យុវជន​ខេត្ត​សៀមរាប​យល់​ថា ព្រឹត្តិការណ៍ GUMBALL 3000 ជួយ​ផ្សព្វផ្សាយ​ទេសចរណ៍​ក្នុង​តំបន់​អង្គរ​ទៅ​កាន់​ពិភពលោក

យុវជន​រស់​នៅ​ក្នុង​ខេត្ត​សៀមរាប​យល់​ថា ព្រឹត្តិការណ៍​ហ្គាំបល (GUMBALL 3000) អាច​ជា​ផ្នែក​មួយ ជួយ​ផ្សព្វផ្សាយ​ទេសចរណ៍​ក្នុង​តំបន់​អង្គរ​ទៅ​កាន់​ពិភព​លោក។

ក៏​ប៉ុន្តែ​អ្នក​ឃ្លាំមើល​យល់​ថា ព្រឹត្តិការណ៍​នេះ​មិន​ចំ​ទិសដៅ​ស្នូល​ ដើម្បី​ស្ដារ​វិស័យ​ទេសចរណ៍​ឱ្យ​ងើប​ឈរ​ឡើង​វិញ​នោះ​ឡើយ​ ប្រសិន​បើ​រដ្ឋាភិបាល​កម្ពុជា​នៅ​តែ​ពន្យារ​ពេល​មិន​ស្ដារ​ប្រជាធិបតេយ្យ។

ក្បួន​រថយន្ត​ទំនើប ៣ រយ​គ្រឿង​បាន​ធ្វើ​ដំណើរ​មក​ដល់​ទឹក​ដី​អង្គរ ខេត្ត​សៀមរាប​ហើយ​ នៅ​ល្ងាច​ថ្ងៃទី១៦ ខែកញ្ញា ក្នុង​ព្រឹត្តិការណ៍ ហ្គាំបល (GUMBALL 3000)។ រីឯ​អាជ្ញាធរ​ខេត្ត​សៀមរាប​បាន​បិទ​ផ្លូវ​សាធារណៈ​សំខាន់ៗ​មួយ​ចំនួន ដើម្បី​សម្រួល​ចរាចរណ៍ និង​រៀប​ចំ​សណ្ដាប់​ធ្នាប់ ក្នុង​ក្រុង ដោយ​មាន​ការ​ប្រគំ​តន្ត្រី​សម័យ​នៅ​សួន​ច្បារ​ខាង​មុខ​ព្រះ​រាជ​ដំណាក់ និង​ពិធី​តាំង​ពិព័រណ៍​ជាដើម។

យុវជន​រស់​នៅ​ខេត្ត​សៀមរាប លោក សៀ តាំងឡេង ប្រាប់​វិទ្យុ​អាស៊ីសេរី ថា ព្រឹត្តិការណ៍​នេះ​អាចរួម​ចំណែក​ផ្សព្វផ្សាយ​វិស័យ​ទេសចរណ៍​នៅ​កម្ពុជា ទៅ​កាន់​ពិភពលោក​កាន់​តែ​ទូលំទូលាយ ព្រោះ​អ្នក​ចូលរួម​ភាគ​ច្រើន ជា​អ្នក​វិនិយោគ សហគ្រិន តារា​ល្បីៗ និង​អ្នក​មាន​ឥទ្ធិពល​ (Influencers) លើ​ពិភព​លោក។

លោក សៀ តាំងឡេង៖ «ខ្ញុំ​គិត​ថា​ព្រឹត្តិការណ៍​នេះ​មាន​ការ​ចូលរួម​ច្រើន​ពី​សំណាក់​អ្នក​មាន​ឥទ្ធិពល​នៅ​លើ​ពិភពលោក និង​មហាសេដ្ឋី​នានា​នៅ​ទូទាំង​ពិភព​លោក​ តាមរយៈ​ការ​ចូលរួម​របស់​ពួកគាត់​ គឺ​អាច​ធ្វើ​ឲ្យ​ឥទ្ធិពល​របស់​ប្រទេស​កម្ពុជា​យើង​កាន់​តែ​មាន​កេរ្តិ៍​ឈ្មោះ​ល្អ ហើយ​ហើយ​មាន​ភាព​ល្បី​សុះសាយ​នៅ​ទូទាំង​ពិភពលោក​ផង​ដែរ»។

រីឯ​យុវជន​ម្នាក់​ទៀត​ កញ្ញា សឹង សំអូនណារី យល់​ថា ព្រឹត្តិការណ៍​នេះ​ នឹង​ធ្វើ​ឱ្យ​ខេត្ត​សៀមរាប​មាន​ភាព​អ៊ូអរ​ខ្លះ​ដែរ  ដែល​ជា​ផ្នែក​មួយ​ជួយ​ស្ដារ​សេដ្ឋកិច្ច​ខេត្ត​នេះ​បាន​ខ្លះ ក្នុង​រយៈ​ពេល​ខ្លី។

