សន្តិសុខម្នាក់ស្លាប់ក្នុងពេលតវ៉ាទាមទារបើកប្រាក់ឈ្នួល
2018.01.03
និមិត្តសញ្ញាអាស៊ីសេរី។
Photo: RFA
សន្តិសុខរបស់ក្រុមហ៊ុន SSC ម្នាក់ខ្យល់គរស្លាប់ភ្លាមៗ ក្នុងចំណោមជាង ២០នាក់ផ្សេងទៀត កំពុងតវ៉ានៅក្នុងក្រុមហ៊ុន ដែលមានទីតាំងនៅម្ដុំវិទ្យាល័យឥន្ទ្រទេវី ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ដើម្បីទាមទារសុំបើកប្រាក់ឈ្នួល នៅព្រឹកថ្ងៃទី៣ ខែមករា។
សន្តិសុខដែលដាច់ខ្យល់ស្លាប់នោះ ត្រូវបានគេអះអាងថា ឈ្មោះ ចំរើន បានខ្យល់គរស្លាប់ ខណៈដែលរូបគាត់កំពុងតវ៉ាទាមទារឲ្យថៅកែបើកប្រាក់ឈ្នួលប្រចាំខែធ្នូ ឲ្យគាត់។
សន្តិសុខម្នាក់ ឈ្មោះ យ៉េប ឧសភា ដែលបានចូលរួមការតវ៉ាជាមួយគ្នាអះអាងថា សពរបស់សន្តិសុខឈ្មោះ ចំរើន ត្រូវបានតម្កល់នៅសាលក្នុងមន្ទីរពេទ្យកាល់ម៉ែត ក្រុងភ្នំពេញ។ លោកប្រាប់ថា សន្តិសុខរូបនេះខ្យល់គរស្លាប់ អាចមកពីក្ដាតការហូបចុកតិចតួច ព្រោះពួកគាត់ទទួលបានប្រាក់ឈ្នួលប្រចាំខែត្រឹមតែ ១៤០ដុល្លារក្នុងមួយខែ ហើយថៅកែបើកប្រាក់ខែឲ្យយឺតយ៉ាវទៀត នៅរយៈពេលប៉ុន្មានខែចុងក្រោយនេះ៖ «គាត់អត់សូវហូបគ្រប់គ្រាន់។ ប្រាប់ខែបើកមិនទៀងទាត់ អ៊ីចឹងទៅគាត់មកតវ៉ា ដល់គាត់អត់អីហូប ខ្យល់គរតែម្ដង។ សពតម្កល់នៅមន្ទីរពេទ្យកាល់ម៉ែត»។
ប្រធានផ្នែកប្រតិបត្តិការនៃក្រុមហ៊ុនសន្តិសុខ SSC ឈ្មោះ សុគន្ធ ពន្យល់ថា ប្រាក់ឈ្នួលនៅខែធ្នូ ថៅកែមិនទាន់បើកជូន ដោយសារតែចុងខែធ្នូ ត្រូវនឹងថ្ងៃសៅរ៍ អាទិត្យ ដែលរដ្ឋបាល និងគណនេយ្យក្រុមហ៊ុនឈប់សម្រាក។ ចំណែកសន្តិសុខម្នាក់ដែលខ្យល់គរស្លាប់នៅក្នុងក្រុមហ៊ុនពេលកំពុងតវ៉ានោះ តំណាងក្រុមហ៊ុនពន្យល់ថា គាត់បានដួលផ្ងារក្រោយ ហើយស្លាប់នៅពេលដឹកបញ្ជូនទៅមន្ទីរពេទ្យកាល់ម៉ែត មិនមែនស្លាប់នៅក្នុងក្រុមហ៊ុនទេ។ លោកបន្តថា បេឡាជាតិរបបសន្តិសុខសង្គម ជាអ្នកទទួលខុសត្រូវលើសំណង ព្រោះខាងក្រុមហ៊ុនបានទិញសេវាធានារ៉ាប់រងរបស់ ប.ស.ស ហើយ។ ចំពោះក្រុមហ៊ុនសន្តិសុខ SCC នឹងមិនទទួលខុសត្រូវចំពោះការស្លាប់របស់សន្តិសុខឈ្មោះ ចំរើន នេះទេ៖ «គាត់ដួលផ្ងារទៅក្រោយ គាត់មិនមែនស្លាប់នៅទីនេះ (ក្រុមហ៊ុន) ទេ។ ដួលភ្លាមយើងបញ្ជូនគាត់ទៅមន្ទីរពេទ្យកាល់ម៉ែត ដល់ពេទ្យគេធ្វើកោសលវិច័យទៅ គាត់ស្លាប់ ជួយអត់បាន។ ក្រុមហ៊ុនយើងមានធានារ៉ាប់រងរបស់បេឡាជាតិ (ប.ស.ស) អ៊ីចឹងរាល់គ្រោះថ្នាក់ គឺខាងបេឡាជាតិអ្នកទទួលខុសត្រូវ...»។
ក្រោយពីមានការបកស្រាយពីតំណាងរបស់ក្រុមហ៊ុន និងមានការសន្យាថា ប្រាក់ឈ្នួលប្រចាំខែធ្នូ នឹងត្រូវបើកឲ្យនៅថ្ងៃទី៥ មករា ក្រុមសន្តិសុខបានរំសាយគ្នាត្រឡប់ទៅវិញ។ ក៏ប៉ុន្តែពួកគាត់ស្នើឲ្យក្រុមហ៊ុនសន្តិសុខ SSC ត្រូវបើកប្រាក់ឈ្នួលឲ្យពួកគាត់យ៉ាងយូរបំផុតត្រឹមថ្ងៃទី៣០ ឬ ៣១ រាល់ខែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ
