មន្ត្រីឃ្លាំមើលការរំលោភសិទ្ធិមនុស្សបន្តស្នើដល់អាជ្ញាធរខេត្តព្រះសីហនុពង្រឹងការអនុវត្តច្បាប់ និងបង្ហាញព័ត៌មានឱ្យបានទូលំទូលាយទាក់ទងនឹងបញ្ហាជួញដូរមនុស្ស និងការបង្ខាំងមនុស្សដោយខុសច្បាប់។ ការស្នើនេះធ្វើឡើងក្រោយសមត្ថកិច្ចខេត្តព្រះសីហនុបន្តចាប់បានជនសង្ស័យជនជាតិចិនចំនួន ៧នាក់ ពាក់ព័ន្ធករណីចាប់បង្ខាំងមនុស្សជំរិតទារប្រាក់ និងប្រើប្រាស់អាវុធដោយខុសច្បាប់។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ប្រាប់វិទ្យុអាស៊ីសេរី នៅថ្ងៃទី១៥ ខែធ្នូ ថា ប្រជាពលរដ្ឋភាគច្រើនរស់នៅក្នុងខេត្តជាប់មាត់សមុទ្រមួយនេះ ព្រួយបារម្ភអំពីបញ្ហាសុវត្ថិភាព និងខ្លាចប៉ះពាល់ការប្រកបរបរប្រចាំថ្ងៃ ដោយសារបញ្ហានៃឧក្រិដ្ឋកម្មជួញដូរមនុស្ស និងបទល្មើសនានាក្នុងខេត្តព្រះសីហនុ។ អ្នកស្រីព្រួយបារម្ភថា ក្រុមឧក្រិដ្ឋជនដែលនៅតែអាចបន្តធ្វើសកម្មភាពជួញដូរមនុស្ស បង្ខាំងមនុស្សនៅក្រុងព្រះសីហនុជាបន្តបន្ទាប់នេះ ដោយសារតែអាជ្ញាធរអនុវត្តច្បាប់ធូររលុង ហើយអាចមានមន្ត្រីអាជ្ញាធរខ្លះឃុបឃិតគ្នាជាមួយជនល្មើសជាប្រព័ន្ធ។
អ្នកស្រី ជៀប សុធារី៖ «ខ្ញុំជឿថា សមត្ថកិច្ចនគរបាលរបស់យើងគ្រប់ជាន់ថ្នាក់ទាំងអស់លោកមានសមត្ថភាពគ្រប់គ្រាន់ក្នុងការស្វែងរកឧក្រិដ្ឋជនទាំងអស់នោះ ប៉ុន្តែ ប្រសិនជាមានការឃុបឃិតគ្នាជាប្រព័ន្ធ ហើយមានអំពើពុករលួយដើម្បីផលប្រយោជន៍ នៅពីក្រោយខ្នងគឺឧក្រិដ្ឋជនទាំងអស់ហ្នឹងងាយស្រួលក្នុងការលាក់ខ្លួន។ ស្នើសុំឱ្យមានការយកចិត្តទុកដាក់គិតអំពីបញ្ហាជាតិ អំពីសុវត្ថិភាពក្នុងប្រទេស និងកេរ្តិ៍ឈ្មោះរបស់កម្ពុជា យើងប្រាកដជាអាចបង្ក្រាបបទល្មើសទាំងអស់ហ្នឹងបាន»។
កាលពីថ្ងៃទី១០ ខែធ្នូ សមត្ថកិច្ចខេត្តព្រះសីហនុ បានឆែកឆេរទីតាំងផ្ទះវីឡាមួយកន្លែងដែលជាទីតាំងបង្ខាំងជនរងគ្រោះ នៅក្នុងបុរី ប៊ីអេសអូ (B.S.O) ទី៥ ស្ថិតនៅ ភូមិ៥ សង្កាត់៤ ខេត្តព្រះសីហនុ តាមបណ្ដឹងជនរងគ្រោះប្ដឹងតាមរយៈទូរស័ព្ទរបស់ស្នងការដ្ឋាននគរបាលខេត្តព្រះសីហនុកាលពីថ្ងៃទី៩ ខែធ្នូ។ ជនសង្ស័យជាជនជាតិចិនចំនួន ៧នាក់ដែលសមត្ថកិច្ចឃាត់ខ្លួនមានឈ្មោះ លី ហ្គាង (LI GANG) លីន អៀន (LIN EN) លី យ៉ុង ប៊ីន (LI YONG BIN) ហៅ លី ឈុន (LI CHUN) ដុង ហ្សេង វ៉េន (DENG SHENG WEN) ហ៊្សៅ យុន ហ្វី (ZHAO YUN FEI) យ៉ាង ហ័រ (YANG HUI) និងហ្សេង ស៊ូ (ZHANG SHU)។ ក្នុងការចុះបង្ក្រាបនោះសមត្ថកិច្ចក៏បានរឹបអូបកាំភ្លើងខ្លីចំនួន ២ដើម ខ្នោះដៃ ៥គូរ ដំបងឆក់ ៥ដើម ឧស្ម័នបង្ហូរទឹកភ្នែក ៣ដប និងឧបករណ៍ប្រើប្រាស់របស់ជនសង្ស័យមួយចំនួនធំ។ សមត្ថកិច្ចខេត្តព្រះសីហនុអះអាងថា ការិយាល័យនគរបាលព្រហ្មទណ្ឌកម្រិតស្រាល បានបញ្ជូនជនសង្ស័យ ០៧នាក់ ទៅសាលាដំបូងខេត្តព្រះសីហនុ ដើម្បីចាត់ការតាមនីតិវិធីរួចរាល់ហើយ។
ទាក់ទងរឿងជួញដូរមនុស្សនេះដែរ ថ្មីៗនេះរដ្ឋមន្ត្រីក្រសួងមហាផ្ទៃ លោក ស ខេង បានបញ្ជាដល់កម្លាំងសមត្ថកិច្ច និងអាជ្ញាធរជំនាញត្រូវបង្កើនការត្រួតពិនិត្យនៅច្រកព្រំដែន ដើម្បីគ្រប់គ្រងជនអន្តោប្រវេសន៍លួចឆ្លងដែនខុសច្បាប់ចូលមកធ្វើការនៅកម្ពុជា។ លោក ស ខេង ព្រមានដល់ក្រុមអាជ្ញាធរមានសមត្ថកិច្ចថា ក្នុងយុទ្ធនាការបង្ក្រាបអំពើជួញដូរមនុស្សនេះ សមត្ថកិច្ចមិនត្រឹមតែជួយសង្គ្រោះជនរងគ្រោះចេញពីកន្លែងបង្ខាំងដោយខុសច្បាប់តែប៉ុណ្ណោះទេ ប៉ុន្តែសមត្ថកិច្ចត្រូវស្វែងរកមេខ្លោង និងអ្នកពាក់ព័ន្ធ ដើម្បីយកមកអនុវត្តច្បាប់។ លោក ស ខេង ឱ្យដឹងទៀតថា គិតត្រឹមពាក់កណ្ដាលខែធ្នូ មានបណ្ដឹងពីជនរងគ្រោះឱ្យជួយសង្គ្រោះពួកគេមានចំនួនជាង ៦រយករណី (៦០០)។
ដោយឡែក របាយការណ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សឱ្យដឹងថា គិតត្រឹមពាក់កណ្ដាលខែសីហា មកដល់ខែវិច្ឆិកា បានរកឃើញជនរងគ្រោះជាង ១ពាន់នាក់ (១.១២២) ក្នុងនោះស្រីជាង ១នាក់ (១២១)។ ក្នុងចំណោមជនរងគ្រោះទាំងនោះ ត្រូវបានកំណត់អត្តសញ្ញាណថា មានជនរងគ្រោះដោយអំពើជួញដូរមនុស្ស ការបង្ខាំង និងការធ្វើពលកម្មដោយបង្ខំចំនួនជាង ១រយនាក់ (១៥៣) ក្នុងនោះស្រី ១៨នាក់៕