឿងញៀន ដើម្បីបន្តចែកចាយនៅក្នុងស្រុក។ យោងតាមគេហទំព័ររបស់អគ្គស្នងការដ្ឋាននៅនគរបាលជាតិ ការបង្ក្រាបនោះ សមត្ថកិច្ចរឹបអូសបាន គ្រឿនញៀនជាង៣០ គីឡូក្រាម និងឧបករណ៍កែច្នៃ ព្រមទាំងសារធាតុគីមីផ្សំទៅជាគ្រឿងញៀនមួយចំនួនធំ។ គ្រឿងញៀន និងសារធាតុគីមីផ្សំទាំងនោះរួមមាន ប្រភេទហេរ៉ូអ៊ីន មេតំហ្វេតាមីន(ICE) ម្ស៉ៅក្រាមពណ៌ផ្កាឈូកខ្ចី (MDMA) កេតាមីន(Ketamine) សារធាតុរាវកេតាមីន (Ketamine) ចំនួនជាង ២រយដប (២១៥) និងថ្នាំគ្រាប់នីមេតាហ្សេប៉ាម សរុបចំនួន ៥៦ គីឡូក្រាម។
ថ្មីៗសមត្ថកិច្ច ក៏បង្ក្រាបបានជនជាតិចិនចំនួន ៤នាក់ ដែរពាក់ព័ន្ធនឹងបើកសិប្បកម្មផលិតគ្រឿងញៀនក្នុងខេត្តកំពង់ស្ពឺ និងរាជធានីភ្នំពេញ ដោយរឹបអូសសារធាតុញៀនបានប្រមាណជាង១១តោន។ មកដល់ពេលនេះ អាជ្ញាធរមិនទាន់បង្ហាញព័ត៌មានឱ្យបានទូលំទូលាយពាក់ព័ន្ធនឹងសវនាការ ដើម្បីកាត់ទោសពួកគេនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- លោក ហ៊ុន សែន អះអាងថា សេដ្ឋកិច្ចកម្ពុជាលែងត្រូវការប្រព័ន្ធអនុគ្រោះពន្ធEBA ពីអឺរ៉ុបហើយ
- ម្ចាស់អាជីវកម្មទាំងខ្នាតតូច និងខ្នាតធំកំពុងជួបវិបត្តិបង្វិលសាច់ប្រាក់មិនទាន់
- អ្នកវិភាគថា លោក សម រង្ស៊ី ជាន់ទឹកដីម៉ាឡេស៊ី ប្រៀបដូចជាការទះកំផ្លៀងលោក ហ៊ុន សែន
- ពលរដ្ឋបង្ខំចិត្តចាកចេញពីតំបន់អង្គរ ប្រឈមនឹងជីវភាពខ្វះខាត និងបាត់បង់មុខរបរ
