តុលាការខេត្តព្រះសីហនុសម្រេចឃុំខ្លួនជនជាតិចិនចំនួនពីរនាក់ពីបទជួញដូរថ្នាំញៀនខុសច្បាប់ បន្ទាប់ពីសមត្ថកិច្ចចាប់ខ្លួនកាលពីថ្ងៃទី២៥ តុលា ក្រោយពីពួកគេបានព្យាយាមនាំយកគ្រឿងញៀនចែកចាយនៅក្នុងខេត្តជាប់មាត់សមុទ្រមួយនេះ។
អគ្គស្នងការរងនគរបាលជាតិ ទទួលបន្ទុកគ្រឿងញៀនលោក ម៉ក់ ជីតូ ប្រាប់អាស៊ីសេរីកាលពីថ្ងៃទី២៧ តុលាថា តាមការស្រាវជ្រាវរបស់សមត្ថកិច្ចបានចាប់ខ្លួនជនជាតិចិនទាំងពីរនាក់នេះក្រោយពីពួកគេបានព្យាយាមនាំយកគ្រឿងញៀនប្រភេទមេតំហ្វេតាមីនចំនួនជិត១គីឡូក្រាមដើម្បីចរាចរណ៍ចែកចាយនៅក្នុងខេត្តព្រះសីហនុ។
លោកបញ្ជាក់ថា ជនសង្ស័យទាំងពីរត្រូវអនុរក្សពន្ធនាគារបញ្ជូនទៅឃុំខ្លួនជាបណ្តោះអាសន្ននៅពន្ធនាគារខេត្តព្រះសីហនុ ដើម្បីរងចាំជំនុំជំរះទោសពាក់ព័ន្ធនឹងការរត់ពន្ធថ្នាំញៀនខុសច្បាប់៖«ការងារជំនាញយើងស្រាវជ្រាវស៊ើបអង្កេតទៅដឹងថា ពួកគេជាឈ្មួញជួញដូរគ្រឿងញៀន។អញ្ចឹងភ្លាមៗយើងចាប់ខ្លួនតាមច្បាប់»។
ទាក់ទិនបញ្ហាគ្រឿងញៀននេះដែរ នាយកដ្ឋានប្រឆាំងគ្រឿងញៀន កាលពីថ្ងៃទី១៥ តុលា សមត្ថកិច្ចខេត្តព្រះសីហនុ និងខេត្តព្រះវិហារ បានចាប់ខ្លួនជនជាតិចិនតៃវ៉ាន់ ចំនួន ៤នាក់នៅក្នុងទីតាំងផ្សេងៗ គ្នា ក្រោយពីបាននាំយកគ្រឿងញៀន ជាង២តោន ពីប្រទេសឡាវ ឆ្លងចូលមកប្រទេសកម្ពុជា តាមព្រំដែនខេត្តព្រះវិហារ។
បុរសជនជាតិចិនទាំង ៤នាក់នោះមានបំណងនាំយកគ្រឿងញៀនទាំងនោះមកលក់ដូរនៅក្នុងទៅក្រុងភ្នំពេញ និងខេត្តព្រះសីហនុ។
ក្នុងចំណោមគ្រឿងញៀនទាំងជាង២តោននេះ មានប្រភេទ ហេរ៉ូអ៊ីន (Heroin) ប្រភេទមេតំហ្វេតាមីនទឹកកក (ICE) ប្រភេទអ៊ិចស្តាស៊ី និងញៀនកេតាមីន (Ketamine) ក្រៅពីនោះសារធាតុផ្សំ អេតាណុល ចំនួន ៣៧ប៊ីដុង មានទម្ងន់ ៧០៣គីឡូក្រាម។
តាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា នៅក្នុងឆមាសទី១ ឆ្នាំ២០២០ នេះ សមត្ថកិច្ចកម្ពុជាបង្ក្រាបបទល្មើសគ្រឿងញៀនបានចំនួនជាង៥ពាន់ករណី (៥.៤៦៣ករណី) គឺបានកើនឡើងចំនួនជាង ១ពាន់ករណី (១.២៨៨ករណី) ស្មើនឹងជាង ៣០ភាគរយ (៣០.៨ភាគរយ) បើប្រៀបធៀបនឹងរយៈពេលដូចគ្នាក្នុងឆ្នាំ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។