កាសែតវៀតណាម ឈ្មោះ ថាន់ ង្វៀន (Thanh Nien) បានស្រង់ខ្លឹមសារលិខិតរបស់មន្ទីរដឹកជញ្ជូនវៀតណាម ដែលលើកឡើងថា បញ្ហារថយន្តខ្មែរចូលទៅប្រទេសវៀតណាម នេះ ជាបញ្ហាបន្ទាន់មួយ ដែលតម្រូវឲ្យក្រសួងដឹកជញ្ជូនវៀតណាម ទប់ស្កាត់ឲ្យបានឆាប់បំផុត។
ឆ្លើយតបនឹងបញ្ហានេះ មន្ត្រីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ នៅថ្ងៃទី១៥ ឧសភា មានប្រសាសន៍ថា ការត្រៀមចាត់វិធានការចំពោះឡានខ្មែរចូលស្រុកវៀតណាម ឬទេសចរណ៍ខ្មែរចូលស្រុកវៀតណាម នេះ ជាសារមួយព្រមានរដ្ឋាភិបាលកម្ពុជា ឲ្យអនុវត្តច្បាប់អន្តោប្រវេសន៍ឲ្យមានប្រសិទ្ធភាព។
លោកបន្តថា មន្ត្រីបក្សកាន់អំណាចរាប់អានភាគីវៀតណាម ចាក់ទឹកមិនលិច រហូតភ្លេចគិតពីផលប្រយោជន៍ជាតិ ប៉ុន្តែវៀតណាមវិញ គេស្រឡាញ់ជាតិគេខ្លាំងណាស់។
មន្ទីរដឹកជញ្ជូនក្រុងហូជីមិញ សរសេរក្នុងលិខិតថា រថយន្តក្រុង និងរថយន្តទេសចរណ៍ទៅពីកម្ពុជា បានបង្កភាពអនាធិបតេយ្យ និងនាំមកនូវបញ្ហាមួយចំនួនទៀតផង។ លិខិតបន្តថា ឡានចូលពីកម្ពុជា បានជួញដូរប្រេងសាំងតាមរយៈការចាក់សាំងក្នុងរថយន្តឲ្យច្រើនលើសលប់ ដើម្បីយកសាំងមកលក់គេចពន្ធ។ រថយន្តទេសចរណ៍ដឹកភ្ញៀវទៅកម្សាន្តដោយស្រេចតែចិត្ត ដោយមិនមានអ្នកនាំភ្ញៀវត្រឹមត្រូវ ហើយរថយន្តទាំងនោះភាគច្រើនជញ្ជូនជនជាតិវៀតណាម យកមកឲ្យលេងល្បែងកាស៊ីណូ តាមព្រំដែនទៀត។
វិទ្យុអាស៊ីសេរី មិនអាចទាក់ទងមន្ត្រីក្រសួងសាធារណការ និងដឹកជញ្ជូន ដើម្បីឆ្លើយតបបានទេ នៅថ្ងៃទី១៥ ខែឧសភា ឆ្នាំ២០១៣។
ទោះយ៉ាងណាក្ដី អ្នកស្រាវជ្រាវឯករាជ្យ លោក កែម ឡី មានប្រសាសន៍ថា ជំនួញជួញសាំងគេចពន្ធពីប្រទេសវៀតណាម ត្រូវបានអ្នកជាយដែនធ្វើតាំងពីយូរមកហើយ តែអ្នកមិនមែនភាគីវៀតណាម ជាអ្នកខាតបង់ទេ។ លោកបន្តថា វៀតណាមអនុវត្តច្បាប់តឹងជាងកម្ពុជា ហើយគេមិនអនុញ្ញាតឲ្យជនកម្ពុជា ចូលវៀតណាម ដោយស្រួលៗនោះឡើយ។
កាលពីដើមខែមេសា ប្រទេសវៀតណាម ធ្លាប់ឃាត់មិនឲ្យលោក សឺន ស៊ូប៊ែរ្ដិ៍ ចូលទៅទឹកដីកំណើតកម្ពុជាក្រោមម្ដងរួចហើយ ហើយវៀតណាម ក៏ធ្លាប់ហាមឃាត់ការនាំបក្សីចូលពីកម្ពុជា ម្ដងជាពីរដងដែរ។ ប៉ុន្តែតាំងពីឆ្នាំ១៩៧៩ មក កម្ពុជាមិនធ្លាប់មានវិធានការណាមួយជាផ្លូវច្បាប់ចំពោះទំនិញ ឬជនអន្តោប្រវេសន៍ឆ្លងចូលកម្ពុជាដោយខុសច្បាប់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។