កម្មករ​​ត្អូញត្អែរ​ពី​ទុក្ខ​លំបាក​ក្រោយ​ពួកគាត់​បើក​ប្រាក់​ឈ្នួល​បន្តិច​បន្តួច​មិន​អាច​ដោះស្រាយ​ជីវភាព

ដោយ មួង ណារ៉េត
2021-05-17
Share
កម្មករ​​ត្អូញត្អែរ​ពី​ទុក្ខ​លំបាក​ក្រោយ​ពួកគាត់​បើក​ប្រាក់​ឈ្នួល​បន្តិច​បន្តួច​មិន​អាច​ដោះស្រាយ​ជីវភាព កម្មកររោងចក្រកាត់ដេរ ចេញពីធ្វើការនៅរោងចក្រមួយក្បែរក្រុងភ្នំពេញ ថ្ងៃទី ១១ ខែ កុម្ភៈ ឆ្នាំ ២០២០។
AP Photo

កម្មករ​រោងចក្រ​នៅ​រាជធានី​ភ្នំពេញ ត្អូញត្អែរ​អំពី​ទុក្ខ​លំបាក ក្រោយ​ពួកគាត់​បើក​បាន​ប្រាក់​ឈ្នួល​បន្តិចបន្តួច ដែល​មិន​អាច​ជួយ​ឱ្យ​ពួកគាត់​សងបំណុល បង់ថ្លៃ​បន្ទប់​ជួល ទឹក​ភ្លើង និង​ដោះស្រាយ​ជីវភាព​មិន​រួច​ផង។ មន្ត្រី​សង្គម​ស៊ីវិល យល់​ថា រដ្ឋាភិបាល និង​ថៅកែ​រោងចក្រ គួរ​យកចិត្ត​ទុក​បន្ថែម ជុំវិញ​ទុក្ខ​លំបាក​របស់​កម្មករ​និយោជិត ដើម្បី​ធានា​ថា ពួកគាត់​អាច​រស់នៅ​ក្នុង​ជីវភាព​សមរម្យ។-កម្មករ​រោងចក្រ ទាមទារ​ឱ្យ​រដ្ឋាភិបាល និង​ចៅ​កែ​រោងចក្រ​ជួយ​ដោះស្រាយ​ជីវភាព​របស់​គាត់​ដែល​កំពុង​ជួប​ទុក្ខ​លំបាក ខណៈ​ពួកគាត់​មួយចំនួន បើក​បាន​ប្រាក់ខែ​៥០​ភាគរយ និង​ខ្លះទៀត​បើក​បាន​ក្រោម​៥០​ភាគរយ។