លោក សឹង សំអូនណារី៖ «វា​ល្អ​ដោយ​សារ​តែ​វា​ទាក់​ទាញ​ភ្ញៀវ​ទេសចរណ៍​ ហើយ​ជួយ​ធ្វើ​ឲ្យ​ប្រទេស​យើង​ល្អ​ជាង​មុន ឯ​អ្នក​លក់​នៅ​លើ​ផ្លូវ ឬ តាម​ដង​ផ្លូវ​គឺ​អាច​មាន​ភ្ញៀវ​ទេសចរណ៍​ទិញ​ច្រើន និង​ប្រសើរ​ជាង​មុន»។

ព្រឹត្តិការណ៍​ហ្គាំបល Gumball 3000 ប្រមូល​ផ្តុំ​ដោយ​រថយន្ត​ទំនើប​ល្បី​ល្បាញ​លំដាប់​ពិភពលោក កាល​ពី​ឆ្នាំ​២០២៣ ព្រឹត្តិការណ៍​នេះ ប្រារព្ធ​ឡើង​នៅ​ទ្វីប​អឺរ៉ុប​ដែល​មាន​រថយន្ត​ទំនើប ជាង ១​រយ​គ្រឿង បាន​ធ្វើ​ដំណើរ​លើ​ចម្ងាយ​ផ្លូវ ៣ពាន់​ម៉ាល (mile) ឬ​ជិត ៥ពាន់ (៥.០០០) គីឡូម៉ែត្រ ក្នុង​រយៈ​ពេល ៦ថ្ងៃ ចាប់​ពី​ប្រទេស​ស្កុតលែន (Scotland) អង់គ្លេស (England) ហូឡង់ (Netherlands) ស្វីស (Switzerland) អ៊ីតាលី (Italy) និង​ហុងគ្រី (Hungary)។

អ្នក​ចូល​រួម​ក្នុង​កម្មវិធី​នេះ​បាន​ចំណាយ​ថវិកា ចាយ​វាយ​ក្នុង​ម្នាក់ៗ​ចន្លោះ​ពី ៥​ម៉ឺន​ដុល្លារ (៥០.០០០) ដល់ ៨ម៉ឺន ៥​ពាន់​ដុល្លារ (៨៥.០០០) អាមេរិក។

ចំណែក យុវជន​ម្នាក់​ទៀត កញ្ញា ឆប រក្សា យល់​ថា ពលរដ្ឋ​ខេត្ត​សៀមរាប​អាច​នឹង​ទទួល​បាន​ចំណូល​ពី​កម្ម​វិធី​នេះ តាម​រយៈ​វិស័យ​ទេសចរណ៍។

លោក ឆប រក្សា៖ «ខ្ញុំ​យល់​ឃើញ​ថា​ការ​បង្ហាញ​ហ្កាំបល 3000នឹង​ល្អ ព្រោះ​អី​ជួយ​ដល់​សង្គម​យើង ឲ្យ​មាន​សេដ្ឋកិច្ច​ និង​ជំរុញ​ទេសចរណ៍​ឲ្យ​មក​លេង​សៀមរាប​យើង​បាន​ច្រើន»។

វិទ្យុ​អាស៊ី​សេរី​មិន​ទាន់​អាច​ទាក់ទង​សុំ​ការ​អធិប្បាយ​បន្ថែម​ជុំ​វិញ​រឿង​នេះ​ ពី​អ្នក​នាំ​ពាក្យ​ក្រសួង​ទេសចរណ៍ លោក តុប សុភ័គ បាន​នៅ​ឡើយ​ទេ​នៅ​ថ្ងៃ​ទី១៦ កញ្ញា។

ក្រសួង​ទេសចរ​ឱ្យ​ដឹង​ថា ព្រឹត្តិការណ៍​នេះ​មាន​ការ​តាំង​បង្ហាញ​រថយន្ត​ និង​ការ​ប្រគំ​តន្ត្រី​ខ្នាត​យក្ស​លំដាប់​អន្តរជាតិ​ដោយ​មានការ​ចូលរួម​ពី​ប្រតិភូ​ហ្គាំបល Gumball 3000 Rally ខ្លះ​ជា​មហា​សេដ្ឋី​ អ្នក​មាន​ឥទ្ធិពល កីឡាករ និង​តារា​ចម្រៀង​ល្បីៗ​ជា​ច្រើន​រូប។

តែ​ទោះ​ជា​យ៉ាង​ណា អ្នក​ឃ្លាំ​មើល​សង្គម និង​សិទ្ធិ​មនុស្ស ចាត់​ទុក​ថា​ ព្រឹត្តិការណ៍​នេះ​នឹង​មិន​អាច​ស្រូប​ទាញ​ភ្ញៀវ​ទេសចរ​ឱ្យ​បាន​ទូលំទូលាយ​នោះ​ឡើយ ប្រសិន​បើ​រដ្ឋាភិបាល​ នៅតែ​មានៈ​មិន​ស្តារ​ប្រជាធិបតេយ្យ​ឡើង​វិញ​ទេ។

