អាជ្ញាធររឹតត្បិតសមាគមសេដ្ឋកិច្ចក្រៅប្រព័ន្ធរឿងចែកស្បៀងឱ្យពលរដ្ឋក្រីក្រនៅក្រុងប៉ោយប៉ែត
2021.02.17
អាជ្ញាធរក្រុងប៉ោយប៉ែតកំពុងសួរលោក វន់ ពៅ ក្នុងពេលចុះចែកស្បៀងអាហារដល់ពលរដ្ឋក្រីក្រ ក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត។
ប្រភព៖ ហ្វេសប៊ុករបស់លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) កាលពីថ្ងៃទី១៧ ខែកុម្ភៈ ឆ្នាំ២០២១។
អាជ្ញាធរមូលដ្ឋាននិងប៉ូលិសនៃអធិការនគរបាលក្រុងប៉ោយប៉ែតមានគ្នាប្រមាណ ៥នាក់ បានសួររកលិខិតអនុញ្ញាតពីប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) គឺលោក វន់ ពៅ ក្នុងពេលដែលលោកចុះចែកស្បៀងអាហារដល់ពលរដ្ឋក្រីក្រចំនួន ៩០គ្រួសារ ក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត។
លោក វន់ ពៅ ប្រាប់អាស៊ីសេរីក្រោយពេលអាជ្ញាធររារាំងថា លោកមិនពេញចិត្តនឹងទង្វើរបស់អាជ្ញាធរក្រុងប៉ោយប៉ែតនោះទេ។ លោកយល់ថា ការធ្វើបែបនេះជាការធ្វើឱ្យពលរដ្ឋភ័យខ្លាច និងធ្វើឱ្យរាំងស្ទះដល់ការងារមនុស្សធម៌របស់មន្ត្រីសង្គមស៊ីវិល។ លោកថា ការចែកស្បៀងនេះ គឺដោយសារលោកអាណិតពលរដ្ឋក្រីក្រ ដាច់ស្បៀងអាហារដោយសារពួកគាត់អត់ការងារធ្វើជាច្រើនខែមកហើយ បណ្ដាលមកពីវិបត្តិជំងឺកូវីដ១៩៖ «អាហ្នឹងវាជាការរឹតត្បិតសេរីភាពនៃការធ្វើការរបស់អង្គការសង្គមស៊ីវិលហើយ។ ពីព្រោះត្រឹមតែចែកអង្ករចែកអីមិនបាច់មកអង្កេតមកសួរនាំអីចឹង វាជារឿងមួយដែលគួរឱ្យសោកស្ដាយ ចុះថ្ងៃក្រោយគ្រាន់តែហូបបាយ ចាំបាច់សុំច្បាប់ពីគេដែរឬយ៉ាងម៉េច។ អាហ្នឹងជារឿងមួយដែលខ្ញុំសោកស្ដាយមែនទែន អីចឹងខ្ញុំគិតថាថ្ងៃក្រោយនឹងមិនមានរឿងបែបហ្នឹងកើតឡើងទៀតទេ»។
ប៉ុន្តែវីដេអូឃ្លិបដែលត្រូវបានបង្ហោះលើបណ្ដាញសង្គមសហ្វេសប៊ុក បានបង្ហាញអំពីសកម្មភាពរបស់ប៉ូលិសនិងអាជ្ញាធរក្រុងប៉ោយប៉ែត ហាមឃាត់លោក វន់ ពៅ ក្រោមហេតុផលថា មន្ត្រីសង្គមស៊ីវិលរូបនេះ ធ្វើសកម្មភាពដោយមិនបានសុំច្បាប់អនុញ្ញាតពីអាជ្ញាធរ។
ទោះជាយ៉ាងណា ក្រោយមកអាជ្ញាធរបានយល់ព្រមឱ្យលោក វន់ ពៅ ចែកស្បៀងជាធម្មតាវិញ ប៉ុន្តែមានលក្ខខ័ណ្ឌមិនឱ្យលោកពិភាក្សាជាមួយពលរដ្ឋឡើយ។ បន្ថែមពីនេះ ប៉ូលិសបានតាមឃ្លាំមើលនិងថតរូបនៃការចែកអំណោយពលរដ្ឋនេះ រហូតដល់ចប់កម្មវិធីនៅរសៀលថ្ងៃដដែល។
អ្នកទទួលបានជំនួយមនុស្សធម៌ទាំងនោះ រួមមានអ្នករត់ម៉ូតូឌុប កម្មករអូសរទេះ អ្នកស៊ីឈ្នួលលីសែងនៅតំបន់ព្រំដែន និងអាជីវករខ្មែរដែលមានតូបលក់ដូរនៅផ្សាររ៉ុងក្លឿប្រទេសថៃ។ ពួកគាត់ទទួលបានអង្ករម្នាក់ ២០គីឡូក្រាម ពីលោក វន់ ពៅ។
