អ្នក​បើក​រថយន្ត​ក្រុមហ៊ុន​ដឹក​ជញ្ជូន​ភ្នំពេញ-​សុរិយា​ធ្វើ​កូដកម្ម​មិន​ចូល​ធ្វើ​ការ

0:00 / 0:00

បុគ្គលិក​បើកបរ​រថយន្ត​និង​ព្រូ​ឡាន​រាប់​រយ​នាក់​របស់​ក្រុមហ៊ុន​ភ្នំពេញ-​សុរិយា ដឹក​ជញ្ជូន​អ្នក​ដំណើរ បាន​​​​ប្រមូល​ផ្តុំ​គ្នា​ធ្វើ​កូដកម្ម​មិន​ចូល​ធ្វើ​ការ ឬ​មិន​បើក​ឡាន​ដឹក​អ្នក​ដំណើរ​ចេញ​តាម​​គោលដៅ​តាម​ខេត្ត-​ក្រុង​នានា​​ទេ នៅ​ព្រឹក​ថ្ងៃ​ទី​៣ ខែ​មេសា ដើម្បី​ទាមទារ​ឲ្យ​ថៅកែ​ក្រុមហ៊ុន​អនុវត្ត​លក្ខខណ្ឌ ៧​ចំណុច។

បញ្ហា​នេះ ថៅកែ​ក្រុមហ៊ុន​បាន​អះអាង​ថា បាន​រក​ដំណោះស្រាយ​រួច​ហើយ ហើយ​បុគ្គលិក​របស់​ខ្លួន​ក៏​បាន​ព្រម​ចូល​ធ្វើ​ការងារ​ជា​ធម្មតា​វិញ​នៅ​រសៀល​ថ្ងៃ​ដដែល។

តំណាង​បុគ្គលិក​បើកបរ​រថយន្ត​ក្រុមហ៊ុន​ភ្នំពេញ-​សុរិយា លោក សម្បត្តិ វន ​បាន​ឲ្យ​ដឹង​នៅ​ព្រឹក​ថ្ងៃ​ ទី​៣ ខែ​មេសា ​​​ថា អ្នក​បើកបរ​រថយន្ត ឬ​ហៅ​ថា តៃកុង​ឡាន របស់​ក្រុមហ៊ុន​ភ្នំពេញ-​សុរិយា សរុប​ជាង ១២០​នាក់ បាន​ធ្វើ​កូដកម្ម​មិន​ចូល​ធ្វើ​ការ។

លោក​បន្ត​ថា គោលបំណង​ធ្វើ​កូដកម្ម​នេះ គឺ​ដើម្បី​​ទាមទារ​ឲ្យ​ថៅកែ​ក្រុមហ៊ុន​ដោះស្រាយ​លក្ខ​ខណ្ឌ​ការងារ​ចំនួន ៧​ចំណុច។ ក្នុង​នោះ​មាន​ដូចជា ដំឡើង​ប្រាក់​បៀវត្ស​បន្ថែម ៦០​ដុល្លារ ដំឡើង​ប្រាក់​ថ្លៃ​ជើង​​បើកបរ និង​​​ស្នើ​បញ្ឈប់​​​កាត់​ប្រាក់​ខែ​ពេល​បុគ្គលិក​សុំ​ច្បាប់​ជាដើម។

លោក​បន្ត​ថា ក្រោយ​ពេល​បុគ្គលិក​ធ្វើ​កូដកម្ម​មិន​ចូល​ធ្វើ​ការ ខាង​ភាគី​ថៅកែ​ក្រុមហ៊ុន​បាន​ចេញ​ជួប​បុគ្គលិក​ដើម្បី​រក​ដំណោះស្រាយ។ ប៉ុន្តែ​ក្នុង​ចំណោម​លក្ខខណ្ឌ​ទាំង ៧​ចំណុច ថៅកែ​ក្រុមហ៊ុន​មិន​ទាន់​ព្រម​លើ​លក្ខខណ្ឌ ២​ចំណុច គឺ​ការ​ទាមទារ​ដំឡើង​ប្រាក់ខែ និង​មិន​ដំឡើង​ប្រាក់​ថ្លៃ​ជើង​បើក​បរ​ទេ។

​លោក សម្បត្តិ វន បាន​ឲ្យ​ដឹង​ថា បុគ្គលិក​បើក​បរ​រថយន្ត​បាន​យល់​ព្រម​ចូល​ធ្វើ​ការ​ជា​ធម្មតា​​​វិញ​ហើយ នៅ​រសៀល​ថ្ងៃ​ទី​៣ ខែ​មេសា ហើយ​ចំណុច​សេសសល់​នឹង​រក​ដំណោះស្រាយ​នៅ​ពេល​ក្រោយ​​ទៀត៖ «ចំណុច​ទី​១ ឧទាហរណ៍​យើង​ចូល​ធ្វើ​ការ​អត់​ទាន់​ម៉ោង ៦​ព្រឹក គេ​លែង​កាត់​លុយ​ហើយៗ ជើង​ឡាន​គេ​សរសេរ​ពី​ល្ងាច​ទុក​ជា​មុន ហើយ​បើ​ឡាន​យើង​ខូច យើង​អាច​ចូល​ធ្វើ​ការ​នៅ​ម៉ោង ៨​ព្រឹក​បាន ហើយ​គេ​លែង​កាត់​លុយ​ទៀត​ហើយ។ សំណូមពរ​រថយន្ត​ចេញ​ពី​ភ្នំពេញ ទៅ​បណ្ដា​ខេត្ត​ក្រុង​នានា ឡាន​ត្រូវ​ចេញ​នូវ​ម៉ោង ៦​កន្លះ នៅ​ម៉ោង ៧​កន្លះ និង​ម៉ោង ៨ និង​ម៉ោង ៩​ព្រឹក»