អ្នក​ឃ្លាំ​មើល​បញ្ហា​សិទ្ធិមនុស្ស និង​សង្គម លោក ស៊ឹង សែនករុណា យល់ថា មធ្យោបាយ​ទាក់ទាញ​ភ្ញៀវ​ទេសចរ​រយៈ​ពេល​យូរ រដ្ឋាភិបាល​ត្រូវ​កែ​លម្អ​ផ្ទៃ​ក្នុង​កម្ពុជា រួមមាន​ បញ្ហា​អសន្តិ​សង្គម អំពើ​ចោរ​រកម្ម ការ​រំលោភ​សិទ្ធិ​មនុស្ស ការ​ធ្លាក់​ចុះ​ប្រជាធិបតេយ្យ​ និង​អំពើ​ពុក​រលួយ​ជាដើម។

លោក សឹង សែនករុណា៖ «រឿង​រថយន្ត រឿង​ទំនើប​ រឿង​តារា​អី​នេះ​វា​នៅ​ប្រទេស​គេ​ជឿន​លឿន តែ​បើ​យើង​មើល​ពី​ទិដ្ឋភាព​នៅ​ប្រទេស​យើង​ នៅ​ក្នុង​ប្រទេស​កម្ពុជា​យើង​ប្រទេស​យើង​កំពុង​តែ​រង​ទុក្ខ ដំណាំ​ក៏​រឿង​ស្ងួត​លក់​មិន​បាន​ថ្លៃ ប្រជាជន​ចំណាក​ស្រុក​ផង​ ឈប់​បំណុល​ផង ហើយ​យើង​ទៅ​សម្ញែង​រថយន្ត​ទំនើបៗ​បែប​ហ្នឹង​ខ្ញុំ​យល់​ថា​ វា​ជា​រឿង​មួយ​ដែល​មិន​សម​ទេ​ដែល​ឲ្យ​ប្រជា​ពលរដ្ឋ​កម្ពុជា​បាន​ឃើញ»។

ព្រឹត្តិការណ៍ ហ្គាំបល ៣០០០នេះ គេ​សង្កេត​ឃើញ​ថា​អ្នក​ចូលរួម ភាគ​ច្រើន​ជា​ជនជាតិ​ខ្មែរ​ ដែល​ជា​កូន​មន្ត្រី​ជាន់​ខ្ពស់​រដ្ឋាភិបាល សាច់​ញាតិ​ក្រុម​ឧកញ៉ា និង​អ្នក​មាន​លុយ​មាន​អំណាច​ ហើយ​មាន​ជន​បរទេស​តិច​តួច​ប៉ុណ្ណោះ។

ព្រឹត្តិការណ៍​ជួបជុំ​ឡាន​អន្តរជាតិ ហ្គាំបល ៣០០០ លើក​ទី​២៥ (2024 Gumball 3000 Rally) នឹង​ធ្វើ​ឡើង​នៅ​តំបន់​អាស៊ី ដែល​ចេញ​ដំណើរ​ពី​ទីក្រុង​ហូជីមិញ (Ho Chi Minh) ប្រទេស​វៀតណាម (Vietnam) ឆ្លង​កាត់​រាជ​ធានី​ភ្នំពេញ និង​ខេត្ត​សៀមរាប​ ហើយ​បន្ត​ដំណើរ​ទៅ​ទី​ក្រុង​បាងកក (Bangkok)ប្រទេស​ថៃ (Thailand) រួច​ឆ្ពោះ​ទៅ​ទីក្រុង​កូឡាឡាំពួរ (Kuala Lumpur) ប្រទេស​ម៉ាឡេស៊ី (Malaysia) ហើយ​គោលដៅ​ចុង​ក្រោយ​នៅ​ប្រទេស​សិង្ហបុរី (Singapore) ក្នុង​រយៈ​ពេល​៦ថ្ងៃ ចាប់​ពី​ថ្ងៃ​ទី១៤ ដល់​ថ្ងៃ​ទី​២២ ខែ​កញ្ញា៕

សម្រាប់​លោកអ្នកនាងកញ្ញា ដែលអានអត្ថបទ​ទាក់ទង​រឿង​នេះ​ជា​ភាសា​អង់គ្លេស សូម​ចុច​លើ​ចំណងជើង​នេះ៖ ​Angkor temple complex plays host to international luxury car rally

Some 130 luxury cars were on display at Cambodia’s Angkor temple complex on Tuesday for the Gumball 3000 – an international car rally that raises money for charity by showcasing iconic vehicles at scenic sites.