សហភាពសហជីពកម្ពុជា បង្ហាញពីភាពមិនប្រក្រតីចំពោះសមាគមរោងចក្រកាត់ដេរកម្ពុជា ជីម៉ាក់ (GMAC) ដែលផ្តល់អំណោយជាទឹកប្រាក់ និងសម្ភារៈផ្សេងៗទៅដល់ក្រសួង និងមន្ត្រីរដ្ឋាភិបាល ដែលមានតម្លៃខ្ពស់ក្នុងពេលមានកម្មវិធីរៃអង្គាសម្តងៗ។
ស្ថាប័នដដែលចាត់ទុកករណីនេះថា គឺជាឧបសគ្គធំមួយនៃការដំឡើងប្រាក់ខែកម្មករ ដោយសារមានអំពើពុករលួយតាមរយៈរូបភាពផ្តល់អំណោយឧបត្ថម្ភដល់ក្រសួង ឬមន្ត្រីរដ្ឋាភិបាលបែបនេះ។
សហភាពសហជីពកម្ពុជា ស្នើឲ្យរដ្ឋាភិបាលស៊ើបអង្កេតយ៉ាងយកចិត្តទុកដាក់ ចំពោះការទទួលសំណូករបស់មន្ត្រីក្រសួងនីមួយៗពីសមាគមរោងចក្រកាត់ដេរកម្ពុជា ជីម៉ាក់។ ស្របពេលគ្នានេះ សហភាពសហជីព ក៏សុំឲ្យពិនិត្យពិចារណាអំពីការដំឡើងប្រាក់ខែកម្មករឲ្យបាន ១៧៧ដុល្លារក្នុងមួយខែ។
សេចក្តីថ្លែងការណ៍របស់សហភាពសហជីពកម្ពុជា ចេញផ្សាយកាលពីថ្ងៃទី២៨ តុលា បង្ហាញថា សមាគមរោងចក្រកាត់ដេរ បានផ្តល់ប្រាក់ចំនួន ៥ពាន់ដុល្លារ ឲ្យទៅក្រសួងពាណិជ្ជកម្ម និងប្រាក់មួយចំណែកផ្សេងទៀត ឲ្យទៅស្ថាប័នរដ្ឋផ្សេងៗដែរ។
ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា ករណីនេះ គឺជាឧបសគ្គធ្ងន់ធ្ងរបំផុតដែលធ្វើឲ្យប៉ះពាល់ដល់ការដំឡើងប្រាក់ឈ្នួលកម្មករ៖ «សហភាពសហជីពកម្ពុជា សុំឲ្យបញ្ចប់នូវការពុករលួយទទួលសំណូក ហើយងាកមកគិតគូរពីសុខទុក្ខកម្មករ ដោះស្រាយបញ្ហាដំឡើងប្រាក់ឈ្នួលកម្មករ ១៧៧ដុល្លារ ហើយបើមិនបានប្រាក់ឈ្នួល ១៧៧ដុល្លារនេះទេ ខ្ញុំគិតថានៅតាមបណ្ដារោងចក្រមិនមានសន្តិភាពទេ ហើយនឹងផ្ទុះកូដកម្មទាមទារប្រាក់ឈ្នួលជាលើកទី២ទៀត»។
ក្នុងសេចក្តីថ្លែងការណ៍ដដែលបានបង្ហាញទៀតថា ករណីផ្តល់ប្រាក់ឲ្យស្ថាប័នរដ្ឋនេះ ថ្នាក់ដឹកនាំសមាគមរោងចក្រកាត់ដេរបានអះអាងថា សំណើសុំជំនួយបានកើតឡើងគ្រប់ពេល និងនៅគ្រប់ក្រសួងនានា។ ដោយហេតុនេះហើយ ទើបមន្ត្រីរដ្ឋាភិបាលតែងតែនិយាយចំអកឲ្យសហជីព និងកម្មករ នៅពេលទាមទារប្រាក់ខែថា វាយបំបែកឆ្នាំងបាយខ្លួនឯង។ ម្យ៉ាងទៀត នៅពេលចរចាបញ្ហាប្រាក់ឈ្នួលម្តងៗ ភាគីរដ្ឋាភិបាលតែងតែអះអាងជំនួសនិយោជកថា មិនមានលុយដំឡើង ឬនិយោជករត់ទៅប្រទេសផ្សេងៗ ដោយឈប់វិនិយោគនៅកម្ពុជា ជាដើម។
ទាក់ទងនឹងសេចក្តីថ្លែងការណ៍របស់សហភាពសហជីពកម្ពុជា នេះ អគ្គលេខាធិការនៃសមាគមរោងចក្រកាត់ដេរ លោក ខេន លូ មានប្រសាសន៍កាលពីថ្ងៃទី២៨ តុលា ថា ការចំណាយរបស់សមាគមមិនពាក់ព័ន្ធនឹងការដំឡើងប្រាក់ខែកម្មករនោះទេ៖ «លុយរបស់សមាគមចាយក្នុងនាមប្រធាន ឬ expert របស់រោងចក្រពិចារណាថាត្រូវចាយ អាហ្នឹងលុយរបស់សមាគមនៃរោងចក្រនីមួយៗជាមូលដ្ឋាននោះទេ»។