លោក​បន្ត​ថា បើ​សិន​ជា​ទៅ​ថ្ងៃ​អនាគត ថៅកែ​ក្រុមហ៊ុន​មិន​គោរព​តាម​លក្ខខណ្ឌ​ការងារ ឬ​កិច្ច​សន្យា​ដែល​បាន​ព្រមព្រៀង​ជាមួយ​បុគ្គលិក​បើកបរ​រថយន្ត​ទេ នឹង​អាច​មាន​កូដកម្ម​កើត​មាន​ទៀត។

ទាក់ទង​បញ្ហា​នេះ លោក​ ច័ន្ទ សុផាន់ណា​ នាយក​ក្រុមហ៊ុន​ភ្នំពេញ-សុរិយា ដឹក​ជញ្ជូន​អ្នក​ដំណើរ​មាន​ប្រសាសន៍​​ថា ​បុគ្គលិក​ខ្លួន​បាន​យល់​ព្រម​ចូល​ធ្វើ​ការ​ជា​ធម្មតា​វិញ​ហើយ នៅ​រសៀល​ថ្ងៃ​ព្រហស្បតិ៍ ទី​៣ ខែ​មេសា បន្ទាប់​ពី​មាន​ការ​ចរចា។

លោក​ចាត់​ទុក​ការ​​ធ្វើ​កូដកម្ម​របស់​បុគ្គលិក​បើក​បរ​រថយន្ត អាច​បណ្ដាល​មក​ពី​មាន​​​​អ្នក​ញុះញង់៖ «ជា​រៀងរាល់​ឆ្នាំ យើង​បាន​យក​ចិត្ត​ទុក​ដាក់​ជាមួយ​គាត់ ២​ដង​ហើយ គឺ​យក​ចិត្ត​ទុក​ដាក់​មែន​ទែន ហើយ​នៅ​មុន​គាត់​បាន​ធ្វើ​កូដកម្ម ឬ​ស្នើ​ហ្នឹង យើង​បាន​និយាយ​ជាមួយ​គាត់​ម្ដង​រួច​មក​ហើយ ហើយ​យើង​ក៏​បាន​ធ្វើ​ជា​តារាង​បញ្ជាក់​ប្រាប់​គាត់​ដែរ។ តើ​នរណា​ខ្លះ​អាច​ដំឡើង​ប្រាក់​បៀវត្ស​ដល់​កម្រិត​ប៉ុណ្ណាៗ ហើយ​ចំពោះ​ចំណុច​ប្រាក់​បៀវត្ស​របស់​ពួក​គាត់​ហ្នឹង​សមស្រប​ដែល​គាត់​អាច​ទទួល​យក​បាន​ហើយៗ។ គាត់​ថា ក៏​សមស្រប​អាច​ទទួល​យក​បាន​ដែរ ប៉ុន្តែ​អ្វី​ដែល​ជា​ចំណុច​រមាស់ រសើប​ហ្នឹង គឺ​គាត់​ទើស​នឹង​សេចក្ដី​ជូន​ដំណឹង​របស់​ក្រុមហ៊ុន​ដែល​បាន​ចេញ​ទៅ​​ទេ»

​​កាល​ពី​ថ្ងៃ​ទី​១១ ខែ​មីនា ​ឆ្នាំ​២០១៤ ការិយាល័យ​កណ្ដាល​របស់​ក្រុមហ៊ុន​ភ្នំពេញ-​សុរិយា ដឹក​ជញ្ជូន​អ្នក​ដំណើរ មាន​ទីតាំង​នៅ​ក្នុង​រាជធានី​ភ្នំពេញ បាន​ចេញ​សេចក្តី​ជូន​ដំណឹង ដោយ​បាន​ព្រមាន​ដល់​បុគ្គលិក​អ្នក​បើក​បរ​រថយន្ត និង​ព្រូ​ឡាន​នៅ​តាម​ខេត្ត​ក្រុង​ទាំង​អស់ ​គឺ​មិន​អនុញ្ញាត​​ឲ្យ​ទទួល​​អីវ៉ាន់ ដាក់​អីវ៉ាន់​របស់​អតិថិជន​​​ដោយ​គ្មាន​វិក្កយបត្រ​ ឬ​គ្មាន​ការ​អនុញ្ញាត​ពី​ក្រុមហ៊ុន​នោះ​ទេ។

បម្រាម​នេះ ថៅកែ​ក្រុមហ៊ុន​បាន​ព្រមាន​​​​នឹង​ចាត់​វិធានការ ឬ​ពិន័យ​ដល់​បុគ្គលិក​ម្នាក់ៗ​ចំនួន ៣​លាន​​រៀល កាត់​ប្រាក់​ខែ​ទាំង​អស់ និង​បណ្ដេញ​ចេញ​ពី​ការងារ បើ​មិន​អនុវត្ត​តាម​ការ​ណែនាំ​របស់​ក្រុមហ៊ុន។ សេចក្តី​ជូន​ដំណឹង​នេះ ក៏​ជា​មូលហេតុ​មួយ​ដែល​ជំរុញ​អោយ​បុគ្គលិក​បើកបរ​រថយន្ត និង​ព្រូ​ឡាន ផ្ទុះ​ការ​តវ៉ា​ធ្វើ​កូដកម្ម​មិន​ចូល​ធ្វើ​ការ​នៅ​ព្រឹក​ថ្ងៃ​ទី​៣ ខែ​មេសា ឆ្នាំ​២០១៤៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។