អាជ្ញាធរសុវត្ថិភាពចរាចរណ៍ផ្លូវគោកអំពាវនាវឲ្យអ្នកបើកបរ បង្កើនការអនុវត្តច្បាប់ចរាចរណ៍ និងយកចិត្តទុកដាក់ខ្ពស់នៅពេលបើកបរ ដើម្បីការពារអាយុជីវិត។
គេហទំព័រក្រសួងសាធារណការ និងដឹកជញ្ជូន កាលពីថ្ងៃទី១៧ ខែមិថុនា បានដកស្រង់សំដីរបស់ អគ្គនាយករងនៃប្រធានក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត លោក ហេង សុផាន់ណារិទ្ធ ដែលបានអះអាងថា គ្រោះថ្នាក់ចរាចរណ៍ គឺជាឃាតកលាក់មុខ ដែលបន្សល់ទុកនូវសោកនាដកម្ម និងបណ្តាលឲ្យប៉ះពាល់ធ្ងន់ធ្ងរដល់សេដ្ឋកិច្ចគ្រួសារ និងសង្គមជាតិទាំងមូល។ លោកបន្តថា ទន្ទឹមដែលវិបត្តិជំងឺកូវីដ១៩ បានធូរស្រាល និងបានបើកដំណើរការឡើងវិញលើគ្រប់វិស័យ ប៉ុន្តែគ្រោះថ្នាក់ចរាចរណ៍ នៅបន្តកើតមានឡើងជាញឹកញាប់។ រដ្ឋាភិបាលនិងស្ថាប័នពាក់ព័ន្ធ បារម្ភជាខ្លាំងពីផលប៉ះពាល់ធ្ងន់ធ្ងរដោយសារគ្រោះថ្នាក់ចរាចរណ៍ ជាពិសេសចំពោះកម្មករនិយោជិតដែលធ្វើដំណើរតាមរថយន្តទ្រុងដឹកកម្មករ។
លោក ហេង សុផាន់ណារិទ្ធ ណែនាំដល់អ្នកធ្វើដំណើរទាំងអស់ថា ដើម្បីកាត់បន្ថយគ្រោះថ្នាក់ចរាចរណ៍ កម្មករដែលប្រើប្រាស់ម៉ូតូ រ៉ឺម៉កម៉ូតូ កង់ ថ្មើរជើង ត្រូវប្រើប្រាស់មួកសុវត្ថិភាព និងគោរពច្បាប់ចរាចរណ៍ផ្លូវគោកឲ្យបានខ្ជាប់ខ្ជួន។ លោកក៏បានជំរុញដល់អ្នកបើកបររថយន្តដឹកទំនិញ ឬរថយន្តទ្រុង ដឹកជញ្ជូនកម្មករនិយោជិត ត្រូវងាកមកប្រើប្រាស់រថយន្តដឹកអ្នកដំណើរវិញ ត្រូវបញ្ឈប់ការដាក់មនុស្សច្រើនពេក ឲ្យឈរកកកុញ ពិនិត្យពីលក្ខខណ្ឌបច្ចេកទេសរថយន្ត និងទទួលការហ្វឹកហ្វឺនត្រឹមត្រូវពីការបើកបរ ព្រមទាំងគោរពច្បាប់ចរាចរណ៍។
បន្ថែមពីនេះក្រសួង ស្ថាប័ន និងអង្គភាពពាក់ព័ន្ធទាំងអស់ ដែលមានភារកិច្ចលើការងារចរាចរណ៍ ត្រូវរួមសហការគ្នាដើម្បីផ្សព្វផ្សាយ បង្កើនការយល់ដឹងលើសុវត្ថិភាពការធ្វើដំណើរ ដើម្បីទប់ស្កាត់និងកាត់បន្ថយករណីគ្រោះថ្នាក់ចរាចរណ៍ផ្លូវគោកឲ្យមកនៅកម្រិតទាបបំផុត។
ស្ថិតិក្រុមការងារសុវត្ថិភាពចរាចរណ៍ផ្លូវគោក បង្ហាញថា ក្នុងអំឡុងពេល៦ខែ ដើមឆ្នាំ២០២២ គ្រោះថ្នាក់ចរាចរណ៍កើតឡើងជិត ១ពាន់ ៧រយករណី (១.៦៧២) លើកម្មករនិយោជិត ចំនួន ជិត២ពាន់នាក់ (១.៩១៩) ក្នុងនោះ ៤៧នាក់បានស្លាប់ រងរបួសធ្ងន់ ជិត ៦រយនាក់ (៥៦៧) និងរបួសស្រាល ជាង ១ពាន់៣រយនាក់ (១.៣០៥)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។