កម្មការិនី​នៅ​រោងចក្រ ហុង វ៉ា (Hung Wah) លោកស្រី អ៊ុក ចន្ធី ប្រាក់​អាស៊ីសេរី​ថា កន្លែង​រស់នៅ និង​កន្លែង​ធ្វើការ​របស់​លោក​ស្រី ត្រូវ​បាន​អាជ្ញាធរ​សង្កាត់​ចោមចៅ​១ បាន​បិទ​ខ្ទប់ និង​ដាក់​ជា​តំបន់​ក្រហម​ជាង​មួយ​ខែ​មក​ហើយ។ លោកស្រី​ប្រាប់​ថា រោងចក្រ បាន​បើកប្រាក់​ឈ្នួល​ចំនួន​មួយរយ​ដុល្លា (១០០$) ប៉ុន្តែ​ប្រាក់​ឈ្នួល​៥០​ភាគរយ​នេះ​មិន​អាច​ឱ្យ​អ្នកស្រី​ដោះស្រាយ​ជីវភាព ដូចជា​សងបំណុល​ឯកជន បង់ថ្លៃ​បន្ទប់​ជួល និង​បង់ថ្លៃ​ទឹក​ភ្លើង បានទេ ព្រោះ​គ្រួសារ​លោកស្រី​មិន​មាន​ប្រភព​ចំណូល​ផ្សេងទៀត ក្នុងអំឡុងពេល​ផ្អាក​ការងារ​កន្លងមក ។ លោកស្រី​ស្នើ​ឱ្យ​រដ្ឋាភិបាល​ជួយ​សម្របសម្រួល​ជាមួយ​ថៅកែ​រោងចក្រ​ជួយ​បន្ថែម​ប្រាក់​ឈ្នួល​ជូន​កម្មករ ព្រោះ​ពួកគាត់ បាន​ជួយ​ចៅ​កែ​រោងចក្រ​ឱ្យ​ចំណេញ​ប្រាក់​យូរ​ឆ្នាំ​មក​ហើយ៖ «ខ្ញុំ​នៅក្នុង​តំបន់​រាំង​ខ្ទប់​ហ្នឹង​យូរ​មក​ហើយ ភាគី​ក្រុមហ៊ុន​ក៏​មិនបាន​បើកប្រាក់​ខែ​ឱ្យ​ពេញ​មួយរយ​ភាគរយ​ទេ ដល់​​អ៊ីចឹង​មានតែ​ក្រសួង​ការងារ​ត្រូវតែ​ជួយ​ពួក​ខ្ញុំ​ផង បើ​មិន​អីចឹង​ទេ​ដាច់ខ្យល់​ដាច់ពោះ​ស្លាប់​អស់ហើយ​យ៉ាងនេះ ការ​ពិត​ទៅ​ថៅកែ​គួរ​ឱ្យ​កម្មករ​មួយរយ​ភាគរយ ព្រោះ​អីយើ​ង​ធ្វើការ​មករ​ហូត​រោងចក្រ​នីមួយៗ​ចំណេញ​ពី​កម្មករ​ច្រើន​មក​ហើយ រាំង​ខ្ទប់​អ៊ីចឹង​គួរ​ឱ្យ​ប្រាក់ខែ​កម្មករ​ពេញ»

ស្រដៀង​គ្នា​នេះ​ដែរ កម្មការិនី​រោងចក្រ ឌីន ហាន (DIN HAN) ម្នាក់ទៀត លោកស្រី ព្រហ្ម សុភី ឱ្យ​ដឹង​ថា រោងចក្រ​លោកស្រី បាន​បើក​ប្រាក់​ឈ្នួល​មិន​គ្រាប់​ចំនួន​៥០​ភាគ តាម​ការណែនាំ​របស់​ក្រសួង​ការងារ​ទេ ដោយ​រោងចក្រ​យក​ហេតុផល​ថា មិន​មាន​លុយ​រាយ។ លោកស្រី​ព្រួយ​បារម្ភ​ថា រោងចក្រ​មិន​បើកប្រាក់​ឈ្នួល​ដែល​នៅសល់​ជូន​កម្មករ ដែល​នឹង​ធ្វើ​ពួកគាត់​ខាតបង់​ផលប្រយោជន៍ ខណៈ​ប្រាក់​ឈ្នួល​ដែល​ទទួល​បាន​បន្តិចបន្តួច​មិនអាច​ដោះស្រាយ​បន្ទុកគ្រួសារ​អំឡុង​ពេល​វិបត្តិ​កូវីដ​១៩។កម្មការិនី​រូប​នេះ ប្រាប់ទៀត​ថា រោងចក្រ​លោកស្រី បើក​ដំណើរការ​បាន​មួយថ្ងៃ​ហើយ ប៉ុន្តែ​កម្មករ​បំពេញ​ការងារ​ទាំង​ភ័យខ្លាច និង​មិន​ទំនុកចិត្ត​ចំពោះ វិធានការ​ការពារ​របស់​រោងចក្រ​ឡើយ ព្រោះ​កង្វះ​អនាម័យ​នៅក្នុង​រោងចក្រ​។ លោកស្រី ឆ្ងល់​ថា​ហេតុអ្វី​ក្រសួង​ការងារ​អនុញ្ញាត​ឱ្យ​រោងចក្រ​ដំណើរការ ខណៈ​រោងចក្រ​មិន​ទាន់​រៀបរយ​ត្រឹមត្រូវ​។ លោកស្រី​ក៏​ស្នើ​ឱ្យ​ក្រសួង​ក្រសួង​ការងារ​ចុះ​ត្រួត​ពិនិត្យ​មើល​ឡើងវិញ​ពី​វិធានការ​សុខាភិបាល ដើម្បី​បង្កើន​ទំនុកចិត្ត​ដល់​កម្មករ៖ «ចង់​ធ្វើ​ម៉េច​ថៅកែ​រោងចក្រ គាត់​ជួយ​មើល​ពី​បញ្ហា​ដែល​កូនចៅ​ធ្វើការ​ហ្នឹង​វា​ងាយ​ឆ្លង​រោគ​ដោយសារ​ការ​អត់​មាន​អនាម័យ គួរតែ​ចុះ​ត្រួតពិនិត្យ ការ​បង្ហាត់​បង្រៀន​ឱ្យ​កម្មករ​យល់​ពី​បញ្ហា​ហ្នឹង កម្មករ​ខ្លះ​គាត់​អត់​ចង់​ចូល​ធ្វើ​ការ​ទេ»

