ក្រុមសហជីពដែលអះអាងថា មានជំហរគាំទ្រ និងរកផលប្រយោជន៍ឲ្យកម្មករ ព្រមានថា នឹងធ្វើបាតុកម្មប្រឆាំងប្រាក់ខែគោលទាប ប្រសិនបើសេចក្ដីសម្រេចចុងក្រោយមួយដំណាក់កាលទៀតរបស់គណៈកម្មការក្រុមប្រឹក្សាការងារ នៅតែមិនអាចឆ្លើយតបដូចការទាមទាររបស់សហជីពចង់បាន។
ប្រតិកម្មរបស់ក្រុមសហជីពនៅពេលនេះ ធ្វើឡើងភ្លាមៗក្រោយពេលបិទបញ្ចប់នៃកិច្ចប្រជុំត្រីភាគី ដែលកិច្ចប្រជុំនេះ គឺដើម្បីស្វែងរកតួលេខរួមមួយ ក្នុងការឈានទៅកំណត់ប្រាក់ខែគោលអប្បបរមា សម្រាប់វិស័យវាយនភណ្ឌកាត់ដេរឆ្នាំ២០១៥។
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ថ្លែងក្រោយបិទបញ្ចប់កិច្ចប្រជុំនៅឯទីស្ដីការក្រសួងការងារ ថា ក្រុមសហជីពដែលតែងទាមទារផលប្រយោជន៍ឲ្យកម្មករ ពិតជាសោកស្ដាយ នៅពេលលទ្ធផលមិនដូចការរំពឹងទុក។ អ្នកស្រីបន្តថា បំណងរបស់ក្រុមសហជីពចង់បានប្រាក់ខែសម្រាប់កម្មករមិនត្រឹមតែ ១៤០ដុល្លារដូចក្នុងពេលចរចាទេ ប៉ុន្តែទាមទាររហូតដល់ ១៧៧ដុល្លារក្នុងមួយខែ។ អ្នកស្រីចាត់ទុកថា ដោយសារសហជីពមួយចំនួនដែលមិនមានភាពស្មោះត្រង់ ហេតុនេះទើបធ្វើឲ្យការចរចាត្រូវបរាជ័យ៖ «ដោយសារតែយើងខ្លាចបាត់បង់សំឡេងទៅ អ៊ិលអ៊ីស៊ី (LEC) ដល់អ៊ីចឹង ទីបំផុតខ្ញុំខ្លួនឯងត្រូវបានចាញ់ឆ្នោត។ ដោយសារគ្នាមួយចំនួនក្នុងនាមជាអ្នកសហជីពដូចគ្នា មិនបានបោះឆ្នោតគាំទ្រតួលេខមួយហ្នឹងទេ»។
បើទោះជា អ្នកស្រី យ៉ាង សុភ័ណ្ឌ មិនបានបញ្ជាក់ភ្លាមៗពីសហជីពដែលអ្នកស្រីអះអាងថា មិនមានភាពស្មោះត្រង់ក្នុងការចរចាក៏ដោយចុះ ក៏គេដឹងថា នោះគឺជាសហជីពរបស់ លោក ជួន មុំថុល និងសហជីពរបស់ លោក សោម អូន។
ជាលទ្ធផលនៃការបោះឆ្នោត ដែលជាការសម្រេចជ្រើសរើសចុងក្រោយ មុននឹងដាក់ឲ្យរដ្ឋមន្ត្រីក្រសួងការងារ ពិនិត្យ និងឆ្លងសេចក្ដីសម្រេចពីគណៈកម្មការប្រឹក្សាការងារ បង្ហាញថា អ្នកបោះឆ្នោតគាំទ្រឲ្យដំឡើងប្រាក់ខែ ១៤០ដុល្លារដូចការទាមទាររបស់សហជីព មានសំឡេងគាំទ្រ ៧ លើ ២៧។ បន្ទាប់មក សំឡេង ៩ លើ ២៧សំឡេង គាំទ្រដំឡើងត្រឹម ១២១ដុល្លារដូចការស្នើឡើងរបស់រដ្ឋាភិបាល។ ដោយឡែកសំឡេងឆ្នោត ៩ លើ ២៧ កំណត់ដំឡើងត្រឹម ១១០ដុល្លារដូចការទាមទាររបស់ភាគីរោងចក្រស្នើឡើង។ ក្រៅពីនោះមាន ២សំឡេងបោះអនុបវាទ។
លោក ប៉ាវ ស៊ីណា ប្រធានសម្ព័ន្ធចលនាកម្មករ ចាត់ទុកថា សំឡេងដែលអនុបវាទក្នុងការបោះឆ្នោតនោះ គឺជាសំឡេងចេញពីសហជីពទាំងពីរដែលមាននិន្នាការគាំទ្ររដ្ឋាភិបាល ដឹកនាំដោយ លោក ជួន មុំថុល និងលោក សោម អូន។ យ៉ាងណាក៏ដោយ លោកមានជំនឿចុងក្រោយទៅលើសេចក្ដីសម្រេចរបស់គណៈកម្មការប្រឹក្សាការងារ។
លោក ប៉ាវ ស៊ីណា ព្រមានថា បើសេចក្ដីសម្រេចនេះនៅតែតិចជាងអ្វីដែលសហជីពទាមទារ មិនដល់ ១៤០ដុល្លារ ឬថាតួលេខប្រហាក់ប្រហែលទេ នោះបាតុកម្មប្រឆាំងនឹងផ្ទុះឡើងជាថ្មីទៀត៖ «ខ្ញុំគិតថាគាត់ត្រូវតែពិចារណា ព្រោះថាខ្ញុំគិតថាវាគួរឲ្យមានរឿងកើតឡើងកាលពីឆ្នាំ២០១៣ ហ្នឹងទេ។ ពេលដែលយើងឃើញហេតុការណ៍ការតវ៉ាទ្រង់ទ្រាយធំទូទាំងប្រទេស ដោយសារការសម្រេចប្រាក់ឈ្នួលមួយដែលមិនតម្លាភាពដែលមិនសមរម្យ។ អ៊ីចឹងហើយរឿងនេះនឹងកើតឡើងទៀត បើសិនអ៊ិលអ៊ីស៊ី នៅតែដើរផ្លូវចាស់»។
វិទ្យុអាស៊ីសេរី ពុំអាចសុំការបំភ្លឺបានទេពី លោក ជួន មុំថុល និងលោក សោម អូន ដោយទូរស័ព្ទពុំអាចទាក់ទងបាន។
លោក ហេង សួរ អ្នកនាំពាក្យក្រសួងការងារ និងជាអ្នកដឹកនាំកិច្ចប្រជុំ ថ្លែងប្រាប់ក្រុមអ្នករាយការណ៍ព័ត៌មាន ក្រោយបិទបញ្ចប់កិច្ចពិគ្រោះយោបល់ថា មូលហេតុដែលរដ្ឋាភិបាលដាក់សំណើក្នុងការដំឡើងត្រឹម ១២១ដុល្លារក្នុងមួយខែនោះ ក៏ព្រោះតែរដ្ឋាភិបាលសម្រេចមិនយកពន្ធលើប្រាក់ខែកម្មករ និង ១០ភាគរយទៀតសម្រាប់ប្រាក់ថែទាំសុខភាព។ ហេតុនេះ លោកថ្លែងថា ប្រសិនបើកំណត់ចំនួន ១៤០ដុល្លារ ឬថាលើសនេះ ជាបន្ទុកនៃការបង់ពន្ធ គឺកម្មករផ្ទាល់។
ម្យ៉ាងវិញទៀត ប្រសិនបើដំឡើងតម្លៃនៃកម្លាំងពលកម្មខ្ពស់ដូចនេះ វានឹងប៉ះពាល់ដល់ការប្រកួតប្រជែងក្នុងវិស័យកាត់ដេរនៅកម្ពុជា៖ «រាជរដ្ឋាភិបាលសុខចិត្តថាឲ្យតួលេខ១២១នេះទាបតិចចុះ ប៉ុន្តែសុខចិត្តឲ្យមានគោលនយោបាយគាំពារសុខភាពគាត់ ដែលធ្វើឲ្យបងប្អូនកម្មករនិយោជិត មិនចាំបាច់ចំណាយ ១០ភាគរយនៃប្រាក់ឈ្នួលគាត់វិញ។ អ៊ីចឹងឧបមាថា ១៣៣ដុល្លារ ហើយគាត់បែរជាចំណាយសុខភាព ១០ភាគរយ មានន័យថា គាត់អស់ជាង ១០ដុល្លារ ដកទៅនៅសល់តែជាង ១២០ដដែល»។
កិច្ចប្រជុំត្រីភាគីដែលធ្វើឡើងដោយបិទទ្វារក្នុងរយៈពេល ៨ថ្ងៃមកនេះ ចាប់តាំងពីថ្ងៃទី២០ ខែតុលា មក គឺភាគីនីមួយៗនៅតែមិនទាន់អាចចុះសម្រុងគ្នាទៅលើតួលេខរួមមួយបាននៅឡើយ។ នៅចុងបញ្ចប់ ក្រុមសហជីពបានបង្ហាញជំហរប្រឆាំងលទ្ធផលឆ្នោត ហើយឥរិយាបថម្នាក់ៗហាក់ពើងទ្រូងដាក់គ្នា មិនដូចសម្ដីដែលបានលើកឡើងថា ហាក់យល់ចិត្តគ្នានោះសោះឡើយ។ ចំណែកទឹកមុខម្នាក់ៗវិញឡើងក្រហមនៅក្នុងបន្ទប់ប្រជុំ។
នៅទីចុងក្រោយ ស្ថានការណ៍ហាក់តានតឹងឡើងៗ ដោយសារខ្វែងគំនិតគ្នាកាន់តែខ្លាំងនៅក្នុងសន្និសីទកាសែត រហូតមិនអាចធ្វើឲ្យត្រីភាគីមានឱកាសថតរូបរួមគ្នាបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។