សង្គមស៊ីវិលសង្ស័យពីភាពមិនប្រក្រតីដែលឱ្យយុវតីបើករថយន្តបុកនិស្សិតដេកនៅពេទ្យរុស្សី
2019.04.09
អ្នកនាំពាក្យអគ្គនាយកដ្ឋានពន្ធនាគារឱ្យដឹងថា ជនជាប់ចោទដែលបើករថយន្តបុកនិស្សិតស្រីស្លាប់កាលពីខែមុននោះ ពិតជាត្រូវបានអនុញ្ញាតឱ្យចេញពីពន្ធនាគាររាជធានីភ្នំពេញ (PJ) ទៅដេកព្យាបាលជំងឺនៅមន្ទីរពេទ្យរុស្ស៊ីមែន។ សង្គមស៊ីវិល សង្ស័យពីភាពមិនប្រក្រតីចំពោះការអនុញ្ញាតងាយៗបែបនេះថា អាចគ្រាន់តែជាលេសព្រោះជនត្រូវចោទដែលគេដឹងថា មានលុយ មានអំណាចមួយចំនួនធំសុទ្ធតែដឹកចេញពីពន្ធនាគារទៅដេកនៅមន្ទីរពេទ្យធំៗរបស់រដ្ឋ។
អ្នកនាំពាក្យអគ្គនាយកដ្ឋានពន្ធនាគារលោក នុត សាវនា ប្រាប់អាស៊ីសេរីថា ជនជាប់ចោទ កញ្ញា យិន ឃុនម៉ី ហៅ យិន ម៉ាណា ត្រូវបានបញ្ជូនចេញពីពន្ធនាគាររាជធានីភ្នំពេញ ឬហៅថា ប៉េហ្ស៊ី(PJ)ទៅព្យាបាលជំងឺនៅមន្ទីរពេទ្យរុស្ស៊ី កាលពីយប់ថ្ងៃទី៨ ខែមេសា។ លោកមិនទាន់ដឹងថា ជនត្រូវចោទរូបនេះ នឹងត្រូវការពេលវេលាសម្រាកព្យាបាលយូរប៉ុណ្ណានោះទេ ព្រោះអាស្រ័យលើការព្យាបាលរបស់គ្រូពេទ្យ។ លោក នុត សាវនា បញ្ជាក់ថា ជនជាប់ចោទរូបនេះមានអាការៈជំងឺធ្ងន់ធ្ងរដូច្នេះចាំបាច់ត្រូវបញ្ជូនទៅព្យាបាលនៅមន្ទីរពេទ្យរុស្សី ព្រោះខាងពន្ធនាគារមានលទ្ធភាពព្យាបាលតែជំងឺស្រាលៗ ប៉ុន្តែខាងពន្ធនាគារក៏បានដាក់កម្លាំងយាមកាមចំពោះជនត្រូវចោទដែរ៖ «អាការៈគាត់ដូចជាល្ហិតល្ហៃ និងអស់កម្លាំង។ នេះគឺជាអ្វីដែលខាងពេទ្យពិនិត្យឃើញនិងខ្ញុំឃើញទិដ្ឋភាពជាក់ស្ដែង។ ឃើញសន្លប់ស្ដូកស្ដឹង និងដាក់អុកស៊ីសែនផង។ ទោះយ៉ាងណា ខ្ញុំគិតថា ដូចជាមិនធំដុំអីទេ ខ្ញុំគិតថាក្នុងរយៈពេលដ៏ខ្លីនេះ អាចធូរស្បើយ ហើយនិងបញ្ជូនទៅដាក់ឃុំឃាំងវិញ»។
កាលពីថ្ងៃទី២៩ ខែមីនា សាលាដំបូងរាជធានីភ្នំពេញបានចោទប្រកាន់កញ្ញា យិន ម៉ាណា ដែលជាអ្នកបើករថយន្តទំនើបទៅបុកនិស្សិតស្រីម្នាក់ឈ្មោះ ឌុំ រីដា បណ្ដាលឱ្យស្លាប់ភ្លាមៗកាលពីថ្ងៃទី២៦ ខែ មីនានោះ ពីបទបើកបរដោយធ្វេសប្រហែលបណ្ដាលឱ្យអ្នកដទៃស្លាប់ និងបាននាំទៅឃុំខ្លួននៅពន្ធនាគាររាជធានីភ្នំពេញ (PJ) ដើម្បីរង់ចាំបើកសវនាការ។