ចំណែក​កម្មការិនី​រោងចក្រ​កំពុង​នៅ​តំបន់​លឿងទុំ លោកស្រី ជា ស៊ីណែ​ត ឱ្យ​ដឹង​ថា ការ​បិទ​ខ្ទប់​និង​ផ្អាក​ដំណើរ​ការ​ធ្វើ​រោងចក្រ​ជាង​មួយ​ខែ​នេះ បាន​ធ្វើ​ឱ្យ​លោកស្រី​ជួប​ការ​លំបាក​ក្នុង​ជីវភាព​គ្រួសារ ស្រប​ពេល​ថ្លៃ​បន្ទប់​ជួល និង​ថ្លៃ​ទឹក​ភ្លើង មិន​ព្រម​បញ្ចុះ​នោះ​ទេ​។ លោកស្រី​បន្ត​ថា រហូត​ពេល​នេះ រោងចក្រ ឌីន ហាន មិន​ទាន់​បើកប្រាក់​ឈ្នួល​៥០​ភាគរយ​សម្រាប់​ខែមេសា​នៅ​ឡើយ​ទេ៖ «ទុក្ខ​លំបាក​ហ្នឹង​រក​ថ្លែង​មិន​រួច ថ្លែង​មិន​ចេញ​ម៉ង ព្រោះ​វា​ពិបាក​សព្វ​បែប​យ៉ាង គឺ​ថា​ប្រាក់ខែ​បាត់​សឹង​ពាក់​កណ្តាល ដល់ពេល​អ៊ីចឹង​កូន​រៀន​ផង ត្រូវការ​សម្ភារៈ​កូន​រៀន ជាពិសេស​ការ​ហូប​ចុក​ប្រចាំថ្ងៃ គឺ​យើង​ខ្វះខាត ផ្ទះ​ជួល​គឺ​ពេញ ទឹក​ភ្លើង​គឺ​ពេញ​តម្លៃ ដល់ពេល​អ៊ីចឹង​យើង​រត់​អត់​រួច​ប្រាក់ខែ​ក៏​អត់​ទាន់​ទទួល​បាន​ដែរ ថ្លៃ​ផ្ទះ​ហ្នឹង​បើ​គេ​មក​យក​ព្យាយាម​អង្វរ​គេ»

អាស៊ីសេរី​មិន​អាច​ទាក់ទង​អ្នកនាំពាក្យ​ក្រសួង​ការងារ បណ្តុះបណ្តាល​វិជ្ជាជីវៈ លោក ហេង សួរ និង​ប្រធាន​សមាគម​រោងចក្រ​កាត់ដេរ​នៅ​កម្ពុជា (GMAC) លោក ខេន លូ ដើម្បី​សុំ​ការ​ឆ្លើយ​បញ្ជាក់ បាន​ទេ នៅ​ថ្ងៃទី​១៦ ឧសភា។

ក្រុម​កម្មករ អះអាង​ថា ពួកគាត់ នៅតែ​ត្រូវ​បាន​ម្ចាស់​ផ្ទះ​ជួល ឬ​បន្ទប់​ជួល​ភាគច្រើន បន្ត​ទាមទារ​ប្រាក់​ឥត​ស្រាកស្រាន្ត ហើយ​ថ្លៃ​ទឹក​ភ្លើង ក៏​ពួកគាត់​បន្ត​បង់​ដដែល ទោះបីជា​មានការ​អំពាវនាវ​ពី​ប្រមុខ​រដ្ឋាភិបាល​ក៏ដោយ។

