នគរបាលជាតិចាប់បានឧក្រិដ្ឋជនជួញដូរគ្រឿងញៀនចំនួន ៣នាក់ ខណៈខ្មាន់កាំភ្លើងម្នាក់ទៀតបានរត់គេចខ្លួនភ្លាមៗ ក្រោយដកកាំភ្លើងបាញ់តដៃជាមួយសមត្ថកិច្ច បណ្ដាលឱ្យមន្ត្រីនគរបាលម្នាក់បានស្លាប់ក្នុងហេតុការណ៍ចុះបង្ក្រាបគ្រឿងញៀននៅរាជធានីភ្នំពេញ កាលពីយប់ថ្ងៃទី២៨ ខែធ្នូ។ អ្នកជំនាញផ្នែកសិទ្ធិមនុស្សសោកស្ដាយកម្លាំងសមត្ថកិច្ចដែលបានស្លាប់ និងព្រួយបារម្ភពីស្ថានភាពគ្រឿងញៀនដោយសារអ្នកជួញដូរមានទាំងកំាំភ្លើងប្រើប្រាស់។
អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនលោក មាស វីរិទ្ធ ប្រាប់វិទ្យុអាស៊ីសេរីនៅថ្ងៃទី២៩ ខែធ្នូ ថា សមត្ថកិច្ចកំពុងបើកការស៊ើបអង្កេតតាមចាប់ខ្លួនខ្មាន់កាំភ្លើងរូបនោះហើយ។ ទោះយ៉ាងណាលោកថា សមត្ថកិច្ចបានសាកសួរជនសង្ស័យដែលសមត្ថកិច្ចចាប់ខ្លួនបាន ដើម្បីមានតម្រុយបន្ថែមក្នុងការពន្លឿននីតិវិធីតាមចាប់ខ្មាន់កាំភ្លើង។
លោក មាស វីរិទ្ធ៖«ជនដៃដល់ដែលតដៃជាមួយសមត្ថកិច្ចកំពុងរត់គេចខ្លួន យើងកំពុងច្បាមតាមរក។ យើងបានកំណត់អត្តសញ្ញាណមួយចំនួនហើយ ជារូបភាព»។
កាលពីយប់ថ្ងៃទី២៨ ខែធ្នូ កម្លាំងមន្ទីរជំនាញនៃអគ្គស្នងការដ្ឋាននគរបាលជាតិ បានបង្ក្រាបក្រុមឧក្រិដ្ឋជនជួញដូរគ្រឿងញៀនមួយក្រុម រហូតដល់ចំណុចផ្លូវ៦០ ម៉ែត្រស្ថិតក្នុងខណ្ឌដង្កោ រាជធានីភ្នំពេញ ក្រុមឧក្រិដ្ឋជនបានដកកាំភ្លើងបាញ់រះជាច្រើនគ្រាប់តដៃ ជាមួយសមត្ថកិច្ចបណ្ដាលឱ្យមន្ត្រីនគរបាលឈ្មោះ ម៉ិច ឆាយភិវ័យ ដេកស្លាប់ក្នុងថ្លុកឈាម។ លោក មាស វីរិទ្ធ បញ្ជាក់ថា សមត្ថកិច្ចបានឃាត់ខ្លួនជនសង្ស័យជាជនជាតិវៀតណាម២នាក់ និងខ្មែរម្នាក់ ចំណែកខ្មាន់កាំភ្លើងបានរត់គេចខ្លួនភ្លាមក្រោយបាញ់សម្លាប់កម្លាំងចុះបង្ក្រាប។
លោក មាស វីរិទ្ធ ឱ្យដឹងទៀតថា គ្រឿងញៀនដែលសមត្ថកិច្ចរឹបអូសបានជាប្រភេទ កេតាមីន(Ketamine) និងមេតំហ្វេតាមីន (ICE) ចំនួន២ដុំធំ ព្រមទាំងអាវុធមួយចំនួនផង។ លោកអំពាវនាវដល់កម្លាំងសមត្ថកិច្ចត្រូវបង្កើនការប្រុងប្រយ័ត្ន ព្រោះលោកថា ក្រុមឧក្រិដ្ឋជនពួកគេហ៊ានធ្វើសកម្មភាពគ្រប់បែបយ៉ាងក្នុងគ្រាដែលសមត្ថកិច្ចចុះបង្ក្រាប។