លោក នុត សាវនា លើកឡើងថា លោកមិនដឹងត្រូវឆ្លើយយ៉ាងម៉េចនោះទេ ចំពោះការរិះគន់ថាជន ជាប់ចោទដែលជាប់សែស្រឡាយ ឬមានលុយមានអំណាចភាគច្រើនទទួលបានការអនុញ្ញាតងាយៗឱ្យសម្រាកព្យាបាលនៅមន្ទីរពេទ្យដែលស្ថិតនៅខាងក្រៅពន្ធនាគារនោះ ព្រោះករណីទាំងនេះគឺជាការសម្រេចរបស់ព្រះរាជអាជ្ញា៖ «អ្នកធូរធារក៏ជាមនុស្សដូចគ្នា។ ដល់ពេលគេឈឺគេមានសំណើមានអីមកអ៊ីចឹង ហើយធ្វើម៉េចឥឡូវ។ បើគេឈឺត្រូវសង្គ្រោះបន្ទាន់ដូច្នេះយើងបញ្ជូនទៅតាមនឹងហើយខាងព្រះរាជអាជ្ញាគេអត់យល់ទាស់អីផងយើងធ្វើម៉េច។ បើព្រះរាជអាជ្ញាយល់ទាស់ យើងយកមកវិញ។ អាហ្នឹងអាស្រ័យលើព្រះរាជអាជ្ញាមិនមែនខាងខ្ញុំទេ»។
អាស៊ីសេរីមិនអាចសុំការបញ្ជាក់ពីប្រធានរដ្ឋបាលមន្ទីរពេទ្យមិត្តភាពខ្មែរសូវៀត ឬហៅថាមន្ទីរ ពេទ្យរុស្ស៊ីលោក ហេន រ៉ាម៉ានី បានទេ ដោយទូរស័ព្ទរបស់លោកមិនអាចទាក់ទងបាន បន្ទាប់ពីលោក សុំពេលពិនិត្យមើលសំណុំឯកសារនេះជាមុនសិន។
កញ្ញា យិន ម៉ាណា អាយុ ១៧ឆ្នាំ ត្រូវបានគេស្គាល់ថា គឺជាកូនស្រីរបស់សមាជិកក្រុមប្រឹក្សាខេត្ត សៀមរាប និងជាម្ចាស់សណ្ឋាគារមួយនៅខេត្តសៀមរាបឈ្មោះលោក យិន ហ្គិច។ ជនជាប់ចោទរូបនេះ ហាក់ព្យាយាមគេចពីការទទួលខុសត្រូវតាមផ្លូវច្បាប់ ប៉ុន្តែករណីនេះ ត្រូវបានមេដឹកនាំរបបក្រុងភ្នំពេញ លោក ហ៊ុន សែន ចេញមុខអន្តរាគមន៍ដោយបញ្ជាឱ្យសមត្ថកិច្ចតាមចាប់ខ្លួន ក្រោយពីអ្នកលែងហ្វេសប៊ុកបានបង្ហាញភស្តុតាងជាច្រើន និងបានទាមទារយុត្តិធម៌ជូនជនរងគ្រោះព្រមទាំងបញ្ចប់វប្បធម៌បុកហើយរត់ ឬវប្បធម៌និទ្ទណ្ឌភាព។
អ្នកនាំពាក្យសមាគមអាដហុក (Adhoc) លោក ស៊ឹង សែនករុណា លើកឡើងថា លោក ហាក់ដូចជាមានការសង្ស័យនៅពេលដែលជនជាប់ចោទដែលមានលុយមានអំណាចភាគច្រើនតែងតែទទួលបានការអនុញ្ញាតងាយៗឱ្យដេកព្យាបាលជំងឺនៅមន្ទីរពេទ្យធំៗរបស់រដ្ឋក្រោមហេតុផលថា មានជំងឺផ្សេងៗ ក្នុងនោះមិនមែនតែករណីកញ្ញា យិន ម៉ាណា នេះទេ។ ចំណែក អ្នកទោសនយោបាយនិងអ្នកទោសមនសិការផ្សេងៗ ដែលមានបញ្ហាសុខភាពធ្ងន់ធ្ងរដែរ មិនទទួលបានការអនុញ្ញាតឱ្យចេញព្យាបាលជំងឺនៅខាងមន្ទីរពេទ្យខាងក្រៅនោះទេ ទោះបីជាមានការស្នើសុំច្រើនដងក្ដី។ ជាក់ស្ដែងសកម្មជនបក្សប្រឆាំងលោក យ៉ា ថុង បានទទួលមរណភាពដោយសារមានជំងឺធ្ងន់ធ្ងរតាំងពីលោកនៅជាប់ពន្ធនាគារព្រៃស