ជុំវិញ​រឿង​នេះ មន្ត្រី​គ្រប់គ្រង​កម្មវិធី​ការងារ​នៃ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស ហៅ​កាត់​ថា សង់ត្រាល់ (CENTRAL) លោក ឃុន ថារ៉ូ មាន​ប្រសាសន៍​ថា ប្រាក់​ឈ្នួល​កម្មករនិយោជិក​មិន​ទាន់​ធានា​នូវ​ការ​រស់នៅ​សមរម្យ ដែល​ធ្វើ​ឱ្យ​ពួកគាត់​ងាយ​ទទួលរង​ផល​ប៉ះពាល់ អំឡុង​ពេល​បិទ​ខ្ទប់​ដោយសារ​និយោជក​មួយចំនួន​មិន​បាន​ផ្តល់​ប្រាក់​ឈ្នួល​ត្រឹមត្រូវ​។ លោក​មើល​ឃើញ​ថា​កម្មករ​និយោជិក​មិន​អាច​មាន​លទ្ធភាព​ចំណាយ​ជា​មូលដ្ឋាន ដូចជា​ថ្លៃ​ទឹក​ភ្លើង បន្ទប់​ជួល បំណុល និង​ជីវភាព​រស់នៅ​ប្រចាំថ្ងៃ ខណៈ​ដែល​ពួកគាត់​មិន​មាន​ប្រាក់​សេសសល់​សម្រាប់​ចាយវាយ ដូច្នេះ​ប្រសិន​បើ​ពួកគាត់​បាត់បង់​ប្រាក់​ឈ្នួល នឹង​ប៉ះពាល់​ដល់​ជីវភាព​របស់​ពួកគាត់​ធ្ងន់ធ្ងរ​ជាក់​ជា​ពុំ​ខាន៖ «ក្រុមហ៊ុន​អ្នក​បញ្ហា​ទិញ​ហ្នឹង​សំខាន់​ណាស់ ដែល​គាត់​ធ្វើការ​តាមដាន ត្រួតពិនិត្យ​ក្នុង​ដំណើរការ​នៃ​ការ​ដំណើរ​ឡើងវិញ​នៃ​រោច​ក្រ​ហ្នឹង ឬក៏​បើក​រោងចក្រ​ឡើងវិញ​ហ្នឹង យើង​ស្វាគមន៍​នូវ​ការកាត់បន្ថយ​គម្លាត​សង្គម ដោយ​ធ្វើការ​ប្តូរ​វេន ប៉ុន្តែ​យើង​មិន​គាំទ្រ​ទៅ​នឹង​ការ​កាត់​ប្រាក់​ឈ្នួល​កម្មករនិយោជិត​ទេ ហើយ​យើង​ក៏​មិន​គាំទ្រ​ទៅ​នឹង​ការ​មិន​ធានា កា​រលើ​កម្ពស់​សុខភាព នៅ​កន្លែង​ការងារ​ដែរ»

លោក ឃុន ថារ៉ូ ពិនិត្យ​ឃើញ​ថា កម្មករ​បាន​បាត់បង់​អត្ថប្រយោជន៍​ស្រប​ច្បាប់ ដោយ​និយោជក​បាន​យក​លេស​ពី​ការ​រីក​រាលដាល​ជំងឺ​កូវីដ​១៩ ដើម្បី​គេចវេះ​ពី​ការទទួលខុសត្រូវ​។ ជាមួយ​គ្នា​នេះ​ដែរ លោក​អះអាង​ថា សហជីព​ឯករាជ្យ​ដែល​ការពារ​ផលប្រយោជន៍​របស់​កម្មករ ក៏​ទទួល​រង​ការ​ធ្វើ​ទុក្ខបុកម្នេញ​ពី​និយោជក​នៅ​តាម​រោងចក្រ​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល