កម្មកររោងចក្រ២នាក់ស្លាប់ និងជាច្រើននាក់ទៀត រងរបួស ក្នុងហេតុការណ៍គ្រោះថ្នាក់ចរាចរណ៍ អំឡុងពេលធ្វើដំណើរទៅធ្វើការ នៅស្រុកកំពង់សីលា ខេត្តព្រះសីហនុ។ មន្ត្រីសង្គមស៊ីវិលថាហេតុការណ៍នេះ គឺជាក្ដីបារម្ភសម្រាប់កម្មកររោងចក្រជារៀងរាល់ថ្ងៃ ព្រោះពួកគាត់ ងាយប្រឈមហានិភ័យខ្ពស់ ខណៈដែលវិធានការកាត់បន្ថយហានិភ័យគ្រោះថ្នាក់ចរាចរណ៍ ពីសំណាក់រដ្ឋាភិបាល នៅពុំទាន់មានប្រសិទ្ធភាពនៅឡើយ។
យោងតាមបញ្ជាការដ្ឋានកងរាជអាវុធហត្ថ ខេត្តព្រះសីហនុ ដែលបានបង្ហោះព័ត៌មាននៅលើទំព័រហ្វេសប៊ុក កម្មករចំនួន២នាក់បានស្លាប់នៅកន្លែងកើតហេតុ និង២៥នាក់ទៀតរងរបួសធ្ងន់ និងស្រាល នៅថ្ងៃពុធ ទី២៨ សីហា ក្នុងហេតុការណ៍គ្រោះថ្នាក់ចរាចរណ៍មួយរវាងរថយន្តកុងតឺន័រ និងរថយន្តសាំយ៉ុងបុកគ្នា អំឡុងពេលដឹកកម្មកររោងចក្រទៅធ្វើការ។ ចំណែកកម្មករដែលរងរបួស កំពុងតែសម្រាកព្យាបាល នៅមន្ទីរពេទ្យបង្អែក ស្រុកស្រែអំបិល។
នៅក្នុងហេតុការណ៍គ្រោះថ្នាក់ចរាចរណ៍នេះ រថយន្តកុងតឺន័រ ដែលកំពុងដឹកទំនិញបានបើកមកបុកចំពីមុខរថយន្តសាំយ៉ុង ដែលកំពុងដឹកកម្មករបណ្ដាលឱ្យបែកផ្ទៃខាងមុខខ្ទេចខ្ទី ហើយអ្នកបើករថយន្តកុងតឺន័រ បានរត់គេចចេញពីកន្លែងកើតហេតុ។ ចំណែករថយន្តសាំយ៉ុងដែលដឹកកម្មករនេះ គេឃើញមានការកែច្នៃកៅអីតពីក្រោយ ដើម្បីដឹកកម្មករឱ្យបានច្រើនខុសស្តង់ដារផងដែរ។
អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) លោក អាត់ ធន់ ប្រាប់វិទ្យុអាស៊ីសេរី នៅថ្ងៃទី២៨ ខែសីហា ថា ហេតុការណ៍គ្រោះថ្នាក់ចរាចរណ៍ដែលបណ្ដាលឱ្យមានកម្មកររោងចក្រស្លាប់ និងរងរបួស កើតមានឡើងស្ទើរតែគ្រប់កន្លែងក្នុងរយៈពេល ប៉ុន្មានឆ្នាំចុងក្រោយនេះ។
លោកថា បច្ចុប្បន្ន កម្ពុជានៅតែបន្តមានរថយន្តដឹកកម្មករដែលពុំមានច្បាប់ ឬប័ណ្ណបើកបរត្រឹមត្រូវឡើយ។ ជាក់ស្ដែង លោកថា រថយន្តដឹកកម្មករភាគច្រើន ដឹកហួសកម្រិត ហើយរថយន្តទាំងនោះថែមទាំងកែច្នៃខុសស្តង់ដារ ដើម្បីដឹកមនុស្សឱ្យបានកាន់តែច្រើនទៀតផង។ លោកថា ករណីបែបនេះ ជាហានិភ័យខ្ពស់សម្រាប់កម្មករគ្រប់ពេលវេលា អំឡុងពេលធ្វើដំណើរទៅធ្វើការ និងពេលត្រឡប់មកវិញ។
លោក អាត់ ធន់៖ «ត្រូវតែឱ្យឡានដឹកកម្មករហ្នឹង មានបច្ចេកទេសត្រឹមត្រូវ ហើយ ឡានដែលកែច្នៃ ខុសបច្ចេកទេស គួរតែ កុំលើកទឹកចិត្ត គួរតែឱ្យមកជិះឡាន ក្រុង ឬឡានដែលមានបច្ចេកទេស ច្បាស់លាស់។ ទី២ ហាមដឹកហួសទម្ងន់ ព្រោះយើងដឹងហើយថា ការកែច្នៃ ខ្លះឡានតូចមួយ អាចថាដឹកត្រឹម១០នាក់ជាង តែគេ ច្នៃដឹកដល់៣០ ទៅ៤០នាក់ជាង»។
