មនុស្សម្នាក់បានស្លាប់ និងបីនាក់រងរបួស ព្រមទាំងផ្ទះប្រជាពលរដ្ឋជិត ៤០០ខ្នង ខ្លះប៉ើងដំបូល ខ្លះដួលរលំរាបដល់ដី នៅតាមភូមិឃុំនានា ក្នុងស្រុកថ្មពួក និងស្រុកស្វាយចេក ខេត្តបន្ទាយមានជ័យ ដោយសារតែគ្រោះធម្មជាតិមេឃភ្លៀងមានខ្យល់ព្យុះ កាលពីយប់ថ្ងៃទី១៤ ខែមីនា ឆ្នាំ២០១៣។
អធិការនគរបាលស្រុកថ្មពួក លោក យ៉ត រាយ បានថ្លែងថា គ្រោះធម្មជាតិនេះខ្យល់ព្យុះមេឃភ្លៀង បានកើតឡើងកាលពីព្រលប់ថ្ងៃទី១៤ ខែមីនា។ លំនៅឋានជាង ៣០០ខ្នង និងទ្រព្យសម្បត្តិ មានម៉ូតូ គោយន្ត និងសម្ភារៈជាច្រើនរបស់អ្នកភូមិ នៅឃុំគំរូ ឃុំថ្មពួក និងឃុំភូមិថ្មី ក្នុងស្រុកថ្មពួក រងខូចខាត ហើយមានមនុស្សស្លាប់ដោយសាររន្ទះបាញ់ និងពីរនាក់រងរបួស ដោយសារផ្ទះបាក់សង្កត់លើ។
លោក យ៉ត រាយ៖ «ពេលកើតហេតុ កម្លាំងយើងតាំងពីល្ងាច មកទល់ពេលម៉ោងនេះ គឺយើងនៅជាប់ជាមួយប្រជាពលរដ្ឋទេ ជួយរៀបចំអ្នកណាដែលធ្ងន់ធ្ងរ ទីទាល់ក្រម្នាក់ឯង យើងឲ្យកម្លាំងរបស់យើងជួយរៀបចំផ្ទះដែលបាក់ខ្ទេចអស់។ យើងរៀបចំធ្វើជម្រកឲ្យគាត់បណ្ដើរៗ គ្រោះថ្នាក់ធម្មជាតិនេះធ្ងន់ធ្ងរដែរ កន្លងមកយើងអត់មាននៅក្នុងឆ្នាំ២០១៣ នេះ»។
គ្រោះធម្មជាតិដូចគ្នានេះ ក៏បានបំផ្លាញលំនៅឋានប្រជាពលរដ្ឋជាច្រើនខ្នងផ្សេងទៀត នៅឃុំចំនួន៤ ក្នុងស្រុកស្វាយចេក។ អាជ្ញាធរមូលដ្ឋានបានបញ្ជាក់ថា គ្រោះធម្មជាតិនោះបានធ្វើឲ្យមនុស្សម្នាក់រងរបួសដែរ៖ «ខូចខាតផ្ទះ ៤៩ខ្នង លើ ៤ឃុំ។ ឃុំតាបែន ឃុំស្លក្រាម ឃុំតាផូ និងឃុំទ្រាស របួសប្រជាពលរដ្ឋម្នាក់ វាចាប់តាំងពីម៉ោង ៦ និង ២០នាទី មានខ្យល់រលឹម និងមានរន្ទះ»។
នេះជាគ្រោះធម្មជាតិមេឃភ្លៀងមានខ្យល់បក់បោកដំបូងគេ នៅដើមឆ្នាំ២០១៣។ ប្រជាពលរដ្ឋជាច្រើនគ្រួសារនៅតាមភូមិឃុំក្នុងស្រុកថ្មពួក និងស្រុកស្វាយចេក កំពុងបាត់បង់ទីជម្រក។ ក្រុមអាជ្ញាធរបានធ្វើការប៉ាន់ប្រមាណថា ការខូចខាតមានតម្លៃជាច្រើនម៉ឺនដុល្លារ។ ក្រុមអ្នកភូមិរងគ្រោះ បានអំពាវនាវសុំរដ្ឋាភិបាលជួយក្នុងការសាងសង់លំនៅឋានឡើងវិញ៖ «ខ្យល់ព្យុះធំកួចផ្ទះខ្ញុំបាក់បែកអស់ហើយ សុំជួយខ្ញុំផង ខ្ញុំកំព្រា រកអីមិនបានទេ នៅក្នុងភូមិនេះបាក់អស់ឡើងជាង ១០០ខ្នង»។
ក្រុមអាជ្ញាធរមូលដ្ឋានបញ្ជាក់ថា លំនៅឋានរបស់អ្នកភូមិដែលខូចខាតនោះ ភាគច្រើនជាផ្ទះឈើប្រក់ស័ង្កសី។ លំនៅឋានខ្លះត្រូវខ្យល់បក់ប៉ើងដំបូល និងលំនៅឋានជាច្រើនទៀតត្រូវខ្យល់បក់បោកដួលរលំរាបដល់ដី ធ្វើឲ្យប្រជាពលរដ្ឋរាប់រយគ្រួសារបាត់បង់ទីជម្រក ដែលតម្រូវឲ្យមានកិច្ចអន្តរាគមន៍ជួយសង្គ្រោះជាបន្ទាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។