ហើយមិនទទួលបានការព្យាបាលនៅមន្ទីរពេទ្យខាងក្រៅ។ លោក ស៊ឹង សែនករុណា បន្តថា តាមគោលការណ៍ច្បាប់គឺអ្នកទោសគ្រប់រូបមានសិទ្ធិទទួលបានសេវាព្យាបាល។លោកស្នើសុំឱ្យអាជ្ញាធរអនុវត្តច្បាប់ឱ្យបានត្រឹមត្រូវ និងមានស្តង់ដារតែមួយដើម្បីកុំឱ្យសាធារណជនរិះគន់ និងបាត់ទំនុកចិត្ត៖ «ចំណុចទាំងអស់នេះដើម្បីឱ្យមានស្មើភាពគ្នា អនុវត្តច្បាប់ឱ្យបានត្រឹមត្រូវ គឺវាជារឿងមួយដ៏ល្អប្រសើរ ចំពោះប្រជាពលរដ្ឋទូទៅដោយកុំគិតថា វាជារឿង សម្រាប់អ្នកមានសម្រាប់អ្នកមានឋានៈផ្សេងៗគឺកុំគិតអ៊ីចឹង។ យើងគួរគិតឱ្យស្មើភាពគ្នាហើយធ្វើឡើងដោយភាពត្រឹមត្រូវកុំចេះតែលើកហេតុផលនេះ ដើម្បីគេចវេះនូវការទទួលទោសទណ្ឌកម្មផ្សេងៗហើយអាចធ្វើឱ្យវប្បធម៌នេះកើតឡើងអាចថា អ្នកដែលមានប្រាក់មានតួនាទីអត់ខ្លាចប្រព្រឹត្តនូវអំពើល្មើសច្បាប់អីទេ។ អ៊ីចឹងវាជះឥទ្ធិដល់សង្គមយើង»។
កន្លងមកមន្ទីរពេទ្យមិត្តភាពខ្មែរ-សូវៀតរងការចោទថា បានជួលបន្ទប់ទំនើបៗឱ្យពួកម៉ាហ្វីយ៉ា និងពួកឧក្រិដ្ឋជនសម្រាប់ដេកលំហែកាយក្រៅគុក។ អ្នកទោសដែលជាប់ឈ្មោះថា ចូលទៅស្នាក់នៅក្នុងបន្ទប់វីអាយភី (VIP) របស់មន្ទីរពេទ្យមិត្តភាពខ្មែរ-សូវៀតបានយ៉ាងស្រួល ដោយលើកហេតុផលដើម្បីសម្រាកព្យាបាលនោះមានដូចជា ឧកញ៉ា គិត ធាង ពាក់ព័ន្ធនឹងករណីជួញដូរគ្រឿងញៀន នៅក្លឹបកម្សាន្តរ៉ក (ROCK) ឧកញ៉ា ថោង សារ៉ាត់ ជាប់ពាក់ព័ន្ធករណីបាញ់សម្លាប់លោកឧកញ៉ា អ៊ឹង ម៉េងជឺ លោក ឈូក បណ្ឌិត អតីតទណ្ឌិត និងជាអតីតអភិបាលក្រុងបាវិត ដែលបាញ់បោះទៅលើក្រុមកម្មករ ឧកញ៉ា សុខ ប៊ុន ក្នុងសំណុំរឿងហិង្សាលើអតីតពិធីការិនីទូរទស្សន៍ និងឧកញ៉ា តាន់ សេងហាក់ ដែលជាប់ពាក់ព័ន្ធនឹងការជួញដូរគ្រឿងញៀនជាដើម។
មជ្ឈដ្ឋានទូទៅដាក់ការសង្ស័យថា ការទទួលបានសិទ្ធិពិសេសដើម្បីយកលេសទៅដេកសម្រាកព្យាបាលនៅមន្ទីរពេទ្យធំៗរបស់រដ្ឋនេះ គឺដោយសារតែអំពើពុករលួយរបស់មន្ត្រីអនុវត្តច្បាប់ ហើយករណីនេះ ប្រសិនបើគ្មានការដោះស្រាយ និងពង្រឹងការអនុវត្តច្បាប់ឱ្យបានត្រឹមត្រូវឡើងវិញទេ គឺនឹងជះឥទ្ធិពលអាក្រក់ដល់សង្គមជាពិសេសជនជាប់ចោទដែលជាមានលុយមានអំណាច លែងខ្លាចនិងគោរពច្បាប់តទៅទៀតហើយ៕