វិទ្យុអាស៊ីសេរី ពុំអាចទាក់ទងអ្នកនាំពាក្យកងរាជអាវុធហត្ថ ស្រុកកំពង់សីលា និងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក កក្តា អ៊ន ដើម្បីឆ្លើយតបជុំវិញរឿងនេះបានទេ នៅថ្ងៃទី២៨ ខែសីហា។
កាលពីឆ្នាំ២០២៣ រដ្ឋមន្ត្រីក្រសួងការងារ លោក ហេង សួរ បានថ្លែងនៅចំពោះមុខកម្មករជិត ២ម៉ឺននាក់ នៅខេត្តកំពង់ស្ពឺថា ក្រសួងបានសហការជាមួយភាគីពាក់ព័ន្ធដើម្បីគាំទ្រ និងលើកទឹកចិត្តឲ្យមានការផ្លាស់ប្ដូរជាបណ្ដើរៗ នូវមធ្យោបាយដឹកជញ្ជូនកម្មករនិយោជិត ឱ្យស្របតាមបទដ្ឋានបច្ចេកទេស និងមានផាសុកភាពជាងមុន ត្រឹមឆ្នាំ២០២៧។ លោកអះអាងទៀតថា ការធ្វើបែបនេះ ដើម្បីការពារសុវត្ថិភាពដល់កម្មករអំឡុងពេលធ្វើដំណើរ។
ទោះជាយ៉ាងណា លោក អាត់ ធន់ សង្កេតឃើញថា មកដល់បច្ចុប្បន្នពុំឃើញមានវិធានការ ណាមួយ របស់អាជ្ញាធរពាក់ព័ន្ធក្នុងការធានា ឬការពារសុវត្ថិភាព ជូនកម្មករនោះឡើយ។ ជាក់ស្ដែងទិដ្ឋភាពនៅខាងមុខរោងចក្រពេលកម្មករចេញពីធ្វើការ ក៏ពុំមានអាជ្ញាធរ ឬប៉ូលិសចរាចរណ៍ចាំសម្រួលចរាចរណ៍ដល់ពួកគាត់ដែរ។ ពោលគឺគេឃើញទិដ្ឋភាពកកស្ទះចរាចរណ៍ពេញដងផ្លូវ ហើយបញ្ហានេះក៏បណ្ដាលឱ្យកម្មករមួយចំនួនជួបគ្រោះថ្នាក់ផងដែរ នៅពេលពួកគាត់ធ្វើដំណើរឆ្លងផ្លូវ។
លោក អាត់ ធន់៖ «និយោជកគេថា លុយ៧ដុល្លារ ហ្នឹង ដែលគេថា ជាការចូលរួមចំណែក ប៉ុន្តែខាងកម្មករនិយោជិត គាត់ថា អាហ្នឹងវាមិនគ្រប់ទេ ព្រោះត្រូវបង់(ថ្លៃឡាន)ជិត១០ដុល្លារ ទៅ២០ ។ ចំណែករដ្ឋ ខ្ញុំមិនឃើញមានកម្មវិធីណាជួយទេ ក្រៅពីជំរុញ និងឱ្យនិយោជកផ្ដល់ថវិកា ហើយរដ្ឋគ្មានកម្មវិធីជាក់លាក់ណាមួយទេ»។
បើតាមក្រសួងការងារ គិតត្រឹមត្រីមាសទី១ ក្នុងឆ្នាំ២០២៤នេះ មានកម្មករ-និយោជិតជួបគ្រោះថ្នាក់ចរាចរណ៍ចំនួនជាង៩រយករណី (៩១៣) ដែលមានជនរងគ្រោះសរុបជាង ១ពាន់នាក់ (១.០៦៥) ក្នុងនោះស្លាប់ ៣៩នាក់ របួសធ្ងន់ស្រាលជាង១ពាន់នាក់ (១.០២៦)។ បើធៀបទៅនឹងត្រីមាសទី១ ឆ្នាំ២០២៣ មានការកើនឡើង៣៨ភាគរយ។
មន្ត្រីសង្គមស៊ីវិល ទទូចដល់អាជ្ញាធរ ឱ្យយកចិត្តទុកដាក់រឹតបន្តឹងការអនុវត្តច្បាប់ និងសហការជាមួយថៅកែរោងចក្រ ដើម្បីទប់ស្កាត់គ្រោះថ្នាក់ចរាចរណ៍ និងធានាដល់អាយុជីវិតរបស់ក្រុមកម្មករ ពីព្រោះពួកគាត់ក៏ជាមនុស្ស និងក៏ជាចំណែកមួយជំរុញឱ្យសេដ្ឋកិច្ចរីកលូតលាស់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។