ប្រជាពលរដ្ឋដែលបានចូលក្នុងពិធីនោះ គឺលោក ម៉ានិត គង់ ថ្លែងថា លោកអត់ការងារធ្វើជិត ១ឆ្នាំហើយ ដោយសារអាជ្ញាធរកម្ពុជានិងថៃ បិទច្រកទ្វារព្រំដែនអន្តរជាតិប៉ោយប៉ែត។ លោកឱ្យដឹងទៀតថា លោកមិនពេញចិត្តនឹងទង្វើបែបនេះរបស់អាជ្ញាធរឡើយ ព្រោះចាប់តាំងពីមានវិបត្តិជំងឺកូវីដ១៩មក ពុំមានអាជ្ញាធរណាចែកស្បៀងអាហារដល់គ្រួសារលោកម្ដងនៅឡើយទេ។៖ «ខ្ញុំតូចចិត្តដូចថាពួកគាត់មិនគួរណាមករារាំងដែលយើងបានអំណោយដើម្បីរស់បន្តទៀតអីចឹងទេ។ ព្រោះសព្វថ្ងៃនេះខ្ញុំជំពាក់ធនាគារផងអីផង ហើយដល់បានខាងអង្គការគាត់ឧបត្ថម្ភជាអង្ករខ្ញុំមានការត្រេកអរ ហើយដល់គាត់មកធ្វើអីចឹងខ្ញុំរាងតូចចិត្ត ពួកគាត់មិនគួរណាមករារាំងពួកយើងដែលអ្នកខ្វះខាតរកអីមិនបាន ហើយកូនអត់ការងារធ្វើទាំងអស់គ្នា រកតែប្រាក់បង់ធនាគារមិនបានផង»។
អាជ្ញាធរកម្ពុជានិងថៃបានបិទច្រកទ្វារព្រំដែនប្រទេសទាំងពីរនៅខែមីនា ឆ្នាំ២០២០ ដើម្បីទប់ស្កាត់ការរាតត្បាតជំងឺកូវីដ១៩ ហើយរហូតមកទល់ពេលនេះ មិនទាន់បើកដំណើរការឡើងវិញនៅឡើយទេ។ ការបិទច្រកព្រំដែននេះ បានប៉ះពាល់ដល់ជីវភាពរស់នៅរបស់ប្រជាពលរដ្ឋនៅតំបន់នោះ ដោយសារពួកគាត់អត់ការងារធ្វើ។
ជាមួយគ្នានេះអាជ្ញាធរខេត្តជាប់ព្រំដែនប្រទេសថៃ រួមមានខេត្តបាត់ដំបង ប៉ៃលិន បន្ទាយមានជ័យ និងខេត្តឧត្ដរមានជ័យ ជាដើម បានបន្ថែមកងកម្លាំងប្រដាប់អាវុធជាច្រើននាក់ ចុះត្រួតពិនិត្យតឹងតែងនៅតំបន់ព្រំដែន ដើម្បីទប់ស្កាត់ពលករខ្មែរលួចឆ្លងដែនខុសច្បាប់ចូលកម្ពុជា ដោយពុំបានធ្វើចត្តាឡឺស័កចំនួន ១៤ថ្ងៃ។ វិធានការរបស់អាជ្ញាធរនេះ ធ្វើឡើយក្រោយពីលោកនាយករដ្ឋមន្ត្រីហ៊ុន សែន បានបញ្ចប់មុខតំណែងអធិការនគរបាលស្រុកកំរៀង ខេត្តបាត់ដំបង ពាក់ព័ន្ធនឹងរឿងដោះលែងមេខ្យល់លួចនាំពលករចូលមកកម្ពុជាខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ហ៊ុន សែន និងលោក សេង សារី បន្តឆ្លើយឆ្លងគ្នាលើបណ្ដាញសង្គមពាក់ព័ន្ធសារបែកធ្លាយ
- ជនជាតិវៀតណាមរស់នៅលើដី៤០ហិកតារ ក្នុងខេត្តកំពង់ឆ្នាំងត្អូញជីវភាពលំបាក និងខ្លះវិលទៅរស់នៅលើផ្ទះបណ្តែតទឹកវិញ
- ពលរដ្ឋខ្មែរនៅជប៉ុនបាតុកម្មជំរុញឱ្យរដ្ឋាភិបាលប្តឹងទាមទារចំណែកកម្ពុជានៅលើកោះគជ់
- ការព្រមានរបស់ចិនបង្ក្រាបសំឡេងរិះគន់ទំនាក់ទំនងកម្ពុជា-ចិន «ដើម្បីការពារអំណាចផ្ដាច់ការទៅវិញទៅមក»
- លោក ហ៊ុន សែន ថា មានអ្នកប៉ុនប៉ងសម្លាប់លោក ដោយប្រើយន្តហោះដ្រូន ខណៈបក្សប្រឆាំងថា ជារឿងប្រឌិត