លោកបន្តថា ការចំណាយរបស់សមាគមទៅលើស្ថាប័នរដ្ឋផ្សេងៗ ដែលមានការអញ្ជើញពីរដ្ឋមន្ត្រីតាមក្រសួងស្ថាប័ននានា ដូចជាកាកបាទក្រហមកម្ពុជា គឺជាការចូលរួមចំណែកឧបត្ថម្ភតាមលទ្ធភាពក្នុងកម្មវិធីអ្វីមួយ។ លោកទទួលស្គាល់ថា កាលពីខែកញ្ញា កន្លងទៅ សមាគមលោកបានចំណាយប្រាក់ ៥ពាន់ដុល្លារជួយឧបត្ថម្ភទាហាននៅប្រាសាទព្រះវិហារ តាមការអំពាវនាវរបស់រដ្ឋមន្ត្រីក្រសួងពាណិជ្ជកម្ម៖ «ទៅមើលពួកទាហានដែលនៅព្រះវិហារ ហើយវាបានប្រកាសដាក់ជាសាធារណៈថា ឲ្យក្រុមហ៊ុនណាក៏ដោយ ឧកញ៉ា លោកជំទាវ អ្នកណាដែលចង់ចូលជាវត្តមាន ដើម្បីឲ្យក្រសួងពាណិជ្ជកម្មជូនទៅទាហាននៅព្រះវិហារ ឬក៏ចង់ទៅជាមួយគ្នាក៏បាន អ៊ីចឹងដូចថាយើងទិញអីវ៉ាន់បាវអង្ករ ប្រេងអី ជូនទៅទាហានដែលនៅព្រះវិហារ តើ! អត់មានដល់ដៃក្រសួង អត់មានដល់ដៃមន្ត្រីរាជការណា? ហើយរឿងហ្នឹងដូចថាយើងបានធ្វើច្រើនដងហើយ កាលពីរឆ្នាំមុនមានរដ្ឋមន្ត្រីផ្សេងៗបានស្នើសុំ យើងក៏បានទៅជាមួយគ្នាដែរ»។
លោក ខេន លូ មិនចាត់ទុកករណីបែបនេះជាអំពើពុករលួយទេ ព្រោះសមាគមលោកធ្វើឡើងជាសាធារណៈ និងមានចុះផ្សាយនៅក្នុងរបាយការណ៍ហិរញ្ញវត្ថុរបស់សមាគម ជីម៉ាក់ ត្រឹមត្រូវ។ ផ្ទុយទៅវិញ លោកថា សកម្មភាពនេះធ្វើឡើងដើម្បីជួយប្រជាពលរដ្ឋ និងជួយសង្គមទៅវិញទេ។
ចំណែកអនុប្រធានអង្គភាពប្រឆាំងអំពើពុករលួយវិញ លោក ឆាយ សាវុធ មានប្រសាសន៍ថា ស្ថាប័នលោកមិនអាចស៊ើបអង្កេតបានទេ បើការស្នើសុំណាមួយពុំមានមូលដ្ឋានច្បាស់លាស់ក្នុងការចោទប្រកាន់ជុំវិញអំពើពុករលួយនេះ៖ «កាលណាបើកការស៊ើបអង្កេតករណីមួយ ទាល់តែមានភស្តុតាងគ្រប់គ្រាន់ កាលណាគ្មានភស្តុតាង យើងមិនដឹងស៊ើបអង្កេតទៅលើអីទេ»។
អង្គភាពប្រឆាំងអំពើពុករលួយបង្ហាញថា ខ្លួនកំពុងប្រឹងប្រែងធ្វើការជាមួយអង្គការសហប្រជាជាតិ ក្រុមប្រទេសមហាអំណាចធំៗ ប្រទេសសមាជិកអាស៊ាន និងក្រុមអ្នកច្បាប់ជាច្រើនទៀត ដើម្បីប្រយុទ្ធប្រឆាំងអំពើពុករលួយបរទេស ដែលនឹងកើតមានតាមការអភិវឌ្ឍសេដ្ឋកិច្ចឆ្លងដែន និងប្រឆាំងអំពើពុករលួយក្នុងប្រទេស ដោយទាមទារឱ្យពិនិត្យមើលទៅលើចំណងដៃ ឬក៏រង្វាន់ នៅពេលដែលមន្ត្រីរាជការធ្វើបុណ្យរៀបការកូន ឬក៏ធ្វើពិធីខួបកំណើតផ្សេងៗ។ ស្ថាប័នដដែលចាត់ទុកគម្រោងនេះ ជាវិធានការបន្ថែមទៀត ដើម្បីប្រឆាំងអំពើពុករលួយ ស្របពេលដែលច្បាប់ប្រឆាំងអំពើពុករលួយ មិនទាន់មានចែងអំពីចំណុចទាំងនេះនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។