លោក មាស វីរិទ្ធ៖«ក្រុមឧក្រិដ្ឋជនតែងតែប្រើប្រាស់គ្រប់មធ្យោបាយតដៃជាមួយសមត្ថកិច្ច យើងជាសមត្ថកិច្ចត្រូវតែបង្កើនការប្រុងប្រយ័ត្ន។ ប៉ុន្តែទោះបីយើងបង្កើនការប្រុងប្រយ័ត្នយ៉ាងណាក៏ដោយ ក៏យើងអាចខ្វះចន្លោះ ខ្វះខាតពីព្រោះក្រុមឧក្រិដ្ឋជនវាក៏មានបក្ខពួក វាក៏មានគ្នាច្រើនដែរ ហើយសមត្ថកិច្ចយើងពេលចុះអនុវត្តគោរពតាមច្បាប់ តាមតួនាទី និងគោរពសិទ្ធិមនុស្ស។ ឯក្រុមពួកឧក្រិដ្ឋជនវាអត់មានគោរពសិទ្ធអ្នកណាទេ គឺវាត្រូវតដៃគឺតដៃតែម្ដងហើយភាគច្រើនហ្នឹងក្រុមឧក្រិដ្ឋជនមានអាវុធ»។
ជុំវិញរឿងនេះ មន្ត្រីសង្គមស៊ីវិលសោកស្ដាយចំពោះមន្ត្រីនគរបាលដែលស្លាប់ក្នុងហេតុការណ៍បង្ក្រាបគ្រឿងញៀន។ នាយកទទួលបន្ទុកកិច្ចការទូទៅនៃអង្គការលីកាដូ (LICADHO) លោក អំ សំអាត ជំរុញដល់រដ្ឋាភិបាលត្រូវបង្កើននូវកិច្ចសហប្រតិបត្តិការក្នុងការបង្ក្រាបក្រុមឧក្រិដ្ឋជនបន្ថែមទៀត។
លោក អំ សំអាត៖«បញ្ហាមួយទៀតត្រូវតែទប់ស្កាត់នៃការចរាចរ និងការជួញដូរអាវុធខុសច្បាប់ ព្រោះឧក្រិដ្ឋជនជួញដូរគ្រឿងញៀនមានអាវុធជាប់ខ្លួនដែរ។ ការត្រួតពិនិត្យ ការទប់ស្កាត់ និងការជួញដូរអាវុធជាតិផ្ទុះ យើងនៅមានភាពធូររលុង ហើយជនបរទេសអាចឆ្លៀតឱកាសក្នុងការប្រើប្រាស់អាវុធខុសច្បាប់បាននៅកម្ពុជា អាហ្នឹងជាការណ៍ដែលលក្ខណៈបង្កអសន្តិសុខ និងភាពភ័យខ្លាចសម្រាប់សង្គមជាតិ ក៏ដូចជាប្រជាពលរដ្ឋ។ ចំណុចនេះ យើងត្រូវតែមានការទប់ស្កាត់ទាំងពីរ»។
ចំណែកអ្នកវិភាគនយោបាយ លោក គឹម សុខ មើលឃើញថា កម្ពុជាក្រោមការដឹកនាំដោយលោក ហ៊ុន សែន បានកើតមាននូវបទល្មើសឧក្រិដ្ឋកម្មជាច្រើន ពិសេសឧក្រិដ្ឋកម្មគ្រឿងញៀនដែលបន្តហូរចូលកម្ពុជា។ លោក គឹម សុខ ចោទថាមូលហេតុករណីគ្រឿងញៀននៅកម្ពុជាបន្តកើតឡើងកាន់តែច្រើនទំនងមានមនុស្សជំនិតរបស់លោក ហ៊ុន សែន នៅពីក្រោយខ្នងឧក្រិដ្ឋជន។
លោក គឹម សុខ៖«លោក ហ៊ុន សែន គាត់មានមនុស្សជំនិតៗច្រើនណាស់ដែលសុទ្ធតែមានអំណាចនិងសេរីភាពរកស៊ីលាងលុយកខ្វក់។ ជាក់ស្ដែង យើងឃើញហើយតាមរយៈក្រសួងកសិកម្ម និងក្រសួងពាក់ព័ន្ធ គេដឹកសារធាតុផលិតគ្រឿងញៀនចូលកម្ពុជាម្ដងៗរាប់រយតោនរកអ្នកទទួលខុសត្រូវពិតមិនឃើញទេ។ សួរថា ថ្នាំញៀនទាំងនោះយកទៅធ្វើអ្វី ចាប់[មេខ្លោង]មិនបានផងហ្នឹងគឺលក់យកលុយ ហើយលុយចូលអ្នកណា ត្រង់នេះយើងគួរតែដឹងហើយ បើរកអ្នកទទួលខុសត្រូវទាំងមិនឃើញផងហ្នឹង»។
នេះមិនមែនជាលើកទីមួយនោះទេ ដែលកម្លាំងសមត្ថកិច្ចត្រូវបានជនល្មើសបាញ់តដៃបណ្ដាលឱ្យស្លាប់។ ជាញឹកញយ រាល់ពេលសមត្ថកិច្ចចុះបង្ក្រាបករណីជួញដូរគ្រឿងញៀនទ្រង់ទ្រាយធំម្ដងៗក្រុមឧក្រិដ្ឋជនមួយចំនួនតែងតែមានកាំភ្លើងបាញ់តទល់ជាមួយសមត្ថកិច្ច។ ជាក់ស្ដែង កាលពីដើមខែមេសា ឆ្នាំ២០២២ កន្លងទៅ មេប៉ុស្តិ៍ឃុំទួលព្រិច ស្រុកអង្គស្នួល ខេត្តកណ្ដាល ត្រូវបានឧក្រិដ្ឋជនបាញ់ស្លាប់ ក្នុងពេលចុះបង្ក្រាបក្រុមជនល្មើសមួយក្រុមធ្វើសកម្មភាពជួញដូរគ្រឿងញៀនក្នុងព្រៃមួយកន្លែង នៅក្នុងភូមិចន្រ្ទាថ្មី ឃុំទួលព្រិច ស្រុកអង្គស្នួល ខេត្តកណ្ដាល។ ដោកឡែក កាលពីខែមិថុនា កន្លងទៅ កម្លាំងសមត្ថកិច្ចម្នាក់នៅខេត្តព្រះសីហនុ ត្រូវបានជនល្មើសជនជាតិចិនមួយក្រុមបាញ់បាក់ជើង ក្នុងគ្រាចុះបង្ក្រាបករណីជួញដូរគ្រឿងញៀន និងកាន់កាប់អាវុធខុសច្បាប់។
គិតត្រឹមចុងខែធ្នូ សម្រាប់ឆ្នាំ២០២២ នេះ អាជ្ញាធររឹបអូសគ្រឿងញៀនបានជាង ៥តោន។ ចំណែកកាលពីថ្ងៃទី២៦ ខែមិថុនា អាជ្ញាធរប្រយុទ្ធប្រឆាំងគ្រឿងញៀនបានដុតបំផ្លាញសារធាតុញៀន និងសារធាតុគីមីសរុបជាង ៦តោន ក្នុងចំណោមវត្ថុតាងគ្រឿងញៀន សារធាតុគីមីផ្សំ និងសារធាតុគីមីពាក់ព័ន្ធផ្សេងៗ ដែលរឹបអូសបានសរុបជិត ១០០តោន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។